मुख्यमंत्री भूपेश बघेल ह पानी के बाढ़त उपयोगिता ल देखत एला सहेजे के आवश्कता उपर जोर दीन। ओमन कीहिन कि वनक्षेत्र म नरवा-नाला म स्टॉप डेम के विकास जरूरी हे। ए बात ओमन ह आज जगदलपुर म आयोजित अधिकारी मनके समीक्षा बइठका म कीहिन।
श्री बघेल ह कीहिन कि नदी नाला म जल के स्तर कम होगे हे। एखर सेती हमन ल प्राथमिकता के संग जल संरक्षण के काम करना होही। मुख्यमंत्री ह वनक्षेत्र म नरवा के काम के मॉनिटरिंग कलेक्टर ल करे बर कीहिन। ओमन कहिन कि जमीन अउ वन के वास्तविक स्वामी आदिवासी हरय। वन विभाग के जिम्मेदारी प्रबंधक के हरय। श्री बघेल ह कहिन कि पाछू साढ़े तीन साल म माओवादी गतिविधि कम होय हे। ओमन कीहिन कि ग्रामीण मन ल काम मिलही तब माओवादी भर्ती बंद होही अउ ओमन अपन आप सिमट जाही।
मुख्यमंत्री ह अधिकारी मनले कहिन कि लोगन ल रोजगार ले जोड़के ओला कृषि काम म जोड़े जाय। संगेसंग वनोपज संग्रहण अउ वनोपज के वेल्यू एडिशन घलो करे जाय। जेखर ले लोगन ह प्रोत्साहित होही। एखर संग स्थानीय किसान मन ल तिलहन फसल लगाय बर प्रेरित करे जाय।
मुख्यमंत्री भूपेश बघेल ह आज जगदलपुर के महारानी अस्पताल म तीन करोड़ रूपिया के लागत ले बने बर्न यूनिट अउ दू करोड़ के डी-एडिकक्सन यूनिट के लोकार्पण करीन। ए मउका म ओमन ह अस्पताल के नवलोकार्पित वार्ड संग मैटरनिटी वार्ड , हमर लैब अउ ब्लड बैंक के निरीक्षण करके ब्लड यूनिट कलेक्शन के जानकारी लीन। ए दउरान ओमन ह मातृ शिशु स्वास्थ्य संस्थान कांदम्बिनी म शिशुवती माता ले भेंट करीन।
मुख्यमंत्री ह स्वामी आत्मानंद इंग्लिश मीडियम स्कूल जगदलपुर म चार करोड़ रूपिया ले जादा के लागत ले नवीन माध्यमिक विद्यालय भवन अउ दू करोड़ आठ लाख रूपिया के लागत ले स्कूल परिसर म आने-आने निर्माण कार्य के लोकार्पण करीन। उंहें श्री बघेल ह कोंडागांव जिला के ग्राम माकड़ी म आत्मानंद अंग्रेजी माध्यम स्कूल के नवा भवन के लोकार्पण करीन।
एखर पहिली मुख्यमंत्री काली भेंट-मुलाकात कार्यक्रम के दउरान जगदलपुर म आयोजित आदिवासी सम्मेलन म शामिल होइन। ए मउका म ओमन ह राष्ट्रीय आदिवासी महोत्सव के तर्ज म बस्तर म हर साल राष्ट्रीय आदिवासी संगीत महोत्सव के आयोजन करे के घोषणा करीन। संगेसग ओमन बादल ल खैरागढ़ संगीत विश्वविद्यालय के अधीन महाविद्यालय के दर्जा दे अउ इंहा सांस्कृतिक कार्यक्रम बर राशि ल बढ़ाके एक करोड़ रूपिया करे के घोषणा करीन। ओमन ह आदिवासी छात्र-छात्रा मन ल प्रतियोगी परीक्षा के तैयारी बर ज्ञानगुड़ी म एक सौ पचास सीटर हॉस्टल निर्माण बर राशि स्वीकृत करीन। संगेसंग भतरासमाज ल भवन निर्माण बर चार एकड़ जमीन अउ एक करोड़ रूपिया देके घलो बात कीहिन।
प्रदेश के पूर्व मंत्री बृजमोहन अग्रवाल ह हसदेव अभ्यारण्य मामला म राज्य सरकार ले हस्तक्षेप करके तत्काल माइनिंग उपर रोक लगाय के मांग करे हे। श्री अग्रवाल ह कीहिन कि हसदेव अभ्यारण्य ल बचाये बर आदिवासी सरलग आंदोल न करत हे। उंहें ए मुद्दा उपर राज्य सरकार जनता ल गुमराह करे के कोशिश करत हे। ओमन कीहिन कि केंद्र के अनुमति के बाद जब तक राज्य सरकार अनुमति नइ दीही तब तक माइनिंग के काम शुरू नइ हो सकय। श्री अग्रवाल ह कीहिन कि राज्य सरकार चाही त माइनिंग ल रोक सकथे।
खबर के मुताबिक हसदेव अभ्यारण्य के परसकोल ब्लॉक म खनन के अनुमति देके लगातार विरोध होवत हे।
राजनांदगांव म आज भारतीय जनता पार्टी किसान मोर्चा के बइठका होइस। बइठका म राज्य सरकार उपर किसान विरोधी नीति अपनाय के आरोप लगात आंदोलन के रूपरेखा तय करे गेहे। बइठका म किसान मोर्चा ह अवइया तीन महीना के कार्य योजना तैयार करीन।
एखर अनुसार प्रत्येक मंडल म किसान मन संग विचार विमर्श करे जाही। बइठका म निर्णय ले गेहे कि ग्राम स्तर म किसान मनके समस्या के निराकरण बर सरकार उपर दबाव बनाये जाही। उंहें मोर्चा डहार ले टिफिन योजना के शुरूआत करे गीस। एखर तहत सबो कार्यकर्ता टिफिन ले जाके किसान मन संग भोजन करही अउ ओखर समस्या ल लेके चर्चा करही।
बरसात के पानी ल सहेजे के उद्देश्य ले शुरू करे गे मिशन अमृत सरोवर के तहत मनरेगा के माध्यम ले सबो जिला म कम ले कम पचहत्तर तरिया बनाये अउ तरिया ल सुधारे के काम करे जात हे। ए तालाब मन ल जनभागीदारी ले धरोहर के रूप म विकसित करे जाही। हरएक सरोवर के रख रखाव बर उपभोक्ता समूह के गठन करे जाही। ए समूह सरोवर के निर्माण के अवधारणा ल लेके ओखर पूरा होय अउ बाद म ओखर उपयोग तक परियोजना ले जुड़े रीही।
राज्य के मनरेगा आयुक्त मोहम्मद कैसर अब्दुक हक ह बताइन कि मिशन अमृत सरोवर म जन भागीदारी अउ संपूर्ण प्रक्रिया के दस्तावेजीकरण बर अतिरिक्त दिशा निर्देश जारी करे गेहे।
धमतरी जिला के कानीडबरी अउ कोलियारी म बीते संझा खेत म आगी लगे ले करीबन पचास एकड़ के पराली जलके खाक होगे। पराली ले दू किलोमीटर म फैले आगी उपर फायर ब्रिगेड के टीम ह नौ घंटा के मशक्कत के बाद काबू पाइन। ए दउरान कतकोन किसान के सिंचाई पंप के केबल अउ आने सामान जल गे जेखर ले किसान मन ल भारी नुकसान होय के अनुमान हे।
भिलाई के युवा मुक्केबाज वाई उमेश ह सब जूनियर बॉयज नेशनल बॉक्सिंग चैंपियनशिप म रजत पदक पाय हे। ये प्रतियोगिता बॉक्सिंग फेडरेशन ऑफ इंडिया डहार ले कर्नाटक के बेल्लारी म आयोजित करे गे रीहिस। ए स्पर्धा म वाई उमेश ल चालीस ले तिरालिस किलोग्राम वर्ग म ये उपलब्धि मिलिस हे। उमेश ल ओखर प्रदर्शन के आधार म नेशनल कैंप बर चुने गेहे ।
अब उखर तीर अंतर्राष्ट्रीय टूर्नामेंट म भाग लेके मउका हे। एखर ले पहिली वाई उमेश सब जूनियर बॉयज नेशनल बॉक्सिंग चैंपियनशिप म भाग ले चुके हे।
केरल अरब सागर अउ लक्षद्वीप क्षेत्र म अवइया दू-तीन दिन म दक्षिण-पश्चिम मानसून के बेरा ले पहुंचे के अनुमान हे। मौसम विभाग ह कीहिन कि दक्षि पश्चिम मानसून दक्षिण अरब सागर के कुछएक हिस्सा, समूचा मालदीव, लक्षद्वीप के तीर तखार के क्षेत्र म आगू बाढ़त हे।
इही बीच उत्तर पश्चिम राजस्थान ले दक्षिण बिहार तक द्रोणिका बने हुए हे। एखर असर ले प्रदेश म काली एक-दू जगा म हल्का बरसा होय या गरज चमक के संग छींटा पड़े के आसार हे। मौसम विभाग ह कुछएक जगा म गरज चमक के संग हवा गरेर चले के संभावना जताय हे। उंहें प्रदेश म अधिकतम तापमान म बढ़ोत्तरी होय के संभावना हे।
संक्षिप्त समाचार
– रायगढ़ म काली जिला स्तरीय मेघावी छात्र सम्मान समारोह के आयोजन करे जाही, जेमा स्कूल शिक्षा मंत्री डॅाक्टर प्रेमसाय सिंह टेकाम दसवीं अउ बारहवीं के परीक्षा म उत्कृष्ट प्रदर्शन करइया जिला के इक्कीस मेघावी विद्यार्थी मन के सम्मान करही।
– राजनांदगांव नगर निगम डहार ले एक जून ले शहर के वार्ड म जन चौपाल लगाके लोगन के समस्या के निराकरण करे जाही।
– जांजगीर चांपा जिला म अवैध खनिज परिवहन म लगे हाइवा अउ ट्रेक्टर समेत इक्कीस वाहन ल जब्त करे गेहे।
– रायपुर जिला म उद्योगपति प्रवीण सोमानी के अपहरण मामला ल सुलझइया पुलिस विभाग के पैंसठ अधिकारी अउ कर्मी मन ल गृह विभाग ह पारितोषिक के रूप म एक अतिरिक्त वेतन वृद्धि देके फैसला लेहे।
– कोरबा चांपा मुख्यमार्ग म ग्राम फर्सवानी के तीर एक ठिन वाहन के टक्कर ले दू झिन लइका के मउत होगे। घटना के बाद गुस्साये लोगन ह करीबन एक घंटा तक ए रद्दा म चक्काजाम करीन।
अउ
– जांजगीर चांपा जिला म हसौद के मिरौनी गांव के तीर एक झन मछुआरा के महानदी म डूबे ले मउत होगे।