खैरागढ़ उपचुनाव
खैरागढ़ विधानसभा उपचुनाव म कांग्रेस के यशोदा वर्मा ह जीत हासिल करे हे। ओमन अपन निकटतम प्रतिद्वंदी भाजपा के कोमल जंघेल ल बीस हजार एक सौ उनसठ वोट ले हरईन। श्रीमती वर्मा ल कुल सत्यासी हजार छह सौ चालीस वोट मिलीस। उहें, श्री बघेल ल सड़सठ हजार चार सौ इक्यासी मत मिले हे। श्रीमती वर्मा पहिली राउंड ले बढ़त बनाय रिहीन, जउन ह आखिरी राउंड तक कायम रिहीस। ए उपचुनाव म आने आठ झिन उम्मीदवार मनके जमानत जब्त होगे हे। राजनांदगांव स्थित राज्य बीज विकास निगम के गोदाम म बनाय गे मतगणना केन्द्र म आज बिहनिया आठ बजे ले मतगणना सुरू होईस, जिहां सुरक्षा के कड़ा इंतजाम राखे गे रिहीस। इहां ए बतादन कि ए उपचुनाव बर पाछु बारह अप्रैल के वोटिंग होय रिहीस। खैरागढ़ विधानसभा सीट ह जनता कांग्रेस छत्तीसगढ़ के विधायक देवव्रत सिंह के निधन के बाद ले रीता रिहीस।
मुख्यमंत्री भूपेश बघेल ह खैरागढ़ विधानसभा के उपचुनाव म कांग्रेस प्रत्याशी ल मिले जीत उपर विधानसभा क्षेत्र के मतदाता मन बर आभार व्यक्त करत किहीन हे कि खैरागढ़ के लोगन मन ह राज्य सरकार के जन कल्याणकारी नीति अउ कारीकरम मन बर एक घांव फेर ले अब भरोसा देखाय हे।
उपचुनाव म जीत के बाद कांग्रेस प्रत्यासी यसोदा वर्मा ह किहीन हे कि ए हर खैरागढ़ के जनता के जीत हे। राज्य सरकार के कामकाज उपर मतदाता मन मुहर लगाय हे। ओमन चुनाव म जीताय बर खैरागढ़ के जनता मन बर अपन आभार व्यक्त करे हे।
उहें, भाजपा प्रत्याशी कोमल जंघेल ह जनता के फैसला ल स्वीकारत आरोप लगाय हे कि ए उपचुनाव म कांग्रेस ह कई ठिन हथकंडा अपनाय हे। ओखर बाद भी भाजपा कार्यकर्ता मन ह कड़ा मेहनत करीन हे। ओमन किहीन कि जनता बर उंखर अउ पार्टी के संघर्ष जारी रइही।
मांडविया-ई-संजीवनी
केन्द्रीय स्वास्थ्य मंत्री डॉक्टर मनसुख मांडविया ह आज आयुष्मान भारत स्वास्थ्य अउ कल्याण योजना के चार बछर पूरा होय म वीडियो कान्फ्रेंस के माध्मय ले करीबन एक लाख स्वास्थ्य केन्द्र मन म ई-संजीवनी ‘‘टेली कन्सलटेंशन‘‘ सुविधा के सुरूवात करीन। ए मउका म डॉक्टर मांडविया ह किहीन कि स्वास्थ्य अउ देखभाल केन्द्र मन अवइया बेरा म स्वास्थ्य के क्षेत्र म बड़का क्रांति लाही। देस म ए बखत एक लाख सत्रह हजार ले जादा स्वास्थ्य अउ कल्याण केन्द्र काम करत हे। ओमन किहीन कि ई-संजीवनी सुविधा के माध्यम ले बियाबान जघा के रहवइया मन देस के बड़का डॉक्टर मन ले सलाह ले सकही।
श्री मांडविया ह किहीन कि प्रधानमंत्री ह स्वास्थ्य क्षेत्र ल प्राथमिकता देहे। ओमन किहीन कि देस के रहवइया मन स्वस्थ रइही, तभे राष्ट्र ह आगू बाढ़ही। ओमन यहू बतईन कि अट्ठारह ले तेईस अप्रैल के बीच देस के हरेक प्रखंड म स्वास्थ्य मेला राखे जाही।
मुख्यमंत्री-कृषि मेला
प्रदेस म धाने असन कई ठिन फसल के पैदावार बर घलो सहकारी बैंक ले करजा दे जाही। एखर बर ऋण मान म घलो बदली होही, जेखर ले किसान मन दलहन-तिलहन अउ नगदी फसल मनके खेती ले जादा आमदनी पा सकही। मुख्यमंत्री भूपेश बघेल ह काली बिलासपुर म होय तीन दिन वाले राज्य स्तरीय कृषि समृद्धि मेला के समापन समारोह म बोलत बेरा ए बात किहीन। ओमन किहीन कि प्रदेस म किसान न्याय अउ गोधन न्याय योजना के उत्साहजनक परिणाम आगू आवत हे। दूसर फसल के रूप म प्रदेस म दलहन पैदावार म सत्रह प्रतिशत अउ तिलहन फसल म तेरह प्रतिशत के बढ़ोतरी दर्ज करे गेहे।
स्वामी आत्मानंद स्कूल
प्रदेस म चलत स्वामी आत्मानंद उत्कृष्ट अंग्रेजी माध्यम स्कूल मनके हरेक कक्षा म चालीस झिन पढ़ईया लइका के जगह अब पचास-पचास झिन पढ़ईया लइका मन ल एडमिशन दे जाही। संचालक लोक शिक्षण डहार ले ए बारे म आदेश जारी कर दे गेहे। संचालक ह सबो जिला सिक्षा अधिकारी अउ प्रिंसपल मन ल स्वामी आत्मानंद स्कूल के हरेक कक्षा म एडमिशन बर तय सीट संख्या ल बढ़ाय के निरदेस देहे। राज्य म चलत करीबन एक सौ इकहत्तर स्वामी आत्मानंद उत्कृष्ट अंग्रेजी माध्यम स्कूल मन म कक्षा पहली ले बारहवीं बर पूर्व निर्धारित चालीस-चालीस ठिन सीट बर अब्बड़ अकन संख्या म एडमिशन ले बर पढ़ईया लइका अउ उंखर पालक मनके मांग उपर ए निर्णय ले गेहे।
जनजातीय साहित्यकार महोत्सव
राजधानी रईपुर म अवइया उन्नीस अप्रैल ले तीन दिन के राष्ट्रीय जनजाति साहित्यकार महोत्सव राखे जाही। पंडित दीनदयाल उपाध्याय ऑडिटोरियम म होवइया ए महोत्सव के सुभारंभ मुख्यमंत्री भूपेश बघेल करही। एमा जनजाति नृत्य प्रदर्सन के संगे कला अउ चित्रकला प्रतियोगिता घलो होही। संगेसंग पुस्तक मेला अउ कई ठिन विभाग मनके प्रदर्सनी घलोक लगाय जाही।
आदिम जाति अनुसंधान अउ प्रसिक्षण संस्थान डहार ले होवइया ए महोत्सव म प्रदेस के कतकोन अंचल मनके जनजातीय समुदाय के गुणीजन, समाज के मुखिया, साहित्यकार अउ कला के ज्ञाता मनखे मन ल घलो नेवता दे जाही। ए दउरान सांस्कृतिक कारीकरम अउ बस्तर बैंड के प्रदर्सन के संगे जनजातीय नृत्य देखे के लइक रिही। महोत्सव के उद्देश्य देसभर म पारंपरिक अउ ओ बेरा के जनजातीय साहित्य ले परिचय के संगे आधुनिक संदर्भ म उंखर विकास के स्थिति जानना हवय। फेर ए साहित्य महोत्सव म रिसर्च पेपर मनके प्रकाशन घलो करे जाही।
हनुमान जन्मोत्सव
हनुमान जनम उत्सव आज छत्तीसगढ़ समेत देसभर म पारंपरिक श्रद्धा अउ उल्लास के संग मनाय जात हे। आज बिहनियच ले राजधानी रईपुर समेत प्रदेस के हनुमान मंदिर मन म श्रद्धालु मनके रेम लगे हे। मंदिर मन म हनुमान जी के आराधना अउ बिसेस पूजापाठ करे जात हे। उहें, कई ठिन जघा म भंडारा घलो होवत हे।
दुरूग-भिलाई म घलो श्री हनुमान जनम उत्सव बेरा म कई ठिन कारीकरम राखे गेहे। भिलाई म जय हनुमान सेवा समिति डहार ले एक सौ एक हनुमान मंदिर मन ले ध्वज यात्रा निकाले गीस। उहें, जांजगीर-चांपा जिला स्थित नहरिया बाबा मंदिर म दर्शन खातिर श्रद्धालु मनके भीड़ देखे गीस।
मुख्यमंत्री भूपेश बघेल ह प्रदेस के रहवइया मन ल हनुमान जनम उत्सव के बधाई अउ सुभकामना दीन हे। अपन संदेस म मुख्यमंत्री ह किहीन हे कि हनुमान जी के जीवन ह हमन ल बुरई के खिलाफ लड़े के प्रेरणा देथे।
लोकवाणी
मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के अट्ठाईसवां कड़ी के प्रसारण काली सत्रह अप्रैल के होही। मुख्यमंत्री ह लोकवाणी म ए बखत के अंक म ‘‘नवा छत्तीसगढ़-नवा बजट‘‘ बिसय उपर गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केन्द्र, एफ.एम. रेडियो अउ क्षेत्रीय समाचार चैनल मन ले बिहनिया साढ़े दस बजे ले ग्यारह बजे तक होही।
जिले की चिट्ठी
सुनइया मन ल बतादन कि आकाशवाणी के रईपुर केन्द्र डहार ले काली संझा छह बजके तीस मिनट म ‘‘जिले के चिट्ठी‘‘ कारीकरम के प्रसारण करे जाही। समाचार एकांश के ए कारीकरम ल छत्तीसगढ़ स्थित आकाशवाणी के जम्मों केन्द्र रिले करही। ए बखत के अंक म कोरिया जिला के बारे म जानकारी दे जाही।
बातों-बातों-में
प्रादेशिक समाचार एकांश के समसामयिक बिसय वाले कारीकरम ‘‘बातों-बातों-में‘‘ ह ए बखत प्रदेस के कतकोन जघा म पड़त जोरदरहा गर्मी, लकलकहा लू के हालत अउ मौसम के कई ठिन पहलु उपर गोठबात करे जाही। ए बारे म अउ जादा जानकारी ले बर आकाशवाणी समाचार ह गोठबात करे हे, मौसम विज्ञानी डॉक्टर एच.पी. चन्द्रा ले।
ए गोठबात के प्रसारण आकाशवाणी रईपुर डहार ले काली बिहनिया नौ बजके तीस मिनट म होही, छत्तीसगढ़ के सबो आकाशवाणी केन्द्र एके संघरा रिले करही।
महिला सशक्तिकरण
बलौदाबाजार-भाटापारा जिला मुख्यालय म महिला सशक्तिकरण सम्मेलन राखे गे रिहीस। सम्मेलन म बोलत महिला अउ बाल विकास मंत्री अनिला भेंडिया ह किहीन कि राज्य सरकार के इच्छा अनुरूप नारी-परानी मन ल आत्मनिर्भर बनाय बर हर तरह के परयास करे जात हे। गंवई जघा म अर्थव्यवस्था ल मजबूत करे के संगे गंवईच जघा म माईलोगिन मन ल रोजगार यानि कमाय-खाय के मउका दे जात हे।
सम्मेलन म महिला स्व-सहायता समूह मन ल बयासी ठिन मिनी राईस मिल दे गीस। संगे छत्तीसगढ़ महिला कोष ऋण योजना के चलत करीबन एक सौ तेरह स्व-सहायता समूह मनके तीन लाख रूपिया ले जादा के करजा माफ करे गीस, जेमा दस ठिन महिला समूह मन ल करजा माफी के प्रमाण पत्र घलो दे गीस।