प्रधानमंत्री नरेंद्र मोदी ह एक अप्रैल के नई दिल्ली के तालकटोरा स्टेडियम म परीक्षा पर चर्चा कार्यक्रम म छात्र, शिक्षक अउ पालक मनके संग गोठबात करही। ओमन तनाव ले दूरिहा रहिके परीक्षा के बारे म चर्चा करही। ए कार्यक्रम म छत्तीसगढ़ के छात्र अउ पालक मन घलो वचुअर्ल रूप ले जुड़ही। केंद्रीय शिक्षा मंत्री धर्मेन्द्र प्रधान ह बताइन कि परीक्षा पर चर्चा कार्यक्रम के सोझे प्रसारण बीहनिया ग्यारा बजे ले दूरदर्शन अउ रेडियो चैनल के संगेसंग आने आने माध्यम ले करे जाही।
परीक्षा पर चर्चा कार्यक्रम म बिलासपुर स्थित रेलवे हायर सेकण्डरी स्कूल के दू झिन छात्र ह प्रधानमंत्री ले गोठबात करही। इंहा के प्राचार्य ह बताइन कि ए दूनो छात्र ल सीबीएसई डहार ले राखे गे निबंध प्रतियोगिता म चुने के बाद प्रधानमंत्री ले गोठबात बर वर्चुअल रूप ले जुड़ही अउ अपन प्रश्न पूछ सकही।
प्रदेश के जम्मों नगरीय निकाय मन म लोगन मन ल अब घर के तीर स्वास्थ्य सुविधा मिलही। शहरी स्लम स्वास्थ्य योजना के विस्तारित स्वरूप के शुभारंभ मुख्यमंत्री ह काली करही। ए योजना के माध्यम ले प्रदेश के तिरालिस ठिन नगर पालिका परिषद अउ एक सौ ग्यारह नगर पंचायत मन म मोबाईल मेडिकल यूनिट अउ दाई-दीदी क्लिनिक लगाये जाही। जिहां लोगन मन अपन स्वास्थ्य के जांच करवाके दवई घलो ले सकही।
जानबा के मुताबिक मुख्यमंत्री शहरी स्लम स्वास्थ्य योजना के शुभारंभ एक नवंबर दू हजार बीस के करे गे रीहिस। एमा चौदा नगर निगम मन म साठ मोबाईल मेडिकल यूनिट एंबुलेंस के माध्यम ले लोगन मन ल ए बेरा स्वास्थ्य सुविधा मिलत हे। अब ये योजना ल पूरा प्रदेश म बढ़ाय जात हे।
मुख्यमंत्री भूपेश बघेल ह वीरांगना अंवति बाई लोधी के नाव ले नारी सशक्तिकरण सम्मान देके घोषणा करे हे। बेमेतरा जिला म राखे गे अंवतिबाई लोधी बलिदान दिवस कार्यक्रम म मुख्यमंत्री ह कीहिन कि हरसाल राज्य स्थापना दिवस एक नवंबर के सम्मान दे जाही।
एति रायपुर म राखे गे एक ठिन बइठका म मुख्यमंत्री ह गौमूत्र के खरीदी बर एक ठिन तकनीकी समिति बनाय के बात केहे हे। ए समिति ह गौमूत्र खरीदी बर आने-आने बात के जानबा लीही। ए समिति म कामधेनु विश्वविद्यालय के विशेषज्ञ मन ल घलो राखे जाही। समिति ह पंद्रह दिन म अपन रिपोर्ट राज्य सरकार ल दीही। उंहें मुख्यमंत्री ह काली रायपुर के पंढरी स्थ्ति छत्तीसगढ़ हाट म राखे गे राज्य स्तरीय खादी अउ ग्रामोद्योग प्रदर्शनी म शामिल होइन।
ओमन बढ़िया काम करइया बुनकर अउ शिल्पकार मन ल राज्य स्तरीय पुरस्कार ले सम्मानित करीन। त उंहें सरकारी वकील मनके मानदेय ल बढ़ाय के घोषणा के बाद काली रायपुर म मुख्यमंत्री के सम्मान कार्यक्रम राखे गीस। ए मउका म ओमन कीहिन कि राज्य सरकार ह सरकारी वकील मनके मानदेय म अस्सी प्रतिशत बढ़ोत्तरी करे के फैसला लेहे।
खैरागढ़ विधानसभा उपचुनई म नाम वापसी अउ चुनावी चिन्हा बांटे के बाद अब जम्मों राजनीतिक दल अउ निर्दलीय उम्मीदवार मन ह प्रचार प्रसार शुरू कर देहे। एति मुख्य निर्वाचन पदाधिकारी कोति ले जारी निर्देश म केहे गेहे कि बारा अप्रैल के होवइया मतदान के पहिली वोट डरइया मन ल अपन पहिचान दिखाय बर पड़ही।
भारत निर्वाचन आयोग ह पहिचान पत्र के संग बारा प्रकार के आने दस्तावेज ल घलो मतदान बर मान्य करे हे। जेमा आधार कार्ड, मनरेगा जॉब कार्ड, बैंक डाकघर डहार ले जारी फोटो वाले पासबुक, पेनकार्ड, ड्राइविंग लाइसेंस, स्वास्थ्य स्मार्ट कार्ड म कोनो भी एक पहिचान पत्र दिखाके वोट डार सकथे।
छत्तीसगढ़ म महात्मा गांधी राष्ट्रीय ग्रामीण रोजगार गारंटी अधिनियम- मनरेगा के तहत मजूर मन ल अब हरएक दिन दू सौ चार रूपिया मजूरी मिलही। नवा दर एक अप्रैल दू हजार बाईस ले प्रभावी होही। केंद्रीय ग्रामीण विकास मंत्रालय ह मनरेगा के तहत ए वित्तीय बछर बर मजूरी म ग्यारा रूपिया के बढ़ोत्तरी करे हे। पहिली श्रमिक मन ल एक सौ तिरानबे रूपिया रोजी दे जात रीहिस।
प्रधानमंत्री नरेंद्र मोदी के अगवई म केंद्रीय मंत्रिमंडल ह एसो एक जनवरी ले केंद्र सरकार के कर्मचारी अउ पेंशन लेवइया मन ल तीन प्रतिशत महंगाई भत्ता के उपराहा किस्त जारी करे के मंजूरी दे देहे। एखर ले महंगाई भत्ता बाढ़के चौंतीस प्रतिशत हो जाही। केंद्र सरकार के सैंतालिस लाख अड़सठ हजार कर्मचारी अउ अड़सठ लाख बैंसठ हजार पेंशनभोगी मन ल बाढ़े महंगाई भत्ता के फायदा मिलही।
नवा रायपुर विकास प्राधिकरण डहार ले ग्यारा ले आठ गांव मन म आवासीय सर्वे करे जात हे। ए सर्वे पंद्रह फरवरी ले शुरू करे गेहे। एखर बर सात दल के गठन करे गेहे। सर्वे के आधार म आठ गांव मन म एक हजार छै सौ अड़तालिस आवासीय पट्टा लोगन मन ल दे गेहे। ए बेरा आठ ग्राम म सर्वे सूची के प्रारंभिक प्रकाशन करे गेहे। दावा आपत्ति बर पंद्रह दिन के बेरा राखे गेहे।
जानबा के मुताबिक नवा रायपुर प्रभावित कल्याण समिति ह आरोप लगाय रीहिन कि सर्वे सूची अपात्र गांव के लोगन मन ल घलो राखे गेहे। एखर खंडन करत नवा रायपुर विकास प्राधिकरण ह केहे हे कि किसान कल्याण समिति के आरोप ह गलत हे।
प्रदेश म अब तक तीन करोड़ ब्यानबे लाख सात हजार ले जादा टीका लगाये जा चुके हे। त उंहें बारा ले चौदा साल के तेला इक्कीस हजार ले जादा लईका मन ल टीका के पहिली डोज दे जा चुके हे। काली प्रदेश म सत्ताईस झिन मनखे मन ह कोरोना संक्रमित पाये गीस। प्रदेश के सतरा जिला म कोरोना के एको मरीज नइ मिले हे। ए बेरा एक सौ पचास मरीज मनके इलाज प्रदेश के अस्पताल या होम आइसोलेशन म चलत हे।
कबीरधाम जिला म आज भोरमदेव महोत्सव के शुभारंभ आदिवासी बैगा लोकनृत्य ले शुरू होइस। एखर पहिली आज बीहनिया बाबा भोरमदेव शिव के महाअभिषेक के संगेसंग विशेष आरती करे गीस। उंहें दीपदान अउ गंगा आरती के घलो आयोजन करे जात हे। भोरमदेव महोत्सव म बैगा जनजाति के लोकनृत्य के संगेसंग आने-आने सांस्कृतिक कार्यक्रम घलो चलत हे।
दू दिन तक चलइया ए कार्यक्रम म स्कूली लईका मन घलो अपन कार्यक्रम पेश करही। जानबा के मुताबिक हर साल होली के बाद के तेरस अउ चौदस तिथि म भोरमदेव महोत्सव होथे, जेमा देश-विदेश के लोगन मनके संगेसंग बड़का कलाकार मन घलो शामिल होथे।
– प्रदेश म पढ़ना-लिखना अभियान के तहत प्रौढ़ शिक्षार्थी मनके आकलन बर आज राज्यव्यापी महापरीक्षा राखे गीस। ए परीक्षा म अड़सठ हजार ले जादा छात्र मन शामिल होइन।