मुख्यमंत्री-समीक्षा
मुख्यमंत्री भूपेश बघेल ह प्रदेस म जमीन के सीमांकन, नामांतरण अउ बंटवारा के मामला मन ल तेजी ले निपटाय खातिर सरलग सिविर लगाय के निरदेस दीन हे। ए संबंध म मुख्यमंत्री ह अधिकारी मनके बइठका लेके आने-आने विभाग मनके कार्य के समीक्षा करीन। इही दउरान श्री बघेल ह स्कूल मन म बनइया अस्थाई जाति प्रमाण पत्र मनके बारे म घलो जानकारी लीन। ओमन राजस्व विभाग के अधिकारी मन ल निरदेस दीन कि अस्थायी जाति प्रमाण पत्र मन ल तय करे गे समय-सीमा के भीतर स्थायी करे के व्यवस्था करे जाय। मुख्यमंत्री ह अधिकारी मन ल रासन कार्ड बने के बाद भी एमा छूटे लोगन मनके नाव जोड़े खातिर अउ नवा रासन कार्ड बनाय के निरदेस दीन।
जाति प्रमाण पत्र
प्रदेस के जम्मों राजस्व अउ तहसील कार्यालय मन म राज्य के प्रकासित अनुसूचित जाति अउ जनजाति के अंग्रेजी म अधिसूचित जाति नाव मनके सूची जरूरी रूप ले चपकाय जाही, जेखर ले आवेदनकर्ता अउ आमजन मन ल एला लेके होवइया भ्रांति खतम हो सकय। एखर बर जम्मों अनुविभागीय अधिकारी अउ तहसीलदार मन ल सामान्य प्रसासन विभाग डहार ले निरदेस दे गे हवय, जेमा केहे गे हवय कि अनुसूचित जाति अउ जनजाति वर्ग के मनखे मन ल जारी होवइया जाति प्रमाण पत्र मन म भारत सरकार डहार ले प्रकासित छत्तीसगढ़ राज्य के ‘‘अंग्रेजी‘‘ म अधिसूचित जाति के उल्लेख करे जाय।
मुख्यमंत्री-भेंट-मुलाकात
प्रदेसव्यापी भेंट-मुलाकात कारीकरम के दउरान मुख्यमंत्री भूपेश बघेल ह आज कोंडागांव म सी-मार्ट के उद्घाटन करीन। ए मार्ट म बिहान के तहत माईलोगिन मन डहार ले बनइया आने-आने उत्पाद मनके संगेसंग कोदो-कुटकी जइसन लोकल उत्पाद के बिक्री घलो करे जाही। ए मउका म मुख्यमंत्री के उपस्थिति म कोंडागांव जिला प्रसासन अउ नेचर एस्केप के बीच बांस ले आने-आने सामग्री बनाय खातिर, आर्टिजन रिसोर्स सेंटर बनाय खातिर अउ उपयोगी शिल्प वाला कलाकृति बनाय खातिर प्रसिक्षण दे बर समझौता पत्र म हस्ताक्षर घलो होईस।
प्रवास के दउरान मुख्यमंत्री ह केशकाल विधानसभा स्थित बड़ेडोंगर के विकास खातिर अब्बड़ अकन घोसना घलो करीन हे, जउन म प्राथमिक स्वास्थ्य केन्द्र ल सामुदायिक स्वास्थ्य केन्द्र बनाय खातिर, जिला सहकारी बैंक के साखा खोले जाय अउ फरगांव के कोनगुड़ म स्वामी आत्मानंद अंग्रेजी माध्यम स्कूल खोले जाना सामिल हवय।
एखर पहिली, मुख्यमंत्री ह काली कोंडगांव म राखे गे आदिवासी समाज सम्मेलन म सामिल होय रिहीन। ए मउका म ओमन कोंडागांव म आदिवासी विश्राम गृह, कोल्ड स्टोरेज, आदिवासी वाद्ययंत्र निर्माण केन्द्र अउ नशामुक्ति केन्द्र बनाय के घोसना घलो करीन।
मुख्यमंत्री-प्रेसवार्ता
मुख्यमंत्री भूपेश बघेल ह किहीन हे कि बस्तर बदलत हवय अउ विकास के गति पहिली ले तेज होय हे। ओमन किहीन कि बस्तर म बैंक मनके मांग बाढ़े हवय, जउन ह बड़ सुघ्घर संकेत हवय। श्री बघेल ह दावा करीन कि राज्य सरकार बस्तर क्षेत्र म विश्वास, विकास अउ सुरक्षा खातिर प्राथमिकता के संग काम करत हवय, जेखर ले माओवादी मन पाछु हटत हवय। ए बात मुख्यमंत्री ह अपन कोंडागांव प्रवास के दउरान एक ठिन पत्रकारवार्ता म किहीन। ओमन किहीन कि आदिवासी मन ल वन संसाधन के फायदा अउ वनाधिकार पट्टा दे जावत हे। मुख्यमंत्री ह यहू बात किहीन कि बस्तर क्षेत्र म जादा ले जादा फलदार पौधा लगाय जाही अउ संगेसंग फलदार पेड़ मनके कटाई घलो रोके जाही।
मन की बात
प्रधानमंत्री नरेन्द्र मोदी काली बिहनिया 11 बजे आकाशवाणी ले ‘‘मन की बात‘‘ कारीकरम म अपन विचार साझा करहीं। ए कारीकरम के प्रसारण आकाशवाणी अउ दूरदर्शन के जम्मों चैनल ले करे जाही। ए प्रसारण आकाशवाणी समाचार के वेबसाइट, न्यूज ऑन एआईआर मोबाइल ऐप, आकाशवाणी, दूरदर्शन, प्रधानमंत्री कार्यालय अउ सूचना प्रसारण मंत्रालय के यूट्यूब के चैनल म देखे-सुने जा सकही। प्रधानमंत्री ह किहीन कि ओमन ल मन की बात कारीकरम खातिर अब्बड़ अकन सुझाव मिले हवय। ओमन ए बात म घलो खुसी जतावत किहीन कि कारीकरम बर बड़ संख्या म युवा मन घलो अपन विचार साझा करे हवय।
राष्ट्रीय अवॉर्ड
आत्मनिर्भर भारत समिट म छत्तीसगढ़ ल डिजिटल गवर्नेंस खातिर एलेट्स इनोवेशन अवॉर्ड ले सम्मानित करे हे। नई दिल्ली म आयोजित समारोह म समाज कल्याण विभाग ल ए अवॉर्ड ‘एनजीओ पंजीकरण ल कम्प्यूटरीकृत करे अउ मान्यता अउ अनुदान‘‘ के प्रक्रिया ऑनलाइन करे खातिर दे गे हवय। इलेट्स टेक्नो इंडिया के सीईओ डॉक्टर रवि गुप्ता ह ए अवॉर्ड राज्य के समाज कल्याण विभाग के संचालक पी. दयानंद ल प्रदान करीन।
मुख्यमंत्री भूपेश बघेल अउ समाज कल्याण मंत्री अनिला भेंड़िया ह ए उपलब्धि म समाज कल्याण विभाग ल अपन सुभकामना दीन हवय।
जनमिलिशिया सदस्य-गिरफ्तार
बीजापुर जिला म सुरक्षा बल मन ह 4 झिन जनमिलिशिया सदस्य मन ल गिरफ्तार करे हे। एखर पास ले टिफिन बम, आईईडी अउ डेटोनेटर समेत आने-आने सामान बरामद करे गे हवय। माओवादी विरोधी अभियान के तहत डीआरजी अउ केन्द्रीय रिजर्व पुलिस बल के संयुक्त टीम बेलनार डहार सर्चिंग खातिर निकले रिहीस। इही दउरान सुरक्षा बल मन ल देखके कुछु संदिग्ध लोगन मन ह भागे के कोसिस करीन, जेखर बाद सुरक्षा बल मन ह इलाका म घेराबंदी कर ओमन ल गिरफ्तार कर लीन।
यूजीसी-संयुक्त परीक्षा
विश्वविद्यालय अनुदान आयोग ह देसभर म जम्मों स्नातक पाठ्यक्रम मन म दाखिला खातिर संयुक्त परीक्षा के आवेदन जमा करे के आखिरी तारीख बाईस मई ले बढ़ाके इकतीस मई कर दे हवय। यूजीसी के अध्यक्ष प्रोफेसर एम. जगदीश कुमार ह किहीन कि ए निर्णय छात्र मन ले मिले निवेदन के बाद ले गे हवय। साढ़े तीन घंटा के कम्प्यूटर आधारित प्रवेस परीक्षा दू ठिन पाली म ले जाही।
जिले की चिट्ठी
आकाशवाणी समाचार डहार ले काली संझा 6 बजके 30 मिनट म ‘‘जिले के चिट्ठी‘‘ कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संघरा रिले करही। ए बखत के अंक म ‘‘नारायणपुर‘‘ जिला के गतिविधि मनके बारे म जानकारी दे जाही।
बातों-बातों-में
प्रादेशिक समाचार एकांश डहार ले समसामयिक विषय म आधारित हमर साप्ताहिक कारीकरम ‘‘बातों-बातों-में‘‘ ह ए बखत जांजगीर-चांपा जिला के बहेराडीह गांव म खेती करे खातिर नवाचार ल बढ़ावा दे बर स्थापित करे गे किसान स्कूल उपर केन्द्रित रइही। ए कार्यक्रम के तहत बहेराडीह गांव म आने-आने किसान मनके संग मिलजुल के ए स्कूल के स्थापना करइया प्रगतिशील किसान दीनदयाल यादव डहार ले, ले गीस भेंटवार्ता के प्रसारण करे जाही। एखर प्रसारण आकाशवाणी के रईपुर केन्द्र डहार ले काली बिहनिया 9 बजके 30 मिनट म करे जाही, जेला छत्तीसगढ़ के जम्मों आकाशवाणी केन्द्र मन ह एके संघरा रिले करही।
मौसम
प्रदेस म काली एक-दू जघा म गरज-चमक के संग अंधड़ चले के चेतावनी दे गे हवय। संगेसंग कुछु जघा मन म हल्का बरसा होय अउ गरज-चमक के संग बूंदाबांदी होय के संभावना हवय।
मौसम विभाग के अनुसार एक ऊपरी हवा के चक्रीय चक्रवाती घेरा उत्तर ओड़िसा के उपर सक्रिय हवय अउ राज्य म उत्तर-पश्चिम डहार ले हवा आवत हवय, जेखर असर ले राज्य के मौसम म बदलाव देखे जावत हे।