कोल ब्लॉक आवंटन
छत्तीसगढ़ ले राजस्थान ल कोयला के आपूर्ति ल लेके राजस्थान के मुख्यमंत्री अशोक गहलोत ह आज रायपुर पहुंच के मुख्यमंत्री भूपेश बघेल ले भेंट करीन।
खबर के मुताबिक भारत सरकार ह राजस्थान ल छत्तीसगढ़ म कोयला के खदान आवंटित करे हे। फेर ए खदान ले अब तक राजस्थान ल कोयला के आपूर्ति शुरू नइ होय पाय हे। गोठबात के बाद पत्रकार ले चर्चा करत मुख्यमंत्री भूपेश बघेल ह कीहिन कि भारत सरकार डहार ले राजस्थान ल आवंटित कोयला खदान के संबंध म छत्तीसगढ़ सरकार नियम के मुताबिक कार्यवाही करत हे ओमन कीहिन कि छत्तीसगढ़ सरकार ह अइसन मामला म कभू पर्यावरण संरक्षण अउ स्थानीय लोगन के मांग ले समझौता नइ करे हे ।
उंहें राजस्थान के मुख्यमंत्री अशोक गहलोत, ह कीहिन कि छत्तीसगढ़ ले ेजल्दीच राजस्थान ल कोयला के आपूर्ति नइ होही त राजस्थान म साढ़े चार हजार मेगावाट के बिजली संयंत्र बंद हो जाही अउ राज्य म बिजली के भारी संकट हो जाही।
मनरेगा-राशि
छत्तीसगढ़ म महात्मा गांधी राष्ट्रीय ग्रामीण रोजगार गारंटी अधिनियम-मनरेगा म केन्द्र सरकार डहार ले चालू वित्तीय बछर बर चार सौ पांच करोड़ दस लाख रूपिया ले जादा के रकम मंजूर करे गेहे। एमा मनरेगा काम म कतकोन जिनीस के भुगतान खातिर दू सौ नब्बे करोड़ पैंसठ लाख रूपिया अउ वेतन-भत्ता अउ प्रसासकीय खर्च के पूर्ति बर एक सौ चौदह करोड़ पैंतालीस लाख ले जादा के रासि मंजूर करे गेहे।
कोरोना टैक्स
पूर्व मंत्री अजय चंद्राकर, बृजमोहन अग्रवाल समेत कुछ एक आने लोगन मन शराब म लगइया दस फीसदी कोरोना टैक्स ल लेके छत्तीसगढ़ उच्च न्यायालय म एक जनहित याचिका दायर करीन हे। आज हाईकोर्ट के मुख्य न्यायाधीश के डीविजन बैंच ह राज्य सरकार ल नोटिस जारी करके पूछीन कि टैक्स लेके बादो पइसा खरच काबर नइ करे गीस।
खबर के मुताबिक पूर्व मंत्री अजय चंद्राकर , बृजमेहन अग्रवाल समेत कुछएक आने लोगन मन ह जनहित याचिका दायर करे रीहिन कि मई दू हजार बीस के आदेश म शराब म दस प्रतिशत कोरोना टैक्स लगाय गेहे जेमा करोड़ो रूपिया जमा होइस फेर ये रकम शासन ह न स्वास्थ्या विभाग ल दीन अउ न ही एखर अधासंरचना बर कोनो किसम के काम करे गीस।
याचिका म कोरोना टैक्स के रकम के सही जगा उपयोग करे के निर्देश देके मांग करे गेहे। हाइकोर्ट ह राज्य शासन ल नोटिस जारी करके बीस अप्रैल तक जवाब मांगे हे।
खैरागढ़ उपचुनाव
भारतीय जनता पार्टी ह खैरागढ़ उपचुनाव बर स्टार प्रचारक के सूची जारी कर देहे। एमा मध्यप्रदेश के मुख्यमंत्री शिवराज सिंह चौहान, केन्द्रीय मंत्री ज्योतिरादित्य सिंधिया, राष्ट्रीय सह संगठन महामंत्री शिवप्रकाश, प्रहलात सिंह पटेल, छत्तीसगढ़ प्रभारी डी. पुरंदेश्वरी अउ नितिन नबिन के संगेसंग राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह, प्रदेश अध्यक्ष विष्णुदेव साय, राज्यसभा सांसद सरोज पांडेय अउ रामविचार नेताम, नेता प्रतिपक्ष धरमलाल कौशिक, प्रदेश संगठन महामंत्री पवन साय, गौरीशंकर अग्रवाल, विक्रम उसेंडी अउ बृजमोहन समेत पार्टी के चालीस झन बड़का नेता मन ल सामिल करे गेहे।
इही बीच, खैरागढ़ उपचुनाव म आज नामांकन पत्र के जांच करे गीस। एमा जम्मों बारह नामांकन पत्र वैध पाय गेहे। उहें, नाव वापिस लेके आखिरी तारीख अट्ठाईस मार्च हवय। इही दिन प्रत्यासी मन ल चुनाव चिन्ह बांटे जाही।
उहें, खैरागढ़ उपचुनाव के तियारी ल लेके सामान्य प्रेक्षक आईएएस शान्तनु पी. गोटमारे के मौजूदगी म जिला निर्वाचन अधिकारी तारन प्रकाश सिन्हा ह नोडल अधिकारी मनके बइठका लीन। बइठका म बताय गीस कि उपचुनाव बर दू सौ तिरासी मतदान केन्द्र अउ आठ सहायक मतदान केन्द्र के संसोधित सूची तियार कर ले गेहे।
उपचुनाव म मतदाता मनके भागीदारी बढ़ाय बर जागरूकता कारीकरम चलाय जावत हे। ए संबंध म सासकीय महाविद्यालय खैरागढ़ के पढ़इया लइका मन ह रैली निकाल के मतदान बर लोगन मन ल जागरूक करीन।
जवान-बीमार
सुकमा जिला के चिंतागुफा म सीआरपीएफ के अट्ठाईस जवान फूड प्वॉइजनिंग के सिकार होगे। हमर संवाददाता ह बतईन कि ए जम्मों जवान सीआरपीएफ के एक सौ पचासवां बटालियन के ‘‘सी‘‘ कंपनी के हरय। बीमार जवान मन ल सीआरपीएफ के फील्ड अस्पताल ले जाय गीस, जेमा ले सोलह झन जवान मन ल प्राथमिक इलाज के बाद छुट्टी दे दे गेहे। उहें, बारह झन जवान मनके इलाज चलत हे। जम्मों के हालत खतरा ले बाहिर बताय जात हे। सीआरपीएफ के कमांडेंट राजेश यादव ह ए मामला के जांच के निरदेस दीन हे।
माओवादी-समाचार
दंतेवाड़ा जिला म माओवादी मन ह ग्राम पंचायत हिरोली के सरंपच के धारदार हथियार ले हत्या कर दे हे। खबर के मुताबिक जिला के किरंदुल थाना क्षेत्र के ग्राम हिरोली म काली मेला भराय रिहीस। मेला के बादे कुछेक माओवादी मन उहां पहुंचीन अउ सरपंच के हत्या कर दीन। घटना के जघा म माओवादी मन ह बैनर-पोस्टर घलो फेंके हे।
ऐति, बीजापुर जिला के माड़ डिवीजन क्षेत्र म इंद्रावती एरिया कमेटी के मिलिट्री प्लाटून नंबर-सोलह के डिप्टी कमांडर ह अतिरिक्त पुलिस अधीक्षक डॉक्टर पंकज शुक्ला के आगू आत्मसमर्पण करे हे। ए माओवादी उपर नारायणपुर जिला के ओरछा थाना क्षेत्र म होय कतकोन घटना म सामिल रेहे के आरोप हे।
परीक्षा पे चर्चा
परीक्षा पे चर्चा कारीकरम के पांचवां संस्करण एसो एक अप्रैल के नई दिल्ली के तालकटोरा स्टेडियम म होही। सिक्षा मंत्रालय के मुताबिक प्रधानमंत्री नरेन्द्र मोदी पढ़ईया लइका मन ले गोठबात करत परीक्षा ले जुड़े तनाव ल कमती करे के संबंध म अपन बिचार साझा करही। परीक्षा ले जुड़े तनाव ल कमती करे बर जिनगी ल उत्सव भावना ले लेवत देस-बिदेस के लइका, अध्यापक अउ माता-पिता परीक्षा पे चर्चा कारीकरम म प्रधानमंत्री ले गोठबात करथे।
अमृत-महोत्सव कार्यशाला
आजादी के अमृत महोत्सव म दुरूग जिला के भिलाई म राष्ट्रीय शिल्पकला कार्यसाला चलत हे। एमा देसभर के बीस झन कलाकार संघरे हवय। तीस मार्च तक चलइया ए कार्यसाला म महापुरूष मनके बीस ठन मूर्ति बनाय जाही, जेला भिलाई म बनइया देस के पहिली अमृत महोत्सव गार्डन म सजाय जाही।
खबर के मुताबिक ए सिल्पकार कटनी ले मंगाय पथरा ले मूर्ति बनाही। ए कार्यसाला के आयोजन भारत सरकार के ललित कला अकादमी कोति ले भिलाई इस्पात संयंत्र अउ संस्कार भारती छत्तीसगढ़ के मदद ले करे जात हे।
टूर डे सिरपुर
महासमुंद जिला म काली छब्बीस मार्च के ‘‘टूर डे सिरपुर‘‘ साइकिल यात्रा के आयोजन करे जाही। ए साइकिल यात्रा वन विद्यालय महासमुंद ले बिहनिया सात बजे सुरू होही, जेमा जिला भर ले प्रतिभागी सामिल होही। ए यात्रा पर्यटन अउ प्रकृति संरक्षण ल बढ़ावा दे खातिर अउ जिला के पुरातात्विक धरोहर अउ संस्कृति कोति लोगन ल जागरूक कराय खातिर हवय।
स्वास्थ्य केन्द्र-भर्ती आदेश
जशपुर के सन्ना अउ जांजगीर-चांपा के शिवरीनारायण म नवा बने सामुदायिक स्वास्थ्य केन्द्र म नवा पद खातिर भर्ती आदेश जारी कर दे गेहे। दूनों सामुदायिक स्वास्थ्य केन्द्र बर सैंतीस-सैंतीस पद म भर्ती करे जाही। एमा खंड चिकित्सा अधिकारी, सामान्य सर्जन, मेडिकल विशेषज्ञ, शिशु रोग विशेषज्ञ, निसचेतना विशेषज्ञ, दंत चिकित्सक, चिकित्सा अधिकारी नर्सिंग, लैब टेक्निशियन, रेडियोग्राफर, स्टाफ नर्स, ओटी टेक्निशियन, लेखापाल, फॉर्मासिस्ट ग्रेड-टू, सहायक ग्रेड-थ्री, समेत आने पद म भर्ती करे जाही।
स्कूल-समय
प्रदेस म बाढ़त गर्मी ल देखत रईपुर जिला प्रसासन ह स्कूल के बेरा म फेरबदल करे हे। ए संबंध म जिला सिक्षा अधिकारी ह आदेस जारी कर देहे। जारी आदेस के मुताबिक उनतीस मार्च ले स्कूल नवा बेरा म लगाय जाही। एमा एक पाली म चलइया प्राथमिक, पूर्व माध्यमिक, हाई अउ हायर सेंकेंडरी स्कूल के कक्षा बिहनिया साढ़े सात बजे ले साढ़े ग्यारह बजे तक लगही। उहें, जउन स्कूल मन म दू पाली म कक्षा लगथे, उहां प्राथमिक अउ पूर्व माध्यमिक साला बिहनिया साढ़े सात बजे ले साढ़े ग्यारह बजे तक अउ हाई-हायर सेकेंडरी के कक्षा साढ़े ग्यारह बजे ले संझा चार बजे लगाय जाही।
अउ अब थोरकुन समाचार सार म-
– केंद्रीय रसायन अउ उर्वरक मंत्रालय के संस्था सीपेट अउ एमएसएमई दुर्ग कोति ले अनुसूचित जाति वर्ग के बेरोजगार लोगन ल निशुल्क प्रशिक्षण दे जाही। एखर बर तीस मार्च तक कलेक्ट्रेट परिसर अउ कार्यालय अंत्यवसायी व्यावसायिक प्रशिक्षण केंद्र दुर्ग म अर्जी दे जा सकथे।
अउ
– दुर्ग पुलिस ह जेल म निरूद्ध सीआईएसएफ जवान के जगा भेस बदलके ड्यूटी करइया आरोपी ल गिरप्तार कर लेहे। आरोपी ह दूसर के जगा म जवान बनके ग्यारा महीना तक ड्यूटी करीस। जब एखर संबंध म विभागीय अधिकारी मन ल पता लगीस त एखर शिकाइत उतई थाना म दर्ज कराये गीस। आरोपी मउका ले फरार होगे रीहिस, जेला पुलिस ह खोज निकालिस।