यूक्रेन संकट
यूक्रेन युद्ध म फंसे भारतीय मन ल लाय बर आज भारतीय वायुसेना के उन्नीस अउ विमान यूक्रेन के पड़ोसी देश ले उड़ान भरही। एमा तीन हजार सात सौ छब्बीस भारतीय मन ल वापिस लाय जाही। नागर विमानन मंत्री ज्योतिरादित्य सिंधिया ह ट्वीट करके बतईन कि ऑपरेशन गंगा म भारतीय वायु सेना, एयर इंडिया अउ इंडिगो के आठ विमान बुखारेस्ट ले अउ पांच बूडापेस्ट ले भारतीय मन ल लेके आही। ओमन बतईन कि तीन ठिन विमान रोजोफ ले, एक कोसीटसा ले अउ दू विमान सुचावा ले उड़ान भरही।
इही बीच, केन्द्र ले मिले जानकारी के मुताबिक सत्ताईस फरवरी ले आज तीन मार्च तक छत्तीसगढ़ के उनहत्तर झिन पढ़ईया लइका मनके सुरक्षित वापसी होगे हे। राज्य सरकार कोति ले यूक्रेन संकट के बेरा छत्तीसगढ़ के नागरिक मनके मदद बर नई दिल्ली म सहायता केन्द्र बनाय गेहे। ए सबो झन ल गाड़ी, रेहे अउ खाय-पीये के सुभीता देवाय जात हे। संगेसंग दिल्ली ले ए छात्र-छात्रा मन ल छत्तीसगढ़ म अपन गृह नगर जाय बर एयर टिकट के संगेसंग अवई-जवई के आने साधन देवाय जात हे। नई दिल्ली के छत्तीसगढ़ भवन के संयुक्त आवासीय आयुक्त संजय अवस्थी ह बतईन कि यूक्रेन म फंसे छत्तीसगढ़ के एक सौ चौंतीस छात्र-छात्रा अउ उंखर घर के लोगन ले पाछु बाईस फरवरी ले सरलग फोन म संपर्क बने हे। ए सबो ल सुरिक्षत वापिस लाय के परयास करे जात हे।
ऐति, विदेश मंत्रालय ह केहे हे कि यूक्रेन म कोनों भारतीय विद्यार्थी ल बंधक बनाय जाय के खबर नइ हे। ए संबंध म मीडिया म प्रसारित खबर के खंडन करत विदेश मंत्रालय के प्रवक्ता अरिंदम बागची ह यूक्रेन म भारतीय दूतावास उहां के भारतीय नगारिक मनके सरलग संपर्क म हवय अउ ओमन ल सुरक्षित लाय के परयास होवत हे।
प्रभावित किसान-आवासीय पट्टा
नवा रईपुर के परभावित किसान मन ल पात्रता के मुताबिक बारह सौ ले पच्चीस सौ वर्गफीट भूईंया के आवासीय पट्टा अवइया सात मार्च ले दे जाही। नवा रईपुर अटल नगर विकास प्राधिकरण के संचालक मंडल के पाछु पच्चीस फरवरी के होय बइठका म राज्य सरकार कोति ले गठित मंत्रिमंडलीय समिति के छै ठिन परमुख सिफारिश ल मानत आदेश जारी करे गेहे। आदेस म परभावित किसान मन ल सरकारी भूईंया म जिहां उंखर कब्जा हवय। उहें, पात्रला के मुताबिक बारह सौ ले पच्चीस सौ वर्गफीट आवासीय भूईंया के पट्टा दे जाही। एखर बर ग्राम विकास योजना ल लागू करे ले जुड़े सरत ल सिथिल करे के सहमति घलो सामिल हे।
अइसने, किसान मनके पक्ष म ऑडिट आपत्ति के निराकरण बर सिंचित अउ असिंचित भूईंया के संबंध म पटवारी दस्तावेज ल प्रमाण माने जाही। उहें, सरकारी भूईंया म लगे पेड़ के संबंध म वनपाल के रिपोर्ट ल प्रमाण मान के आपत्ति के निराकरण करे के फइसला ले गेहे। संचालक मंडल कोति ले आने-आने सेवा बर प्राधिकरण के अवइया निविदा म साठ प्रतिशत कमरचारी प्रभावित गांव ले ही होय के सरत जोड़े के मंजूरी दे गेहे। संचालक मंडल के एक आने फइसला म नवा रईपुर अटल नगर के आने-आने सेक्टर म बने तीन चौथाई दुकान, गुमटी, चबूतरा अउ हॉल के आवंटन लागत मूल्य अरजी मंगा के लॉटरी ले परियोजना ले प्रभावित परिवार ल ही दे जाही।
नवा रईपुर अटल नगर के लेयर-ग्यारह के गांव म भूईंया बिसाय-बेचे बर मंजूरी के जरूरत ल खत्म करे के अनुसंसा करे गेहे। ए जम्मों काम ल अवइया तीन महीना म पूरा करे के निरदेस दे गेहे।
विश्व कर्ण देखभाल दिवस
राष्ट्रीय बधिरता रोकथाम अउ नियंत्रण कार्यक्रम म आज विश्व कर्ण देखभाल दिवस मनाय जात हे। एमा प्रदेस के सबो सरकारी स्वास्थ्य संस्था म कान के रोग के बचाव अउ इलाज के जानकारी बर जागरूकता कारीकरम के संगेसंग जांच सिविर लगाय गेहे।
दिव्यांगजन-पुरस्कार
समाज कल्याण विभाग कोति ले एसो निःशक्तजन कल्याण बर राज्य स्तरीय पुरस्कार खातिर सर्वोत्तम जिला के श्रेणी म जांजगीर-चांपा जिला ल चुने गेहे। ए इनाम रईपुर के माना के संचालनालय परिसर म काली बिहनिया ग्यारज बजे राज्य स्तरीय समारोह म दे जाही। ए बेरा म दिव्यांगजन मन ल आधुनिक कृत्रिम अंग, सहायक उपकरण घलो दे जाही। सर्वोत्तम दिव्यांग कर्मचारी मन बर दृष्टिबाधित श्रेणी म बालोद जिला के तेजराम साहू अउ धमतरी जिला के अरविंद शर्मा ल चुने गेहे। उहें, श्रवण बाधित श्रेणी म रईपुर जिला के सौरभ कुमार पांडेय अउ अस्थि बाधित श्रेणी म रईपुर जिला के ही रामेश्वर प्रसाद साहू ल इनाम दे जाही। सर्वोत्तम स्वैच्छिक संस्था बर दृष्टिबाधित श्रेणी म महासमुंद जिला के फॉर्चुन फाउंडेशन समाजसेवी संस्था अउ श्रवण बाधित म जांजगीर-चांपा जिला के नवजीवन मुकबधिर स्कूल चलइया प्रेमधारा चैरीटेबल सोसायटी ल चुने गेहे। अइसने, सर्वोत्तम दृष्टिबाधित न्योक्ता के श्रेणी म बालोद जिला के खेमराज जलकल्याण संस्था समिति ल दिव्यांगजन राज्य स्तरीय पुरस्कार ले सम्मानित करे जाही। विजेता मन ल शील्ड, प्रमाण पत्र अउ प्रसंसा पत्र मिलही।
दुर्घटना
प्रदेस म कांकेर, दुरूग अउ जांजगीर-चांपा जिला म पाछु चौबीस घंटा म होय रद्दा दुर्घटना म सात झन के मउत होगे। उहें, तीन झिन आने घायल होगे हे। कांकेर जिला म बड़गांव तीर पाछु रतिहा होय रद्दा दुर्घटना म फटफटी सवार तीन झन के मउत होगे। ए घटना म दू झिन पुलिस जवान अउ आरोपी ल चोट आय हे।
खबर के मुताबिक पुलिस के टीम ए आरोपी ल अपन गाड़ी म लेके जात रिहीन। तभे आरोपी ह भागे के फिराक म पुलिस गाड़ी के स्टेयरिंग ल घूमा दीस। गाड़ी अनते-तनते होके एक फटफटी ले टकरा गे। ए घटना म फटफटी सवार मनखे के मउकाच म मउत होगे। उहें, युवक के पिता अउ एक माईलोगिन नंदियां म जा गिरीन। आज बिहनिया गोताखोर मन ह दूनों के शव बरामद करे हे।
ओति, दुरूग जिला के खुर्सी पार क्षेत्र म ट्रक ह दुपहिया गाड़ी ल टक्कर मार दीस। दुपहिया सवार महतारी अउ बेटा के मउकाच म मउत होगे। उहें, भिलाई के पद्मनाभपुर ओव्हरब्रिज म काली रतिहा एक गाड़ी ह फटफटी ल टक्कर मार दीस, जेमा फटफटी सवार एक झिन मनखे के मउकाच म मउत होगे। उहें, झिन आने मनखे मन घायल होगे, जेमा दू झन के हालत गंभीर बताय जात हे।
अइसने, जांजगीर-चांपा जिला के डभरा क्षेत्र म कोसमझर नगर तीर अज्ञात गाड़ी के टक्कर ले एक मनखे के मउत होय हे।
सियान जतन क्लीनिक
प्रदेश के स्वास्थ्य विभाग कोति ले लोगन के बने स्वास्थ्य अउ उंखर देखभाल बर कतकोन कल्याणकारी योजना अउ जागरूकता कारीकरम चलाय जात हे। एमा स्वास्थ्य विभाग ह काली रईपुर म सियान जतन क्लीनिक लगईन। एमा छत्तीस झिन जरूरतमंद मरीज मन ल वॉकिंग स्टिक अउ सात झन ल श्रवण यंत्र बांटे गीस।
महिला सम्मेलन
अंतर्राष्ट्रीय महिला दिवस के मउका म महिला अउ बाल विकास विभाग कोति ले प्रदेस म कतकोन कारीकरम होही। एमा राजधानी रईपुर के शंकर नगर बीटीआई मैदान म सात मार्च के राज्य स्तरीय महिला सम्मेलन राखे जाही। ए कारीकरम म मुख्यमंत्री भूपेश बघेल, महिला अउ बाल विकास मंत्री अनिला भेंडिया बिसेस रूप ले संघरही। कारीकरम के बेरा आठ तारीख के माईलोगिन मन कोति ले सइकिल रैली निकाले जाही। उहें, पांच ले आठ मार्च तक राज्य स्तरीय महिला मड़ई लगाय जाही। एमा राज्य के स्व-सहायता समूह कोति ले तियार करे गे जिनीस के प्रदर्शनी रइही।
राष्ट्रीय लोक अदालत
राष्ट्रीय विधिक सेवा प्राधिकरण कोति ले देशभर म बारह मार्च के राष्ट्रीय लोक अदालत राखे जाही। एमा रईपुर जिला के तिल्दा अउ गरियाबंद जिला के राजिम, देवभोग तहसील म घलो लोक अदालत लगाय जाही। छत्तीसगढ़ राज्य विधिक सेवा प्राधिकरण के कार्यपालक अध्यक्ष अउ छत्तीसगढ़ उच्च न्यायालय के न्यायाधीश गौदम भादुड़ी ह काली वीडियो कान्फ्रेंसिंग ले राज्य के जम्मों जिला म लोक अदालत के तियारी के समीक्षा करीन। ओमन राष्ट्रीय लोक अदालत ले लोगन ल जल्दी नियाय देवाय के निरदेस दीन। ए लोक अदालत म बिसेस रूप ले भाड़ा नियंत्रण, चेक बाउंस, आबकारी कानून, जलकर, भूमिकर अउ श्रम कानून समेत कतकोन मामला के सुनवाई करे जाही।