केन्द्र स्वास्थ्य मेला
केंद्रीय स्वास्थ्य अउ परिवार कल्याण मंत्रालय आज ले देशभर म ब्लॉक स्तर म स्वास्थ्य मेला लगावत हे। ये मेला के आयोजन एक लाख ले जादा आयुष्मान भारत स्वास्थ्य अउ आरोग्य केंद्र म करे जाही। एखर आयोजन जम्मों राज्य अउ केंद्रशासित प्रदेश, शिक्षा, महिला अउ बाल विकास, सूचना अउ प्रसारण, पंचायती राज अउ आयुष मंत्रालय मिलके करत हे।
आकाशवाणी समाचार संग विशेष भेंट म स्वास्थ्य अउ परिवार कल्याण मंत्री मनसुख मांडविया ह कीहिन कि ब्लॉक स्तर म ये मेला ल आजादी के अमृत महोत्सव म आयोजित करे जात हे। एखर उद्देश्य आयुष्मान भारत स्वास्थ्य अउ आरोग्य केंद्र के सुविधा के संबंध म लोगन ल जागरूक करना हे।
मुख्यमंत्री समीक्षा बैठक
मुख्यमंत्री भूपेश बघेल ह श्री धनवंतरी जेनेरिक मेडिकल स्टोर योजना के समीक्षा के बेरा सरकारी अस्पताल मन म जेनेरिक दवई के जगा म ब्रांडेड दवई लिखे म नाराजगी जताइन हे। ओमन कीहिन कि जउन सरकारी डॅाक्टर ब्रांडेड दवई लिखत हे उंखर उपर कड़ा कार्रवाई करे जाही। मुख्यमंत्री के निर्देश के बाद स्वास्थ्य विभाग के प्रमुख सचिव ह तुरते जम्मों कलेक्टर अउ सीएचएमओ ल निर्देश जारी करत कीहिन कि ये निश्चित करे जाय कि डॅाक्टर सिरिफ जेनेरिक दवई लिखंय। मुख्यमंत्री ह आज अपन निवास कार्यालय म नगरीय प्रशासन विकास विभाग अउ पर्यावरण आवास विभाग के समीक्षा बइठका म ये निर्देश दीन। बइठका म बताये गीस कि प्रदेश के नौ नगर निगम म पांच सौ वर्गमीटर तक के आवासीय भुंइया म निर्माण बर ऑनलाईन भवन अनुज्ञा प्रणाली लागू करे गेहे। जेखर ले अब तक तीन हजार सात सौ इकहत्तर भवन अनुज्ञा जारी करे गेहे। बइठका म मुख्यमंत्री ह लोक सेवा गारंटी अधिनियम म नगरीय निकाय कोति ले नागरिक मन ल मिलइया जादा ले जादा सेवा ल ऑनलाईन करे के निर्देश दीन। मुख्यमंत्री ह यहू कीहिन कि ले आउट पास कराय के अधिकार नगर निगम ल दे जाही। अभी तक टाउन एंड कंट्री प्लानिंग विभाग कोति ले लेआउट पास करे जात रीहिस हे, जेखर ले दू-दू ठन कार्यालय के चक्कर लगाय बर पड़य। बइठका म मुख्यमंत्री ह नगरी निकाय के संपत्ति ल फ्री होल्ड करे के फैसला लीन। अभी तक नगरीय निकाय के संपत्ति लीज म दे जात रीहिस हे , ये फैसला ले लाखों लोगन ल फायदा मिलही।
मुख्यमंत्री कोति ले लेगे फैसला के मुताबिक अब नगरीय निकाय के मुख्य नगर पालिका अधिकारी राजपत्रित अधिकारी घोषित करे जाही। खबर के मुताबिक नगरीय प्रशासन मंत्री डॅाक्टर शिवकुमार डहरिया ह मुख्यमंत्री ले मुख्य नगर पालिका अधिकारी ल राजपत्रित अधिकारी घोषित करे के मांग करे रीहिन जेमा मुख्यमंत्री ह आज मंजूरी दे देहें।
माओवादी मुठभेड़/हत्या
बीजापुर जिला म पाछू रतिहा पुलिस अउ माओवादी मनके बीच होय मुठभेड़ म चार झिन जवान घायल होगे हे। गंभीर रूप ले घायल दू झिन जवान ल रायपुर लाय गेहे। उंहे दू आने जवान के बीजापुर अस्पताल म इलाज होवत हे।
खबर के मुताबिक ये घटना जिला के कुटरू थाना क्षेत्र के दरभा कैम्प के हावय। जिहां पाछू रतिहा करीबन ग्यारा बजे माओवादी मन ह सुरक्षा बलके कैम्प म फायरिंग शुरू कर दीन। जुवाबी कार्रवाई करत जवान मन घलो माओवादी मन उपर फायरिंग करीन। एखर बाद माओवादी भाग गे । ये मुठभेड़ म पुलिस के चार झिन जवान घायल होगे, जेमा दू जवान ल रायपुर के अस्पताल म भर्ती कराय गेहे अउ दू झिन के इलाज बीजापुर के अस्पताल म होवत हे।
इही बीच बीजापुर जिला म पुलिस ह आज आठ झिन माओवादी ल गिरप्तार करे हे। पुलिस के मुताबिक ये माओवादी मंगापेंटा अउ बरगापारा के बीच आगजनी के घटना म शामिल रीहिन।
एति सुकमा जिला के कोलाइगुड़ा क्षेत्र म माओवादी मन ह गांव के एक मनखे के हत्या कर देहे। पुलिस अधीक्षक सुनील शर्मा ह बताइन कि मउत होय ग्रामीण कई बछर ले तेलंगाना म रहत रीहिस हे। कुछएक दिन पहिली अपन रिश्तेदार के इंहा आय रीहिस, इही बेरा माओवादी मन ह ये घटना ल अंजाम दीन।
विश्व धरोहर दिवस
आज विश्व धरोहर दिवस हरय। ए मउका म आज राजधानी रायपुर के महंत घासीदास स्मारक संग्रहालय परिसर म संस्कृति अउ पुरातत्व विभाग कोति ले व्याख्यान कार्यक्रम राखे गीस, जउन छत्तीसगढ़ के शैलकला म प्रदर्शनी अउ धरोहर के संरक्षण म आधारित रीहिस।
उंहें बिलासपुर जिला के रतनपुर के एतिहासिक किला म भारतीय पुरातत्व सर्वेक्षण रायपुर मंडल कोति ले विश्व धरोहर दिवस के मउका म जागरूकता कार्यक्र्रम राखे गीस। कार्यक्रम म रायपुर मंडल के मुख्य अधिकारी डॅाक्टर कारबी साहा ह बताइन कि विश्व धरोहर दिवस एसो विरासत अउ जलवायु के थीम म मनाये जात हे। जेखर उद्देश्य जलवायु परिवर्तन ले विश्व धरोहर ल होवइया खतरा बर लोगन ल जागरूक करना हे। ये बेरा म छात्र-छात्रा मनके बीच निबंध प्रतियोगिता घलो राखे गीस।
सुनील सोनी-पत्रकार वार्ता
भाजपा सांसद सुनील सोनी ह कीहिन हे कि केंद्र सरकार हरएक बछर राज्य के आय ले जादा रकम छत्तीसगढ़ ल देवत हे। ओमन कीहिन कि केंद्र सरकार कोति ले राज्य ल जउन रकम दे जात हे, वो पाछू तीन बछर म कांग्रेस शासन म कुल आय ले जादा रीहिस।
खबर के मुताबिक राज्य के कांग्रेस सरकार ह केंद्र कोति ले मिलइया बजट म छत्तीसगढ़ के हिस्सा म कटौती करे के आरोप लगाय रीहिस। इही मामला म सांसद सुनील सोनी ह आज रायपुर म पत्रकार मन संग गोठबात करत कांग्रेस के आरोप के जुवाब म ये बात कीहिन । ओमन कीहिन कि एसो के केंद्रीय बजट म केंद्र सरकार ह राज्य के विकास खातिर दू लाख ब्यानबे हजार करोड़ रूपिया के रकम अलग ले पूंजीगत व्यय बर आबंटित करे हे। जेमा आठ हजार करोड़ रूपिया के अलग ले फायदा छत्तीसगढ़ ल मिलइया हे। श्री सोनी ह यहू कीहिन कि केंद्र ले मिलइया ग्रांट म हरएक बछर नै प्रतिशत के बढ़वार होवत हे अउ पहिली ले छत्तीसगढ़ ल केंद्र ले एक सौ अठहत्तर प्रतिशत रकम जादा मिलत हे।
हाथी आतंक
जशपुर जिला के पत्थलगांव इलाका म जंगली हाथी के आतंक पाछू हफ्ता भर ले चलत हे। पाछू दिन हाथी मन ह ये इलाका के कई ठन घर ल नकसान पहुंचाय हे, संगेसंग फसल ल घलो बर्बाद कर देहे। एखर सेती गांव के लोगन म दहशत हवय।
वन विभाग ले मिले जानकारी के मुताबिक जिला के लुडेंग क्षेत्र म पांच हाथी के दल घूमत हे। विभाग कोति ले गांव के लोगन ल हाथी के दल ले दूरिहा रेहे बर चेताय गेहे।
आंगनबाड़ी केंद्र जांच
महिला अउ बाल विकास मंत्री अनिला भेंडिया ह बालोद के भैंसबोड़ आंगनबाड़ी केंद्र म लईका मनके घायल होय के घटना ल गंभीरता ले लेवत कलेक्टर ल घटना के जांच करके दोषी मनके खिलाफ कार्रवाई करे के निर्देश दीन हे। श्रीमती भेड़िया ह घायल लईका मनके इलाज अउ बने देखभाल के निर्देश देवत अइसन घटना फेर कभू झन होवय ये सुनिश्चित करे बर कीहिन।
खबर के मुताबिक बालोद जिला के भैंसबोड़ आंगनबाड़ी केंद्र म पाछू दिन टाइल्स गिरे ले पांच झिन लईका ल गंभीर चोट आय रीहिस। घटना के बाद घायल लईका मन मल इलाज बर बालोद जिला अस्पताल म भर्ती कराय गे रीहिस हे।
जनजातीय साहित्यकार महोत्सव
राजधानी रायपुर म काली उन्नीस अप्रैल ले तीन दिवसीय राष्ट्रीय जनजातीय साहिस्यकार महोत्सव के आयोजन करे जाही। पंडित दीनदयाल उपाध्याय ऑडिटोरियम म राखे गे ये महोत्सव के शुभारंभ मुख्यमंत्री भूपेश बघेल करहीं।
आदिम जाति अनुसंधान अउ प्रशिक्षण संस्थान कोति ले होवत ये महोत्सव म प्रदेश के आने आने क्षेत्र के जनजातिय समुदाय ले जुड़े मनखे, समाज के प्रमुख अउ साहित्यकार मन ल बलाय गेहे। ये बेरा म कतकोन सांस्कृतिक कार्यक्रम होही। जेमा बस्तर बैण्ड के प्रदर्शन अउ जनजातीय नृत्य होही। संगेसंग चित्रकला प्रतियोगिता अउ किताब मेला के संग आने आने विभाग के प्रदर्शनी लगाय जाही।
केंद्रीय मंत्री प्रवास
भारतीय जनता पार्टी के सामाजिक समरसता कार्यक्रम म भाग लेबर प्रदेश म आजले चार झिन केंद्रीय मंत्री छत्तीसगढ़ दउरा म हवय। दू दिवसीय दउरा के बेरा जम्मों मंत्री आकांक्षी जिला म केंद्र सरकार के योजना के सबंध म जानकारी लीही।
दू दिवसीय दउरा के बेरा जम्मों मंत्री प्रदेश के भाजपा पदाधिकारी अउ कार्यकर्ता मनले भेंट करहीं।