प्रसंस्करण इकाई-समझौता
बस्तर संभाग म दू ठिन लघु वनोपज महुआ अउ इमली उपर आधारित प्रसंस्करण इकाई के स्थापना करे जाही। राज्य सरकार ह एखर बर दू ठिन त्रि-पक्षीय समझौता उपर हस्ताक्षर करे हे।
समझौता के तहत कोंडागांव जिला म चार करोड़ रूपिया के लागत ले महुआ डिस्टिलेशन प्लांट स्थापित करे जाही। ए प्लांट के लगे ले बस्तर क्षेत्र म फूड ग्रेड महुआ के उपयोग होही, जेखर ले ओ क्षेत्र के संग्राहक मन ल अतिरिक्त लाभ मिल सकही। उहें, बस्तर के छिंदगांव म लगभग सवा चार करोड़ रूपिया के लागत ले इमली प्रसंस्करण केन्द्र के स्थापना करे जाही। ए प्रसंस्करण केन्द्र म इमली के पेस्ट, इमली बीज के पाउडर अउ इमली ब्रिक्स तियार करे जाही।
भेंट-मुलाकात कार्यक्रम
नारायणपुर जिला के छोटेडोंगर म स्वामी आत्मानंद शासकीय अंग्रेजी माध्यम स्कूल अउ शासकीय आईटीआई के स्थापना करे जाही। ए घोसना मुख्यमंत्री भूपेश बघेल ह नारायणपुर जिला म भेंट-मुलाकात कारीकरम के दउरान करीन। ओमन किहीन कि छोटेडोंगर म हल्बा समाज, चौरासी परगना गोंडवाना समाज भवन अउ सामुदायिक स्वास्थ्य केन्द्र बनाय जाही। एखरे संग तारागांव म लघु उद्वहन सिंचाई योजना, बड़े जम्हरी शासकीय स्कूल अउ कन्हारगांव सासकीय माध्यमिक शाला के उन्नयन के घलो ऐलान करीन। उहें, मुख्यमंत्री ह कन्हार गांव, कोहकामेटा, सोनपुर, गढ़बेंगाल अउ कुकड़ाझोर म धान खरीदी केन्द्र खोले के बात किहीन। एखर अलावा नारायणपुर म पचास बिस्तर वाला मातृ-शिशु अस्पताल खोले जाही। संघरा ओमन तेंदूपत्ता संग्राहक मन ल नगद भुगतान करे के घोसना करीन। अपन प्रवास के दउरान मुख्यमंत्री ह छोटेडोंगर म अट्ठारह करोड़ रूपिया के लागत ले एक सौ चार देवगुड़ी अउ एक सौ चार घोटुल के जीर्णोद्वार काम के भूमिपूजन करीन।
एखर पहिली, बीजापुर म राखे गे पत्रकारवार्ता म मुख्यमंत्री ह जिलावासी मन बर आने-आने घोसना करीन। ओमन किहीन कि बीजापुर म जिला अउ सत्र न्यायालय के स्थापना बर पहल करे जाही। उहें, श्री बघेल ह मद्देड़ म स्वामी आत्मानंद अंग्रेजी माध्यम स्कूल अउ कईका म उप स्वास्थ्य केन्द्र खोले के ऐलान करीन। ओमन किहीन कि भोपालपट्टनम अउ नेमेड़ म मिनी स्टेडियम बनाय जाही।
भेंट-मुलाकात कारीकरम के दउरान मुख्यमंत्री ह बीजापुर के ज्ञानगुड़ी एजुकेशन सिटी म खेल मैदान, साईंस स्कूल, समर्थ पुनर्वास केन्द्र, जिला ग्रंथालय, बालिका छात्रावास अउ सी-मार्ट के लोकार्पण करीन। ए दउरान मुख्यमंत्री ह इंद्रावती नंदी म बड़का एनीकट के निर्माण अउ संगेसंग तालाब मनके गहरीकरण अउ कुंआ निर्माण ल बढ़ावा देके बात घलो किहीन।
जाति प्रमाण पत्र
मात्रात्मक त्रुटि के सेती जाति प्रमाण पत्र बनाय म होने वाला परेसानी मन ल दूर करे बर प्रदेस म अंग्रेजी भासा म जाति के नाम के उल्लेख करे के सुरूवात करे गेहे। मुख्यमंत्री भूपेश बघेल ह भेंट-मुलाकात कारीकरम के दउरान बीजापुर म अनुसूचित जाति अउ जनजाति बर आज अंग्रेजी भासा म जाति के उल्लेख के संगेसंग जाति प्रमाण पत्र के वितरण के सुभारंभ करीन। ए मउका म ओमन किहीन कि मात्रात्मक त्रुटि के सेती अब कोनों भी जाति प्रमाण पत्र प्राप्त करे ले नइ छूट पाय। ए दउरान मुख्यमंत्री ह प्रधान जनजाति के तीन हितग्राही मन ल जाति प्रमाण पत्र प्रदान करीन।
आतंकवाद विरोधी दिवस-शपथ
पूर्व प्रधानमंत्री स्वर्गीय राजीव गांधी के काल पुण्यतिथि हरय। एला आतंकवाद विरोधी दिवस के रूप म मनाय जाथे। काली सरकारी छुट्टी होय के सेती आज प्रदेस के आने-आने कार्यालय मन म अधिकारी-करमचारी मन आतंकवाद विरोधी दिवस के सपथ लीन। ए मउका म राजभवन म सचिवालय के उप सचिव दीपक अग्रवाल ह अधिकारी अउ करमचारी मन ल आतंकवाद अउ हिंसा के विरोध करे के अउ विघटनकारी शक्ति ले लड़े के सपथ दिलईन। उहें, राज्य निर्वाचन आयोग कार्यालय म घलो अधिकारी-करमचारी मन आतंकवाद विरोधी सपथ लीन।
जांजगीर-वायरोलॉजी लैब
जांजगीर-चांपा जिला के पुराना जिला अस्पताल परिसर म वायरोलॉजी लैब के स्थापना करे गेहे। ए लैब के स्थापना के बाद इहां आरटी-पीसीआर जांच बर सैम्पल बाहिर भेजे के जरूरत घलो नइ पड़य। ए लैब म हरेक दिन तीन सौ मरीज मनके आरटी-पीसीआर जांच करे जा सकही। कलेक्टर जितेन्द्र शुक्ला ह आम नागरिक मनके सुविधा बर ए वायरोलॉजी लैब के सुभारंभ करीन। ओमन वायरोलॉजी लैब के स्थापना ल जिला बर एक बड़का उपलब्धि बतावत किहीन कि आने वाला समय म मुख्यमंत्री भूपेश बघेल ए लैब के औपचारिक उद्घाटन करहीं।
राष्ट्रीय एकता शिविर
केन्द्रीय खेल अउ युवा कार्यक्रम मंत्रालय अउ राष्ट्रीय सेवा योजना-एनएसएस डहार ले काली इक्कीस मई ले दुरूग जिला के अमलेश्वर म सात दिन के के राष्ट्रीय एकता सिविर के आयोजन करे जाही। श्रीराम चंद्र मिशन आश्रम म आयोजित होने वाला ए सिविर के उद्घाटन राज्यपाल अनुसुईया उइके करही। सिविर म छत्तीसगढ़, मध्यप्रदेश, महाराष्ट्र, झारखंड, गुजरात समेत बारह राज्य मनके राष्ट्रीय सेवा योजना के दू सौ दस स्वयंसेवक अउ दल नायक भाग लीहीं। सिविर के दउरान सांस्कृतिक कारीकरम समेत रचनात्मक गतिविधि राखे जाही।
बाईक रैली
आजादी के अमृत महोत्सव के तहत केन्द्रीय सड़क परिवहन अउ राजमार्ग मंत्रालय संस्कार भारती-क्रीड़ा भारती के तत्वावधान म बाईस मई के दुरूग ले रईपुर तक युवा बाईक रैली निकाले जाही। ए बाईक रैली म पचहत्तर युवक-युवती सामिल होही। रैली ल पूर्व हॉकी खिलाड़ी नीता डुमरे झंडा दिखाके दुरूग के नाना-नानी पार्क ले रवाना करही।
हसदेव अभ्यारण्य-प्रदर्शन
हसदेव अभ्यारण्य ल कोयला खनन बर अनुमति दे जाय के विरोध म चलत आंदोलन अउ तेज होगे हे। सर्व आदिवासी समाज के बैनर तले प्रदेस के आने-आने जगह मन ले बड़का संख्या म ग्राम परसा पहुंचे लोगन मन ह राष्ट्रीय राजमार्ग एक सौ तीस म चक्काजाम कर दीन। ए दउरान प्रदर्सनकारी मन ह कोयला ले जाने वाला रेलवे ट्रैक ल घलो बाधित करीन। हालांकि, स्थिति ल देखत प्रसासन ह राष्ट्रीय राजमार्ग ले गुजरइया वाहन मनके रस्ता बदल देहे। एखर बाद भी हजारों प्रदर्शनकारी सड़क म डटे रिहीन। प्रदर्सन के नेतृत्व पूर्व सांसद सोहन पोटाई करत हे। ए दउरान प्रदर्सनकारी मन चेतावनी देहे कि यदि परसा कोल ब्लॉक उत्खनन के अनुमति ल निरस्त करके परसा ईस्ट बासेन म कोयला खनन तुरते बंद नइ करे गीस, त सर्व आदिवासी समाज पूरा प्रदेस म उग्र आंदोलन करही।
अध्यक्ष पद-चुनाव
राजनांदगांव जिला के छुईखदान नगर पंचायत म अध्यक्ष पद बर होय चुनाव म कांग्रेस समर्थित प्रत्याशी पार्तिका महोबिया ह जीत दर्ज करे हे। पार्तिका ह अपन निकटतम प्रतिद्वंदी भाजपा के अनुभा संजय जैन ल चार वोट ले हरईन। बतादन कि छुईखदान नगर पंचायत म भाजपा के दीपाली जैन अध्यक्ष चुने गे रिहीन। बाद म कांग्रेस अउ भाजपा के पार्षद मन डहार ले लाय गे अविश्वास प्रस्ताव पारित होय के बाद ओमन ल अध्यक्ष पद ले हटा दे गे रिहीस। एखर बाद इहां दुबारा अध्यक्ष पद बर चुनाव होईस, जेमा कांग्रेस के पार्तिका महोबिया ह जीत हासिल करीन।
दुर्घटना
कांडागांव जिला म आज होय सड़क दुर्घटना म तीन मनखे मनके मउत होगे। मिले जानकारी अनुसार फरसगांव-जुगनी पुल करा बस ह दुपहिया वाहन ल अपन चपेट म ले लीस। ए दुर्घटना म दोपहिया वाहन सवार एक युवक के मउकाच म मउत होगे। उहें, एक झिन महिला अउ एक झिन युवती ह अस्पताल म इलाज के दउरान दम तोड़ दीस।
ओति, बालोद जिला के डौंडी थाना क्षेत्र म पाछु रतिहा तेज रफ्तार कार सड़क किनारे खड़े ट्रक ले टकरा गीस। ए हादसा म एक झिन लइका के मउत होगे। उहें, तीन झिन दूसर लोगन मन गंभीर रूप ले घायल होगीन।
उहें, दुरूग जिला के सेंट्रल एवेन्यू मार्ग म होय एक सड़क दुर्घटना म मोटर साइकिल सवार युवक के मउत होगे। मिले जानकारी अनुसार सेक्टर-पांच चउक करा खिचड़ी बांटे के दउरान एक तेज रफ्तार मोटर साइकिल सवार युवक उहां खड़े महिला मन ले टकरा के गिर गीस, जेखर ले ओखर मउत होगे।