प्रधानमंत्री सिविल सेवा दिवस
प्रधानमंत्री नरेंद्र मोदी ह कीहिन हे कि देश के एकता अउ अखंडता ले कोई समझौता नइ करे जा सकय। श्री मोदी ह आज सिविल सेवा दिवस म राखे गे पुरस्कार समारोह ल संबोधित करत कीहिन कि पाछू आठ बछर के दउरान सरकारी अभियान के सेती लोगन मनके व्यवहार म कतकोन बदलाव होय हे।
प्रधानमंत्री ह कीहिन कि भारत म एक लोकतांत्रिक बेवस्था हे अउ सिविल सेवा के अधिकारी मन आम लोगन के जीवन म बदलाव लाने बर काम करना चाही। ओमन कीहिन कि देश के हर जिला म अवइया पच्चीस बछर बर अपन लक्ष्य तय करना चाही। श्री मोदी ह जम्मों सरकारी अधिकारी मनके प्रयास ले देश ल नवा उंचाई तक ले जाये के आह्वान करीन।
गडकरी सड़क निर्माण
केंद्रीय राष्ट्रीय राजमार्ग अउ सड़क परिवहन मंत्री नितिन गडकरी ह आज रायपुर के चिकित्सा महाविद्यालय सभागार म आयोजित कार्यक्रम म प्रदेश बर नौ हजार दू सौ चालीस करोड़ रूपिया के तैंतीस ठन सड़क परियोजना मनके लोकार्पण अउ शिलान्यास करीन।
ए मउका म केंद्रीय मंत्री श्री गडकरी ह रायपुर ले दुर्ग के बीच केबल के जरिया ले बस चलाये के प्रस्ताव दीन, जेमा किराया आधा ले कम लगे के अनुमान हे। श्री गडकरी ह रेलवे ओवर ब्रिज बर तीन सौ करोड़ रूपिया दे जाय के घलो घोषणा करीन। केंद्रीय मंत्री ह कीहिन कि छत्तीसगढ़ ल ओडिशा ले जोड़ने वाला राष्ट्रीय राजमार्ग बनाय उपर घलो विचार करे जावत हे।
केंद्रीय मंत्री ह कीहिन कि माओवादी ल समाप्त करे बर प्रभावित क्षेत्र म उद्योग लगाके आदिवासी मन ल रोजगार दे जाय के जरूरत हे ।
श्री गडकरी ह कीहिन कि विकास के गति ल बढ़ाय खातिर गांव मन ल सड़क ले जोड़ना बहुत जरूरी हे। ओमन कीहिन कि छत्तीसगढ़ म ए बखत रायपुर ले विशाखापट्नम तक राजमार्ग बनाये जावत हे। दूसर सड़क रायपुर ले धनबाद तक बनइया हे। ओमन ह एथेनॉल ल भविष्य के इंधन बतावत कीहिन कि गाड़ी मन म घलो एला वैकल्पिक इंधन के रूप म उपयोग करे जा सकत हे।
स्कूल ग्रीष्म अवकाश
प्रदेश म पड़त गर्मी ल देखत स्कूल शिक्षा विभाग ह सबो सरकारी अउ निजी स्कूल मन म अवइया चौबीस अप्रैल ले चौदा जून तक ग्रीष्म अवकाश दे जाय के फैसला ले हवय। विभाग डहार ले जारी संशोधित आदेश म केहे गे हावय कि स्कूल मन म कुछएक विषय म वर्तमान सत्र के अंतिम मूल्यांकन पच्चीस अप्रैल के करना हे। ओ विषय म जउन विद्यार्थी मन स्वेच्छा ले स्कूल जाना चाहत हे, उंखर मूल्यांकन निर्धारित बेरा म करे जाही । एखर बाद अवइया शिक्षा सत्र बर स्कूल मन पंद्रा जून ले खुलही। ये आदेश सरकारी अउ निजी दूनो स्कूल बर लागू होही।
मुख्यमंत्री लू निर्देश
प्रदेश म भीषण गर्मी ल देखत मुख्यमंत्री भूपेश बघेल ह स्वास्थ्य विभाग अउ नगरीय निकाय मन ल सावधानी बरते के निर्देश दीन। मुख्यमंत्री ह नगरीय निकाय ले केहे हे कि सार्वजनिक जगा म लू ले लोगन ल बचाय खातिर पीये के पानी के बेवस्था करे जाय। श्री बघेल ह स्वास्थ्य विभाग ले घलो कीहिन हे कि गर्मी के सेती होवइया बीमारी ले लोगन मन ल बचाये बर अस्पताल मन म बने बेवस्था करे जाय।
राज्यपाल-लोककला महोत्सव
राज्यपाल अनुसुईया उइके ह काली बिलासपुर जिला के करगी रोड कोटा के डॅाक्टर सी.वी. रमन विश्वविद्यालय म तीन दिन के रमन लोककला महोत्सव के शुरूआत करीन। कार्यक्रम म राज्यपाल ह कीहिन कि आदिवासी कला अउ संस्कृति छत्तीसगढ़ के विशेष पहिचान हे। ओमन कीहिन कि ये गर्व के बात हे कि आज देश-विदेश म आदिवासी संस्कृति ल सम्मान के संग स्वीकार करे जावत हे। छत्तीसगढ़ म होय विश्व स्तरीय आदिवासी महोत्सव जइसन आयोजन ले छत्तीसगढ़ के संस्कृति के खुशबू दुनिया भर म फैलत हवय।
जनजातीय साहित्य सम्मेलन
राजधानी रायपुर के पंडित दीनदयाल उपाध्याय ऑडिटोरियम म चलत तीन दिन के राष्ट्रीय जनजातिय साहित्य महोत्सव आज सिरावत हे। अबले थोरकुन देर बाद होवइया समापन समारोह म राज्यपाल अनुसूइया उइके एमा मुख्य अतिथि होही। समापन समारोह के अध्यक्षता केंद्रीय जनजातिय कार्य राज्यमंत्री रेणुका सिंह ह करही। प्रदेश के आदिम जाति विकास मंत्री डॅाक्टर प्रेमसाय सिंह टेकाम ह विशिष्ट अतिथि के रूप म मौजूद रीही। ये मउका म जनजातिय बाल कलाकार सहदेव नेताम के गायन होही।
एखर पहिली राष्ट्रीय जनजातिय साहित्य महोत्सव के आखिरी दिन आज बीहनिया के सत्र म आदिवासी स्वाधीनता सेनानी मनके अलावा स्वाधीनता आंदो लन म आदिवासी मनके संघर्ष अउ योगदान उपर शोधपत्र पढ़े गीस। एखर बाद छत्तीसगढ़ म जनजातिय साहित्य के वर्तमान स्थिति अउ एला सहेजे के बारे म परिचर्चा होइस। संझा के सत्र म जनजातिय जीवन उपर आधारित काव्य नाटिका लमझना‘ के मंचन के संग जनजातिय नृत्य घलो प्रस्तुत करे गीस।
अमृत महोत्सव-वेबीनार
आजादी के अमृत महोत्सव म रायपुर के पत्र सूचना कार्यालय अउ प्रादेशिक लोक संपर्क कार्यालय डहार ले क्षेत्रीय लोक संपर्क कार्यालय- अंबिकापुर के सहयोग ले आज एक ठन वेबिनार के आयोजन करे गीस। ‘गर्मियों के दिनों में स्वास्थ्य रक्षा संबंधी उपाय‘ विषय म राखे गे ये वेबिनार ल अंबिकापुर के आयुष चिकित्सा अधिकारी डॅाक्टर मुकेश माहौर अउ डॅाक्टर सुनील मंदिलवार ह संबोधित करीन। कार्यक्रम के संचालन प्रादेशिक लोक संपर्क कार्यालय के प्रमुख शैलेष फाये ह करीन।
मुख्यमंत्री गोधन न्याय योजना
गोधन न्याय योजना म गोबर खरीदी अउ लाभांश वितरण के रूप म मुख्यमंत्री भूपेश बघेल ह प्रदेश के पशुपालक, ग्रामीण गोठान समिति अउ महिला समूह मन ल काली साढ़े छै करोड़ रूपिया के ऑनलाईन भुगतान करीन। मुख्यमंत्री निवास कार्यालय म राखे गे कार्यक्रम म लाभार्थी मन ल भुगतान करे के बाद श्री बघेल ह कीहिन कि गोधन न्याय योजना के चर्चा देश के दूसर राज्य मन म घलो होवत हे। मुख्यमंत्री ह छत्तीसगढ़ के गोधन न्याय योजना ल राष्ट्रीय पुरस्कार मिले म अपन खुशी जाहिर करत गोधन न्याय योजना ले जुड़े सबो लोगन ल बधाई अउ शुभकामना दीन।
बालवाड़ी योजना कार्यशाला
प्रदेश म बालवाड़ी योजना ल सफलतापूर्वक लागू करे के उद्देश्य ले रायपुर म दू दिन के कार्यशाला कराये गीस। राज्य शैक्षिक अनुसंधान अउ प्रशिक्षण परिषद डहार ले राखे गे ए कार्यशाला म देश के आने आने राज्य ले आये शिक्षाविद् मन ह अपन विचार प्रस्तुत करीन। ये विशेषज्ञ मनके सुझाव रीहिस कि लईका मन ल स्थानीय भाखा म सीखे के मउका दे जाना चाही।
ओमन यहू घलो कीहिन कि बालवाड़ी योजना के हर तीन महीना म समीक्षा करे जाना चाही। संगेसंग लईका मन ल बने ढंग ले सिखाये खातिर बालवाड़ी के शिक्षक मन डहार ले ही ओमन ल पहिली अउ दूसरी कक्षा म पढ़ाय के जिम्मेदारी दे जाना चाही।
वन जांच समिति
मरवाही वनमंडल के अंतर्गत कैम्पा मद ले पाछू चार बछर म कराए गे काम के जांच बर समिति बनाय गेहे। ए संबंध म मिले शिकायत ल गंभीरता ले लेवत वन मंत्री मोहम्मद अकबर ह तुरते जांच करके आवश्यक कार्रवाई करे के निर्देश दीन हे। समिति डहार ले मरवाही वनमंडल क्षेत्र म करे गे आने-आने काम के गुणवत्ता ले जुड़े अभिलेख के जांच करे जाही। जांच समिति ल एक हफ्ता के भीतर रिपोर्ट जमा करे बर केहे गेहे।
बिलासपुर गोलीकांड
बिलासपुर के गोड़पारा इलाका म आज दिनदहाड़े तीन आरोपी मन ह एक सराफा दुकान म लूट के घटना ल अंजाम देके बाद दुकानदार उपर गोली चलाके घायल कर दीस। घायल सराफा कारोबारी ल शहर के एक निजी अस्पताल म भर्ती कराय गेहे। बिलासपुर रेंज के पुलिस महानिरीक्षक रतनलाल डांगी अउ वरिष्ठ पुलिस अधीक्षक पारूल माथुर ह सूचना मिलतेच मउका म पहुंचीन। घटना के बाद आसपास के लोगन ह आरोपी ल पकड़ लीन। उंहें दू झिन आरोपी मन फरार हो गीन। पुलिस ह पकड़े गे आरोपी तीर ले एक ठन देशी कट्टा जब्त करे हे।
गांजा बरामद
धमतरी पुलिस ह प्रदेश म गांजा बरामद करे के अभी तक के सबले बड़े कार्रवाई करत साढ़े दस कुंटल गांजा के संग दू झन आरोपी मन ल गिरप्तार करीन हे। जब्त करे गे गांजा के कीमत करीबन दू करोड़ ग्यारा लाख रूपिया बताये जावत हे। मिले जानकारी के अनुसार जिला के बोराई थाना क्षेत्र म आज ओडिशा ले आवत एक ठन ट्रक ल संदेह के आधार म रोके गीस। तलाशी के दउरान एमा साढ़े दस कुंटल गांजा बरामद करे गीस। ए मामला म पकड़े गे दू झिन आरोपी मन राजस्थान के निवासी हवय।