मुख्यमंत्री-राशि ट्रांसफर
मुख्यमंत्री भूपेश बघेल ह आज रईपुर म आयोजित एक कारीकरम म आने-आने योजना म राज्य के छब्बीस लाख अड़सठ हजार ले जादा किसान, भूमिहीन कृषि मजदूर, पशुपालक अउ समूह मन ले जुड़े माईलोगिन मनके बैंक खाता म अट्ठारह सौ करोड़ रूपिया ले जादा के रासि ट्रांसफर करीन। ए मउका म मुख्यमंत्री ह किहीन कि राजीव गांधी किसान न्याय योजना के विस्तार करत एमा खरीफ के प्रमुख फसल, उद्यानिकी फसल अउ कोदो, कुटकी, रागी समेत वृक्षारोपण करइया किसान मन ल सामिल करे गेहे। मुख्यमंत्री ह किहीन कि योजना के तहत ए बछर पहिली किस्त के रूप म करीबन सत्रह सौ बीस करोड़ रूपिया के छूट दे गेहे। ए साल राज्य के किसान मन ल करीबन छह हजार नौ सौ करोड़ रूपिया के इनपुट सब्सिडी दे जाही।
राजीव गांधी-पुण्यतिथि
पूर्व प्रधानमंत्री राजीव गांधी के आज इकतीसवां पुण्यतिथि हवय। राजीव गांधी के पुण्यतिथि ल हर बछर आतंकवाद विरोधी दिवस के रूप म मनाय जाथे।
ए मउका म मुख्यमंत्री भूपेश बघेल ह आज रईपुर म स्वर्गीय राजीव गांधी के चित्र म फूलमाला चढ़ाके श्रद्धांजलि अर्पित करीन। मुख्यमंत्री ह कारीकरम म उपस्थित लोगन मन ल आतंकवाद विरोध दिवस के सपथ देवईन। ए कारीकरम म जम्मों मंत्री, संसदीय सचिव, विधायक, जनप्रतिनिधि अउ लोगन मन वचुअर्ल माध्यम ले जुड़ीन।
हर्बल गुलाल-यूरोप
छत्तीसगढ़ के हर्बल गुलाल के यूरोप म घलो मांग होवत हे, जेखर ले हर्बल गुलाल के निर्यात के द्वार खुल गेहे। मुख्यमंत्री भूपेश बघेल ह आज रईपुर म राज्य म तैयार हर्बल गुलाल ले भरे ट्रक ल यूरोप एक्सपोर्ट करे बर हरा झंडा देखाके रवाना करीन। ए हर्बल गुलाल स्व-सहायता समूह के सखी कलस्टर संगठन अंजोरा, अउ कुमकुम महिला ग्राम संगठन सांकरा के माईलोगिन मन तैयार करे हे। यूरोप एक्सपोर्ट करे जातव तेईस हजार किलो हर्बल गुलाल के कीमत करीबन बयालीस लाख रूपिया हवय।
पेंशन योजना-वित्त सचिव पत्र
राज्य म पुराना पेंशन योजना बहाल करे के फैसला ल लेके वित्त सचिव अलरमेल मंगई डी. ह पेंशन फंड रेगुलेटरी एंड डेव्लहपमेंट अथॉरिटी के चेयरमेन ल चिट्ठी लिखे हे। एमा ओमन ल नवा पेंशन योजना म राज्य सरकार के योगदान के कुल रासि के वर्तमान बाजार मूल्य सत्रह हजार दू सौ चालीस करोड़ रूपिया छत्तीसगढ़ सरकार ल जल्दी लहुटाय के बात केहे हे।
अमृत सरोवर
सतही अउ भूमिगत जलस्तर ल बढ़ाय बर रिमोट सेंसिंग अउ भू-स्थानिक जइसन नवा तकनीक के बउरे ले प्रदेस के जम्मों जिला म कम से कम पचहत्तर तरिया बनाय जाही। महात्मा गांधी राष्ट्रीय ग्रामीण रोजगार गारंटी अधिनियम-मनरेगा ले मिशन अमृत सरोवर के तहत ए तरिया मनके निर्माण करे जाही। जउन गांव मन म वाटर हार्वेस्टिंग बर नवा जघा नइ हे, उहां जुन्ना तरिया मन के फेर ले साफ-सफई अउ निर्माण काम करके कायाकलप करे जाही। मिशन अमृत सरोवर के अंतर्गत बनइया ए तरिया मनके नाव ‘अमृत सरोवर‘ राखे जाही। मनरेगा आयुक्त मोहम्मद कैसर अब्दुल हक ह ए बारे म जम्मों कलेक्टर मन ल पत्र जारी कर दे हे।
दुर्घटना
प्रदेस म पाछु चौबीस घंटा के दउरान दू ठिन अलग-अलग हादसा म पांच झिन लोगन मे मउत होगे। उहें, आने दू झिन मनखे घायल होगे हे।
मिले जानकारी के मुताबिक बिलासपुर जिला के तखतपुर थाना क्षेत्र म पाछु रतिहा तेज रफ्तार हाईवा ह मालवाहक ऑटो ल टक्कर मार दीस। ए हादसा म तीन झिन लोगन के मउकाच म मउत होगे। उहें, एक झिन मनखे के अस्पताल ले जावत बेरा परान छूट गे।
उहें, रायगढ़-खरसिया राष्ट्रीय राजमार्ग म पाछु रतिहा तेज रफ्तार मोटर साइकिल खड़े ट्रैक्टर-ट्रॉली ले टकरा गे। ए हादसा म मोटरसाइकिल सवार एक एक झिन मनखे के मउत होगे अउ दू झिन मनखे घायल होगे हे।
आईईडी विस्फोट-जवान घायल
बीजापुर जिला म माओवादी मन डहार ले करे गे आईईडी विस्फोट म एक जवान घायल होगे। पुलिस अधीक्षक अंजनेय वैष्णव ह घटना के पुष्टि करत बतईन कि जवान मनके टीम नेलसनार थाना क्षेत्र म गश्त म निकले रिहीन। इही दउरान पांडेमुर्गा इलाका म एक जवान आईईडी विस्फोट के चपेट म आ गे। घायल जवान ल दंतेवाड़ा जिला अस्पताल म भर्ती कराय गेहे।
महुआ फूल संग्रहण-अवधि
राज्य म महुआ फूल संग्रहण के बेरा इकतीस मई तक बढ़ा दे गेहे। मुख्यमंत्री भूपेश बघेल ह बीजापुर वनमंडल के आवापल्ली म भेंट-मुलाकात कारीकरम के दउरान ए घोसना करीन। ग्रामीण मन ह मुख्यमंत्री ल बतईन कि ए साल महुआ फूल के उत्पादन जादा होय हे, जेला देखत ओमन ह मुख्यमंत्री ले संग्रहण के बेरा ल बढ़ाय के आग्रह करीन। मुख्यमंत्री के निरदेस म राज्य लघु वनोपज संघ ह महुआ फूल संग्रहण अवधि ल इकतीस मई तक बढ़ा देहे।
प्रवास आवासीय विद्यालय
प्रदेस म प्रयास आवासीय विद्यालय के लइका मन ह छत्तीसगढ़ माध्यमिक शिक्षा मंडल डहार ले आयोजित कक्षा बाहरवीं के बोर्ड परीक्षा म सानदार प्रदर्सन करे हे। ए विद्यालय के छियानवे प्रतिशत लइका मन ह सफलता पाय हे। सत्यासी प्रतिशत लइका मन प्रथम श्रेणी म पास होय हे। उहें, आठ लइका मन ह नब्बे प्रतिशत ले जादा अंक हासिल करे हे।
स्कूल शिक्षा मंत्री डॉक्टर प्रेमसाय सिंह टेकाम ह ए उपलब्धि म जम्मों विद्यार्थी मन ल बधाई दीन हे।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके तीस मिनट म ‘‘जिले के चिट्ठी‘‘ कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही। जेला सबो केंद्र मन ह रिले करही। ए बखत के अंक म ‘‘दंतेवाड़ा‘‘ जिला के गतिविधि के बारे म जानकारी दे जाही।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय उपर आधारित हमर साप्ताहिक कारीकरम ‘‘बातों-बातों-में‘‘ ह ए बखत स्टार्टअप इंडिया उपर केन्द्रित रइही। ए कार्यक्रम के तहत स्टार्टअप इंडिया से प्रेरित होके अपन कारोबार शुरू करइया युवा इंजीनियर आदित्य बोकावरपू से करे गे भेंटवार्ता के प्रसारण करे जाही। एखर प्रसारण आकाशवाणी के रईपुर केन्द्र डहार ले काली बिहनिया नौ बजके तीस मिनट म करे जाही, जेला छत्तीसगढ़ के सब्बो आकाशवाणी केन्द्र मन ह रिले करही।
संक्षिप्त समाचार
– निर्माण श्रमिक ई-रिक्शा सहायता योजना के तहत अब हितग्राही मन ल एक लाख रूपिया के अनुदान रासि दे जाही। पहिली ए रासि पचास हजार रूपिया रिहीस। ए बारे म भवन अउ अन्य सन्निर्माण कर्मकार मंडल डहार ले अधिसूचना जारी कर दे गेहे।
– कबीरधाम जिला के ग्राम पंचायत बांधा अउ उंखर आश्रित ग्राम बोड़ला तहसील म सामिल होही। ए संबंध म कबीरधाम कलेक्टर ह अधिकारी मन ल जरूरी कार्यवाही करे के निरदेस दीन हे।
– रईपुर के जिला रोजगार अउ स्वरोजगार मार्गदर्शन केन्द्र डहार ले चौबीस मई के पुराना पुलिस मुख्यालय परिसर म प्लेसमेंट कैम्प के आयोजन करे जाही।
– दुरूग जिला म लाइन अटैच करे गे एक सहायक उपनिरीक्षक ह कथित तौर म काली फांसी लगाके आत्महत्या कर ले हे। सहायक उपनिरीक्षक छावनी थाना म पदस्थ रिहीस।
– जशपुर जिला के कुनकुरी क्षेत्र के अम्बा चुआं गांव म हाथी के हमला म एक झिन मनखे के मउत होगे।
अउ
– महासमुंद जिला के पटेवा पुलिस ह हिरण के सिकार करे के आरोप म चार झिन लोगन ल गिरफ्तार करे हे। ए जम्मों आरोपी बावनकेरा के निवासी हरय।