मुख्यमंत्री-घोषणा
खैरागढ़-छुईखदान-गंडई नवा जिला बन गेहे। मुख्यमंत्री भूपेश बघेल ह काली खैरागढ़ विधानसभा उपचुनाव के परिणाम घोसित होय के बाद काली रईपुर म एला नवा जिला बनाय के ऐलान करीन। ए प्रदेस के तैंतीसवां जिला होही। संगेसंग मुख्यमंत्री ह साल्हेवारा ल पूर्ण तहसील अउ जालबांधा ल उप तहसील बनाय के घलो घोसना करीन। ए मउका म ओमन किहीन कि नवा जिला बने ले प्रसासनिक कामकाज म तेजी आही। उहें, विकास अउ निर्माण काम मन ल गति मिलही।
राजस्व सचिव नीलम नामदेव एक्का ह बतईन कि मुख्यमंत्री के घोसना के अनुरूप खैरागढ़-छुईखदान-गंडई जिला के प्रक्रिया राजस्व विभाग डहार ले सुरू कर दे गेहे।
बतादन कि राज्य के कांग्रेस सरकार ह अपन सवा तीन साल के कार्यकाल म अब तक छै ठिन नवा जिला बनाय के घोसना करे हे।
मुख्यमंत्री-बलौदाबाजार
इही बीच, मुख्यमंत्री भूपेश बघेल ह किहीन हे कि राज्य म जल्दी सारंगढ़-बिलाईगढ़ जिला अस्तित्व म आ जही। एखर बर तुरते ओएसडी के नियुक्ति करे जाही। मुख्यमंत्री आज बलौदाबाजार-भाटापारा जिला के ग्राम सलौनीकला म राखे गे चंद्रनाहू विकास महासमिति के वार्षिक अधिवेशन ल संबोधित करत रिहीन। ए मउका म ओमनर सलौनीकला गांव म सामाजिक भवन बर तीस लाख रूपिया मंजूर करीन।
मुख्यमंत्री-गरियाबंद
मुख्यमंत्री भूपेश बघेल आज गरियाबंद जिला के छुरा विकासखंड के ग्राम बोडराबांधा म राखे गे अखिल भारतीय गोंड समाज के महाधिवेशन म सामिल होईन। ए दउरान ओमन कचना धुरवा, गोंडवाना समाज भवन बर एक करोड़ सात लाख रूपिया देय के घोसना करीन। कारीकरम ल संबोधित करत श्री बघेल ह किहीन कि राज्य सरकार आदिवासी समाज के विकास अउ ओमन के हित के संरक्षण बर दृढ़ संकल्पित हरय। ओमन समाज के लोगन मन ले आह्वान करीन कि समर्थन मूल्य ले कम म महुआ या दूसर कोनों भी लघु वनोपज मत बेचय।
उहें, मुख्यमंत्री आज रईपुर जिला के ग्राम टीला म राखे गे छत्तीसगढ़ मनवा कुर्मी क्षत्रिय समाज चंदखुरी राज के महाअधिवेशन म घलो सामिल होईन। ए मउका म ओमन किहीन कि चंपारण ल राम वनगमन पथ सर्किट म सामिल करे जाही। संगेसंग कौशल्या माता के जनम के सही तिथि ल पता करके आने वाले समय म कौशल्या माता जन्म उत्सव मनाय जाही। मुख्यमंत्री ह टीला-हथखोज सड़क उपर महानदी म पुल बनाय के घोसना करीन। एखर अलावा ओमन मनवा कुर्मी क्षत्रिय समाज के सामाजिक भवन बर बीस लाख रूपिया के मंजूरी घलो दीन।
लोकवाणी
मुख्यमंत्री भूपेश बघेल ह आज आकाशवाणी ले प्रसारित अपन मासिक रेडियोवार्ता ‘‘लोकवाणी‘‘ के अट्ठाईसवां कड़ी म प्रदेसवासी मन ल संबोधित करत किहीन कि राज्य सरकार के नवा बजट, नवा छत्तीसगढ़ के विकास के दिसा तय करने वाला हरय। सरकार ए सुनिश्चित करही कि खुसहाली म जनभागीदारी के सबले जादा भूमिका हरय अउ प्रदेस के समृद्धि म हरेक प्रदेसवासी के भागीदारी हरय। मुख्यमंत्री ह किहीन कि सरकार ह कोरोना संकट, जीएसटी अउ केन्द्रीय कर के हिस्सा म कमी के बावजूद अउ जादा राजस्व के बजट प्रस्तुत करे हे।
आज प्रसारित लोकवाणी ‘‘नवा छत्तीसगढ़-नवा बजट‘‘ बिसय उपर केन्द्रित रिहीस। मुख्यमंत्री ह लोकवाणी म श्रोता मनके जिज्ञासा के जवाब देवत छत्तीसगढ़ के आर्थिक स्थिति के जानकारी दीन।
जनजातीय साहित्यकार महोत्सव
राजधानी रईपुर म परन दिन उन्नीस अप्रैल ले तीन दिन के राष्ट्रीय जनजाति साहित्यकार महोत्सव के आयोजन करे जाही। पंडित दीनदयाल उपाध्याय ऑडिटोरियम म राखे गे ए महोत्सव के सुभारंभ मुख्यमंत्री भूपेश बघेल करही।
आदिम जाति अनुसंधान अउ प्रसिक्षण संस्थान डहार ले होवइया ए महोत्सव म प्रदेस के आने-आने क्षेत्र मनके जनजातीय समुदाय ले जुड़े व्यक्ति, समाज प्रमुख अउ साहित्यकार मन ल आमंत्रित करे गेहे। ए दउरान सांस्कृतिक कारीकरम घलो होही। एमा बस्तर बैंड के प्रदर्सन अउ जनजातीय नृत्य मुख्य आकर्षण होही। संगेसंग चित्रकला प्रतियोगिता घलो होही। एखर अलावा पुस्तक मेला अउ आने-आने विभाग मनके प्रदर्सनी लगाय जाही।
कोरोना समाचार
छत्तीसगढ़ म काली कोरोना संक्रमण के कोनों भी नवा मामला आगू नइ आईस। प्रदेस म ए बेरा कोरोना के सक्रिय मरीज मनके संख्या घटके सोलह होगे हे। राज्य के बीस जिला मन म कोरोना के एको ठिन सक्रिय मरीज नइ हे। रईपुर, दुरूग, रायगढ़ जिला म जिहां तीन-तीन सक्रिय मरीज हे। उहें, बिलासपुर अउ कोरबा जिला म दू-दी अउ सूरजपुर, जशपुर अउ बस्तर जिला म कोरोना के एक-एक सक्रिय मरीज मनके इलाज चलत हे।
इही बीच, राज्य म कोरोना टीकाकरण अभियान सरलग चालू हवय। प्रदेस म कोरोना ले बचाव खातिर अब तक तीन करोड़ अंठानवे लाख सैंतीस हजार ले जादा टीका लगाय जा चुके हे।
विश्व धरोहर दिवस
काली विश्व धरोहर दिवस हवय। ए मउका म काली राजधानी रईपुर के महंत घासीदास स्मारक संग्रहालय परिसर रईपुर म संस्कृति अउ पुरातत्व विभाग डहार ले व्याख्यान कारीकरम के आयोजन करे गेहे। ए व्याख्यान छत्तीसगढ़ के सैल कला उपर प्रदर्सनी अउ धरोहर मनके संरक्षण उपर आधारित होही।
शिवनाथ नदी-महाआरती
नदी मनके संवर्धन अउ जल संरक्षण के उद्देश्य ले राजनांदगांव जिला के मोहारा स्थित शिवनाथ नदी के तट उपर भगवान भोलेनाथ अउ गंगा मईया के महाआरती के कारीकरम राखे गीस। एमा बड़का संख्या म समाजसेवी अउ आम जनता मन सामिल होके जल संरक्षण के संकल्प लीन।
दुर्घटना
प्रदेस म आज होय दू ठिन अलग-अलग सड़क दुर्घटना मन म चार मनखे मनके मउत होगे। उहें, तीन झिन दूसर लोगन मन घायल होगे।
मिले जानकारी अनुसार जांजगीर-चांपा जिला के पकरिया झूलन गांव म एक तेज रफ्तार कार अनियंत्रित होगे पलट गीस। ए घटना म तीन मनखे मनके मउकाच म मउत होगे। जबकि तीन झन दूसर मन घायल होगे। एमन जम्मों पचपेड़ी गांव के रहइया हरय।
उहें, रायगढ़-खरसिया राष्ट्रीय राजमार्ग म कुनकुरी करा ट्रेक्टर के टक्कर ले मोटर सायकल सवार एक मनखे के मउत होगे।
नायब तहसीलदार-कार्रवाई
छत्तीसगढ़ सिविल सेवा आचरण नियम के विरूद्ध आचरण के आरोप म मस्तुरी के नायब तहसीलदार ल अवइया आदेस तक जिला कार्यालय भू-अभिलेख शाला बिलासपुर म संलग्न करे गेहे। संगेसंग कलेक्टर ह आरोपी नायब तहसीलदार ल तत्काल प्रभाव ले निलंबित करे बर ओमन के विरूद्ध कड़ा कार्रवाई के प्रस्ताव बिलासपुर संभाग के कमिश्नर ल भेजे हवय।
बिलासपुर-कमिश्नर वार्ता
‘‘सरगुजा संभाग की अट्ठारह सौ संतावन की क्रांति में योगदान‘‘ बिसय उपर बिलासपुर संभाग के कमिश्नर अउ इतिहासकार डॉक्टर संजय अलंग के वार्ता के प्रसारण बीस अप्रैल के रईपुर दूरदर्शन डहार ले करे जाही। ए वार्ता बुधवार के संझा छह बजे डीडी फ्री-डिश अउ डिश टीवी म प्रसारित होही। प्रसारण के बाद एला यू-ट्यूब म घलो देखे जा सकही।
मौसम
प्रदेस के दक्षिणी क्षेत्र म अवइया चौबीस घंटा के दउरान एक-दू स्थान म हल्का बरसा होय या गरज-चमक के संग छींटा पड़े के संभावना हे। उहें, प्रदेस के बिलासपुर, मुंगेली, पेण्ड्रा अउ एखर ले लगे जिला मन म अधिकतम तापमान म बढ़ोतरी हो सकत हे।
अउ अब थोरकुन समाचार सार म-
– दुनियाभर म आज ईस्टर मनाय जात हे। ए मउका म गिरिजा घर मन म मध्यरात्रि के बिसेस प्रार्थना करे गीस। राष्ट्रपति रामनाथ कोविंद, उप राष्ट्रपति एम. वेकैंया नायडु, प्रधानमंत्री नरेन्द्र मोदी अउ छत्तीसगढ़ के मुख्यमंत्री भूपेश बघेल ह ईस्टर के मउका म बधाई दीन।
– मुख्यमंत्री भूपेश बघेल ह भारत के पूर्व राष्ट्रपति अउ सिक्षाविद् भारत रत्न डॉक्टर सर्वपल्ली राधाकृष्णन ल आज ओमन के पुण्यतिथि म नमन करीन हे।
– आम आदमी पार्टी के सांसद डॉक्टर संदीप पाठक छत्तीसगढ़ चुनाव प्रभारी गोपाल राय अउ प्रदेस प्रभारी संजीव झा काली बिलासपुर पहुंचही। ए दउरान रोड शो, बाइक रैली अउ सभा के आयोजन करे जाही।
अउ
– राज्य म कस्टम मिलिंग बर अब तक करीब अंठानवे लाख मीटरिक टन धान के उठाव हो चुके हे। उहें, केन्द्रीय पुल म लगभग सैंतीस लाख मीटरिक टन चावल जमा कराय जा चुके हे।