सुरक्षा जवान-विमान सेवा
बस्तर संभाग के माओवाद प्रभावित क्षेत्र मन म तैनात सुरक्षा बल के जवान अउ अधिकारी मन बर आज ले विशेष हवाई सेवा शुरू होगे हे। ए बिसेस हवाई सेवा के अंतर्गत विमान ह संझा लगभग पौने पांच बजे पहिली उड़ान भरीस। ये हवाई सेवा छुट्टी म जवइया जवान अउ अधिकारी मन बर होही। विमान सेवा के तहत एक निजी एयरलाईंस के बहत्तर सीटर विमान सप्ताह म तीन दिन – बुधवार, शनिचर अउ ईतवार के जगदलपुर ले रायपुर होके दिल्ली तक उड़ान भरही।
ये विमान सेवा सिरिफ नक्सल मोर्चा म तैनात अर्द्धसैनिक बल के जवान अउ अधिकारी मन बर रइही। ए हवाई सुविधा के शुरू होये ले माओवाद प्रभावित क्षेत्र म तैनात जवान मन ल छुट्टी म आये-जाये बर बड़ सुविधा होही। संगेसंग बेरा के घलो बचत होही।
मुख्यमंत्री-भेंट/मुलाकात-01
मुख्यमंत्री भूपेश बघेल ह आज सूरजपुर जिला के प्रतापपुर सामुदायिक स्वास्थ्य केन्द्र म बत्तीस लाख रूपिया के लागत ले नवा बने बीस बिस्तर वाला कोविड वार्ड के लोकार्पण करीन। ए वार्ड म कोविड मरीज मनके अलावा सामान्य बीमारी के मरीज मनके घलो इलाज हो सकही। ए मउका म मुख्यमंत्री ह वार्ड म कोविड मरीज के इलाज बर उपलब्ध मूलभूत सुविधा मनके जायजा लीन। संगेसंग मरीज मन ले भेंट करके स्वास्थ्य केन्द्र म मिलने वाला चिकित्सकीय सुविधा मनके घलो जानकारी लीन।
एखर पहिली, मुख्यमंत्री ह प्रतापपुर म अधिकारी मनके बइठका लेके सासन के योजना अउ विकास कार्य मनके प्रगति के समीक्षा करीन। ए दउरान श्री बघेल ह अधिकारी मन ले किहीन कि ओमन मुस्तैदी ले काम करय अउ जनता के प्रति जवाबदेह बनय। काम म कोनों भी प्रकार के लापरवाही बर्दास्त नइ करे जाही। मुख्यमंत्री ह क्षेत्र म पेयजल के समस्या अउ भू-जल स्तर म कमी ल दूर करे बर नरवा योजना अउ वाटर रिजार्चिंग के काम म तेजी लाय के निरदेस अधिकारी मन ल दीन। ओमन किहीन कि वन भूमि म जेन लोगन मनके तेरह दिसंबर दू हजार पांच के पहिली के कब्जा हवय, ओ जम्मों पात्र लोगन मन ल वन भूमि पट्टा दे जाय। संघरा ओमन राजस्व विभाग के सिकायत मनके घलो तुरते निराकरण करे बर अधिकारी मन ल निर्देशित करीन।
मुख्यमंत्री-भेंट/मुलाकात-02
बाद म पत्रकार मन करा चरचा करत मुख्यमंत्री ह माओवादी मन ले वार्ता के संबंध म किहीन कि माओवादी, भारत के संविधान उपर विश्वास व्यक्त करय, तेखर बाद ओमन ले कोनों भी मंच म बात करे जा सकत हे। ओमन किहीन कि माओवाद परभावित क्षेत्र मन म राज्य सरकार के योजना मन ह आदिवासी मन के दिल जीत लेहे। अब उहां सड़क बनाय अउ कैम्प खोले के मांग लोगन मन करत हे।
मुख्यमंत्री ह प्रतापपुर म कृषि महाविद्यालय खोले अउ अपर कलेक्टर लिंक कोर्ट सुरू करे के घोसना करीन।
भेंट-मुलाकात अभियान के चौथा दिन आज मुख्यमंत्री ह कुदरगढ़ म लगभग ढाई करोड़ रूपिया के आने-आने विकास काम मनके लोकार्पण अउ भूमिपूजन करीन। संगेसंग ओमन कुदरगढ़ म संचालित उचित मूल्य के दुकान के निरीक्षण घलो करीन। ए दउरान श्री बघेल ह हितग्राही मन ले रासन के मात्रा अउ गुणवत्ता के जानकारी लीन।
उहें, मुख्यमंत्री ह बिहारपुर म स्वामी आत्मानंद अंग्रेजी माध्यम स्कूल खोले के अउ सासकीय कन्या हायर सेकेंडरी स्कूल के छात्रा मनके मांग उपर कन्या छात्रावास खोले के ऐलान करीन।
बस्तर फाइटर्स-भर्ती प्रक्रिया
प्रदेस म बस्तर फाइटर्स बर भर्ती प्रक्रिया सुरू होगे हे। नौ मई के बस्तर संभाग के सब्बो जिला मुख्यालय मन म बस्तर फाइटर्स बर रोल नंबर अनुसार अभ्यर्थी मनके दस्तावेज मनके जांच करे जाही। ए संबंध म रोल नंबरवार अभ्यर्भी मन ल सूचना दे दे गेहे।
उहें, प्रदेस म एसआई भर्ती परीक्षा के घलो रास्ता साफ होगे हे। एसआई, सूबेदार अउ प्लाटून कमांडर भर्ती परीक्षा के अभ्यर्थी मन ल चौदह मई ले प्रवेस पत्र प्रदान करे जाही। अभ्यर्थी, छत्तीसगढ़ पुलिस के वेबसाइट ले अपन प्रवेस पत्र डाउनलोड कर सकत हे।
डी. पुरंदेश्वरी-बैठक
भारतीय जनता पार्टी के प्रदेश प्रभारी डी. पुरंदेश्वरी ह आज कुशाभाऊ ठाकरे परिसर म रईपुर संभाग के पार्टी के पदाधिकारी मनके बइठका लीन। बइठका म पार्टी के अवइया कारीकरम के रूपरेखा तैयार करे गीस। संगेसंग पदाधिकारी अउ कार्यकर्ता मन ल केन्द्र सरकार के योजना मन ल जन-जन तक पहुंचाय के निरदेस दे गीस। बइठका म भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह अउ प्रदेश अध्यक्ष विष्णु देव साय घलो मौजूद रिहीन।
उहें, दुरूग संभाग के पदाधिकारी मनके बइठका म पार्टी ल अउ मजबूत करे बर संगेसंग अवइया कारीकरम बर विचार-विमर्स करे गीस। बइठका म राज्यसभा सांसद सरोज पांडेय, पूर्व मंत्री प्रेमप्रकाश पांडेय अउ विधायक विद्यारतन भसीन घलो मौजूद रिहीन।
अइसने, बिलासपुर संभाग के बइठका म भाजपा के प्रदेस सह प्रभारी नितिन नबीन, प्रदेश संगठन महामंत्री पवन साय अउ नेता प्रतिपक्ष धरमलाल कौशिक सामिल होईन।
भाजपा-कार्य विस्तार
भारतीय जनता पार्टी, कुशाभाऊ ठाकरे जन्म शताब्दी कार्य विस्तार योजना के तहत प्रदेस के शक्ति केन्द्र अउ बूथ मन ल मजबूत करे म लगे हे। इही कड़ी म मुंगेली जिला के मुंगेली, लोरमी अउ बिल्हा विधानसभा क्षेत्र मनके शक्ति केन्द्र अउ बूथ मन म घलो कारीकरम राखे जात हे।
बिलासपुर सांसद अरूण साव ह मुंगेली नगर मंडल के आने-आने शक्ति केन्द्र अउ बूथ मन म जाके कार्य विस्तारक मनके संग बूथ मनके समीक्षा करीन। ए दउरान ओमन कार्यकर्ता मन ल केन्द्र सरकार के जन कल्याणकारी योजना के प्रचार-प्रसार के संगेसंग राज्य सरकार के विफलता मन ल जनता के बीच उजागर करे के बात किहीन।
बातों-बातों-में
प्रादेशिक समाचार एकांश के समसामयिक बिसय वाले कारीकरम ‘‘बातों-बातों-में‘‘ ह ए बखत रईपुर स्थित इंदिरा गांधी कृषि विश्वविद्यालय के कुलपति डॉक्टर गिरीश चंदेल ले बिसेस भेंटवार्ता के प्रसारण करे जाही। ए भेंटवार्ता कृषि सिक्षा अउ अनुसंधान के आने-आने पहलु उपर आधारित होही।
ए भेंटवार्ता के दूसरइया कड़ी के प्रसारण आकाशवाणी रईपुर डहार ले काली बिहनिया नौ बजके तीस मिनट म होही, जेला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी के रईपुर केन्द्र डहार ले काली संझा छह बजके तीस मिनट म ‘‘जिले के चिट्ठी‘‘ कारीकरम के प्रसारण करे जाही। समाचार एकांश के ए कारीकरम ल छत्तीसगढ़ स्थित आकाशवाणी के जम्मों केन्द्र रिले करही। ए बखत के अंक म ‘‘बेमेतरा‘‘ जिला के बारे म जानकारी दे जाही।
राजनांदगांव-सोखता गढ्ढा निर्माण
राजनांदगांव जिला के ग्रामीण क्षेत्र म पानी बचाय बर सोखता गड्ढा बनाय के अभियान सुरू होगे हे। पद्मश्री फूलबासन यादव के संस्था मां बम्लेश्वरी जनहितकारी समिति के अगुवई म स्व-सहायता समूह ले जुड़े महिला मन ए अभियान के सुरूवात करीन हे। ए अभियान के तहत गांव मन म निस्तारी के बाद बहे वाला पानी ल सहेजे बर बड़का संख्या म सोखता गड्ढा बना के लोगन मन ल जागरूक करे जात हे।
संक्षिप्त समाचार
– दंतेवाड़ा जिला म लोन वर्राटू के तहत चार झिन माओवादी मन ह आज पुलिस अधीक्षक अउ सीआरपीएफ के अधिकारी मनके आगू आत्मसमर्पण कर दीन। ए माओवादी मन पाछु सात बछर ले माओवादी संगठन म सक्रिय रिहीन।
– राजनांदगांव जिला के छुरिया विकासखंड के ग्राम साल्हे मन्होरा म रसोई गैस सिलेंडर म विस्फोट होय ले सोलह ठिन मकान मन म आगी लग गे, जेखर कारण उहां रखे सामान मन जलके खाक होगे। ए घटना म कोनों प्रकार के जनहानि के खबर नइ हे।
अउ
– मुंगेली म सिटी कोतवाली पुलिस ह एक झिन आरोपी ल गिरफ्तार करके ओखर करा ले छह किलो गांजा बरामद करे हे।