संसदीय सचिव-शपथ
मुख्यमंत्री भूपेश बघेल ह काली संझा बारह झिन विधायक मन ल संसदीय सचिव के शपथ देवाही। शपथ ग्रहण समारोह मुख्यमंत्री निवास म आयोजित करे जाही। फेर, अभी संसदीय सचिव मनके नाव नइ बताय गेहे।
कोरोना-मरीज
प्रदेस म आज आने-आने जिला ले कतकोन कोरोना संक्रमित मरीज मिले हे। राजधानी रईपुर म आज सड़सठ नवा कोरोना पाॅजिटिव मरीज के पुष्टि होय हे, जेमा सांसद सुनील सोनी के ड्राईवर घलो सामिल हे।
राजनांदगांव जिला म आज नौ नवा कोरोना संक्रमित मरीज के पहिचान होय हे। एमा आईटीबीपी सोमनी कैम्प के सात झिन जवान सामिल हे। उहें, एक झिन साल्हेवारा अउ एक मरीज मोहला के हरय। जिला ले आज दू झिन कोरोना पाॅजीटिव मरीज ल ठीक होय के बाद अस्पताल ले छुट्टी दे दे गेहे।
उहें, दुरूग जिला के पाटन म आज पांच झिन नवा कोरोेना संक्रमित मरीज मिले हे, जेमा ले दू झिन सामुदायिक स्वास्थ्य केन्द्र के करमचारी हरय। उहें, एक मरीज पाटन स्थित एक मेडिकल स्टोर्स के संचालक हरय। एखर संगेसंग दू झिन मरीज अमलेश्वर स्थित बटालियन के जवान हरय।
असइने, गरियाबंद जिला के मगरलोड म पदस्थ दू झिन जवान मन म घलो कोरोना संक्रमण के पुष्टि होय हे, जेमा एक आरक्षक अउ दूसर नगर सैनिक के जवान हरय। सीएमएचओ डाॅक्टर डी.के तुर्रे ह बतईन कि दूनों जवान मन ल कोविड अस्पताल धमतरी म भर्ती कराय गेहे। उहें, थाना ल सील कर दे गेहे।
ओति, बस्तर जिला म काली तीन कोरोना पाॅजिटिव मरीज मिले रिहीस। एमा ले दू सौ चार बटालियन के दू झिन जवान घलो सामिल हे। एमन ल सरकारी मेडिकल कालेज डिमरापाल म भर्ती कराय गेहे।
रईपुर-कंटेमेंट जोन
इही बीच, केन्द्र अउ राज्य सरकार डहार ले जारी दिसा-निरदेस के मुताबिक राजधानी रईपुर के आमा सिवनी पुलिस कालोनी म कोरोना पाॅजिटिव मरीज मिले के सेती ए क्षेत्र ल कंटेमेन्ट जोन घोसित कर दे गेहे। कंटेमेन्ट जोन म आय अउ जाय बर एके ठिन रद्दा होही, जेमा तैनात पुलिस अधिकारी सामाजिक दूरी के पालन करत दवई अउ जरूरी सामान बर अवइया-जवइया लोगन मनके जानकारी रजिस्टर म दरज करही। कंटेमेन्ट जोन म सबो गाड़ी मनके अवई-जवई म रोक रइही।
ओति, अंबिकापुर म कोरोना मरीज के बाढ़त संख्या ल देखत जम्मों व्यापारिक संगठन, जनप्रतिनिधि अउ लोगन मनकें मांग म काली अउ परन दिन दू दिन के लाॅकडाउन ल जिला प्रसासन ह मंजूर कर लेहे। ए दउरान जम्मों दुकान, किराना के संगेसंग सब्जी बाजार घलो बंद रइही। फेर, बैंक, पोस्ट आॅफिस समेत जम्मों सरकारी कर्यालय खुल्ला रइही। जरूरी सेवा घलो चालू रइही। कलेक्टर संजीव झा ह बतईन कि लाॅकडाउन ल लेके गाइडलाइन जारी कर दे गेहे। ए लाॅकडाउन जउन क्षेत्र मन म लागू करे जाही, उहां पूरा कड़ाई करे जाही।
कोरोना योद्धा-राखी
कोरोना वायरस के खिलाफ जंग लड़इया योद्धा मनके कलाई म ए बखत राखी तिहार के मउका म धमतरी जिला म तैयार करे जावत राखी ल पहिनाय जाही।
मिले खबर के मुताबिक जिला के छाती गांव के मल्टी यूटिलिटी सेंटर म बांस अउ गोबर ले बनाय जावत राखी स्वास्थ्य, पुलिस, पंचायत अउ ग्रामीण विकास विभाग के संगेसंग आदिवासी विकास विभाग अउ स्वच्छ भारत मिशन के दस हजार ले जादा भाई मनके हाथ म ए राखी ल पहिनाय जाही। बताय जात हे कि आने-आने विभाग बर बनाय जावत ए राखी ल उंखर कर्तव्य के मुताबिक डिजाईन करे जावत हे। पुलिस विभाग के राखी म तिरंगा, स्वास्थ्य विभाग म रेडक्राॅस के चिन्हा, स्वच्छ भारत मिशन म राष्ट्रपिता महात्मा गांधी के चश्मा अउ आने-आने विभाग के राखी म घलो उंखर चिन्हा के हिसाब ले राखे बनाय जावत हे।
सीबीएसई-परिणाम
केन्द्रीय माध्यमिक शिक्षा बोर्ड-सीबीएसई ह आज बारहवीं के परीक्षा के रिजल्ट घोसित कर देहे। ए बखत घलो नोनी मन ह बाबू मन ले छह प्रतिसत सुघ्घर प्रदर्सन करे हे। ए बछर अट्ठायासी प्रतिसत ले जादा लइका मन पास होय हे, जउन ह पाछु बछर के तुलना म पांच प्रतिसत जादा हे। परीक्षा के रिजल्ट वेबसाइट सीबीएसई रिजल्ट डाॅट एनआईसी डाॅट इन म देखे जा सकत हे।
प्रयास विद्यालय-परीक्षा स्थगित
प्रदेस म आदिम जाति अउ अनुसूचित जाति विकास विभाग डहार ले चलत प्रयास अउ एकलव्य आवासीय विद्यालय मन म काली अउ सोलह जुलाई के राखे गे प्रवेस परीक्षा स्थगित कर दे गेहे। प्रवेस परीक्षा के अवइया तारीख आते एखर खबर दे जाही।
माओवादी-सामग्री बरामद
राजनांदगांव पुलिस ह माओवादी मन डहार ले जंगल म डम्प करे गे भारी मात्रा म हथियार के जखीरा अउ आने-आने माओवादी सामान बरामद करे हे। मिले खबर के मुताबिक कुछेक दिन पहिली छुरिया के जोक अउ कटेगा के बीच मुठभेड़ के दउरान गिरफ्तार एक झिन माओवादी के तीर ले बरामद डायरी के आधार म करे गे छापामारी म हथियार के जखीरा बरामद करे म पुलिस ल सफलता मिले हे।
पुलिस अधीक्षक जितेन्द्र शुक्ला ह बतईन कि गिरफ्तार माओवादी के सूचना के आधार म जिला पुलिस बल, छत्तीसगढ़ सशस्त्र बल, डिस्ट्रिक्ट रिजर्व गार्ड-डीआरजी अउ बीडीएस के सामलात टीम गातापार अउ बाघ नंदियां क्षेत्र म तलाशी अभियान म निकले रिहीन। ए दउरान घोबेदल्ली-मांगीखोली अउ छुईपानी के जंगल म गिरफ्तार माओवादी डहार ले बताय गे पांच आने-आने जघा मन म डम्प बरामद करे गीस, जेमा दू डम्प खाली पाय गीस। उहें, आने तीन डम्प म स्टील डब्बा के भीतर एके-फोर्टी सेवन के संगेसंग भारी मात्रा म बंदूक के गोली, वायरलेस, वाॅकी-टाॅकी सेट, डेटानेटर, पाॅलीथिन, डायरी अउ माओवादी साहित्य बरामद करे गीस।
सीएम-ई-काॅन्क्लेव
मुख्यमंत्री भूपेश बघेल ह किहीन हे कि खाद्य प्रसंस्करण, लघु वनोपज अउ वन औषधि मनके वैल्यू एडिशन अउ माओवाद परभावित क्षेत्र के युवा मनके कौशल उन्नयन के क्षेत्र म काम करइया इच्छुक गैर सरकारी संगठन ल राज्य सरकार हरसंभव मदद दीहीं। मुख्यमंत्री ह काली रईपुर म वीडियो काॅन्फ्रेंसिंग के माध्यम ले राखे गे ‘‘पेन आईआईटी ग्लोबल ई-काॅन्क्लेव‘‘ ल संबोधित करत ए बात किहीन।
मौसम
मौसम विभाग ह प्रदेस म अवइया चोबीस घंटा के दउरान एक-दू ठिन जघा म भारी बरसा होय अउ गाज गिरे के चेतावनी देहे। प्रदेस के कतकोन जघा म आज घलो हल्का ले मध्यम बरसा होय के खबर मिले हे।
मौसम विभाग के मुताबिक एक चक्रवाती घेरा पूर्वी बिहार अउ उंखर तीर-तखार म बने हे, जेखर असर ले प्रदेस के कतकोन जघा म हल्का ले मध्यम बरसा होवत हे। अवइया चैबीस घंटा के दउरान प्रदेस के मैदानी इलाका के संगेसंग बस्तर संभाग अउ ओखर ले लगे जिला मन म भारी बरसा होय के संभावना हे।
जनसंख्या स्थिरीकरण पखवाड़ा
विधानसभा अध्यक्ष डाॅक्टर चरणदास महंत ह जनसंख्या स्थिरीकरण पखवाड़ा के तहत काली जांजगीर ले प्रचार गाड़ी ल हरियर झंडा देखाके रवाना करीन। ए रथ के माध्यम ले आपदा म घलो परिवार नियोजन के तैयारी, सक्षम राष्ट्र अउ परिवार के पूरा जिम्मेदारी के थीम म परिवार नियोजन के प्रति लोगन मन ल जागरूक करे जाही। संगेसंग पोस्टर अउ गाना-बजाना के माध्यम ले परिवार नियोजन के उपाय के बारे म जानकारी दे जाही।
संक्षिप्त समाचार
अउ अब थोरकुन समाचार सार म-
– एंटी करप्शन ब्यूरो के टीम ह बलौदाबाजार म खुद ल एसीबी के अधिकारी बता के पइसा के मांग करइया तीन झिन लोगन ल गिरफ्तार करे हे।
– महासमुंद जिला म अंत्यावस्यी सहकारी विकास समिति डहार ले अनुसूचित जाति-जनजाति, सफाई कामगार अउ अल्पसंख्यक वर्ग के लोगन ल खुद के रोजगार स्थापित करे बर पात्र हितग्राही मन ले अवइया पच्चीस जुलाई तक अरजी मंगाय गेहे।
– बिलासपुर म काली रतिहा सिविल लाईन पुलिस ह जुआ खेलत इक्कीस झिन लोगन ल गिरफ्तार करे हे। इंखर तीर ले तीन लाख साठ हजार रूपिया ले जादा के रासि के संगेसंग तीन दर्जन ले जादा मोबाइल, कार अउ मोटर साइकिल जब्त करे गेहे।
अउ
– राजनांदगांव जिला के सांकरा गांव म हाईटेंशन तार के चपेट म आय ले सात मवेसी के मउत होगे।