विस बजट-01
छत्तीसगढ़ म मुख्यमंत्री भूपेश बघेल ह अवइया वित्तीय बछर बर आज राज्य विधानसभा म बजट पेस करीन। एक लाख चार हजार करोड़ रूपिया के ए बजट म कोनों किसम के नवा कर नइ लगाय गेहे।
मुख्यमंत्री ह आज बजट पेस करत आने-आने वरग बर कतकोन घोसना करीन। राज्य के सरकारी अधिकारी अउ करमचारी बर पुराना पेंशन योजना बहाल कर दे गेहे। उहें, छत्तीसगढ़ व्यावसायिक परीक्षा मंडल अउ छत्तीसगढ़ लोक सेवा आयोग कोति ले होवइया प्रतियोगी परीक्षा म छत्तीसगढ़ राज्य के स्थानीय प्रतिभागी मनके परीक्षा फीस माफ करे के घोसना करे गेहे। राज्य म विधायक निधि के रकम ल दू करोड़ रूपिया ले बढ़ाके चार करोड़ रूपिया करे जाही। उहें, जिला पंचायत अध्यक्ष बर पन्द्रह लाख, उपाध्यक्ष बर दस लाख अउ हरेक सदस्य बर चार लाख बछर के मान ले जिला पंचायत विकास निधि योजना म बाईस करोड़ के प्रावधान राखे जाही। एखर संगेसंग जनपद पंचायत अध्यक्ष बर पांच लाख, उपाध्यक्ष बर तीन लाख अउ हरेक सदस्य बर दू लाख हरेक बछर के मान ले जनपद पंचायत विकास निधि योजना म छियासठ करोड़ रूपिया के प्रावधान होही।
आज बजट पेस करत मुख्यमंत्री ह पंचायत प्रतिनिधि मनके मानदेय बढ़ाय के घोसना करीन। एखर मुताबिक जिला पंचायत अध्यक्ष के मानदेय पन्द्रह हजार ले बढ़ाके पच्चीस हजार रूपिया, जिला पंचायत उपाध्यक्ष के दस हजार रूपिया ले बढ़ाके पन्द्रह हजार रूपिया महीना अउ जिला पंचायत सदस्य मनके मानदेय छह हजार रूपिया ले बढ़ाके दस हजार रूपिया महीना करे जाही। उहें, सरपंच के भत्ता दू हजार ले बढ़ाके चार हजार रूपिया अउ पंच के भत्ता दू सौ ले बढ़ाके पांच सौ रूपिया महीना बर एक सौ चौरासी करोड़ रूपिया के प्रावधान होही।
विस बजट-02
आज पेस करे गे बजट म राजीव गांधी भूमिहीन कृषि मजदूर न्याय योजना म मिलइया छह हजार रूपिया के वार्षिक सहायता ल बढ़ाके सात हजार रूपिया कर दे गेहे। उहें, ए योजना म अब अनुसूचित क्षेत्र म आदिवासी मनके देवता-धामी के जघा म पूजा करइया मांझी, बैगा-गुनिया, पुजारी के संगेसंग हाट पाहार्या अउ बाजा मोहरिया ल घलो सामिल करे गेहे।
छत्तीसगढ़ लघु वनोपज संघ कोति ले आने-आने स्थानीय उत्पाद के ब्रांडिंग अउ विपणन अब छत्तीसगढ़ हर्बल्स के नाव ले करे जाही। बस्तर संभाग म मिलइया रैली ककुन ल इकट्ठा करके राज्य म ही धागा उत्पादन अउ प्रसंस्करण के बेवस्था बर मुख्यमंत्री रेशम मिशन सुरू करे जाही। बस्तर जिला के जगदलपुर, बालोद के बासीन अउ कोंडगांव जिला के माकड़ी म सासकीय महाविद्यालय, मुंगेली म सासकीय कन्या महाविद्यालय खोले जाही। बस्तर संभाग म काम करत सहायक आरक्षक मनके वेतन भत्ता अउ पदोन्नति के फायदा दे बर डिस्ट्रिक्ट स्ट्राइक फोर्स ले नवीन कैडेर के गठन करे जाही। उहें, पुलिस जवान मनके सुरक्षा खातिर तीन सौ नग बुलेट पु्रफ जैकेट बिसाय के बात केहे गेहे। सहीद मनके सम्मान बर रईपुर म छत्तीसगढ़ अमर जवान ज्योति स्मारक के स्थापना, पुलिस मेमोरियल टावर अउ आने निर्माण काम बर एक करोड़ रूपिया के प्रावधान करे गेहे।
उहें, राजस्व संग्रहण विभाग म प्रचलित कराधान अधिनियम-नियम कर दर आंकड़ा के विशेषलण अउ समीक्षा कोति ले राजस्व म बढ़वार बर करावर्धन प्रकोष्ठ बनाय जाही। आज दे गे बजट म सबले जादा सोलह प्रतिशत रकम के प्रावधान स्कूल सिक्षा बर करे गेहे।
विस बजट-03
बजट पेस करे के बाद पत्रकार मन ले गोठबात करत मुख्यमंत्री भूपेश बघेल ह किहीन कि आज पेस करे गे बजट मुख्य रूप ले गांव म केन्द्रित नवा अर्थव्यवस्था म आधारित छत्तीसगढ़ मॉडल म सामिल उद्देश्य ल पूरा करे के दिसा म एक मजबूत कदम हवय। ओमन किहीन कि छत्तीसगढ़ मॉडल के मुख्य उद्देश्य हरय किसान, मजदूर समेत आम लोगन के आमदनी बाढ़य अउ उंखर जेब म पइसा आवय। एखर ले उद्योग अउ व्यापार म अपने-अपन बढ़वार होही।
बजट-प्रतिक्रिया
राज्य सरकार कोति ले आज छत्तीसगढ़ विधानसभा म पेस करे गे बजट ल भारतीय जनता पार्टी ह लोक लुभावन घोषणा के पुलिंदा बतईन। पूर्व मुख्यमंत्री अउ भाजपा के राष्ट्रीय उपाध्यक्ष एला दिशाहीन बतईन। ओमन बजट म अपन प्रतिक्रया देवत किहीन कि ए बजट म माईलोगिन, बेरोजगार, युवा, किसान, मजदूर, सियान अउ नोनी मन बर कुछु नइ हे।
उहें, भाजपा के प्रदेश अध्यक्ष विष्णुदेव साय ह किहीन कि आदिवासी मनके विकास, सम्माजनक जीवन स्तर अउ उंखर सुरक्षा ल लेके ए बजट मौन हे। ओमन किहीन कि पंजीयन शुल्क बढ़ाके राज्य सरकार ह प्रदेस के जनता बर आर्थिक बोझा लादे के काम करे हे।
उहें, भाजपा के प्रदेश महामंत्री नारायण चंदेल, भूपेन्द्र सिंह सवन्नी अउ किरण देव ह आरोप लगईन कि प्रदेस सरकार के ए बजट आय के नवा श्रोत खोजे के जगह म उधार के दिसा म प्रदेस ल ढकलइया साबित होही।
आईटी-छापा
आयकर विभाग के टीम ह छत्तीसगढ़ के दू बड़े व्यवसायी के कई ठिन ठिकाना म आज एक संघरा छापा मारीन। छापा के ए कार्रवाई रईपुर, कवर्धा, जशपुर, बिलासपुर, रायगढ़ अउ दुरूग समेत कई जिला म करे जात हे। आयकर विभाग के ए कार्रवाई म पांच सौ ले जादा अधिकारी अउ करमचारी सामिल हे। आयकर विभाग टीम कारोबारी मनके ठिकाना म जरूरी दस्तावेज जांच म जुटे हे। बताय जात हे कि आयकर विभाग के ए टीम जबलपुर अउ भोपाल ले पहुंचे हे। समाचार लिखे जाय तक आयकर विभाग के कार्रवाई जारी हवय।
नीति आयोग-सराहना
नीति आयोग कोति ले छत्तीसगढ़ म लोगन के बढ़वार बर चलाय जात कतकोन विकास कारीकरम के प्रसंसा होवत हे। एमा नीति आयोग ह नारायणपुर के स्व-सहायता समूह के माईलोगिन मनके काम ल ट्वीट करके प्रसंसा करीन। नीति आयोग ह अपन ट्वीट संदेस म किहीन कि आकांक्षी जिला नारायणपुर जिला म चलाय जात दंतेश्वरी स्व-सहायता समूह के माईलोगिन अभी तक प्रसंस्करण काम ले करीबन चार लाख रूपिया के कमई करे हे। महिला समूह सासन के योजना के फायदा लेके कोदो-कुटकी अउ रागी के उत्पादन करत पन्द्रह ले बीस हजार रूपिया महीना के आमदनी करत हे।
पुलिस विभाग-ट्रॉफी
केन्द्रीय गृह मंत्रालय ह राज्य पुलिस अकादमी चंदखुरी अउ पुलिस प्रसिक्षण संस्थान, राजनांदगांव ल यूनियन होम मिनिस्टर ट्रॉफी ले सम्मानित करीन हे। एखर संगेसंग एक पुलिस थाना समेत पुलिस विभाग के अधिकारी-करमचारी मन ल आने-आने पुरस्कार पदक ट्रॉफी अउ मेडल दे गीस। ए इनाम संबंधित संस्था अउ पुलिस विभाग के करमचारी मन ल आने-आने बछर म उंखर बने काम अउ सेवा बर दे गेहे।
मुख्यमंत्री भूपेश बघेल अउ गृहमंत्री ताम्रध्वज साहू ह एखर बर सम्मानित पुलिस कर्मचारी-अधिकारी अउ संस्था ल बधाई दीन हे।
चिकित्सा शिक्षा-परिणाम
छत्तीसगढ़ लोक सेवा आयोग कोति ले स्वास्थ्य अउ परिवार कल्याण विभाग के आने-आने पद के परीक्षा के नतीजा जारी कर दे गेहे। खबर के मुताबिक आयोग ह प्रावीण्य सूची के आधार म वर्गवार सूची तियार करके आखिरी चयन सूची अउ अनुपूरक सूची जारी कर देहे। आयोग ह मेडिसीन विशेषज्ञ के एक सौ पन्द्रह पद, क्लीनिकल पैथालॉजिस्ट, क्लीनिक बायोकेमिस्ट, चर्मरोग विशेषज्ञ अउ एपीडेमोलॉजिस्ट के एक-एक पद पर विज्ञापन जारी करे गे रिहीस। परीक्षा के नतीजा अउ जानकारी आयोग के वेबसाइट ले जा सकत हे।
अइसने, आयोग ह चिकित्सा सिक्षा आयुष विभाग के यूनानी चिकित्सा अधिकारी चिकित्सक पद के इंटरव्यू बर सूचना पत्र जारी कर दे गेहे, जउन तीस मार्च के होही।
आदिग्राम पोर्टल
आदिवासी क्षेत्र म केन्द्र अउ राज्य सरकार कोति ले चलाय जात आने-आने कारीकरम अउ योजना के जानकारी, उपलब्धि आदिग्राम पोर्टल म दरज होही। एखर बर प्रदेसभर के अधिकारी अउ कमरचारी मन ल संचालनालय स्तर म प्रसिक्षण दे गेहे। खबर के मुताबिक राज्य के आदिवासी क्षेत्र म योजना ल बने ढंग ले चलाय बर केन्द्र सरकार कोति ले आदिग्राम ऑनलाइन पोर्टल बनाय गेहे।