एक्सपोर्ट कॉन्क्लेव
उद्योग मंत्री कवासी लखमा ह आज राजधानी रईपुर म फेडरेशन ऑफ इंडियन एक्सपोर्ट आर्गनाइजेशन डहार ले राखे गे एक्सपोर्ट कॉन्क्लेव के सुभारंभ करीन। ए मउका म श्री लखमा ह किहीन कि छत्तीसगढ़ म प्राकृतिक संसाधन, वनोपज अउ खनिज बहुत मात्रा म हवय। एखर प्रसंस्करण उद्योग स्थापित करके निर्यात के संभावना बढ़ाय जा सकथे। श्री लखमा ह किहीन कि राज्य के कुल निर्यात ह बढ़के दुगुना होगे हे। ए मउका म कारीकरम स्थल म छत्तीसगढ़ के कोसा शिल्प, ब्रॉस मेटल, वनोपज अउ वनौषधि ले तैयार उत्पाद मनके प्रदर्सनी घलो लगाय गे रिहीस।
होईकोर्ट-सीबीआई जांच
महासमुंद जिला म एके परिवार के चार झन के मउत के मामला म छत्तीसगढ़ हाईकोर्ट ह सीबीआई जांच के आदेस दे हे। पिथौना थाना क्षेत्र के ग्राम किशुनपुर म तीस मई दू हजार अट्ठारह म उप स्वास्थ्य केन्द्र म पदस्थ स्टाफ नर्स समेत चार झिन लोगन के हत्या कर दे गे रिहीस। पुलिस ह ए मामला म पांच आरोपी मन ल गिरफ्तार करे रिहीस। पुलिस जांच ले असंतुष्ट होके मृतक के परिजन मन ह हाईकोर्ट म याचिका दायर करके मामला के सीबीआई जांच कराय के मांग करे रिहीन। एमा हाईकोर्ट ह सीबीआई ल चार महीना के भीतर ए मामला के जांच के आदेस देहे।
हेपेटाइटिस-बी टीका
स्वास्थ्य विभाग ह नियमित टीकाकरण अभियान के अंतर्गत प्रदेस के सब्बो शिशु अउ उच्च जोखिम वाले व्यक्ति मन ल हेपेटाइटिस-बी के टीका अवश्य लगाय के अपील करे हे। हेपेटाइटिस के समय म इलाज नइ कराय ले ए ह लीवर फेलियर या लीवर कैंसर के कारण बन जथे। हेपेटाइटिस एक संक्रामक बीमारी आय, जेन ह लीवर म सूजन पैदा कर एला नुकसान पहुंचाथे।
राष्ट्रीय वायरल हेपेटाइटिस नियंत्रण कारीकरम के राज्य नोडल अधिकारी डॉक्टर धर्मेन्द्र गहवई ह बतईन कि प्रदेस म हेपेटाइटिस संक्रमण से होवइया बीमारी मनके निःशुल्क जांच अउ उपचार के व्यवस्था हे। प्रदेस म उप स्वास्थ्य केन्द्र स्तर म रैपिड डयग्नोस्टिक किट से एखर जांच के सुविधा हे। सबो जिला अस्पताल अउ सासकीय मेडिकल कॉलेज अस्पताल मन म एखर निःशुल्क जांच अउ उपचार करे जाथे।
कोविड टीका
राष्ट्रव्यापी अभियान के अंतर्गत देस म अब तक एक सौ बयासी करोड़ सत्यासी लाख ले जादा कोविड टीका लगाय जा चुके हे। उहें, 12 ले 14 बछर आयु वर्ग के एक करोड़ पांच लाख ले जादा लइका मन ल कोविड रोधी टीका के पहलइया डोज लगाय गेहे।
ऐति, छत्तीसगढ़ म घलो कोरोना ले बचाव बर टीकाकरण अभियान जोर-सोर से जारी हे। प्रदेस म अब तक तीन करोड़ इंक्यानवे लाख चार हजार ले जादा टीका लगाय गेहे। उहें, 12 ले 14 बछर आयु वर्ग के एक लाख अस्सी हजार आठ सौ चवालीस लइका मन ल टीका के पहलइया डोज दे जा चुके हे।
स्कूल-समय
धमतरी जिला म भीषण गर्मी ल देखत हुए कलेक्टर ह स्कूल मन ल दू पाली म संचालित करे के आदेस जारी करे हे। एक पाली म संचालित होवइया सबो शाला मन म कक्षा मन बिहनिया साढ़े सात बजे ले साढ़े ग्यारह बजे तक लगही। उहें, दू पाली म संचालित शाला मन म प्राथमिक अउ पूर्व माध्यमिक के कक्षा बिहनिया साढ़े सात बजे ले साढ़े ग्यारह बजे तक अउ हाई अउ हायर सेकेंडरी के कक्षा मन बिहनिया ग्यारह बजे ले संझा चार बजे तक संचालित करे जाही। ये आदेस उनतीस मार्च ले प्रभावी होही।
स्वामी आत्मानंद स्कूल
प्रदेस म नवा शिक्षा सत्र ले 32 ठन स्वामी आत्मानंद हिन्दी माध्यम उत्कृष्ट विद्यालय सुरू करे जाही। ये स्कूल मनके संचालन कलेक्टर के अध्यक्षता म गठित सोसायटी डहार ले करे जाही। ए स्कूल मन बर एक हजार पांच सौ उनसठ पद स्वीकृत करे गेहे।
उल्लेखनीय हे कि राज्य सासन डहार ले प्रदेस म एक सौ इकहत्तर स्वामी आत्मानंद अंग्रेजी माध्यम स्कूल मनके संचालन घलो करे जात हे।
खैरागढ़ उपचुनाव
खैरागढ़ उपचुनाव ल लेके कांग्रेस अउ भाजपा सहित जम्मों राजनीतिक दल मन प्रचार अभियान तेज कर देहे। उपचुनाव प्रचार बर भारतीय जनता पार्टी अउ कांग्रेस ह स्टार प्रचारक मनके सूची जारी करे हे। दोनों पार्टी ह उपचुनाव म पूरा ताकत झोंके के तैयारी कर लेहे।
गौरतलब हे कि खैरागढ़ उपचुनाव के तहत नामांकन पत्र मनके जांच म सबो बारह नामांकन वैध पाय गेहे। 28 मार्च तक अभ्यर्थी मन अपन नाम वापस ले सकही। इही दिन प्रत्यासी मन ल चुनाव चिन्ह के आवंटन करे जाही। उहें, 12 अप्रैल के वोट डाले जाही।
इही बीच, खैरागढ़ उपचुनाव ल देखत हुए छत्तीसगढ़ राज्य ओपन स्कूल रायपुर डहार ले आयोजित हाईस्कूल अउ हायर सेकेंडरी मुख्य परीक्षा बर परीक्षा केन्द्र मनके घलो बदलाव करे गेहे।
मन की बात
प्रधानमंत्री नरेन्द्र मोदी काली बिहनिया ग्यारह बजे आकाशवाणी से ‘‘मन की बात‘‘ कारीकरम म देस-विदेस के लोगन ले अपन विचार साझा करही। ये ह मासिक रेडियो कारीकरम के सत्ताईसवीं कड़ी होही। आकाशवाणी अउ दूरदर्शन के सब्बो नेटवर्क म एखर प्रसारण होही। आकाशवाणी समाचार के वेबसाइट अउ न्यूज ऑन एआईआर मोबाइल ऐप म घलो ये कारीकरम उपलब्ध रइही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो कार्यक्रम के सीधा प्रसारण होही।
बातों-बातों-में
प्रादेशिक समाचार एकांश के समसामयिक विषय उपर आधारित कार्यक्रम ‘‘बातों-बातों-में‘‘ ह ये बखत तपेदिक रोग, जेला क्षय रोग या टीबी घलो केहे जाथे, उपर केन्द्रित रइही। बीते चौबीस मार्च के विश्व क्षय रोग दिवस मनाय गीस। ये रोग के कारण, निदान अउ एखर ले बचाव के तरीका के बारे म विस्तार ले जानकारी हासिल करे बर आकाशवाणी समाचार ह बात करीस, रायपुर के जिला क्षय रोग नियंत्रण अस्पताल के चिकित्सा अधिकारी डॉक्टर नमिता साहू से।
ये भेंटवार्ता के प्रसारण आकाशवाणी केन्द्र डहार ले काली बिहनिया साढ़े नौ बजे करे जाही। एला छत्तीसगढ़ स्थित आकाशवाणी के सबो केन्द्र रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा 6 बजके 30 मिनट ले 6 बजके 35 मिनट तक जिला के चिट्ठी कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही, जेला जम्मों केंद्र मन ह एके संघरा रिले करही। ए बखत के अंक म कोरबा जिला के गतिविधि के बारे म जानकारी दे जाही।
बॉडी बिल्डिंग-चैंपियनशिप
ग्यारहवीं फेडरेशन कप नेशनल बॉडी बिल्डिंग चैंपियनशिप के सीनियर महिला वर्ग म छत्तीसगढ़ दुर्ग के सुप्रीति आचार्जी ह रजत पदक अउ पुरूष वर्ग के पैंसठ किलोग्राम वर्ग म कोरिया के अशोक बेहरा ह कांस्य पदक हासिल करे हे। सिक्किम के गंगटोक म आयोजित ये स्पर्धा म छत्तीसगढ़ सहित 32 राज्य अउ स्पोर्टस बोर्ड के खिलाड़ी अउ अधिकारी मन हिस्सा लीन।
अउ अब थोरकुन समाचार सार म-
– छत्तीसगढ़ व्यावसायिक परीक्षा मंडल डहार ले आयोजित पटवारी प्रशिक्षण चयन परीक्षा अब चौबीस अप्रैल के आयोजित करे जाही। एखर पहिली, ये परीक्षा के आयोजन सत्रह अप्रैल के होना रिहीस।
– छत्तीसगढ़ योग आयोग, जिला प्रशासन अउ यूनिसेफ डहार ले कोंडागांव जिला म गर्भवती महिला मन बर विशेष योगाभ्यास बर पायलट प्रोजेक्ट के संचालन करे जाही। ए संबंध म आंगनबाड़ी कार्यकर्ता अउ सहायिका मन ल प्रसिक्षण देके निरदेस दे गेहे।
– बीजापुर जिला के भदराकाली थाना क्षेत्र के ग्राम नरोनापल्ली म आईईडी विस्फोट के चपेट म आय से एक झिन महिला घायल होगे, जेला भोपालपट्टनम के अस्पताल म भर्ती कराय गेहे।
– कोंडागांव जिला म ट्रक के टक्कर ले मोटर साइकिल सवार एक झिन युवक के मउत होगे।
और
– बिलासपुर जिला के सिरगिट्टी थाना क्षेत्र म पुलिस ह चार क्विंटल गांजा के संग एक झिन आरोपी ल गिरफ्तार करे हे। जब्त गांजा के अनुमानित कीमत करीब इकचालीस लाख रूपिया बताय गेहे।