विधानसभा-बजट सत्र
छत्तीसगढ़ विधानसभा के बजट सत्र सोमवार सात मार्च ले सुरू होही। पच्चीस मार्च तक चलने वाला ए सत्र के दउरान कुल तेरह ठन बैठक होही। सत्र के सुरूवात सात मार्च के राज्यपाल के अभिभाषण ले होही। राज्यपाल के अभिभाषण बिहनिया ग्यारह बजे होही। एखर आकाशवाणी अउ दूरदर्शन डहार ले सीधा प्रसारण करे जाही। नौ मार्च बुधवार के अवइया वित्तीय बछर बर बजट पेश करे जाही। मुख्यमंत्री भूपेश बघेल ह नौ मार्च के मंझनिया साढ़े बारह बजे बजट प्रस्तुत करही।
विधानसभा अध्यक्ष डॉक्टर चरणदास महंत ह आज विधानसभा परिसर म होय एक ठन पत्रकारवार्ता म बतईन कि ए बजट सत्र ले प्रश्न के सूचना ऑनलाइन लेके अउ उंखर उत्तर घलो ऑनलाइन ही दे जाय के व्यवस्था करे गे हवय। ओमन बतईन कि ए सत्र बर प्रश्न के कुल एक हजार छह सौ बयासी सूचना मिले हे। एमा ले करीब नब्बे प्रतिशत सूचना सदस्य मन ले ऑनलाइन मिले हे। विधानसभा अध्यक्ष ह सदस्य मन डहार ले अपन प्रश्न के सूचना भेजे म देखाय गे रूचि के प्रशंसा करीन। ओमन किहीन कि ए बेवस्था के बारे म विधानसभा सचिवालय डहार ले आई.आई.टी. खड़गपुर ले अध्ययन करवाय गीस। एखर प्राथमिक रिपोर्ट के अनुसार ऑनलाइन प्रक्रिया के कारण हर बछर दू टन ले जादा कागज के बचत होही अउ अइसने करीब अंठावन ठन पेड़ मन कटाय ले बाचही। जेखर ले प्रदूषण घलो कमती होही।
खेलो इंडिया
भारतीय खेल प्राधिकरण ह छत्तीसगढ़ म खेलो इंडिया स्कीम म सात ठन खेलो इंडिया केन्द्र के स्थापना ल मंजूरी दे देहे। ए केन्द्र आने-आने जिला म एक-एक खेल बर खोले जाही। एमा आर्चरी अउ हॉकी बर दू-दू ठन केन्द्र, बॉलीबॉल, मलखंड अउ फूटबॉल बर एक-एक केन्द्र सामिल हे। ए केन्द्र म छत्तीसगढ़ के खिलाड़ी मन ल चुन के राष्ट्रीय अउ अंतर्राष्ट्रीय स्तर के प्रशिक्षित मन डहार ले प्रशिक्षण दे जाही। भारतीय खेल प्राधिकरण ह जउन सेंटर मन ल मंजूरी दे हवय, ओमा शिवतराई बिलासपुर अउ बीजापुर म तीरंदाजी सेंटर, राजनांदगांव अउ जशपुर म हॉकी सेंटर, गरियाबंद म बॉलीबॉल सेंटर, नारायणपुर म मलखंभ सेंटर अउ सरगुजा म फुटबॉल सेंटर सामिल हे।
मुख्यमंत्री भूपेश बघेल ह खेलो इंडिया केन्द्र मन ल मंजूरी मिले म अपन खुसी जतावत किहीन कि एखर ले छत्तीसगढ़ के खिलाड़ी मन ल अपन प्रतिभा निखारे के सुघ्घर मउका मिलही।
तबादला
राज्य सरकार ह भारतीय पुलिस सेवा के तीन झन अधिकारी मनके प्रभार ल बदल देहे। एमा नारायणपुर जिला के पुलिस अधीक्षक गिरिजाशंकर जायसवाल ल पुलिस मुख्यालय रायपुर संबद्ध कार्यालय उप पुलिस महानिरीक्षक कांकेर म सहायक पुलिस महानिरीक्षक के पद म पदस्थ करे गेहे। उहें, बालोद जिला के पुलिस अधीक्षक सदानंद कुमार ल नारायणपुर जिला के नवा पुलिस अधीक्षक बनाय गे हवय। फेर, छत्तीसगढ़ सशस्त्र बल प्रथम वाहिनी भिलाई के सेनानी गोवर्धन राम ठाकुर ल बालोद जिला के पुलिस अधीक्षक के जिम्मेदारी सौंपे गे हवय।
स्वास्थ्य मंत्री-पत्र
छत्तीसगढ़ के स्वास्थ्य मंत्री टी.एस. सिंहदेव ह केन्द्रीय स्वास्थ्य मंत्री मनसुख मांडविया ल यूक्रेन म पढ़ईया मेडिकल के छात्र मनके आगू के पढ़ाई के बारे म चिट्ठी लिखीन हे। चिट्टी म ओमन किहीन हे कि यूक्रेन म मेडिकल के पढ़ाई करत भारतीय छात्र मन ह वापिस लहुटत हे। इंखर मनके भविष्य ल देखत चिंता जाहिर करत श्री सिंहदेव ह किहीन कि इंखर मनके बारे म सरकार ल गंभीरता ले विचार करना चाही। ए छात्र मन ल स्क्रीनिंग टेस्ट अउ मूल्यांकन के बाद देश के मेडिकल कॉलेज म उपरहा सीट देके समायोजित करना चाही, जेखर ले छात्र मनके भविष्य सुरक्षित हो सकय।
कीमोथैरेपी सुविधा
राष्ट्रीय स्वास्थ्य मिशन के दीर्घायु वार्ड योजना म प्रदेश के सत्रह जिला अस्पताल म डे-केयर कीमोथैरेपी सुविधा दे जावत हे। एखर ले प्रदेस के दूरिहा अउ आदिवासी क्षेत्र के कैंसर मरीज मन ल घलो ए सुविधा के फायदा मिलत हे। बस्तर संभाग के दंतेवाड़ा, नारायणपुर, बस्तर अउ कांकेर जिला अस्पताल अउ सरगुजा संभाग के बलरामपुर, जशपुर, सरगुजा अउ सूरजपुर जिला अस्पताल म मरीज मनके मुफत म कीमोथैरेपी करे जावत हे। बालोद, बेमेतरा, बिलासपुर, गरियाबंद, जांजगीर-चांपा, कोरबा, मुंगेली, रईपुर अउ धमतरी के जिला अस्पताल मन म घलो ए सुविधा सुरू होगे हे।
नीति आयोग-आंकाक्षी जिला
नीति आयोग ह आकांक्षी जिला बस्तर म माईलोगिन मन डहार ले चलत वन उपज ले बने बस्तर फूड फर्म अउ दंतेवाड़ा जिला म महुआ ले खाद बनाय के काम के तारीफ करीन हे। आयोग ह जनजातीय अर्थव्यवस्था म महुआ के महत्व अउ बस्तर जिला म सुरू करे गे बस्तर फूड फर्म म ट्वीट करे हे। आयोग डहार ले ट्वीट म केहे गे हवय कि आकांक्षी जिला दंतेवाड़ा म महुआ ह जनजातीय अर्थव्यवस्था के अंग हवय। महुआ पोषण अउ औषधि गुण ले भरे एक ठन मीठा फूल हे। अइसने, नीति आयोग ह बस्तर फूड फर्म म खाद्य पदार्थ बनावत माईलोगिन मनके चित्र ल देखावत ट्वीट म लिखीन हे कि बस्तर फूड फर्म के लक्ष्य लोगन ल जंगल ले मिलने वाला खाद्य पदार्थ ले सेहत ल होने वाला फायदा के बारे म जागरूक करना हे।
नवा रायपुर-प्रभावित किसान
आवास मंत्री मोहम्मद अकबर ह किहीन हे कि नवा रईपुर के प्रभावित किसान मनके जादा ले जादा मांग ल पूरा कर दे गेहे। श्री अकबर ह बतईन कि नवा राजधानी के प्रभावित किसान मन डहार ले आने-आने मांग के सेती पाछु दू महीना ले आंदोलन करे जावत हे। किसान मनके मांग उपर बिचार करे बर बनाय गे तीन सदस्य वाले मंत्री स्तर के समिति ह छह ठन मांग के सिफारिश करे हे। ए सिफारिश ल नवा रईपुर अटल नगर विकास प्राधिकरण के संचालक मंडल के बइठका म मान्य करे गेहे। एमा ग्रामीण बसाहट के आवासीय पट्टा दे जाय के संबंध म ग्राम विकास योजना वाले शर्त ल हटा दे गेहे। प्रभावित किसान मन ल पात्रता के अनुसार बारह सौ ले ढाई हजार वर्गफीट तक आवासीय भूमि दे जाही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित हमर कारीकरम ‘‘बातों-बातों-में‘‘ ह ए बखत अंतर्राष्ट्रीय महिला दिवस उपर केन्द्रित रइही। एमा काली इतवार के बस्तर क्षेत्र के महिला उद्यमी शेख रजिया संग होय भेंटवार्ता के प्रसारण करे जाही। एखर प्रसारण आकाशवाणी के रईपुर केन्द्र डहार ले काली बिहनिया नौ बजके तीस मिनट म करे जाही, जेला छत्तीसगढ़ के सब्बो आकाशवाणी केन्द्र मन ह रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके तीस मिनट ले छह बजके पैंतीस मिनट तक जिला के चिट्ठी कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संघरा रिले करही। ए बखत के अंक म बीजापुर जिला के गतिविधि के बारे म जानकारी दे जाही।
सीआईएसएफ-स्थापना दिवस
केन्द्रीय औद्योगिक सुरक्षा बल-सी.आई.एस.एफ. ह आज अपन तिरपनवां स्थापना दिवस मनावत हे। ए मउका म छत्तीसगढ़ के आने-आने सी.आई.एस.एफ. के मुख्यालय परिसर म कतकोन कारीकरम कराय गीस। सी.आई.एस.एफ के भिलाई मुख्यालय परिसर म राखे गे कारीकरम म भिलाई इस्पात संयंत्र के प्रभारी निदेशक अनिर्बान दास गुप्ता ह गार्ड ऑफ ऑनर के निरीक्षण करके परेड के सलामी लीन। ए दउरान स्वान दस्ता, वेपन हैंडलिंग अउ ड्रोन के प्रदर्शन करे गीस।
अउ अब थोरकुन समाचार सार म-
– सुकमा जिला म आज एक झिन माओवादी ह पुलिस के आगू आत्मसमर्पण करीस। ए माओवादी ह सुरपनगुड़ा आरपीएस सदस्य के रूप म दोरनापाल क्षेत्र म बहुत बेरा ले सक्रिय रिहीस।
– राजधानी रईपुर म अवइया ग्यारह ले तेरह अप्रैल तक तीन दिन के अखिल भारतीय जनजातीय साहित्य समारोह, राज्य स्तरीय जनजाति नृत्य महोत्सव अउ जनजातीय कला अउ चित्रकला प्रतियोगिता के आयोजन करे जाही।
– बालोद पुलिस ह जिला सहकारी बैंक मर्यादित निपानी म पइसा के हेराफेरी के मामला म बैंक कैशियर ल नारायणपुर के जंगल ले गिरफ्तार करे हे।
– दुरूग पुलिस ह सट्टा खेलाय के आरोप म चार झन आरोपी मन ल गिरफ्तार करे हे। इंखर मन तीर ले लाखों रूपिया के सट्टा-पट्टी अउ करीबन अस्सी हजार रूपिया नगद राशि जब्त करे गेहे।
अउ
– रईपुर पुलिस ह करीब ढाई लाख रूपिया कीमत के मादक पदार्थ हेरोईन के संग अमृतसर-पंजाब के तीन झन आरोपी मन ल गिरफ्तार करीन हे।