कोविड टीका
छत्तीसगढ़ म अब तक एक करोड़ अड़सठ लाख उनहत्तर हजार ले जादा नागरिक मन ल कोरोना ले बचाव के दूनों टीका लगाय जा चुके हे। राज्य म टीकाकरण बर पात्र अट्ठारह साल ले जादा उमर के बयासी प्रतिशत लोगन मन ल अउ पन्द्रह ले अट्ठारह साल के तिरालीस प्रतिशत किशोर मन दूनों टीका लगा दे गेहे।
इही बीच, प्रदेश म कोरोना संक्रमण के मामला म सरलग कमी आवत हे अउ औसत पॉजिटिविटी दर शून्य दशमलव पांच-एक प्रतिशत उपर आ गेहे। प्रदेस म काली कोरोना संक्रमण के एक सौ दस नवा मामला आगू आईस।
शिशु संरक्षण माह
प्रदेश म आज ले शिशु संरक्षण माह सुरू होगे हे। आठ अप्रैल तक चलइया ए माह के दउरान नौ महिना ले लेके पांच साल तक छब्बीस लाख चालीस हजार लइका मन ल विटामिन-ए के खुराक दे जाही। संगेसंग छह माह ले पांच साल तक के अट्ठाईस लाख तीस हजार लइका मन ल आयरन अउ फोलिक एसिड सिरप घलो बांटे जाही।
स्वास्थ्य विभाग ह जम्मों माता-पिता मन ले अपील करे हे कि ओमन अपन छह माह ले पांच साल के लइका मन ल हफ्ता म दू बार आयरन सिरप अउ नौ महीना ले पांच साल तक के लइका मन ल हर छह माह के अंतराल म विटामिन-ए के खुराक जरूर दिलवावय।
यूक्रेन संकट
यूक्रेन म फंसे भारतीय मन ल सुरक्षित लाय के अभियान ऑपरेशन गंगा के तहत एक सौ पच्यासी यात्री मन ल लेके विशेष विमान आज बिहनिया रोमानिया ले मुंबई पहुंचीस। एयर इंडिया एक्सप्रेस विमान ले रोमानिया के राजधानी बुखारेस्ट ले मुंबई आय ए लोगन मन म अधिकांश विद्यार्थी हवय। उहें, इंडिगो के घलो एक विशेष यात्री विमान आज बिहनिया बुखारेस्ट ले दू सौ उन्नीस भारतीय मन ल लेके दिल्ली पहुंचीस।
ऐति, राज्यपाल अनुसुईया उइके के पहल उपर जगदलपुर निवासी दीप्ति अउ निहाल समेत छत्तीसगढ़ के सत्तर ले जादा विद्यार्थी यूक्रेन ले सकुशल लहुट गेहे। बतादन कि यूक्रेन अउ रूस के बीच चलत तनाव ल देखत राज्यपाल अनुसुईया उइके ह छत्तीसगढ़ के विद्यार्थी मनके सकुशल वापसी बर विदेश मंत्री डॉक्टर एस. जयशंकर ल पत्र लिखे रिहीन।
दुर्घटना
दुरूग जिला म पाछु रात होय सड़क दुर्घटना म चार मनखे मनके मउत होगे। मोहन नगर थाना प्रभारी जितेन्द्र वर्मा ह बतईन कि पाछु देर रात दुरूग ले तीन झिन युवक एक मोटर सायकल म सवार होके धमधा कोति जात रिहीन। इही दउरान धमधा नाका रेलवे फ्लाईओवर म विपरीत दिसा ले आवत ट्रक ह ओमन के मोटर सायकल ल टक्कर मार दीस। भिंड़त अतका जोरदार रिहीस कि ट्रक अउ मोटर सायकल सवार युवक फ्लाईओवर ले नीचे गिर गीन। ट्रक करीबन पन्द्रह ले बीस मीटर तक रेलिंग ल तोड़त फ्लाईओवर के नीचे खड़े पिकअप वाहन उपर जा गिरीस। ए हादसा म मोटर साइकिल सवार तीन झिन युवक अउ ट्रक चालक के मउकाच म मउत होगे। मोटर साइकिल सवार तीनों युवक दुरूग के तकियापारा निवासी बताय जात हे।
मुख्यमंत्री भूपेश बघेल ह ए हादसा म चार मनखे मनके मउत उपर दुख जतावत ओ मनके परिजन के प्रति संवेदना प्रकट करे हे।
ओति, जांजगीर-चांपा जिला के पंतोरा करा अज्ञात वाहन के चपेट म आय ले एक पुलिस आरक्षक सहदेव निर्मलकर के मउत होगे। ओमन पंतोरा उपथाना म पदस्थ रिहीन।
पत्रकार-मारपीट
दुरूग जिला के अमलेश्वर थाना क्षेत्र म रईपुर के पत्रकार धीरेन्द्र गिरी गोस्वामी ले मारपीट के मामला म पुलिस ह उत्तर पाटन क्षेत्र के जिला पंचायत सदस्य मोनू साहू ल गिरफ्तार कर लेहे। मिले जानकारी अनुसार अमेलश्वर स्थित एक कॉलोनी म कोनों बात ल लेके जिला पंचायत सदस्य अउ उंखर साथी मन पत्रकार उपर हमला कर दीन। ए घटना के निंदा करत रईपुर ले कतकोन पत्रकार अमलेश्वर थाना पहुंचीन, जेखर बाद पुलिस ह आरोपी जिला पंचायत सदस्य उपर मामला दरज करके ओला गिरफ्तार कर लीस।
भाजपा प्रभारी-रायपुर प्रवास
भारतीय जनता पार्टी के राष्ट्रीय सह-संगठन मंत्री शिवप्रकाश अउ राष्ट्रीय महामंत्री अउ प्रदेश प्रभारी डी. पुरंदेश्वरी ह छत्तीसगढ़ के दू दिन के प्रवास म आज रईपुर पहुंचीन। रायपुर विमानतल म पत्रकार मन ले चर्चा करत डी. पुरंदेश्वरी ह किहीन कि प्रदेस म जइसना पत्रकार मन उपर हमला होवत हे अउ बस्तर म पत्रकार मनके उत्पीड़न के मामला आगू आवत हे, ओखर बर भाजपा गंभीर हवय। ओमन किहीन कि अवइया बजट सत्र म भाजपा विधायक पत्रकार मन ले जुड़े मुद्दा समेत आने-आने विषय मन विधानसभा म उठाही।
प्रदेश भाजपा से मिले जानकारी के अनुसार काली पांच मार्च के सह-सगंठन मंत्री शिवप्रकाश अउ प्रदेश प्रभारी डी. पुरंदेश्वरी विधायक अउ सासंद मनके बइठका लीहीं। एखर बाद ओमन भाजपा कोर कमेटी के बइठका म घलो सामिल होही।
दीक्षांत समारोह
जगदलपुर स्थित शहीद महेन्द्र कर्मा विश्वविद्यालय म काली पांच मार्च के दीक्षांत समारोह के आयोजन करे जाही। ए विश्वविद्यालय के ए ह तीसरा दीक्षांत समारोह होही। कुलाधिपति अउ राज्यपाल अनुसुईया उइके समारोह के अध्यक्षता करही। दीक्षांत समारोह म पंचानवे छात्र-छात्रा मन ल गोल्ड मेडल प्रदान करे जाही।
मिशन इंद्रधनुष
आजादी के अमृत महोत्सव के तहत स्वास्थ्य विभाग डहार ले सात मार्च ले सघन मिशन इंद्रधनुष अभियान के चौथा चरण चलाय जाही। ए अभियान तीन महीना तक एक-एक हफ्ता चलही। एखर तहत नियमित टीकाकरण ले छूटे शून्य ले दू साल तक के लइका अउ गर्भवती महतारी मनके जांच करके ओमन के टीकाकरण करे जाही।
धमतरी के जिला टीकाकरण अधिकारी डॉक्टर जे.पी. दीवान ह बतईन कि जिला म पांच सौ अट्ठाईस लइका अउ एक सौ ससत्तर गर्भवती महिला मनके टीकाकरण करे के लक्ष्य राखे गेहे। स्थानीय उप स्वास्थ्य केन्द्र म सोमवार ले रविवार तक प्रतिदिन टीकाकरण करे जाही।
मुख्य सचिव-बैठक
मुख्य सचिव अमिताभ जैन ह काली मंत्रालय म इंदिरा गांधी कृषि विश्वविद्यालय, कामधेनू विश्वविद्यालय, कृषि, पशुपालन अउ सहकारिता विभाग के वरिष्ठ अधिकारी मनके बइठका लीन। ए दउरान ओमन राज्य म खेती म गौमूत्र के वैज्ञानिक अउ व्यवस्थित उपयोग बर कार्ययोजना तियार करे बर किहीन। ओमन किहीन कि खेती म जैविक खाद अउ गौमूत्र के उपयोग ल बढ़ावा दे जाय। मुख्य सचिव ह किहीन कि राज्य के गौठान मन म उच्च क्वालिटी के जैविक खाद बनत हे, जेखर उपयोग किसान खेती म करत हे। ओमन राज्य म खेती-किसानी म गौमूत्र के उपयोग बर कृषि वैज्ञानिक मन ल एकेडमिक रिसर्च के अपील करीन। जेखर ले एखर लाभ के बारे म तथ्यात्मक जानकारी आगू आही।
बोर्ड परीक्षा
छत्तीसगढ़ माध्यमिक शिक्षा मंडल के दसवीं अउ बारहवीं कक्षा के परीक्षा सुरू होगे। परीक्षा मन ल देखत मंडल डहार ले हेल्पलाइन नंबर एक आठ शून्य-शून्य दू तीन तीन चार तीन छह तीन जारी करे गेहे। एमा रईपुर के अलावा दूसर जिला मनके घलो परीक्षार्थी अउ पालक फोन करके अपन समस्या बतावत हे, जेखर विशेषज्ञ मन डहार ले समाधान करे जात हे।
टीबी रोग
बछर दू हजार पच्चीस तक प्रदेस ल टी.बी. मुक्त करे बर स्वास्थ्य विभाग डहार ले कतकोन कदम उठाय जात हे। क्षय नियंत्रण कारीकरम के राज्य नोडल अधिकारी डॉक्टर वाई.क.े शर्मा ह बतईन कि प्रदेस म टी.बी. रोगी मनके पहिचान बर डोर-टू-डोर अभियान चलाय जात हे। एखर तहत दू करोड़ तिरसठ लाख ले जादा लोगन मनके स्क्रीनिंग करे गेहे, जेमा ले दू हजार तीन सौ व्यक्ति संक्रमित पाय गेहे। ओमन बतईन कि प्रदेस के जम्मों प्राथमिक अउ सामुदायिक स्वास्थ्य केन्द्र अउ जिला अस्पताल मन म टीबी रोग के निःशुल्क जांच, इलाज अउ दवई उपलब्ध हवय।
ऊर्जा संरक्षण-प्रतियोगिता
ऊर्जा संरक्षण ल बढ़ावा देके उद्देश्य ले केन्द्रीय विद्युत मंत्रालय डहार ले राज्य अउ राष्ट्रीय स्तर म विद्यार्थी मन बर चित्रकारी अउ स्लोगन प्रतियोगिता के आयोजन करे जात हे। इही कड़ी म सिक्षा अउ क्रेडा विभाग के माध्यम ले धमतरी जिला के आने-आने स्कूल मन म चित्रकारी अउ स्लोगन प्रतियोगिता के आयोजन होईस।
डहरिया-स्वच्छता
नगरीय प्रशासन मंत्री डॉक्टर शिवकुमार डहरिया ह किहिन कि छत्तीसगढ़ म स्वच्छता ल रोजगार ले जोड़े गेहे। एखर ले प्रदेस के सहर मन ल स्वच्छ बनाय म सफलता मिले हे। ओमन काली रईपुर म सोशल इंटरप्राइजेस फॉर गारबेज फ्री सिटी नेशनल कॉन्क्लेव के समापन सत्र ल संबोधित करत रिहीन। भारत सरकार के आवास अउ नगरीय मामला के मंत्रालय डहार ले राखे गे ए कॉन्क्लेव म देश के बीच राज्य मनके प्रतिनिधि मन हिस्सा लीन। कारीकरम म डॉक्टर डहरिया ह स्वच्छता के क्ष्ज्ञेत्र म अच्छा काम करइया स्वच्छता दीदी मनके सम्मान करीन।