मुख्यमंत्री लोकार्पण
मुख्यमंत्री भूपेश बघेल ह आज नारयणपुर जिला म करीबन एक सौ अठाईस करोड़ रूपिया के आने-आने विकास काम के लोकार्पण अउ भूमिपूजन करीन।
बालक उच्चतर माध्यमिक विद्यालय खेल मैदान म राखे गे ये कार्यक्रम म मुख्यमंत्री ह अबूझमाड़ क्षेत्र के पांच सौ किसान मन ल पट्टा बांटीन। संगेसंग मुख्यमंत्री सामूहिक कन्या विवाह कार्यक्रम म शामिल होके दू सौ इंकावन झिन नवा जोड़ ल असीसा दीन। एखर संगेसंग कतकोन आने-आने सरकारी योजना के लाभ लेवइया हितग्राही मन ल चेक बांटीन।
कार्यक्रम के बेरा मुख्यमंत्री ह जिला म सौ ठन घोटुल बनाय बर दस करोड़ रूपिया दे अउ छोटे डोंगर म नवीन शासकीय महाविद्यालय खोले के घोषणा करीन। श्री बघेल ह नारायणपुर म आउटडोर स्टेडियम बनाय बर दू करोड़ संतावन लाख रूपिया अउ बंगलापारा म फुटबॉल स्टेडियम बर पैंतीस लाख रूपिया मंजूर करीन।
उंहें ओरछा विकासखंड मुख्यालय म मिनी स्टेडियम बनाये खातिर पैंतीस लाख रूपिया के मंजूरी दे गीस। एखर संगेसंग मुख्यमंत्री ह सरकारी जिला अस्पताल नारायणपुर के नाव पूर्व विधायक स्वर्गीय बद्रीनाथ बघेल के नाव म राखे के घोषणा करीन।
एति मुख्यमंत्री कांकेर जिला के दउरा के बेरा कोयलीबेड़ा ल तहसील के दर्जा दे अउ जिला सहकारी बैंक के स्थापना करे के घोषणा करीन। एखर संग अंतागढ़ अउ पखांजूर के महाविद्यालय म स्नातकोत्तर के कक्षा शुरू करे के बात कीहिन उंहें बस्तर म स्थापित बादल असन कांकेर जिला म घलो नृत्यकला अउ साहित्य ल बढ़ावा दे खातिर संगठन बनाय जाही।
राज्यपाल-रेलमंत्री मुलाकात
राज्यपाल अनुसुईया उइके ह नई दिल्ली के संसंद भवन म केंद्रीय रेलमंत्री अश्विनी वैष्णव ले भेंट करीन। ए बेरा म सुश्री उइके ह रेलमंत्री ल छत्तीसगढ़ राज्य म रेल अउ यात्री सुविधा के संगेसंग छिंदवाड़ा ले रायपुर रेल कनेक्टिवीटी के मांग ल लेके गोठबात करीन।
उंहें छिंदवाड़ा, सिवनी, नैनपुर, मंडला, अउ गोंदिया के रेल रद्दा परियोजना के काम के प्रगति अउ रेल सुविधा के बढ़वार म गोठबात होइस। संगेसंग राज्यपाल के गतिविधि म आधारित किताब – नई सोच नई पहल के दूसर भाग भेंट करीन।
खैरागढ़ उपचुनाव
खैरागढ़ विधानसभा उपचुनाव म प्रचार प्रसार जोरदरहा होवत हे। जम्मों प्रत्याशी मनके पक्ष म प्रचार बर उंखर पार्टी के नेता मन दउरा करत हे। मध्यप्रदेश के मुख्यमंत्री शिवराज सिंह चौहान आज खैरागढ़ पहुंचके भाजपा प्रत्याशी के पक्ष म साल्हेवारा म जनसभा ल संबोधित करीन।
एति मुख्यमंत्री भूपेश बघेल ह आज खैरागढ़ के जालबांधा म सभा लीन। काली नगर के पिपरिया म आमसभा म बोलत मुख्यमंत्री ह कीहिन कि प्रदेश के किसान मनके कर्जा के बोझ उतारे बर कांग्रेस सरकार कर्जा लेबर तियार हे। ओमन कीहिन कि कांग्रेस सरकार अपन घोषणा पत्र म कायम हवय। ओमन यहू कीहिन कि कांग्रेस प्रत्याशी यशोदा वर्मा के विधायक बनतेच चोबीस घंटा म जिला बनाय के घोषणा होही। उंहें कार्यक्रम म राजनांदगांव जिला के प्रभारी मंत्री अमरजीत भगत ह घलो अपन बात राखीन।
जाति प्रमाण पत्र
राज्य सरकार के निर्देश के मुताबिक जम्मों सरकारी स्कूल के पढ़ईया लईका मन ल अब स्कूले म मुफत म जाति प्रमाण पत्र दे जाही। रायपुर कलेक्टर सौरभ कुमार ह जिला शिक्षा अधिकारी सहायक आयुक्त आदिवासी विकास समेत जम्मों संबंधित अधिकारी मन ल ए संबंध म निर्देश दीन हे।
एखर मुताबिक स्कूल म भर्ती के बेरा ही लईका अउ अभिभावक ले जाति प्रमाण पत्र संबंधी जरूरी दस्तावेज लेबर पड़ही। ओमन सबो स्कूली के प्राचार्य अउ प्रधान अध्यापक ल ई- पोर्टल म अपन एक यूजर आईडी बनाये बर कीहिन हे । एमा पढ़ईया लईका के जाति प्रमाण पत्र बर अर्जी भरके अपलोड करे बर केहे गेहे।
मानस मंडली-प्रतियोगिता
जांजगीर-चांपा जिला के शिवरीनारायण म आज गौ-सेवा आयोग के अध्यक्ष राजेश्री महंत रामसुंदर दास ह राज्य स्तरीय मानसगान प्रतियोगिता के शुभारंभ करीन। तीन दिन चलइय ये प्रतियोगिता म पच्चीस ठन जिला के चुने गे मानस मंडली के करीबन साढ़े तीन सौ प्रतिभागी प्रस्तुती दीही। एखर संगेसंग कार्यक्रम के पहिली दिन आज पद्मश्री ममता चंद्राकर डहार ले कार्यक्रम प्रस्तुत करे गीस। उंहें काली पार्श्वगायिका अनुराधा पौडवाल अउ दस अप्रैल के जसगीत गायक दिलीप षडंगी अउ भजन गायक अनूप जलोटा कार्यक्रम प्रस्तुत करही।
प्रतियोगिता म पहिली तीन स्थान म अवइया रामायण मंडली ल इनाम दे जाही। पहिली पुरस्कार पांच लाख रूपिया दूसर तीन लाख अउ तीसर स्थान म अइवया प्रतिभागी मन ल दू लाख रूपिया दे जाही। काली होवइया कार्यक्रम म विधानसभा अध्यक्ष चरणदास महंत संघरही। उंहें दस तारीख के समापन बेरा म मुख्यमंत्री भूपेश बघेल शामिल होही अउ इही बेरा म मुख्यमंत्री ह राम वनगमन पर्यटन परिपथ के आने-आने काम के लोकार्पण करही।
सियान जतन क्लिनिक
विश्व स्वास्थ्य दिवस म काली प्रदेश के उनतीस ठन आयुर्वेदिक केंद्र मन म सियान जतन क्लिनिक के शुरूआत करे गीस। एमा साठ बछर ले जादा आयु वरग के नौ सौ छै झिन सियान मनके इलाज करे गीस। सियान जतन क्लिनिक के शुरूआत प्रदेश के दू ठिन आयुर्वेदिक महाविद्यालय के चिकित्सालय, पांच जिला आयुर्वेदिक चिकित्सालय अउ बाईस सामुदायिक स्वास्थ्य केंद्र म करे गेहे।
ये जम्मों केंद्र म हरएक महीना के पहिली बिरस्पत के सियान जतन क्लिनिक लगाये जाही। आयुष संचालनालय के सहायक संचालक डॅाक्टर विजय साहू ह बताइन कि अब सियनहा अवस्था म होवइया शारीरिक अउ मानसिक समस्या ले पीड़ित सियान मन ल आयुर्वेद ले विशेष ओपीडी अउ पंचकर्म के सेवा राज्य के आयुर्वेदिक अस्पताल म दे जाही।
दुर्घटना
महासमुंद जिला के बसना क्षेत्र म आज होय रद्दा दुर्घटना म चार झिन के मउत होगे। उंहें छै आने घायल होगे हे।
खबर के मुताबिक गांव जमड़ी ले अठारा झिन ट्रेक्टर म बइठके एक कार्यक्रम म संघरे बर भालूकोना जावत रीहिन, इही बेरा ट्रेक्टर अंते-तंते होके पलट गे, जेमा चार झिन के मउत होग अउ छै झिन घायल हे। घायल मन ल इलाज बर अस्पताल म भर्ती कराय गेहे।
उंहें कोरबा जिला के बांगे थाना क्षेत्र म पाछू होय रद्दा दुर्घटना म एक मनखे के मउत होग। खबर के मुताबिक गांव परला म हंसदेव पूल तीर एक चौपहिया गाड़ी अउ फटफटी के बीच टक्कर होगे। जेखर ले गाड़ी म आगी लग गे। फटफटी सवार मनखे चौपहिया गाड़ी के नीचे फंस गे अउ जले ले उंखर मउत हेगे।
उंहें रतिहा कुन ये दुर्घटना म जले चौपहिया गाड़ी ले एक आने चौपहिया गाड़ी ले टकरा गे। दुर्घटना के बाद चालक केबिन म कई घंटा फंसे रीहिस। जेला बड़ मुश्किल के बाद निकाल के अस्पताल लेगे गीस, जिहां उंखर हालत गंभीर बताये जात हे।
ट्रेन परिचालन
उत्तर मध्य रेलवे के प्रयागराज रेलमंडल के कानपुर-टुंडला सेक्शन म सिग्नल कनेक्टिविटी के सेती कुछएक यात्री गाड़ी के अवई जवई प्रभावित रीही। दस अउ बारा अप्रैल के दुर्ग ले चलइया दुर्ग-कानपुर द्वि साप्ताहिक एक्सप्रेस रद्द रीही।
अइसने ग्यारा अउ तेरा अप्रेल के कानपुर ले चलइया कानपुर-दुर्ग द्वि साप्ताहिक रद्द रीही। उंहें ग्यारा अप्रैल के लखनउ रायपुर गरीब रथ द्वि साप्ताहिक एक्सप्रेस लखनउ ले एक घंटा अबेर ले रवाना होही।
अउ अब थोरकुन समाचार सार म-
– राज्य सरकार ह छत्तीसगढ़ वक्फ बोर्ड के नवा नियुक्ति करे हे। एमा सेवा निवृत्त न्यायधीश मिन्हाजुद्दीन ल छत्तीसगढ़ वक्फ बोर्ड के अध्यक्ष बनाय गेहे। उंहें एक प्रशासनिक अधिकारी समेत पांच झिन ल सदस्य राखे गेहे।
– छत्तीसगढ़ के वन कर्मचारी संघ के हड़ताल ल आम आदमी पार्टी ह अपन समर्थन देहे। जगदलपुर म धरना स्थल म पहुंचके बस्तर जिला अध्यक्ष तरूणा साबे बेदरकर ह पार्टी के समर्थन करीन।
– नवा रायपुर अटल विकास प्राधिकरण कोति ले नवा रायपुर के आने-आने सेक्टर म बने हाल दुकान अउ चबूतरा के परियोजना प्रभावित मन ल आबंटित करे जाय बर अर्जी जमा करे के आखरी तारीख ग्यारा अप्रैल तय करे गेहे ।
अउ
– राजधानी रायपुर के उरला थाना क्षेत्र ले चार बछर के एक लईका के अपहरण अउ ओखर हत्या के मामला म पुलिस ह आरोपी ल महाराष्ट्र ले गिरप्तार करे हे। आरोपी लईका ल घुमाय के लालच देके अपन संग बेमेतरा लेग के ओखर हत्या कर दीस।