किसान भागीदारी-प्राथमिकता हमारी
प्रदेस म काली चौबीस अप्रैल ले ‘‘किसान भागीदारी-प्राथमिकता हमारी‘‘ अभियान चलाय जाही। एक मई तक चलइया ए अभियान म सासन के आने-आने योजना के फायदा देवाय के संगेसंग प्रधानमंत्री किसान सम्मान निधि योजना म पंजीयन कराय किसान, जउन किसान ल क्रेडिट कार्ड जारी नइ होय हे। अइसन किसान मन ल क्रेडिट कार्ड देवाय जाही। अभियान म पंचायत अउ ग्रामीण विकास विभाग कोति ले काली राज्य के जम्मों जिला के ग्राम पंचायत म बिसेस ग्राम सभा राखे जाही। ग्राम सभा के एजेंडा म प्रधानमंत्री किसान योजना के हितग्राही मन किसान कार्ड जारी करे के बिसय घलो सामिल रइही।
कृषि विभाग के संयुक्त सचिव के.सी. पैकरा ह संबंधित विभाग के अधिकारी ल केन्द्रीय कृषि विकास अउ कृषक कल्याण मंत्रालय कोति ले जारी दिसा-निरदेस के पालन करे के निरदेस दीन हे।
रासायनिक उर्वरक-स्वीकृति
केन्द्र सरकार ह खरीफ फसल दू हजार बाईस बर छत्तीसगढ़ सरकार के मांग के मुताबिक तेरह लाख सत्तर हजार मीटरिक टन रासायनिक खातू आपूर्ति के मंजूरी दे देहे। कृषि उत्पादन आयुक्त डॉक्टर कमलप्रीत सिंह के अगुवई म काली राखे बइठका म ए जानकारी दे गीस। बइठका म किसान मनके मांग के मुताबिक सबो किसम के रासायनिक खातू के उपलब्धता ल सुनिश्चित करे बर केहे गेहे। कृषि उत्पादन आयुक्त ह विभागीय अधिकारी अउ फर्टिलाइजन कंपनी के अधिकारी मन ल मिलके प्रदेस म उर्वरक के आपूर्ति सुनिश्चित करे के निरदेस दीन।
मन की बात
प्रधानमंत्री नरेन्द्र मोदी काली बिहनिया ग्यारह बजे आकाशवाणी ले ‘‘मन की बात‘‘ कारीकरम म देस-बिदेस के लोगन संग अपन विचार साझा करही। आकाशवाणी अउ दूरदर्शन के जम्मों चैनल म मन की बात के प्रसारण होही। आकाशवाणी समाचार, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म घलो कारीकरम के सोझे प्रसारण करे जाही। आकाशवाणी ले हिन्दी प्रसारण के तुरते बाद मन की बात के क्षेत्रीय भासा म प्रसारण होही। क्षेत्रीय भासा म एला रतिहा आठ बजे फेर ले सुने जा सकत हे।
केबल टेलीविजन नेटवर्क
केन्द्रीय सूचना अउ प्रसारण मंत्रालय ह सबो प्राईवेट सैटेलाइट टीवी चैनल ल सलाह देहे कि केबल टेलीविजन नेटवर्क विनियमन अधिनियम के प्रावधान के उल्लंघन करइया कोनों भी सामग्री के प्रसारण झन करय। मंत्रालय ह अपन परामर्श म केहे हे कि अभी सैटेलाइट चैनल ह घटना के कवरेज म अप्रमाणिक, भ्रामक, सनसनी खेज तरीका के परयोग करे हे। केबल टेलीविजन नेटवर्क अधिनियम के मुताबिक मित्र देस के बुरई धार्मिक या समुदाय के बुरई करइया कोनों भी कारीकरम केबल नेववर्क म नइ चलाय जाना चाही।
मुख्यमंत्री-धमधा
मुख्यमंत्री भूपेश बघेल ह आज दुरूग जिला के धमधा म पचपन करोड़ रूपिया के लागत के आने-आने विकास काम के लोकार्पण अउ भूमिपूजन करीन। एमा ग्यारह करोड़ रूपिया के लागत ले बने सब्जी-फल मंडी, पौने दू करोड़ रूपिया के लागत ले बने सामुदायिक स्वास्थ्य केन्द्र अउ वरिष्ठ कृषि विस्तार अधिकारी भवन के लोकार्पण सामिल हे। ए बेरा म मुख्यमंत्री ह धमधा के स्वास्थ्य केन्द्र ल पचास बिस्तर वाला बनाय बर धमधा कॉलेज म ऑडिटोरियम, स्टेडियम, तरिया के सौंदर्यीकरण के संगेसंग पीएससी, सेना अउ प्रतियोगी परीक्षा के कोचिंग सुभीता सुरू करे के घोसना करीन। कारीकरम म बोलत मुख्यमंत्री ह किहीन कि अब धमधा के पहिचान उद्यानिकी फसल ले हे।
केन्द्रीय राज्यमंत्री-सीएम मुलाकात
केन्द्रीय सिक्षा राज्यमंत्री डॉक्टर सुभाष सरकार ह मुख्यमंत्री भूपेश बघेल ले उंखर निवास कार्यालय म भेंट करीन। ए बेरा म डॉक्टर सरकार ह छत्तीसगढ़ म सिक्षा समेत स्वास्थ्य क्षेत्र म नवाचार के परयोग करत चलाय जात आने-आने योजना के प्रसंसा करीन। ए बेरा म मुख्यमंत्री ह किहीन कि छत्तीसगढ़ म लइका मनके सिक्षा के व्यवस्था ल बने बनाय बर कतकोन कारीकरम चलाय जात हे। पढ़ईया लइका मनके सुरूवाती सिक्षा के व्यवस्था उंखर पहुंच क्षेत्र म करवाय गेहे।
बातों-बातों-में
प्रादेशिक समाचार एकांश के समसामयिक बिसय वाले कारीकरम ‘‘बातों-बातों-में‘‘ ह ए बखत सशस्त्र सीमा बल के उप महानिरीक्षक सुधीर कुमार ले विशेष भेंटवार्ता प्रसारित करे जाही।
ए गोठबात के प्रसारण आकाशवाणी रईपुर डहार ले काली बिहनिया नौ बजके तीस मिनट म होही, छत्तीसगढ़ के सबो आकाशवाणी केन्द्र एके संघरा रिले करही।