मुख्यमंत्री-बस्तर
मुख्यमंत्री भूपेश बघेल ह आज बस्तर प्रवास के दउरान एक सौ चार करोड़ रूपिया ले जादा के लागत के आने-आने विकास काम के लोकार्पण अउ भूमिपूजन करीन। नगर पंचायत बस्तर के लाल बहादुर शास्त्री स्टेडियम म राखे गे सिरहा-गुनिया सम्मेलन म सत्तर करोड़ रूपिया के लागत के सत्रह ठन काम के लोकार्पण अउ करीबन चौंतीस करोड़ रूपिया के विकास काम के भूमिपूजन करे गीस। ए मउका म मुख्यमंत्री ह बस्तर नगर पंचायत क्षेत्र के ग्यारह झन हितग्राही मन ल व्यक्तिगत वन अधिकार पत्र दे गीस। संगेसंग श्री बघेल ह मुख्यमंत्री कन्या विवाह योजना म एक सौ इंक्यावन नवा जोड़ा मन ल आशीर्वाद दीन।
उहें, मुख्यमंत्री ह काली दुरूग जिला के पाटन म देस के पहिली ब्लॉक पब्लिक हेल्थ यूनिट के सुरूवात करीन। ए यूनिट म चौव्वन प्रकार के टेस्ट हो सकही। अइसने, तीन हजार अन्य यूनिट अवइया दिन म देस म सुरू करे जाही। मुख्यमंत्री ह पाटन विकासखंड के ग्राम केसरा म राखे गे छत्तीसगढ़ डड़सेना कलार समाज के कारीकरम म समाज के नायिका बहादुर कलारिन के नाव म अलंकरण सम्मान सुरू करे के घोसना करीन। एक नवंबर राज्य स्थापना दिवस के मउका म राखे गे समारोह म ए सम्मान दे जाही।
अइसने, मुख्यमंत्री काली राजधानी रईपुर म सिंधी नववर्ष के पहिली संझा राखे गे चेट्रीचंड उत्सव कारीकरम म घलो सामिल होईन। ए मउका म ओमन ह सिंधी समाज के ग्यारह झन विभूति मन ल घलो सम्मानित करीन।
हाईकोर्ट-रेडी-टू-ईट
छत्तीसगढ़ उच्च न्यायालय ह राज्य सरकार ल अवईया तीस अपै्रल तक स्व-सहायता समूह मनला ही रेडी-टू-ईट या टेक होम रासन बनाएके अउ ओखर वितरण के यथास्थिति बनाए राखे के निर्देस दीन हे। खबर के मुताबिक महिला अउ बाल विकास विभाग ह थोड़कुन दिन पहली रेडी-टू-ईट रासन बनाए के अउ ओला बांटे के पूरा काम छत्तीसगढ़ राज्य बीज अउ कृषि विकास निगम लिमिटेड ल एक फरवरी दू हजार बाईस ले चलाए बर निर्देस जारी करे रिहीन। एखर उपर कुछेक स्व-सहायता समूह मन ह वकील मनके माध्यम ले हाईकोर्ट के आगू याचिका दायर करे रिहीन।
उहें, दुरूग के चंदूलाल चंद्राकर मेमोरियल हॉस्पिटल ल राज्य सरकार डहार ले अधिग्रहित करे के खिलाफ लगाए गे जनहित याचिका ल सुनवाई बर हाईकोर्ट ह मंजूर कर लेहे। संगेसंग कोर्ट ह हॉस्पिटल के बोर्ड ऑफ डायरेक्टर अउ इंडियन बैंक ल नोटिस जारी कर जुवाब मांगे हे।
मुख्य सचिव-बैठक
मुख्य सचिव अमिताभ जैन ह सब्बो अधिकारी मनला मैदानी स्तर म राज्य सरकार के प्राथमिकता वाले सब्बों योजना मनके काम म तेजी लाय के निर्देस दीन हे। ओमन ह मंत्रालय म राखे गे बइठका म किहीन कि मुख्यमंत्री अवइया दीन म सासन के प्राथमिकता वाले योजना मनके जायजा लिहीं। ऐला देखत मुख्य सचिव ह अधिकारी मनला सचेत होके काम करे बर किहीन हे। उहें, ओमन ह अवइया पंदरा दिन म राज्य के सब्बों ग्रामीण अउ सहरी गौठान प्रभारी मनला निरीक्षण करे के घलो निर्देस दीन हे।
खैरागढ़ उपुचनाव
खैरागढ़ विधानसभा उपचुनाव बर मतदान के तारीख जइसे-जइसे नजदीक आवत हे, वइसे-वइसे चुनाव प्रचार अभियान घलो तेज होगे हवय। आने-आने राजनीतिक पार्टी मन ह अपन-अपन स्तर म मतदाता मन ल रिझाय के परयास करत हे।
उहें, निर्वाचन आयोग डहार ले मतदान बर मतदाता मन ल जागरूक करे बर जागरूकता अभियान घलो चलाय जावत हे। एमा गंडई क्षेत्र के ग्राम कासीटोला, पेंडारवानी, बरबसपुर, बिरनपुर खुर्द संघरा आने-आने गांव म सियान, युवा अउ नवा मतदाता मन ह ‘‘बारह अप्रैल को मतदान अवश्य करें‘‘ के संदेस दीन। असइने, ईव्हीएम के कमीशनिंग बर राखे गे अधिकारी मन ल पद्मश्री गोविंद राम निर्मलकर ऑडिटोरियम म प्रशिक्षण दे गीस।
खैरागढ़ उपचुनाव बर बारह अप्रैल के वोट डारे जाही। एखर बर सबो तैयारी कर ले गेहे। उपचुनाव म सुरक्षा अउ सांति बनाय राखे बर जिला पुलिस के संग अर्द्धसैनिक बल ह खैरागढ़, छुईखदान, गंडई अउ मोहगांव थाना क्षेत्र म फ्लैग मार्च करीन।
पूर्व विधायक-कारावास
रायगढ़ न्यायालय ह दू झिन माइलोगिन के हत्या के मामला म ओडिसा के बृजराजनगर के पूर्व विधायक अनूप साय ल आजीवन कारावास के सजा सुनाई हे। ऐखरे संग सबूत छुपाए के मामला म आरोपी पूर्व विधायक ल सात बछर के सजा घलो दे गे हवय। एखर अलावा उंखर उपर पांच हजार रूपिया के जुर्माना घलो लगाए गे हवय। ए मामला बछर दू हजार सोला के हरय। ओ समय रायगढ़ तीर संबलपुर म दू झिन माइलोगिन मनके सव बरामद करे गे रिहीस। बाद म ए मामला म बृजराजनगर में तत्कालीन पूर्व विधायक अनूप साय ल पुलिस ह ओडिसा ले गिरफ्तार करे रिहीस।
बीएसपी-कीर्तिमान
भिलाई इस्पात संयंत्र-बीएसपी ह वित्तीय बछर दू हजार इक्कीस-बाईस के दउरान फिनिश्ड स्टील, सैलेबल स्टील अउ डिस्पैच म बढ़िया प्रदर्सन करके उत्पादन के क्षेत्र म कीर्तिमान बनाय हे। उहें, प्लांट के आने-आने विभाग ह घलो ए वित्तीय बछर म नवा कीर्तिमान गढ़े हे। बीएसपी के ओर हैंडलिंग प्लांट ह ए बेरा म करीबन दू करोड़ टन मटेरियल हैंडलिंग के नवा रिकार्ड दर्ज करीन हे।
आकाशवाणी-प्रतियोगी परीक्षा
आकाशवाणी ले आज ले प्रतियोगी परीक्षा मन बर नवा साप्ताहिक संवाद कारीकरम-अभ्यास सुरू होवत हे। एखर उद्देश्य प्रतियोगी परीक्षा के तैयारी करत लइका मनके मदद करना हे। ए कारीकरम हिन्दी म होही अउ हर सनिचर रतिहा साढ़े नौ बजे ले दस बजे तक सौ दशमलव एक‘‘ एफ.एम. गोल्ड म प्रसारित करे जाही। एखर पहला कड़ी आधुनिक इतिहास उपर तैयार करे गेहे। प्रमुख शिक्षाविद ह देसभर ले मिले सवाल के जवाब दीहीं। एमा म्युजिकल ब्रेक के संग एक्सप्लेनर्स, फैक्टफाइल, परीक्षा कैलेंडर अउ क्वेश्चन ऑफ द वीक जइसन सेगमेंट घलो सामिल हे।
ए कारीकरम ल ट्विटर या यू-ट्यूब चैनल म अउ न्यूज ऑन एआईआर ऐप म घलो सुने जा सकत हे। नौ अप्रैल के ए कड़ी बर भारतीय राजनीति अउ संविधान ले जुड़े प्रश्न वाट्सऐप नंबर – नौ दो आठ नौ शून्य – नौ चार शून्य चार चार म भेज जा सकत हे या पांच अप्रैल तक मेल करे जा सकत हे।
जिले की चिट्ठी
आकाशवाणी समाचार डहार ले काली संझा छै बजके तीस मिनट ले छै बजके पैंतीस मिनट तक ‘‘जिले के चिट्ठी‘‘ कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही, जेला जम्मों केंद्र मन ह एके संघरा रिले करही। ए बखत के अंक म बिलासपुर जिला के गतिविधि के बारे म जानकारी दे जाही।
चैत्र नवरात्र
मां दुर्गा के उपासना के परब चैत्र नवरात्र आज ले सुरू होगे हवय। कोरोना संक्रमण म कमी आय के बाद ए बखत देवी मंदिर मन म दर्शन बर श्रद्धालु मनके भीड़ देखे जावत हे। मंदिर मन म मनोकामना ज्योति कलश घलो जलाय जावत हे। संगेसंग मंदिर मन ल रंगा-बिरंगा लाइट ले घलो सजाय गे हवय। नवरात्र के मउका म डोंगरगढ़ के मां बम्लेश्वरी मंदिर, रतनपुर के मां महामाया, चंद्रपुर के मां चंद्रहासिनी अउ दंतेवाड़ा के दंतेश्वरी दाई के मंदिर जाने वाला श्रद्धालु मन बर बिसेस व्यवस्था करे गे हवय।
राज्यपाल अनुसुईया उइके ह आज राजभवन के उपासना कक्ष म विधिवत कलश स्थापना करके जोत जलाके मां दुर्गा के पूजा करीन अउ देस-प्रदेस के सुख के कामना करीन। उहें, मुख्यमंत्री भूपेश बघेल ह बस्तर के पुजारीपारा के गंगादाई माता के पूजा करके प्रदेस के लोगन बर सुख-समृद्धि के कामना करीन।
आज ले भारतीय नववर्ष घलो सुरू होगे हे। एला विक्रम संवत या नव संवत्सर घलो कहिथे। ए ह चैत्र शुक्ल प्रतिपदा ले सुरू होथे।
अउ अब थोरकुन समाचार सार म-
– प्रदेस के वरिष्ठ साहित्यकार अउ पत्रकार पारितोष चक्रवर्ती के आज रईपुर म निधन होगे। मुख्यमंत्री भूपेश बघेल ह श्री चक्रवर्ती के निधन म गहरा सोक जतईन हे।
– धमतरी जिला के सोंढूर बांध म नाव के पलटे ले दू झिन नोनी मन डूब गे। गोताखोर मनके मदद ले इंखर मनके तलास करे जावत हे।
– सरगुजा जिला म पुलिस ह अंतर्राज्यीय चोर गिरोह के पांच झन सदस्य मन ल गिरफ्तार करके उंखर मन तीर ले एक ठिन देशी रिवाल्वर संघरा आने सामान जब्त करे हे।
अउ
– बलौदाबजार जिला म लवन क्षेत्र के ग्राम परसाडीह खार के तीर एक ठन कंटेनर गाड़ी म मवेसी मनके तस्करी करत पांच झिन आरोपी मन ल पुलिस ह गिरफ्तार करे हे।