उच्च न्यायालय-झीरम घाटी
छत्तीसगढ़ उच्च न्यायालय ह झीरम घाटी मामला म राज्य के एजेंसी ले जांच करवाय के खिलाफ नेशनल जांच एजेंसी-एन.आई.ए. के याचिका ल खारिज कर देहे। हाईकोर्ट के जस्टिस आर.सी.एस. सामंत अउ जस्टिस अरविंद सिंह चंदेल के डिवीजन बेंच ह आज ए सुनवाई करीस।
झीरम घाटी हादसा म दिवंगत उदय मुदलियार के बेटा जितेन्द्र मुदलियार ह दरभा थाना म बछर दू हजार बीस म हत्या अउ पड़यंत्र के आरोप लगावत हुए मामला दर्ज कराय रिहीन। पुलिस म दर्ज ए प्रकरण ल एनआईए ह जगदलपुर के विशेष अदालत म चुनौती दे रिहीन। एखर बाद ए फइसला के खिलाफ एनआईए ह हाईकोर्ट म याचिका दायर करे रिहीन। सुरूवाती सुनवाई के बेरा ही हाईकोर्ट ह ए प्रकरण के जांच म रोक लगा दे रिहीन। तब ले ए मामला के सुनवाई लंबित रिहीस अउ राज्य सरकार जांच सुरू नइ कर पाय रिहीस। आज डिवीजन बेंच ह फइसला सुनात हुए एनआईए के अपील ल खारिज कर दीन।
बोर्ड-परीक्षा
छत्तीसगढ़ माध्यमिक सिक्षा मंडल के दसवीं बोर्ड के परीक्षा ह काली तीन मार्च ले सुरू होही, जउन तेईस मार्च तक चलही। परीक्षा के सुरूवात हिन्दी विषय ले होही। दसवीं के परीक्षा म एसो तीन लाख अस्सी हजार लइका मन सामिल होवत हे।
उहें, बारहवीं बोर्ड के परीक्षा ह आज सुरू होगे हे। आज पहिली पेपर प्रथम भासा हिन्दी, हिन्दी विशिष्ट अउ सामान्य हिन्दी के होईस। बारहवीं के परीक्षा म एसो करीबन दू लाख तिरानवे हजार लइका मन सामिल होवत हे। दूनों कक्षा के परीक्षा ह बिहनिया नौ बजे ले मंझनिया सवा बारह बजे तक संचालित करे जाही।
माओवादी-मुठभेड़
दंतेवाड़ा जिला म सुरक्षा बल मनके संग होय मुठभेड़ म एक झिन इनामी माओवादी मारे गीस। ए माओवादी उपर तीन लाख रूपिया के इनाम रिहीस। जिला के पुलिस अधीक्षक सिद्धार्थ तिवारी ह घटना के पुष्टि करत बतईन कि कटेकल्याण थाना क्षेत्र म करीबन पन्द्रह झिन माआवोदी मनके होय के सूचना मिले रिहीस, जेखर बाद डीआरजी के टीम ल रवाना करे गे रिहीस। इही बेरा तुमकपाल गांव करा माओवादी मन ह सुरक्षा बल मन उपर फायरिंग सुरू कर दीन। ऐति, जवान मन डहार ले करे गे जवाबी कार्रवाई म एक झिन माआवोदी मारे गीस, जेखर सव ल बरामद कर ले गेहे। बताय जात हे कि मारे गे ए माओवादी ह डीवीसी सुरक्षा दलम म डिप्टी कमांडेंट अउ प्लाटून नंबर इकतीस के पार्टी सदस्य रिहीस।
दुर्घटना
महासमुंद जिला के बसना के रहइया एके परिवार के छह झिन लोगन के काली एक ठिन रद्दा हादसा म मउत होगे। ए सबो लोगन मन ओड़िसा म एक बिहाव ले होके वापस लहुटत रिहीन। इही बेरा नुआपाड़ा जिला के जोंक गांव के तीर उंखर कार ह अनियंत्रित होके एक ठिन पेड़ ले टकरा गे, जेखर ले सबो लोगन के मउका म ही मउत होगे।
उहें, इही जिला के राष्ट्रीय राजमार्ग तिरपन म झलप अउ पटेवा के बीच तोरला गांव करा मोटर साइकिल सवार तीन झिन लोगन खड़ा ट्रक ले टकरा गे, जेखर ले तीन झिन जवान लइका के मउत होगे।
ओति, बलरामपुर जिला के शंकरगढ़ थाना क्षेत्र के जगिमा गांव करा एक ट्रैक्टर के अनियंत्रित होके पलटे ले ट्रॉली म सवार चौदह लोगन मन घायल होगे। जेमा गंभीर रूप ले घायल चार झिन मनखे ल जिला अस्पताल म भर्ती कराय गेहे। ट्रॉली म करीब बाईस झिन लोगन मन सवार होके कोटागहना ले पटना गांव एक बिहाव म सामिल होय बर जात रिहीन।
जेईई मेन-परीक्षा तिथि
संयुक्त प्रवेश परीक्षा-जेईई मेन बर परीक्षा के तारीख के घोसना कर दे गेहे। जेईई मेन दू हजार बाईस के आयोजन राष्ट्रीय परीक्षा एजेंसी डहार ले दू ठिन सत्र म करे जाही। पहिली सत्र ए बछर अप्रैल म होही। उहें, दूसर सत्र मई म आयोजित करे जाही। पहिली सत्र के परीक्षा के संभावित तिथि सोलह ले इक्कीस अप्रैल हवय। जबकि उहें, दूसर सत्र के संभावित तिथि चौबीस ले उनतीस मई होही। जेईई मेन बर ऑनलाइन आवेदन के प्रक्रिया पहिली ही सुरू हो चुके हे अउ अभ्यर्थी मन ह इकतीस मार्च तक आवेदन कर सकत हे। अभ्यर्थी मन ह जानकारी बर जेईई मेन के अधिकारिक वेबसाईट रममउंपदण्दजंण्दपबण्पद म देख सकत हे।
माघी पुन्नी मेला/अमृत धारा महोत्सव
मुख्यमंत्री भूपेश बघेल ह किहीन हे कि छत्तीसगढ़ के सुप्रसिद्ध तीर्थ राजिम सिरिफ एक सहर नहीं, बल्कि अध्यात्म, धर्म अउ हमर गौरवसाली संस्कृति के संगगम हवय। मुख्यमंत्री ह काली राजिम माघी पुन्नी मेला के समापन समारोह सामिल होईन। ए मउका म ओमन ह राजिम के त्रिवेणी संगम म तैंतीस करोड़ बारह लाख रूपिया के लागत ले बने लक्ष्मण झूला के लोकार्पण करीन। ए बेरा म मुख्यमंत्री ह भगवान राजीव लोचन के पूजा-अर्चना करीन अउ महानदी आरती म सामिल होईन।
राजिम माघी पुन्नी मेला के समापन कारीकरम म धर्मस्व मंत्री ताम्रध्वज साहू ह कहिन कि राज्य सरकार डहार ले हर बछर मेला के आयोजन ल बेहतर रूप देय के कोसिस करे जात हे। ओमन ह बतईन कि मेला म एसो लगभग तीन हजार हितग्राही मन ल अंठानवे करोड़ रूपिया के आने-आने योजना के माध्यम ले लाभांवित करे गेहे।
उहें, विधानसभा अध्यक्ष डॉक्टर चरणदास महंत ह काली कोरिया जिला के मनेन्द्रगढ़ म आयोजित अमृतधारा महोत्सव के सुभारंभ करीन ए मउका म ओमन ह कहिन कि कोरिया जिला म पर्यटन के आपार संभावना हवय अउ अमृतधारा जलप्रपात स्थल ल प्रमुख पर्यटन स्थल के रूप म विकसित करे के दिसा म सरलग प्रयास करे जात हे। ए महोत्सव म पहिली घांव लोगन मन बर तीरंदाजी, वॉलीबॉल, कबड्डी अउ पारंपरिक खेल- भौंरा, चम्मच दउड़, रस्साकस्सी, मटका फोड़ जइसन आने-आने आयोजन करे गीस।
महाशिवरात्रि के मउका म जिला पुलिस बल अउ सीएएफ छठवां वाहिनी कैम्प कुंडपानी के अधिकारी-करमचारी मन डहार ले काली कबीरधाम म स्वास्थ्य अउ शिक्षा सिविर के अंतर्गत जागरूकता बइठका के आयोजन होइस। सिविर म पुलिस जवान मन ह ग्रामीण मन ले गोठबात करीन अउ उंखर समस्या ल सुनीन।
चित्रकोट-महोत्सव
जगदलपुर म चित्रकोट जलप्रपात के तट म काली ले तीन दिवसीय चित्रकोट महोत्सव सुरू होगे हे। महोत्सव के सुभारंभ करत हुए चित्रकोट विधायक राजमन बेंजाम ह कहिन कि ए महोत्सव ह बस्तर के जनजातीय संस्कृति ल विश्व पटल म पहुंचाय के एक ठिन सुनहरा अवसर हे। ओमन ह कहिन कि बस्तर के लोक संस्कृति ह सरल अउ सहज होय के संगेसंग आकर्षक घलो हवय। महोत्सव के पहिली दिन बस्तरिया जनजाति परिधान म आधारित फैशन शो के आयोजन करे गीस।
हॉकी टूर्नामेंट
बिलासपुर जिला के बहतराई स्टेडियम के बी.आर. यादव एस्ट्रोटर्फ हॉकी मैदान म ऑल इंडिया हॉकी टूर्नामेंट सुरू होगे हे। वन मंत्री मोहम्मद अकबर ह काली एखर उद्घाटन करत हुए कहिन कि हॉकी सहित आने-आने खेल ल प्रोत्साहन दे बर राज्य सरकार डहार ले कई ठिन प्रयास करे जात हे। ए स्पर्धा म आने-आने राज्य ले पुरूष वर्ग के सोलह अउ महिला वर्ग के चौदह ठिन टीम ह भाग लेवत हे। उद्घाटन मैच काली पुरूष वर्ग म सुफिया स्पोर्टिंग क्लब अमरावती अउ जिला हॉकी संघ बिलासपुर के बीच खेले गीस।
शिक्षिका-पुरस्कार
छत्तीसगढ़ के दुरूग जिला के भिलाई स्थित शासकीय कन्या हायर सेकेंडरी के स्कूल के शिक्षिका पूनम उर्मलिया ल राष्ट्रीय आई.सी.टी. पुरस्कार ले सम्मानित करे गेहे। केन्द्रीय शिक्षा राज्यमंत्री अन्नपूर्णा देवी ह नई दिल्ली के अंबेडकर अंतर्राष्ट्रीय भवन म पाछु अट्ठाईस फरवरी के आयोजित पुरस्कार समारोह म श्रीमती उर्मलिया ल प्रमाण पत्र अउ मेडल दे गीस।
स्वास्थ्य विभाग-रेबीज बचाव
स्वास्थ्य विभाग ह रेबीज ले बचे खातिर जानवर मनके काटे म घांव ल तुरंत साबुन या फेर एंटीसेप्टिक ले पन्द्रह ले बीस मिनट तक बोहात पानी ले धोय के सलाह दीन हे। विभाग ह रेबीज ले बचे खातिर घर के पालतू जानवर, कुत्ता, बिल्ली या फेर आने जरूरी टीका लगवाय के अपील घलो करीन हे। विभाग ह बतईन कि पालतू कुत्ता ल तीन महीना के उमर म टीका लगवाना चाही। टीका के प्रकार के अनुसार हर तीन बछर म एखर एक अतिरिक्त डोज घलो लगवाना चाही।
अउ अब थोरकुन समाचार सार म-
– वरिष्ठ पत्रकार अउ फिलिम समीक्षक जयप्रकाश चौकसे के आज इंदौर म निधन होगे। मुख्यमंत्री भूपेश बघेल ह उंखर निधन उपर दुख जतईन हे।
– बीजापुर जिला मुख्यालय स्थित कलेक्टर निवास म नगर सैनिक एक झिन जवान ह फांसी लगाके आत्महत्या कर लीन, जेखर बाद पुलिस ह मामला के जांच करत हे।
अउ
– कोंडागांव पुलिस ह अंतर्राज्यीय गांजा तस्कर गिरोह के दू झिन सदस्य ल गिरफ्तार करके उंखर करा ले पचास हजार रूपिया कीमत के गांजा बरामद करे हे।