खैरागढ़ उपचुनाव
खैरागढ़ विधानसभा उपचुनाव बर नामांकन दाखिल करे के समय सीमा आज मंझनियांकुन तीन बजे सिरागे । ये उपचुनाव बर कुल तेरह झन उम्मीदवार मन ह अपन नामांकन दाखिल करीन हे। आज आखरी दिन भाजपा प्रत्याशी कोमल जंघेल संघरा नौ झिन प्रत्याशी मन ह नामांकन भरीन। एमा जनता कांग्रेस छत्तीसगढ़ के प्रत्याशी नरेंद्र सोनी घलो शामिल हे।
काली नामांकन पत्र के जांच करे जाही। उंहें अठाईस मार्च तक नाम वापस ले जा सकही। इही दिन प्रत्याशी मन ल चुनाव चिन्ह घलो दे जाही। इही बीच निर्वाचन आयोग ह खैरागढ़ उपचुनाव बर आईएएस अधिकारी शांतनु पी. गोटमारे ल सामान्य प्रेक्षक नियुक्त करे गेहे।
इही बीच खैरागढ़ विधानसभा उपचुनाव म सौ प्रतिशत मतदान बर जागरूकता अभियान चलाये जावत हे। इही कड़ी म आज जिला निर्वाचन कार्यालय डहार ले जागरूकता रथ निकाले गीस। जिला निर्वाचन अधिकारी तारन प्रकाश सिन्हा ह रथ ल झंडी दिखाके रवाना करीन। ए रथ के माध्यम ले खैरागढ़ क्षेत्र के शहरी अउ ग्रामीण मतदाता मन ल मतदान के महत्व के बारे म बताये गीस। ए जागरूकता अभियान म खैरागढ़ के विद्यार्थी मन बड़ संख्या म भाग लेवत हे। अभियान के दौरान खैरागढ़ के शासकीय पॉलिटेक्निक के लइका मन ह जागरूकता रैली म शामिल होके आम लोगन ल मतदान के महत्व बताइन।
एखर अलावा मतदाता मन ल अपन मताधिकार के प्रयोग निष्पक्ष तरीका ले करे बर शपथ घलो देवाय जाही। उंहें ए बारे म जागरूकता बर कलेक्ट्रेट परिसर म फोटो प्रदर्शनी घलो लगाय गे हावय। एखर अलावा जागरूकता बर नुक्कड़ नाटक, रंगोली अउ पोस्टर प्रतियोगिता घलो कराये जावत हे।
केंद्र सरकार ह केहे हे कि कोविड ल रोके के उपाय बर आपदा प्रबंधन कानून के प्रावधान ल अब आगू जारी राखे के जरूरत नही हे। ये फैसला ल देश म कोरोना मरीज मनके संख्या म आवत गिरावट ल देखत करे गेहे। ए महीना के इकतीस तारीख के मौजूदा आदेश के सिराय के बाद गृह मंत्रालय डहार ले राज्य मन ल आगू कोनो आदेश जारी नइ करे जाही।
केंद्र ह राज्य अउ केंद्र शासित प्रदेश मन ल यहू सलाह देहे कि ओमन ह जारी करे गे आदेश मन ल वापिस ले लेवयं। फेर मास्क लगाय के अउ हाथ धोय जइसन कोविड नियंत्रण के जरूरी उपाय जारी रही।
इही बीच केंद्र सरकार डहार ले जारी दिशा-निर्देश ल देखत राज्य सरकार ह घलो प्रदेश के सबो विभाग के सचिव, संभागायुक्त अउ कलेक्टर मन ल चिट्ठी के माध्यम ले निर्देश जारी करीन हे। एखर अनुसार कोरोना संक्रमण म कमी के बावजूद सावधानी बर मास्क लगाना अउ दू गज के दूरी जइसन उपाय के पालन करना आगे घलो जरूरी होही।
मुख्यमंत्री भूपेश बघेल ह आज अपन निवास कार्यालय म राखे गे कार्यक्रम म वीडियो कॉन्फ्रेसिंग के माध्यम ले जशपुर जिला के कुनकुरी अउ रायगढ़ जिला के लैलूंगा म छत्तीसगढ़ राज्य सहकारी बैंक के नवा शाखा के उद्घाटन करीन। ये दूनो शाखा म किसान मन ल मोबाइल बैंकिंग, किसान क्रेडिट कार्ड, एटीएम अउ फंड ट्रांसफर के सुविधा मिलही।
ये मउका म मुख्यमंत्री ह कीहिन कि प्रदेश म सहकारिता ल बढ़ाय बर हरसंभव प्रयास करे जावत हे। सहकारी बैंक के शाखा अउ प्राथमिक कृषि साख समिति मनके संख्या म बढ़ोत्तरी के संग ये समिति मन ल सहकारिता क्षेत्र ले घलो जोड़े जावत हे। ये मउका म मुख्यमंत्री ह कीहिन कि राजीव गांधी किसान न्याय योजना के चौथा किश्त के भुगतान इकतीस मार्च के करे जाही। उंहें चालू वित्तीय बछर के अंतिम दिन गोधन न्याय योजना अउ राजीव गांधी ग्रामीण भूमिहिन कृषि मजदूर न्याय योजना के हितग्राही मन ल घलो निर्धारित राशि के भुगतान करे जाही।
आज विश्व क्षय रोग दिवस हे। क्षय रोग याने टीबी के सेहत उपर पड़इया दुष्प्रभाव अउ एखर सामाजिक, आर्थिक परिणाम के बारे म लोगन ल जागरूक करे बर ए दिन ल हर बछर चोबीस मार्च के मनाये जाथे। टीबी अभी घलो दुनिया के सबले जादा संक्रामक जानलेवा बीमारी हवय। आंकड़ा के मुताबिक टीबी ले हर दिन करीबन चार हजार लोगन के जान जाथे अउ करीबन अठाइस हजार लोगन हर दिन ए बीमारी के शिकार होथे। विश्व स्तर म टीबी ल रोके के प्रयास ले बछर दू हजार ले अभी तक करीबन छै करोड़ तीस लाख लोगन के जीवन बचाय म सफलता मिले हे।
महासमुंद के एथलिट इश्वरी ह दुबई म होय वर्ल्ड पैरा – एथलेटिक्स ग्रैंड-प्रिक्स चैंपियनशिप म रजत पदक हासिल करीन हे । महासमुंद के दृष्टिबाधित धाविका इश्वरी निषाद ह चार सौ मीटर के दौड़ ल एक मिनट पच्चीस सेकण्ड म पूरा करके दूसरा स्थान ले हवय।
मुख्यमंत्री भूपेश बघेल अउ समाज कल्याण मंत्री अनिला भेड़िया ह इश्वरी निषाद ल उंखर उपलब्धी बर बधाई दीन हे।
आजादी के अमृत महोत्सव के मउका म रायपुर के सूक्ष्म, लघु अउ मध्यम उद्योग विकास संस्थान डहार ले आज दुर्ग म एक ठन जागरूकता कार्यक्रम कराये गीस। जेखर शुभारंभ उद्योग विभाग के महाप्रबंधक सिमोन एक्का ह करीन। ए कार्यक्रम के उद्देश्य लोगन ल उद्योग मंत्रालय के आने आने योजना के जानकारी देना रीहिस। जेखर ले ओमन ह स्वरोजगार ल अपना सकय। कार्यक्रम के दउरान स्वरोजगार बर वित्तीय सहायता संघरा दूसर जानकारी दे गीस।
ओति आजादी के अमृत महोत्सव म रायगढ़ जिला के नगर निगम ऑडिटोरियम म काली सांस्कृतिक कार्यक्रम अउ कवि सम्मेलन कराय जाही।
दंतेवाड़ा जिला के कटेकल्याण म गांव वाला मन अपन मांग ल लेके तहसील कार्यालय के घेराव करीन। सर्व आदिवासी समाज के कटेकल्याण विकासखंड इकाई के अध्यक्ष भीमसेन मंडावी ह बताइन कि प्रदर्शनकारी मन ह राज्यपाल अउ मुख्यमंत्री के नाम तहसीलदार ल ज्ञापन घलो सौंपीन। ज्ञापन म केहे गेहे कि जल-जंगल-जमीन म उंहा रहइया मूलवासी मनके अधिकार हरय। श्री मंडावी ह बताइन कि ज्ञापन म अनुसूचित क्षेत्र म ग्राम सभा ल अउ जादा मजबूत बनाय के मांग घलो करे गेहे।
प्रदेश के निलंबित आईपीएस अधिकारी जी.पी. सिंह डहार ले सर्वोच्च न्यायालय म लगाये गे अंतरिम जमानत याचिका ल मंजूर करत अदालत ह राज्य सरकार ल जवाब देबर नोटिस जारी करे हे। जी.पी. सिंह डहार ले वरिष्ठ अधिवक्ता कपिल सिब्बल ह याचिका पेश करीन। सुप्रीम कोर्ट के मुख्य न्यायाधीश एन.व्ही. रमन्ना अउ कृष्ण मुरारी के युगल पीठ म ये याचिका बर सुनवाई होइस।
अउ अब पेस हे मौसम के हाल –
ए बेरा प्रदेश के उत्तरी भाग म पश्चिम दिशा ले हवा चलत हे। उंहें दक्षिण भाग म दक्षिण ले नमी वाले हवा आवत हे। तेखर सेती प्रदेश म अधिकतम अउ न्यूनतम तापमान म कोनो खास परिवर्तन होय के संभावना नइ हे। फेर उत्तरी छत्तीसगढ़ म अवइया दू दिन तक तापमान म थोरबहुत गिरावट आय ले गर्मी कमती रेहे के संभावना हे। उंहें प्रदेश म एक दू जगा हल्का बरसा होय के संभावना हे।
– बीजापुर जिला म माओवादी मन ह आत्मसमर्पण करइया एक झन माओवादी के अपहरण कर लेहे। पुलिस के अनुसार ये आत्मसमर्पित माओवादी ह जब गंगालूर के बाजार के रीहिस, तभे दूसर माओवादी मन ह ओला अगवा कर लीन।
– बलौदाबाजार पुलिस ह चकरवाय म सात अउ आठ बछर के दू झन लइका मनके हत्या के मामला म चार झिन आरोपी किशोर उमर के लइका मन ल गिरप्तार करे हे। पुलिस के अनुसार आम तोरे के बात म झगड़ा होय के सेती ए किशोर मन ह ओ दूनो लइका के हत्या कर दीन।