आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेन्द्र मोदी ह किहीन हे कि सरकार देस म स्वास्थ्य के बुनियादी ढांचा ल मजबूत करे बर काम करत हे। भविष्य के चुनौती ल ध्यान म राखत हर जिला म कम ले कम एक मेडिकल कॉलेज खोले के लक्ष्य राखे गेहे। प्रधानमंत्री भारतीय जनऔषधि परियोजना के लाभार्थी अउ जनऔषधि केन्द्र के संचालक मन ले आज वीडियो कान्फ्रेंसिंग के माध्यम ले गोठबात म श्री मोदी ह किहीन कि आजादी के इतना दिन बाद घलो देस म सिरिफ एक अखिल भारतीय आयुर्विज्ञान संस्थान-एम्स रिहीस, फेर अब बाईस एम्स काम करत हे।
जेनेरिक दवई के उपयोग अउ जनऔषधि परियोजना के लाभ के बारे म लोगन मन ल जागरूक करे बर एक मार्च ले पूरा देस म जनऔषधि सप्ताह घलो मनाय जावत हे।
प्रधानमंत्री ह राजधानी रईपुर के कोटा के जनऔषधि केन्द्र के संचालक डॉक्टर शैलेष खंडेलवाल ले वर्चुअल माध्यम ले घलो गोठबात करीन। प्रधानमंत्री ह डॉक्टर खंडेलवाल डहार ले करे गे प्रयास के सराहना करत जम्मों डॉक्टर मन ल अपील करीन कि ओमन घलो अइसन प्रयास करय, जेखर ले गरीब अउ मध्यम वर्ग के लोगन मनके भला हो सकय।

विधानसभा समाचार-01
राज्य विधानसभा के बजट सत्र आज ले सुरू होगे हे। पच्चीस मार्च तक चलइया ए सत्र के दउरान कुल तेरह बइठका होही।
सत्र के सुरूवात आज राज्यपाल अनुसुईया उइके के अभिभाषण ले होईस। राज्यपाल ह ए अभिभाषण म छत्तीसगढ़ सरकार के उपलब्धि गिनावत बतईन कि सरकार के प्रयास ले माओवादी हिंसा के घटना मन म प्रभावी रोक लगे हे। छियालीस झिन माओवादी मारे गेहे। उहें, पांच सौ पचपन ह आत्मसमर्पण करे हे। ओमन बतईन कि ठगी के आरोपी चिटफंड कंपनी के जिम्मेदार लोगन मनके खिलाफ कड़ा कार्रवाई करे के संग ए कंपनी म पइसा जमा करइया सत्रह हजार ले जादा निवेशक मन ल ग्यारह करोड़ रूपिया ले जादा के राशि लहुटाय गेहे।
राज्यपाल ह बतईन कि जगदलपुर के संग बिलासपुर ह हवाई सेवा ले जुड़ गेहे अउ इहां ले नियमित विमान सेवा के संचालन होवत हे। अंबिकापुर के मां महामाया एयरपोर्ट ले घलो घरेलू विमान सेवा सुरू करे के योजना हवय। राज्य सासन डहार ले कोरिया जिला म एक नवा हवाई पट्टी विकसित करे अउ कोरबा जिला म व्यावसायिक एयरपोर्ट के विकास बर कार्यवाही सुरू कर देहे। उहें, माना एयरपोर्ट म अंतर्राष्ट्रीय विमान सेवा अउ अंतर्राष्ट्रीय कार्गों सुविधा उपलब्ध कराय बर गंभीरता ले परयास करे जावत हे।
राज्य सरकार ह नशाबंदी के संबंध म अध्ययन करे बर तीन समिति के गठन करे हे, जउन एखर आने-आने पहलु के अध्ययन करत हे। पाछु दू बछर म निन्यानवे शराब दुकान अउ रेस्टोरेंट बार मन ल बंद करे गेहे।
राज्यपाल ह बतईन कि शुद्ध पानी देवाय बर घर-घर म नल कनेक्शन देके के काम सरलग चलत हे। जल जीवन मिशन के अंतर्गत अड़तीस लाख ले जादा परिवार मन ल अवइया बछर तक घरेलू नल कलेक्शन के माध्यम ले पीये के पानी देके लक्ष्य राखे गेहे।

विधानसभा समाचार-02
राज्यपाल के अभिभाषण के बाद सदन म अविभाजित मध्यप्रदेश विधानसभा के पूर्व सदस्य रमेश वर्ल्यानी अउ मदन सिंह डहरिया के संग भारतरत्न स्वर कोकिला लता मंगेशकर ल श्रद्धांजलि अर्पित करत उंखर व्यक्तित्व अउ उंखर सुघ्घर काम ल सुरता करे गीस।
एखरे संग मुख्यमंत्री भूपेश बघेल ह अभी के वित्तीय बछर बर तृतीय अनुपूरक अनुमान ल घलो आज सदन म पेस करीन।

कौशल्या मातृत्व योजना
मुख्यमंत्री भूपेश बघेल ह आज रईपुर म राखे गे राज्य स्तरीय महिला सम्मेलन के मउका म कौशल्या मातृत्व योजना के सुभारंभ करीन। ए योजना के तहत दूसरइया बेटी के जन्म म महिला हितग्राही मन ल एकमुश्त पांच हजार रूपिया के सहायता रासि दे जाय के प्रावधान हे। योजना ले बेटी मनके लालन-पालन अउ सिक्षा म मदद मिलही।
ए मउका म श्री बघेल आंगनबाड़ी कार्यकर्ता मनके संगेसंग स्व-सहायता समूह अउ सखी वन स्टॉप सेंटर अउ नवा बिहान योजना के तहत महिला संरक्षण के दिसा म सुघ्घर काम करइया अधिकारी मन ल घलो सम्मानित करिन। मुख्यमंत्री ह सुरक्षित मातृत्व बर पांच हितग्राही मन ल पांच-पांच हजार रूपिया के रासि के चेक घलो प्रदान करीन। ए मउका म मुख्यमंत्री ह अंतर्राष्ट्रीय महिला दिवस के बधाई अउ सुभकामना देवत किहीन कि छत्तीसगढ़ के संस्कृति म हमेशा माईलोगिन मनके ऊंचा स्थान रेहे हे।

मुख्यमंत्री-गोधन योजना
मुख्यमंत्री भूपेश बघेल ह किहीन हे कि प्रदेस के किसान मन खाद-बीज असन समिति अउ गौठान ले वर्मी कम्पोस्ट के पहिली ले उठाव कर सकही। मुख्यमंत्री ह काली अपन निवास कार्यालय म गोधन न्याय योजना के रासि अंतरण कारीकरम म म किहीन कि गौठान समिति अउ स्व-सहायता समूह के                       गतिविध मनके सुघ्घर संचालन बर पहिली ले पइसा घलो दे जाही।
श्री बघेल ह बतईन कि स्वावलंबी गौठान ले बारह करोड़ साठ लाख रूपिया के गोबर खरीदे हे। ओमन कारीकरम म गोबर विक्रेता, गौठन समिति अउ महिला समूह मन ल पांच करोड़ अड़तीस लाख रूपिया के रासि ऑनलाइन अंतरित घलो करीन।