सुरक्षा जवान विमान सेवा
बस्तर संभाग के माओवाद प्रभावित क्षेत्र मन म तैनात सुरक्षा बलके जवान अउ अधिकारी मन बर काली सात मई ले विशेष हवाई सेवा शुरू करे जाही। ये हवाई सेवा छुट्टी म जवइया जवान अउ अधिकारी मन बर होही। एमा एक निजी एयरलाईंस के बहत्तर सीटर विमान सप्ताह म तीन दिन – बुधवार, शनिचर अउ ईतवार के जगदलपुर ले रायपुर होके दिल्ली तक उड़ान भरही।
ये विमान सेवा सिरिफ नक्सल मोर्चा म तैनात अर्द्धसैनिक बल के जवान अउ अधिकारी मन बर रइही। आम नागरिक मन ल ये सुविधा नइ मिलय। ए हवाई सुविधा के शुरू होये ले माओवाद प्रभावित क्षेत्र म तैनात जवान मन ल छुट्टी म आये-जाये बर बड़ सुविधा होही। संगेसंग बेरा के घलो बचत होही।
मुख्यमंत्री-भेंट/मुलाकात कार्यक्रम
मुख्यमंत्री भूपेश बघेल ह भेंट-मुलाकात कारीकरम के तीसर दिन आज सूरजपुर जिला के प्रतापपुर विधानसभा क्षेत्र के रघुनाथ नगर म लोगन ले आने-आने जन कल्याकारी करीकरम के कामकाज के बारे म जानकारी लीन। ए मउका म ओमन ह रघुनाथ नगर म कॉलेज खोले, वाड्रफनगर म मिनी स्टेडियम अउ अपर कलेक्टर लिंक कोर्ट सुरू करे जाय के घोसना करीन। संगेसंग रघुनाथ नगर म तालाब बनाय के घलो मंजूरी दीन। उहें, गोविंदपुर म जिला सहकारी बैंक के साखा खोले जाय के ऐलान करीन। एखर अलावा मुख्यमंत्री ह ग्राम केरता म तीन करोड़ तीस लाख रूपिया के लागत के पन्द्रह ठिन विकास काम के लोकार्पण अउ सिलान्यास करीन।
अपन प्रवास के दउरान मुख्यमंत्री ह रघुनाथ नगर के चौपाल म लोगन के सिकायत म पटवारी पन्नालाल सोनानी ल निलंबित करे के आदेस दीन। अइसने, सूरजपुर जिला के प्रतापगढ़ म गौठान म लापरवाही के सिकायत म डीएफओ मनीष कश्यप अउ रेंजर संस्कृति वारले ल घलो निलंबित करे बर किहीन।
उहें, मुख्यमंत्री ह बलरामपुर जिला के रामानुजगंज विधानसभा क्षेत्र म संतावन करोड़ रूपिया ले जादा के लागत के इकतीस ठिन काम के लोकार्पण अउ सिलान्यास करीन। ए दउरान आम लोगन ले गोठबात करे के बाद अधिकारी मन ले घलो भेंट करीन। ए मउका म ओमन किहीन कि आम जनता अउ किसान मनके छोटे-छोटे समस्या के निपटारा तुरते करे जाना चाही। उहें, लोक सेवा गारंटी के आवेदन के निपटारा घलो समय-सीमा म करे बर किहीन। कारीकरम म श्री बघेल ह किहीन कि पुलिस के काम करे के तरीका लोगन ल न्याय देवाय के होना चाही। श्री बघेल ह नामांतरण, बंटवारा, सीमांकन जइसन राजस्व ले जुड़े मामला के निपटारा घलो जल्दी करे जाय बर किहीन।
यूजीसी-संयुक्त प्रवेश परीक्षा
विश्वविद्यालय अनुदान आयोग-यूजीसी ह आने-आने विश्वविद्यालय म स्नातक पाठ्यक्रम के संयुक्त प्रवेश परीक्षा के आवेदन के आखिरी तारीख ल ए महीना के बाईस तारीख तक बढ़ा दे हवय। आयोग के अध्यक्ष प्रोफेसर एम. जगदीश कुमार ह बतईन कि केन्द्रीय, राज्य अउ प्राईवेट विश्वविद्यालय म प्रवेस के इच्छुक विद्यार्थी मन ल आवेदन करे के उपरहा मउका मिलही। साढ़े तीन घंटा के कम्प्यूटर आधारित प्रवेश परीक्षा ल दू पाली म कराय जाही। आयोग ले वित्तीय सहायता मिले सब्बो पैंतालीस केन्द्रीय विश्वविद्यालय बर संयुक्त प्रवेश परीक्षा जरूरी हे।
दुर्ग आईजी-बैठक
दुरूग रेंज के पुलिस महानिरीक्षक बी.एन. मीणा ह काली राजनांदगांव अउ मानपुर क्षेत्र के दउरा करके पुलिस अधिकारी मनके बइठका लीन। ए दउरान ओमन ह कानून व्यवस्था के जानकारी लीन अउ जरूरी निरदेस दीन। आई.जी. ह आम लोगन बर पुलिस के पहुंच ल आसान करे बर अउ उंखर समस्या के निपटारा जल्दी करे बर किहीन। पुलिस महानिरीक्षक ह नवा जिला के स्थापना बर सब्बो प्रशासनिक तैयारी ल तेज करे बर किहीन। संगेसंग माओवादी गतिविधि के बारे म जानकारी लेके नक्सल ऑपरेसन ल तेज करे बर घलो किहीन।
बइठका के बाद ओमन ह मदनवाड़ा, सीतागांव अउ कोहका थाना के दउरा करीन।
दुर्ग एसपी-बैठक
दुरूग जिला म पदस्थ जिला पुलिस बल के अधिकारी अउ करमचारी मन ल अब साप्ताहिक अवकाश मिलही। ए संबंध म पुलिस अधीक्षक डॉक्टर अभिषेक पल्लव ह आदेस जारी करीन हे। ओमन ह आज जनरल परेड के निरीक्षण करके उत्कृष्ट टर्नआउट अउ ड्रिल करइया करमचारी मन ल सम्मानित करीन। ओमन ह दरबार लगाके कमरचारी मनके अवकाश, ट्रांसफर, आवास अउ दूसर समस्या मनके निपटारा करीन।
लाश बरामद
कांकेर पुलिस ह एक ठन लॉज ले पति-पत्नी संघरा दू झिन लइका मनके लास ल बरामद करे हे। पुलिस के अनुसार रईपुर निवासी एके परिवार के चार सदस्य बुधवार संझा कांकेर के कोतवाली थाना क्षेत्र के एक ठिन लॉज म गे रिहीन। दूसर दिन संझा तक उंखर कमरा ले काखरो बाहर नइ निकले म एखर सूचना लॉज प्रबंधन ह पुलिस ल दीस, जेखर बाद कमरा के दरवाजा तोड़े म एमन सब्बो झन के सव मिलीस। पुलिस ह मामला के जांच सुरू कर देहे।
मौसम
दक्षिण अंडमान सागर अउ ओखर ले लगे दक्षिण पूर्व बंगाल के खाड़ी के उपर एक ठन निम्न दबाव के क्षेत्र बने हे। एखर उत्तर पश्चिम डहार जाय के संभावना हे। एखर असर ले काली संझा तक दक्षिण पूर्व बंगाल के खाड़ी के उपर चक्रवाती तूफान के ‘‘असानी‘‘ म बदले के संभावना हे। उहें, अवइया दिन आठ मई के संझा तक एक तूफान के पूर्व मध्य बंगाल के खाड़ी के उपर अउ उत्तर म पश्चिम मध्य बंगाल के खाड़ी तक पहुंचे के संभावना हे। दस मई तक एखर परभाव आंध्र-ओड़िसा के तट म देखे बर मिल सकत हे। उहें, मौसम विभाग ह केहे हे कि ए चक्रवाती तूफान के परभाव छत्तीसगढ़ म कब अउ कतका होही, ये एक-दू दिन म पता चलही।
इही बीच, मौसम विभाग ह प्रदेस म कुछेक जगह म हल्का बरसा या गरज-चमक के संग छींटा पड़े के संभावना बताय हे। उहें, राज्य के कुछेक जघा म अंधड़ चले के घलो संभावना हे। मौसम विभाग के अनुसार उत्तर छत्तीसगढ़ के तापमान म धीरे-धीरे बढ़ोतरी होय के संभावना हे। फेर, दक्षिणी छत्तीसगढ़ के तापमान म खास परिवर्तन होय के आसार नइ हे।
संक्षिप्त समाचार
– विश्व प्रसिद्ध केदारनाथ धाम के कपाट आज बिहनिया खुल गे हवय। एखर पहिली, केदार बाबा के पंचमुखी डोली धाम म पहुंचीस। इही बीच, गंगोत्री अउ यमुनोत्री धाम के यात्रा आसानी ले चलत हे।
– पद्म पुरस्कार दू हजार तेईस बर नामांकन ए बछर पन्द्रह सितंबर तक करे जा सकत हे। एखर बर ऑनलाइन नामांकन अउ सिफारिस भेजे के प्रक्रिया एक मई ले सुरू होगे हवय। पुरस्कार के घोसना अवइया बछर गणतंत्र दिवस के मउका म करे जाही।
– राजधानी रईपुर के स्वामी विवेकानंद विद्यापीठ आदर्श आवासीय उच्च माध्यमिक विद्यालय म निःशुल्क प्रवेश के प्रक्रिया सुरू होगे हवय। विद्यालय के कक्षा तीसरी, छठवीं, नौवीं अउ ग्यारहवीं म प्रवेस बर सत्रह मई तक आवेदन करे जा सकथे।
– महिला अउ बाल विकास मंत्री अनिला भेंडिया ह आज अपन बस्तर प्रवास के दउरान बस्तर जिला के आंगनबाड़ी केन्द्र मनके निरीक्षण करीन। ए दउरान ओमन ह टाकरागुड़ा आंगनबाड़ी केन्द्र म अव्यवस्था पाय म सुपरवाइजर ल निलंबित करे के निरदेस दीन।
– रईपुर-धमतरी रद्दा म राखी थाना क्षेत्र म ट्रक अउ बस के साथ एक ठिन कार के टकराय ले कार म बइठे एक झिन मनखे के मउत होगे। उहें, छह झिन यात्री मन घायल होगे हवय।
– नई राजधानी प्रभावित किसान कल्याण समिति ह आंदोलन के विस्तार करत बड़े आंदोलन करे के अउ रैली बर प्रभावित गांव मनके पारी तय करीन हे। एखर अनुसार सात ले अट्ठारह मई तक आने-आने प्रभावित गांव के लोगन के पारी लगाय गे हवय।
अउ
– बलरामपुर जिला के रामानुजगंज पुलिस ह पाईप खरीदी के मामला म कार्यपालन अभियंता उमाशंकर राम के खिलाफ एफ.आई.आर. दर्ज कर ले हवय। ओखर उपर बिना पाईप सप्लाई करे भुगतान करे के आरोप हे।