गर्मी-दिशा/निर्देश
केन्द्र सरकार ह जम्मों राज्य अउ केन्द्रसासित प्रदेस मन ल भीषण गर्मी अउ एखर ले होवइया बीमारी ले बचाव संबंधी दिसा-निरदेस के प्रचार करे बर किहीन हे। राज्य अउ केन्द्रसासित प्रदेस के सचिव मन ल लिखे चिट्ठी म केन्द्रीय स्वास्थ्य सचिव राजेश भूषण ह किहीन कि मौसम विभाग के पूर्वानुमान के मुताबिक ए बछर मार्च ले मई तक देस के कई ठिन जगह म अधिकतम तापमान सामान्य ले जादा रेहे के संभावना हवय। कई ठिन जगह म तापमान पहिलीच ले छियालीस डिग्री तक पहुंच गेहे।
राष्ट्रीय शिक्षक शिक्षा परिषद-आवेदन
राष्ट्रीय शिक्षक शिक्षा परिषद ह शैक्षणिक सत्र दू हजार तेईस-चौबीस बर चार वर्षीय एकीकृत शिक्षक शिक्षा कारीकरम-आईटीईपी बर ऑनलाइन आवेदन मंगाय हे। एखर तहत बी.ए.-बी.एड., बी.एस.सी.-बी.एड. अउ बी.कॉम-बी.एड. के डिग्री दे जाही।
शिक्षा मंत्रालय ह किहीन कि नेशनल टेस्टिंग एजेंसी डहार ले राष्ट्रीय सामान्य प्रवेश परीक्षा के माध्यम ले एमा प्रवेस दे जाही। चार वर्षीय एकीकृत सिक्षक शिक्षा कारीकरम-आई.टी.ई.पी. ह ओ जम्मों विद्यार्थी मन बर होही, जउन मन बारहवीं के बाद ए बिसय ल चुनना चाहत हे।
मितान योजना-अनुश्रवण समिति
प्रदेस म मुख्यमंत्री मितान योजना के सुरूवात होय के बाद एखर देखरेख बर मुख्य सचिव के अध्यक्षता म राज्य स्तरीय अनुश्रवण समिति गठित करे के फइसला ले गेहे। एखर तहत जिला स्तर म कलेक्टर मनके पगरइति म जिला स्तरीय अनुश्रवण समिति गठित करे जाही।
खबर के मुताबिक प्रदेस के लोगन मन म राज्य सासन के आने-आने विभाग के एक सौ ले जादा सेवा मनके लाभ उंखर घर म मितान के माध्यम ले देवाय के उद्देश्य ले मुख्यमंत्र मितान योजना सुरू करे गेहे। योजना के पहिली चरण म एला राज्य के चौदह ठिन नगर निगम म सुरू करे गेहे। एखर बाद आने-आने निकाय अउ गंवई क्षेत्र म घलो ए योजना ल चलाय जाही।
अक्षय तृतीया-माटी पूजन दिवस
प्रदेस म अक्षय तृतीया के परब काली तीन मई के ‘‘माटी पूजन दिवस अउ अक्ती तिहार‘‘ के रूप म मनाय जाही। ए मउका म कृषि महाविद्यालय रईपुर म राज्य स्तरीय समारोह राखे गेहे, जेमा मुख्यमंत्री अउ कृषि मंत्री ह सामिल होही। उहें, जम्मों ग्राम पंचायत, जनपद अउ जिला पंचायत स्तर म कारीकरम राख के परंपरागत रूप ले माटी के पूजापाठ करे जाही अउ ए मउका म धरती माता के रक्षा करे के सपथ घलो ले जाही।
एखर अलावा कृषि महाविद्यालय म अवइया जम्मों महाविद्यालय, अनुसंधान केन्द्र अउ कृषि विज्ञान केन्द्र के संगेसंग करीबन साठ जघा म तीन मई के अक्ती तिहार कारीकरम के आयोजन करे जाही। जिला के प्रमुख गौठान मन ल घलो ए कारीकरम ले जोड़े जाही। ए मउका म किसान, गौठान समिति अउ स्व-सहायता समूह के सदस्य मन ल आने-आने फसल के बीजा कृषि यंत्र बांटे जाही। कारीकरम के दउरान किसान मन ल प्रशिक्षण देके संगेसंग संगोष्ठी के घलो आयोजन करे जाही।
छत्तीसगढ़ विधानसभा के अध्यक्ष डॉक्टर चरणदास महंत ह प्रदेसवासी मन ल अक्ती तिहार के बधाई दीन।
दिनेश मिश्र-बाल विवाह
इही बीच, अंधश्रद्धा निर्मूलन समिति के अध्यक्ष डॉक्टर दिनेश मिश्र ह किहीन हे कि बाल विवाह जइसन सामाजिक कुरीति के उन्मूलन बर समाज के जम्मों वरग के मदद जरूरी हवय। ओमन किहीन कि जुन्ना परंपरा ल आगू बढ़ाय के नाव म होवइया बाल विवाह ल रोकना जम्मों मनखे के कर्तव्य हवय। डॉक्टर मिश्र ह किहीन कि अक्ती के मउका म बाल विवाह के प्रथा धार्मिक अउ सामाजिक रूप ले सही नइ हे। डॉक्टर मिश्र ह गांव वाले मन ल अपील करे हे कि अपन तीर-तखार के कोनों नाबालिग लइका के बिहाव होवत देखे त तुरते पुलिस प्रसासन ल खबर करय।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म राखे गे प्रश्नोत्तरी म आज के प्रश्न हवय –
1942 के भारत छोड़ो आंदोलन के दउरान कर्नाटक के एक गांव ह ब्रिटिश शासन ले मुक्ति के घोसना करे रिहीन, ओ गांव के नाव बतावव, जउन अपन स्वतंत्रता के सबले पहिली घोसना करइया एक रिहीन?
श्रोता मन अपन उत्तर वाट्स ऐप नंबर आठ आठ दू छह पांच चार छह दू छह दू म या ई-मेल आई-डी अमृत महोत्सव क्वीज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही। विजेता ल ई-प्रमाण पत्र अउ सांकेतिक पुरस्कार घलो दे जाही।
महंगाई-भत्ता
प्रदेस म सरकारी करमचारी मनके महंगाई भत्ता म पांच प्रतिशत के बढ़ोतरी करे गेहे। मुख्यमंत्री भूपेश बघेल ह काली श्रम दिवस के मउका म महंगाई भत्ता बढ़ाय के फइसला लीन। सरकारी करमचारी मनके महंगाई भत्ता के ए दर एक मई ले लागू होगे।
खबर के मुताबिक अभी म राज्य के करमचारी मन ल सत्रह प्रतिसत महंगाई भत्ता मिलत हे, जउन ह बाढ़के बाईस प्रतिसत हो जही।
रमन सिंह-बयान
भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह राज्य सरकार डहार ले धरना-प्रदर्शन के मंजूरी ले संबंधी फइसला ल मिनी इमरजेंसी के सामान बतईन हे। आज राजनांदगांव म पत्रकार मन ले गोठबात करत डॉक्टर सिंह ह किहीन कि प्रदेस के जनता ल अपन हक अउ अधिकार बर सासन ले मंजूरी ले बर पड़ही, जउन काला कानून के समान हवय। ओमन किहीन कि कहू राज्य सरकार अपन फइसला ल पन्द्रह दिन के भीतर वापिस नइ लीही, त भाजपा डहार ले सोलह मई ले प्रदेसभर म जेल भरो आंदोलन करे जाही।
मुख्यमंत्री-प्रिकॉशन डोज
मुख्यमंत्री भूपेश बघेल ह आज रईपुर स्थित अपन निवास म कोविड-नाइंटीन ले बचाव बर प्रिकॉशन डोज के टीका लगवईन। ए मउका म मुख्यमंत्री ह किहीन कि टीकाकरण कोविड-नाइंटीन ले बचाव के सुरक्षा कवच हवय। ओमन प्रदेसवासी मन ले अपील करीन हे कि गाइडलाइन के मुताबिक कोविड संक्रमण ले बचाव बर टीका जरूर लगवाय। श्री बघेल ह यहू घलो किहीन कि कोविड-नाइंटीन के खतरा अभी टले नइ हे, एखरे सेती जम्मों लोगन प्रोटोकॉल के पालन करत रहय।
दुर्घटना
जांजगीर-चांपा जिला के धरदेई गांव म एक पिकअप गाड़ी अनते-तनते होके पेड़ ले टकरा गे। ए हादसा म एक झिन मनखे के मउत होगे अउ एक मनखे गंभीर रूप ले घायल होगे, जउन ल बिलासपुर रेफर करे गेहे। उहें, कुछेक लोगन मन ल मामूली चोट आय हे। ए गाड़ी म करीबन बीस झिन लोगन बइठे रिहीन।
उहें, इही जिला के नगरदा गांव म तेज रफ्तार फटफटी के अनते-तनते होके पुलिया ले टकराय ले एक झिन मनखे के मउत होगे।
ऐति, रायगढ़ जिला म लैलूंगा के तीर पाछु रतिहा बस अउ कार के बीच होय भिडंत म कार सवार एक झिन मनखे के मउत होगे। मृतक मनखे लैलूंगा के रहवइया रिहीस।
मौसम
प्रदेस के कुछेक जघा म आज बड़ तेज हवा-गरेर अउ गरज-चमक के संग बरसा होईस। राजधानी रईपुर म आज मंझनिया बाद अचानके मौसम बदले ले तेज हवा के संग बरसा होईस। मौसम म आय ए बदलाव के सेती तापमान म कुछेक गिरावट अईस, जेखर ले लोगन मन ल गर्मी ले थोड़-बहुत राहत मिलीस।
उहें, अंबिकापुर, कोरिया समेत प्रदेस के कुछेक स्थान म घलो बरसा होय के खबर मिले हे।
संक्षिप्त समाचार
– बेंगलुरू म राखे गे राष्ट्रीय पावरलिफ्टिंग प्रतियोगिता म दुरूक के जेबा अख्तियार ह महिला के चौरासी किलोग्राम वजन समूह म एक सौ संतावन किलो बेंच प्रेस लिफ्ट करके छत्तीसगढ़ ल रजत पदक देवाय हे।
– दंतेवाड़ा जिला के गुड़से गांव म अज्ञात लोगन मन ह एक झिन कोतवाल के हत्या कर दे हे। पुलिस ह मामला दर्ज करके जांच सुरू कर देहे।
अउ
– सुकमा पुलिस ह कोंटा थाना क्षेत्र म एक ठिन गाड़ी ले साढ़े तीन सौ किलो गांजा बरामद करे हे। जब्त गांजा के कीमत करीबन छत्तीस लाख रूपिया बताय जात हे। ए मामला म पुलिस ह ड्राईवर ल गिरफ्तार कर लेहे।