भाजपा-बयान
पांच राज्य म होय विधानसभा चुनाव म भारतीय जनता पार्टी ह उत्तरप्रदेश, उत्तराखंड, मणिपुर अउ गोवा म सरकार बनाय लायक बढ़त हासिल कर ले हवय। पार्टी के अतेक बड़ सफलता बर नेता मन प्रधानमंत्री अउ कार्यकर्ता मन ल धन्यवाद दे हवय।
इही बीच, प्रदेस भाजपा अध्यक्ष विष्णुदेव साय ह जनता मनके प्रति आभार व्यक्त करे हे। अपन बयान म श्री साय ह ए सफलता बर प्रधानमंत्री नरेन्द्र मोदी अउ केन्द्रीय गृहमंत्री अमित शाह के संगेसंग पार्टी के समर्पित कार्यकर्ता मनके प्रयास ल जिम्मेदार बतईन। ओमन उत्तरप्रदेश म भाजपा ल मिले निर्णायक बढ़त बर राज्य के मुख्यमंत्री योगी आदित्यनाथ के काम ल घलो एक बड़का कारण बतईन।
प्रधानमंत्री-कोविड समीक्षा
प्रधानमंत्री नरेन्द्र मोदी ह कोविड महामारी ले निपटे बर टीका लगइया स्वास्थ्यकर्मी मनके संग केन्द्र अउ राज्य सरकार के परयास के सराहना करीन हे। श्री मोदी ह काली संझा एक उच्च स्तरीय बइठका म कोविड महामारी अउ बिसेस रूप ले ओमिक्रॉन लहर के दउरान देस म टीकाकरण अभियान के समीक्षा करीन। प्रधानमंत्री ह कोरोना ले बचाव बर जारी करे गे दिसा-निरदेस के पालन के संगेसंग सामुदायिक मदद के आग्रह घलो करीन।
मुख्य सचिव-स्वास्थ्य परीक्षण
प्रदेस के जम्मों स्कूल के पढ़ईया लइका मनके जल्दीच स्वास्थ्य जांच कराय जाही। ए दउरान दिव्यांग लइका मन ल निःशक्तता प्रमाण पत्र घलो बिसेस रूप ले जारी करे जाही। ए संबंध म मुख्य सचिव अमिताभ जैन ह जम्मों जिला कलेक्टर अउ जिला पंचायत मनके मुख्य कार्यपालन अधिकारी मन ल चिट्ठी जारी करे हे। मुख्य सचिव ह स्वास्थ्य जांच ले पहिली जम्मों स्कूल मन म सर्वें के काम अवइया दू महीना के भीतर पूरा कराय के निरदेस दीन हे।
नीट परीक्षा-आयु सीमा
राष्ट्रीय चिकित्सा आयोग ह नीट-अंडर ग्रेजुएट प्रवेश परीक्षा म भाग ले बर उपरी आयु सीमा हटा देहे। राष्ट्रीय परीक्षण एजेंसी-एनटीए ल लिखे चिट्ठी म आयोग ह एजेंसी ले नीट परीक्षा के सूचना पुस्तिका ले जादा उमर के मापदंड हटाय बर केहे हे।
पीएम किसान सम्मान निधि योजना
केन्द्र सरकार के प्रधानमंत्री किसान सम्मान निधि योजना म पंजीकृत जम्मों किसान मन बर पीएम किसान पोर्टल म ई-केवायसी करवाना जरूरी कर दे गेहे। छत्तीसगढ़ के जम्मांं जिला मन म ए निरदेस के पालन करे बर जरूरी कदम उठाय जावत हे।
इही कड़ी म बीजापुर जिला म पदस्थ कृषि विभाग के उप संचालक पी. एस. कुशरे ह बतईन कि पीएम किसान योजना के फायदा सही अउ पात्र किसान मन ल देके के संग ए काम म धोखाधड़ी ल रोके बर ई-केवाईसी करवाना जरूरी कर दे गेहे। पीएम किसान पोर्टल म ओटीपी या बायोमेट्रिक पहिचान के माध्यम ले ई-केवाईसी के विवरण दर्ज करे के सुविधा दे गेहे। एखर संगेसंग दूर-दराज गांव क्षेत्र के किसान अपन तीर के लोक सेवा केन्द्र के मदद ले घलो पन्द्रह रूपिया के सुल्क देके ई-केवाईसी दरज करा सकत हे।
एसएसबी-प्रशिक्षण शिविर
सशस्त्र सीमा बल छत्तीसगढ़ डहार ले माओवाद प्रभावित क्षेत्र के शिक्षित बेरोजगार युवा मन बर दुरूग म मुर्गी पालन के दस दिवसीय सिविर लगाय गीस। छत्तीसगढ़ कामधेनु विश्वविद्यालय अउ पशु चिकित्सा विज्ञान महाविद्यालय के मदद ले राखे गे ए सिविर म कड़कनाथ अउ आने-आने प्रजाति के मुर्गी मनके वैज्ञानिक तरीका ले पालन करे के प्रशिक्षण दे गीस। सिविर म माओवाद प्रभावित अंतागढ़ अउ भानुप्रतापपुर विकासखंड के दूर-दराज गांव के अट्ठारह लड़का अउ चौदह लड़की समेत कुल बत्तीस प्रतिभागी सामिल होईन।
ए मउका म सशस्त्र सीमा बल के रावघाट परियोजना क्षेत्र म पदस्थ उप महानिरीक्षक सुधीर कुमार ह बतईन कि ए प्रसिक्षण के उद्देश्य माओवाद प्रभावित क्षेत्र के शिक्षित बेरोजगार अउ स्थानीय लोगन मन ल स्वरोजगार देवाना हे।
अमृत महोत्सव-जागरूकता कार्यक्रम
आजादी के अमृत महोत्सव के तहत केन्द्रीय श्रम अउ रोजगार मंत्रालय के दंतोपंत ठेंगड़ी राष्ट्रीय श्रमिक शिक्षा अउ विकास बोर्ड डहार ले आलेखूंटा गांव म श्रमिक जागरूकता कारीकरम आयोजित करे गीस। ए मउका म कारीकरम के मुख्य अतिथि अशोक बजाज ह किहीन कि भारत सरकार के कल्याणकारी योजना आर्थिक रूप ले कमजोर लोगन मन बर वरदान साबित होवत हे। ओमन उज्जवला गैस योजना, जनधन योजना अउ अटल पेंशन योजना समेत आने-आने योजना मनके जिक्र करत किहीन कि ए योजना मन ले गरीब मनके जिनगी म सकारात्मक बदलाव आय हे।
आस्था संकुल संगठन-पुरस्कार
राजनांदगांव जिला के सोनेसरार गांव के आस्था संकुल संगठन ल सुघ्घर काम बर केन्द्र सरकार ह ए बछर के आत्मनिर्भर संगठन पुरस्कार ले सम्मानित करे हे। केन्द्रीय पंचायती राज अउ ग्रामीण विकास मंत्री गिरिराज सिंह ह अंतर्राष्ट्रीय महिला दिवस के मउका म नई दिल्ली म होय समारोह म ए पुरस्कार दीन। ‘बिहान‘ योजना के तहत गठित ए आस्था संकुल संगठन के माईलोगिन मन साग-भाजी उगाय के संग सेनिटरी नैपकिन बनाय अउ बैंक सखी के संगेसंग ई-रिक्शा संचालन के काम करत हे।
दुर्घटना
बलौदाबाजार-भाटापारा जिला के पलारी म पाछु रतिहा एक कार के पेड़ ले टकराय ले तीन झिन लोगन के मउत होगे। उहें, एक झिन मनखे घायल होगे हे। ए चारो अपन संगवारी के घर ले परिवार के कारीकरम म सामिल होय के बाद कुसमी ले लहुटत रिहीन, तभेच ए हादसा होईस। टक्कर अतका जोरदरहा रिहीस कि कार के भीतर फंसे लोगन मन ल बड़ मुश्किल के बाद बाहिर निकाले जा सकीस।
ओति, जांजगीर-चांपा जिला के घिवरा गांव म चारपहिया गाड़ी के टक्कर ले फटफटी सवार एक झिन मनखे के मउत होगे। उहें, चारपहिया गाड़ी म सवार आठ झिन लोगन घायल होगे हे। ए जम्मों झन ल स्थानीय अस्पताल म भर्ती कराय गेहे।
माओवादी समाचार
सुकमा जिला के धर्मापेंटा इलाका म माओवादी मन ह सड़क निर्माण काम म लगे एक ठिन गाड़ी म आगी लगा दीन। जिला के पुलिस अधीक्षक सुनील शर्मा ह बतईन कि किस्टाराम थाना क्षेत्र म होय ए आगजनी के घटना म सामिल माओवादी मनके तलाशी बर अभियान तेज कर दे गेहे।
मल्टीमीडिया चित्र प्रदर्शनी
आजादी के अमृत महोत्सव के तहत बिलासपुर जिला के रतनपुर म काली ले तीन दिवसीय मल्टीमीडिया चित्र प्रदर्शनी लगाय जाही। बिलासपुर के सांसद अरूण साव ह काली मंझनिया बारह बजे ए प्रदर्सनी के उद्घाटन करही। उहें, कोटा क्षेत्र के विधायक डॉक्टर रेणु जोगी ह कारीकरम के पगरइति करही। रईपुर स्थित प्रादेशिक लोकसंपर्क कार्यालय अउ बिलासपुर के क्षेत्रीय लोकसंपर्क कार्यालय के मदद ले राखे गे ए प्रदर्सनी के दउरान हरेक दिन आने-आने सांस्कृतिक कारीकरम अउ स्पर्धा होही।
बजट-अकबर
मुख्यमंत्री भूपेश बघेल डहार ले अवइया बछर बर काली पेस करे गे बजट ल प्रदेस के वन मंत्री मोहम्मद अकबर ह लोक कल्याणकारी बतईन हे। अपन बयान म श्री अकबर ह किहीन कि मुख्यमंत्री ह ए बजट म प्रदेस के जम्मों वर्ग के हित मनके बिसेस ध्यान राखे हे। ओमन किहीन कि व्यावसायिक परीक्षा मंडल अउ राज्य लोक सेवा आयोग के परीक्षा म राज्य के स्थानीय उम्मीदवार मनके परीक्षा सुल्क माफ करे के घोसना स्वागत योग्य हवय। उहें, राज्य के सरकारी अधिकारी अउ करमचारी मनके लंबा समय ले चले आवत मांग ल पूरा करत पुराना पेंशन योजना ल बहाल करे के फइसला घलो एक ठिन बड़का कदम हवय।
लोकवाणी
मुख्यमंत्री भूपेश बघेल के मासिक रेडियोवार्ता लोकवाणी के सत्ताईसवां कड़ी के प्रसारण तेरह मार्च के होही। मुख्यमंत्री लोकवाणी म ए बखत ‘‘छत्तीसगढ़ सरकार-नारी शक्ति के सरोकार‘‘ बिसय म प्रदेसवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल मन ले बिहनिया साढ़े दस बजे ले ग्यारह बजे तक करे जाही।
अउ अब थोरकुन समाचार सार म-
– बलौदाबाजार पुलिस ह ठगी के मामला म तीन झिन फरार आरोपी मन ल गिरफ्तार कर लेहे। ए तीनों मन उपर एक फायनेंस कंपनी ले लोन के नाम म दस लाख रूपिया के ठगी करे के आरोप हवय।
अउ
– राजनांदगांव पुलिस ह चिखली के तीर दू आरोपी ल गिरफ्तार करके उंखर तीर ले करीबन दू किलो गांजा जब्त करे हे। पुलिस ह बतईन कि ए आरोपी रईपुर ले फटफटी के डिक्की म गांजा लुका के ले जावत रिहीन।