खैरागढ़ विधानसभा उपचुनाव बर राजनीतिक सरगर्मी अउ तेज हो गेहे। भाजपा, कांग्रेस अउ जनता कांग्रेस छत्तीसगढ़ समेत आने-आने पार्टी के प्रचारक ए दिन प्रचार बर खैरागढ़ पहुंचत हे।
इही कड़ी म केंद्रीय खाद्य, उद्योग अउ जलशक्ति राज्य मंत्री प्रहलाद सिंह पटैल आज छत्तीसगढ़ प्रवास म आवत हे। ओमन काली छै अप्रैल के अमलीडीहकला म भाजपा डहार ले आयोजित कार्यक्रम म शामिल होही। बाद म ओमन खैरागढ़ मंडल के पिपरिया म जनसंपर्क करहीं। संगेसंग छुईखदान मंडल के उदयपुर म आमसभा ल संबोधित करही। श्री पटेल सात अप्रैल के खैरागढ़ ग्रामीण मंडल के राहुद म कार्यकर्ता अउ आमजन ल संबोधित करही। ओमन आठ अप्रैल के दिल्ली रवाना होही।
उंहें केंद्रीय इस्पात अउ ग्रामीण विकास राज्यमंत्री फग्गन सिंह कुलस्त घलो काली छत्तीसगढ़ दउरा म आवत हे। ए दउरान ओमन भाजपा के स्थापना दिवस म रायपुर के कुशाभाउ ठाकरे परिसर म आयोजित कार्यक्रम म शामिल होही। एखरे संग केंद्रीय राज्यमंत्री खैरागढ़ विधानसभा म जनसंपर्क घलो करही।
इही बीच पूर्व मुख्यमंत्री डॅाक्टर रमन सिंह ह खैरागढ़ विधानसभा म प्रचार-प्रसार के दउरान कीहिन कि भाजपा ह पाछू बछर म जउन विकास काम करे हे, वो पाछू पचास साल म कोनो पार्टी नइ करे हे।
उंहे मुख्यमंत्री भूपेश बघेल ह कीहिन हे कि जनता राज्य सरकार के करे गे विकास काम म मुहर लगाही। ओमन कीहिन कि राज्य सरकार ह हरएक क्षेत्र के विकास बर प्रतिबद्ध हे। ओमन कीहिन कि नवा जिला के बने ले क्षेत्र के चहुमुंखी विकास होही।
विशेष कनिष्ठ कर्मचारी परीक्षा शुल्क
राज्य सरकार ह विशेष कनिष्ठ कर्मचारी चयन बोर्ड डहार ले राखे गे परीक्षा म परीक्षार्थी मनले फीस नइ लेके घोषणा करे हे। मुख्यमंत्री भूपेश बघेल डहार ले विधानसभा म पेश करे गे बजट म पीएससी अउ व्यापम के परीक्षा मन म फीस नइ लेके घोषणा करे गे रीहिस।
इही क्रम म अब विशेष कनिष्ठ कर्मचारी चयन बोर्ड डहार ले राखे गे परीक्षा म परीक्षार्थी मनले फीस नइ लेके घोषणा करे गेहे। एखर पहिली एनएसयूआई के सदस्य मन ह मुख्यमंत्री ले भेंट करके परीक्षा शुल्क माफ करे के मांग करे रीहिस हे। आपमन ल बतादन कि बस्तर अउ सरगुजा म विशेष कनिष्ठ कर्मचारी चयन बोर्ड डहार ले तृतीय अउ चतुर्थ श्रेणी पद बर परीक्षा राखे जाथे।
निर्वाचक नामावली प्रक्रिया
प्रदेश के आने आने नगरीय निकाय मन म रिक्त पद बर होवइया निर्वाचन बर फोटोयुक्त निर्वाचक नामावली तैयार करे के प्रकिया आज ले शुरू होगे हे। निर्वाचक नामावली के प्रारंभिक प्रकाशन के संग दावा अउ आपत्ति प्राप्त करे के कार्रवाई उनतीस अप्रैल ले शुरू होके सात मई तक चलही। निर्वाचक नामावली के अंतिम प्रकाशन पच्चीस मई के करे जाही।
प्रवासी व्यक्ति पुनर्वास
सलवा जुडूम के दउरान छत्तीसगढ़ के बस्तर अंचल ले विस्थापित होके तेलंगाना अउ आंध्रप्रदेश गे लोगन मनके पुनर्वास बर आने आने राज्य ले समन्वय स्थापित करे बर बस्तर संभाग के आयुक्त ल नोडल अधिकारी बनाय गेहे। राज्य सरकार डहार ले जारी निर्देश म केहे गेहे कि नोडल अधिकारी परंपरागत वन निवासी संशेधन नियम दू हजार बारा के प्रावधान के मुताबिक पुनर्वास बर समन्वय स्थापित करही।
खबर के मुताबिक मुख्यमंत्री भूपेश बघेल ह काली उंखर निवास कार्यालय म तेलंगाना ले आए छत्तीसगढ़ के मनखे मन ले भेंट करीन। ए दउरान मुख्यमंत्री ह छत्तीसगढ़ लहुटे के इच्छुक लोगन मन ल जमीन देके संग ओमन ल राशन दुकान, स्कूल, रोजगार समेत मूलभूत सुविधा देके बात करे रीहिन हे।
राम वन गमन
जांजगीर चांपा जिला के शिवरीनारायण म आठ अप्रैल ले राज्य स्तरीय मानस गायन प्रतियोगिता के आयोजन करे जाही। तीन दिन के ए प्रतियोगिता के दउरान देश-प्रदेश के प्रतिष्ठित कलाकार मन अपन प्रस्तुति दीहीं। प्रतियोगिता म पच्चीस जिला के चुने गे मानस मंडली के करीबन तीन सौ पचास कलाकार शामिल होही। प्रतियोगिता म पहिली तीन स्थान म अवइया रामायण मंडली मन ल पुरस्कार दे जाही। पहिली पुरस्कार पांच लाख रूपिया, दूसर तीन लाख अउ तीसर पुरस्कार के रूप म दू लाख रूपिया विजेता मन ल दे जाही।
उंहें मुख्यमंत्री भूपेश बघेल शिवरीनारायण म राम वन गमन पर्यटन परिपथ के आने आने काम के दस अप्रैल के लोकार्पण करहीं। इही कड़ी म संस्कृति विभाग के सचिव अनबलगन पी. ह आने आने विकास काम के जायजा लीन हे। ए दउरान ओमन अधिकारी मनके बइठका लीन अउ निर्माण काम ल जल्दीच पूरा करे बर कीहिन। श्री अनबलगन ह शिवरीनारायण म रामायण मंडली के राज्य स्तरीय मानस गायन प्रतियोगिता के रूपरेखा तैयार करे के संबंध म निर्देश दीन।
स्कूल फीस निर्देश
राज्य सरकार ह छत्तीसगढ़ म चलत निजी स्कूल डहार ले लेवत फीस उपर निगरानी बर जम्मों कलेक्टर मन ल जिला स्तरीय फीस विनियमन समिति के गठन करे के संग छत्तीसगढ़ अशासकीय विद्यालय फीस विनियमन अधिनियम 2020 के प्रावधान के पालन सुनिश्चित करे के निर्देश देहे।
स्कूल शिक्षा विभाग के प्रमुख सचिव डॅाक्टर आलोक शुक्ला ह कलेक्टर मन ले कीहिन हे कि ओमन अपन जिला के जम्मों प्रायवेट स्कूल ले फीस के संबंध म जानकारी लेवय। ओमन ह मनमानी फीस लेवइया निजी स्कूल मन उपर कार्रवाई करे बर घलो कीहिन। डॅाक्टर शुक्ला ह कीहिन कि विद्यालय फीस समिति डहार ले एक घांव म जादा ले जादा आठ प्रतिशत फीस के बढ़ोत्तरी करे जा सकत हे। एखर ले जादा फीस बढ़ाय के स्थिति म स्कूल ल जिला फीस समिति के आगू प्रस्ताव रखना होही।
आईपीएल क्रिकेट मैच के शुरूआत के संग प्रदेश के पुलिस ह सट्टा खेलाने वाला मन उपर कार्रवाई तेज कर देहे। मिले खबर के मुताबिक पाछू अड़तालिस घंटा म सट्टा खेलाय के आरोप म छियानबे लोगन मन ल गिरप्तार करे गेहे। उंहें इंखर तीर ले पुलिस ह दस लाख रूपिया ले जादा के राशि जब्त करे गेहे।
इही बीच कांकेर जिला म पचास लाख रूपिया ले जादा के आईपीएल सट्टा के मामला म पांच झिन आरोपी मन ल गिरप्तार करे गेहे। इंखर तीर ले सोला हजार नौ सौ रूपिया नगद अउ सोला लाख की संपत्ति जब्त करे गेहे।
उंहें राजधानी रायपुर के पुलिस ह कुछ दिन पहिली आईपीएल के सटटा खिलात तेरह सटोरियों मन ल गिरप्तार करे गीस हे। पुलिस ह एखर तीर ले उनहत्तर मोबाइल अउ सात लैपटाप जब्त करे रीहिस।
प्रदेश म आईपीएल म सट्टा खेलाय के सरलग शिकायत के बीच मुख्यमंत्री भूपेश बघेल ह जम्मों पुलिस अधीक्षक मन ल आरोपी मनके खिलाफ कार्रवाई तेज करे बर केहे हे।
अउ अब थोरकुन समाचार सार म-
– दुर्ग के हेमचंद यादव विश्वविद्यालय के वार्षिक स्नातकोत्तर परीक्षा के प्रश्न पत्र अब बीहनिया सात बजे ले उपलब्ध होही। छात्र मन ल प्रश्न पत्र हल करके मंझनियां बारा बजे ले तीन बजे तक उत्तर पुस्तिका जमा करना होही।
– सीमा सुरक्षा बल डहार ले एक भारत श्रेष्ठ भारत अभियान के तहत काली कांकेर जिला के दुर्गकोंदल म रक्तदान शिविर आयोजन करे गे रीहिस। ये दउरान पैंसठ लोगन मन रक्तदान करीन।
– जांजगीर चांपा जिला म सात अप्रैल के जिला रोजगार डहार ले पंजीयन अउ मार्गदर्शन शिविर के आयोजन करे जाही।
– सरगुजा जिला के पुलिस ह पाछू दू साल म होय चोरी के चालीस के जादा घटना के आरोपी मन ल पकड़े म सफलता पाय हे। एखर तीर ले तीस लाख रूपिया ले जादा के चोरी के सामान जब्त करे गेहे ।
– दुर्ग जिला म महादेव आईईडी मामला म वरिष्ठ पुलिस अधीक्षक ह पंद्रा पुलिसकर्मी मन ल लाईन अटैच करे हे।
अउ
– महासमुंद जिला म भाजपा किसान मोर्चा ह ग्रामीण क्षेत्र म कमती वोल्टैज अउ बिजली कटौती के विरोध म एक दिन के धरना दीन।