प्रधानमंत्री-मुख्यमंत्री/मुख्य न्यायाधीश
प्रधानमंत्री नरेन्द्र मोदी ह अदालती फइसला म उहें के माने स्थानीय भासा ल बढ़ावा देके आह्वान करे हे। एखर ले न्यायिक व्यवस्था म आम लोगन मनके विश्वास बाढ़ही। नई दिल्ली म राखे गे राज्य मनके मुख्यमंत्री अउ उच्च न्यायालय के मुख्य न्यायाधीश मनके संयुक्त सम्मेलन के उद्घाटन सत्र ल संबोधित करत प्रधानमंत्री ह किहीन कि सरकार ह न्यायिक प्रणाली म प्रौद्योगिकी के संभावना ल डिजिटल इंडिया मिशन के जरूरी हिस्सा मानथे। ओमन किहीन कि ई-कोर्ट परियोजना ल मिसन के रूप म लागू करे जात हे। प्रधानमंत्री ह आजादी के पचहत्तर बछर पूरा होय उपर न्यायपालिका अउ कार्यपालिका के भूमिका अउ जिम्मेवारी ल घलो बतईन। ओमन किहीन कि अमृत काल म देस म अइसन न्यायिक व्यवस्था हो, जेमा जम्मों झन ल जल्दी न्याय मिल सकय।
ए मउका म देस के प्रधान न्यायाधीश एन.वी. रमण्णा ह घलो अपन विचार बांटीन।
मितान योजना-शुभारंभ
प्रदेस म काली एक मई ले मुख्यमंत्री मितान योजना सुरू होही। मुख्यमंत्री भूपेश बघेल ह ए योजना के सुभारंभ करही। योजना के तहत सहरी क्षेत्र म रहइया लोगन मन ल करीबन सौ ठिन सरकारी सेवा के लाभ घर बइठे मिल सकही। ए योजना म ड्राइविंग लाइसेंस, बिजली बिल, पानी बिल, राशन कार्ड, जाति प्रमाण पत्र अउ पेंसन ले जुड़े जम्मों सुविधा मन ह घर बइठे मिल जही। योजना के मुताबिक मितान मन ह लोगन मनके घर म जाही अउ ओमन ल सरकारी सुविधा के लाभ दीहीं। ए जम्मों कामकाज डिजिटल होही।
मजदूर दिवस-बोरे बासी
मुख्यमंत्री भूपेश बघेल के अपील उपर काली एक मई के मजदूर दिवस के मउका म देस-विदेस के कोना-कोना म बसे प्रदेस के लोगन मन ह ‘‘बोरे बासी‘‘ खाके मजूर मन ल सम्मान दीही। प्रदेस के सांसद, विधायक, जनप्रतिनिधि अउ युवा मन ह घलो बोरे बासी खाके अपन संस्कृति के प्रचार करही। संगेसंग सोसल मीडिया म ‘‘हैशटैग लेबर-डे दो हजार बाईस‘‘ ‘‘हैशटेग बोरे बासी‘‘ हैशटैग सीजी मॉडल‘‘ के माध्यम ले अपन फोटो या वीडियो सेयर करही। उहें, छत्तीसगढ़ होटल अउ रेस्टोरेंट एसोसिएशन ह घलो काली एक मई के उंखर इहां काम करइया करमचारी अउ उंखर परिवार मन बर बोरे-बासी के व्यवस्था करे के फइसला लेहे।
त ऐति, रईपुर के संस्कृति विभाग परिसर स्थित गढ़कलेवा के मीनू म काली ले ‘‘बोरे बासी थाली‘‘ घलो एक ठिन व्यंजन के रूप म जुड़ जही।
राज्यपाल अनुसुईया उइके अउ मुख्यमंत्री भूपेश बघेल ह मजूर दिवस के मउका म श्रमवीर मन ल बधाई अउ सुभकामना दे हवय।
अक्षय तृतीया-माटी पूजन दिवस
प्रदेस म अक्षय तृतीय के परब तीन मई ल ‘‘माटी पूजन दिवस अउ अक्ती तिहार‘‘ के रूप म मनाय जाही। ए मउका म कृषि महाविद्यालय रईपुर म राज्य स्तरीय समारोह राखे गेहे, जेमा मुख्यमंत्री अउ कृषि मंत्री ह सामिल होही। उहें, जम्मों ग्राम पंचायत, जनपद अउ जिला पंचायत स्तर म कारीकरम राख के परंपरागत रूप ले माटी के पूजापाठ करे जाही अउ ए मउका म धरती माता के रक्षा करे के सपथ घलो ले जाही।
एखर अलावा कृषि महाविद्यालय म अवइया जम्मों महाविद्यालय, अनुसंधान केन्द्र अउ कृषि विज्ञान केन्द्र के संगेसंग करीबन आठ जघा म तीन मई के अक्ती तिहार कारीकरम के आयोजन करे जाही। जिला के प्रमुख गौठान मन ल घलो ए कारीकरम ले जोड़े जाही। ए मउका म किसान, गौठान समिति अउ स्व-सहायता समूह के सदस्य मन ल आने-आने फसल के बीजा कृषि यंत्र बांटे जाही। कारीकरम के दउरान किसान मन ल प्रशिक्षण देके संगेसंग संगोष्ठी के घलो आयोजन करे जाही।
अस्पताल-प्रमाण पत्र
बढ़िया स्वास्थ्य सेवा अउ मरीज मन ल बने इलाज देवाय बर प्रदेस के पांच ठिन सरकारी अस्पताल मन ल केन्द्रीय स्वास्थ्य मंत्रालय ह राष्ट्रीय गुणवत्ता आश्वासन मानक प्रमाण पत्र देहे। एमा गौरेला-पेण्ड्रा-मरवाही जिला के आमाडांड, बस्तर के आड़ावाल अउ कांकेर जिला के कोटतरा प्राथमिक स्वास्थ्य केन्द्र के संगेसंग रईपुर के भाठागांव अउ दुरूग जिला के टंकी मरोदा सहरी प्राथमिक स्वास्थ्य केन्द्र सामिल हे।
ए सफलता उपर स्वास्थ्य मंत्री टी.एस. सिंहदेव ह जम्मों अस्पताल के अधिकारी अउ करमचारी मन ल बधाई दे हवय।
स्वामी आत्मानंद स्कूल
राज्य म एसो के सैक्षणिक सत्र ले पचास नवा स्वामी आत्मानंद अंग्रेजी मीडियम स्कूल खोले जाही। मुख्यमंत्री ह एक ठिन ट्वीट म ए बारे म जानबा दीन। ओमन लिखे हे कि आगू घलो जइसन जरूरत होही, उतका स्कूल तैयार करे जाही।
जानबा के मुताबिक प्रदेस म ए बेरा स्वामी आत्मानंद अंग्रेजी मीडियम स्कूल मन म प्रवेस के काम चलत हे। एक सौ इकहत्तर स्कूल मन म एक सौ छब्बीस स्कूल के चौबीस हजार ले जादा सीट मन बर करीबन डेढ़ लाख अरजी मिले हे।
ऐति, स्कूल सिक्षा विभाग के परमुख सचिव डॉक्टर आलोक शुक्ला ह स्वामी आत्मानंद स्कूल मनके प्राचार्य मन संग समीक्षा बइठका म किहीन कि स्कूल मन म नवा सिक्षा सत्र सुरू होय के पहिली सिक्षक मनके जम्मों खाली पद ल भर ले जाही अउ संगेसंग बारिस ले पहिली जम्मों स्कूल भवन मन ले जुड़े कामकाज ल पूरा करे के निरदेस दीन।
महापौर-पार्षद निधि
नगरीय निकाय मन म महापौर, अध्यक्ष अउ पार्षद निधि के पइसा ल बढ़ाके डेढ़ गुना करे के बारे म नगरीय प्रसासन अउ विकास विभाग डहार ले आदेस जारी कर दे गेहे। आदेस के मुताबिक तीन लाख ले जादा जनसंख्या वाले नगर निगम म महापौर निधि के रासि सवा दू करोड़ रूपिया, तीन लाख ले कम जनसंख्या वाले नगर निगम मन म महापौर निधि के रासि एक करोड़ बारह लाख रूपिया कर दे गेहे। अइसने, नगर पालिक निगम म पार्षद निधि छह लाख रूपिया, नगर पालिका म साढ़े चार लाख रूपिया अउ नगर पंचायत मन पार्षद निधि तीन लाख रूपिया कर दे गेहे। त उहें, नगर निगम म एल्डरमैन निधि साढ़े चार लाख, नगर पालिका म तीन लाख अउ नगर पंचायत म दू लाख पच्चीस हजार रूपिया करे गेहे।
हज यात्रा
मक्का मदीना के हज यात्रा बर प्रदेस के जम्मों अरजी करइया मनके आवेदन ल मंजूर कर ले गेहे। छत्तीसगढ़ हज कमेटी के अध्यक्ष मोहम्मद असलम खान ह बतईन कि एसो हज यात्रा बर छत्तीसगढ़ ले चार सौ इकतीस हज यात्री मन ह अरजी करे रिहीन। ओमन बतईन कि राज्य हज कमेटी डहार ले जल्दीच हज यात्री मन ले जरूरी कागजात मंगवाय जाही अउ टीकाकरण बर सिविर के आयोजन करे जाही।
खैरागढ़ महोत्सव
खैरागढ़ के इंदिरा कला संगीत विश्वविद्यालय म चलत चार दिन के खैरागढ़ महोत्सव आज सिरा जही। महोत्सव के आखिरी दिन आज महाराष्ट्र के लावणी नृत्य के प्रस्तुति के संगेसंग योगेश कुमार शंकर के शहनाई वादन अउ कलापिनी कोमकली के गायन होही। त उहें, महोत्सव के तीसर दिन काली पद्मश्री उस्ताद एफ. वसीफुद्दीन डागर के धु्रपद गायन ल सुनीन अउ छत्तीसगढ़ के लोक कलाकार दिलीप षडं़गी के लोक गीत ल अब्बड़ सहरईन।
बातों-बातों-में
प्रादेशिक समाचार एकांश के समसामयिक बिसय वाले कारीकरम ‘‘बातों-बातों-में‘‘ ह ए बखत रईपुर स्थित इंदिरा गांधी कृषि विश्वविद्यालय के कुलपति डॉक्टर गिरीश चंदेल ले बिसेस भेंटवार्ता के प्रसारण करे जाही। ए भेंटवार्ता कृषि सिक्षा अउ अनुसंधान के आने-आने पहलु उपर आधारित होही।
ए भेंटवार्ता के पहिली कड़ी के प्रसारण आकाशवाणी रईपुर डहार ले काली बिहनिया नौ बजके तीस मिनट म होही, जेला छत्तीसगढ़ के सबो आकाशवाणी केन्द्र एके संघरा रिले करही।
जिले की चिट्ठी
आकाशवाणी के रईपुर केन्द्र डहार ले काली संझा छह बजके तीस मिनट म ‘‘जिले के चिट्ठी‘‘ कारीकरम के प्रसारण करे जाही। समाचार एकांश के ए कारीकरम ल छत्तीसगढ़ स्थित आकाशवाणी के जम्मों केन्द्र रिले करही। ए बखत के अंक म बलौदाबाजार-भाटापारा जिला के बारे म जानबा दे जाही।
संक्षिप्त समाचार
– जनरल मनोज पांडे ह आज नवा सेनाध्यक्ष के पद्भार संभालीन। ओमन जनरल मनोज मुकुंद नरवणे के जघा लीहीं।
– प्रदेस कांग्रेस कमेटी ह अमरजीत चावला ल संगठन के नवा प्रभारी महामंत्री बनाय हे। एखर पहिली, चन्द्रशेखर शुक्ला ह ए जिम्मेवारी संभाले रिहीन।
अउ
– महासमुंद जिला म पुलिस ह आईपीएल क्रिकेट मैच के दउरान सट्टा खेलाय के आरोप म एक झिन ल गिरफ्तार करे हे। एखर तीर ले दस हजार रूपिया ले जादा के पइसा बरामद करे गेहे।