राज्यपाल-संत समागम
गरियाबंद जिला के राजिम म त्रिवेणी संगम तट उपर लगने वाला प्रसिद्ध माघी पुन्नी मेला के तहत काली संझा संत समागम के आयोजन करे गीस। राज्यपाल अनुसूइया उइके ह देश अउ प्रदेश के आने आने जगा ले आमंत्रित
साधु संत मनके उपस्थिति म एखर शुभारंभ करीन। ए मउका म राज्यपाल ह भगवान राजीव लोचन के पूजा अर्चना करके प्रदेशवासी मनके सुख समृद्धि अउ खुशहाली के कामना करीन।
समारोह ल संबोधित करत राज्यपाल ह कीहिन कि राजीम म महानदी, सोंढूर अउ पैरी नदी मनके संगम होय के संगेसंग धर्म, आध्यात्म अउ आस्था के घलो संगम हरय। ओमन कीहिन कि हमन ल स्थानीय कला, संस्कृति अउ धार्मिक आयोजन बर अपन प्रयास ल बढ़ाय के जरूरत हे। जेखर ले छत्तीसगढ़ पर्यटन मानचित्र म उभर सकय। राज्यपाल ह कीहिन कि देश अउ प्रदेश के नदी मन ल स्वच्छ अउ पदूषण मुक्त राखे बर सबो ल अपन सहभागिता निभाना होही।
किसान सम्मान निधि
प्रधानमंत्री किसान सम्मान निधि योजना के आज तीन साल पूरा होवत हे। ए योजना देश के जम्मों किसान परिवार के आमदनी म मदद बर चौबीस फरवरी दू हजार उन्नीस के शुरू करे गे रीहिस। ए योजना के तहत लाभार्थी मन ल हर साल छै हजार रूपिया के राशि दे जात हे। ए राशि दू हजार रूपिया के तीन समान किश्त म ओमन के बैंक खाता म सीधा जमा कराये जाथे ।
आकाशवाणी ले खास बातचीत म केंद्रीय कृषि राज्य मंत्री कैलाश चौधरी ह बताइन कि किसान सरकार के प्राथमिकता म हरय। ओमन कीहिन कि किसान सम्मान निधि ले किसान आर्थिक रूप ले मजबूत होय हे।
यूक्रेन मदद
यूक्रेन म उत्पन्न वर्तमान स्थिति ल देखत छत्तीसगढ़ सरकार ह यूक्रेन म प्रवासित छत्तीसगढ़ के लोगन मनके सहायता बर नई दिल्ली म छत्तीसगढ़ भवन स्थित आवासीय आयुक्त कार्यालय के संपर्क अधिकारी गणेश मिश्र ल नोडल अधिकारी बनाय हे। श्री मिश्र ले टेलिफोन नंबर – शून्य एक एक चार छै एक पांच छै शून्य शून्य शून्य अउ मोबाइल नंबर – नौ नौ नौ सात शून्य छै शून्य नौ नौ नौ म संपर्क करे जा सकत हे।
अइसने सरगुजा के जिला प्रशासन ह घलो प्रवासित छत्तीसगढ़ के नागरिक मन बर हेल्पलाइन नंबर जारी करे हे । कलेक्टर संजीव कुमार झा ह केहे हे कि छत्तीसगढ़ के कोनो परिवार के सदस्य यूक्रेन म फंसे हे, त वोमन सरगुजा के डिप्टी कलेक्टर नीलम टोप्पो ल उंखर फोन नंबर – नौ चार दू पांच दू पांच दू आठ नौ एक – म संपर्क कर सकत हे।
बाल वीरता पुरस्कार
प्रदेश के साहसी बालक अमन ज्योति जाहिरे ल बछर दू हजार इक्कीस बर राष्ट्रीय बाल वीरता पुरस्कार प्रदान करे जाही। भारतीय बाल कल्याण परिषद ह कोरबा जिला के निवासी अमन ज्योति के चयन पुरस्कार बर करे हे। मुख्यमंत्री भूपेश बघेल अउ महिला तथा बाल विकास मंत्री अनिला भेड़िया ह साहसी बालक अमनज्योति के चयन राष्ट्रीय पुरस्कार बर होय खातिर ओमन ल बधाई अउ शुभकामना दीन हे।
बतादन कि अमनज्योति ल ओखर साहसिक कार्य बर छत्तीसगढ़ राज्य बाल कल्याण परिषद डहार ले राज्य वीरता पुरस्कार ले घलो सम्मानित करे जा चुके हे।
भाजपा आरोप
भारतीय जनता पार्टी ह राज्य सरकार उपर आदिवासी मनके उपेक्षा करे के आरोप लगाइन हे। प्रदेश भाजपा अध्यक्ष विष्णुदेव साय ह आरोप लगाइन कि छत्तीसगढ़ म आदिवासी मनके सीट उपर गैर आदिवासी कब्जा करत हे। ओमन कीहिन कि प्राथमिक वनोपज समिति मनके जिला इकाई के प्रतिनिधि चुनाव म आदिवासी मन बर आरक्षित पद उपर गैर आदिवासी लोगन मन ल जिला प्रतिनिधि बना दे गेहे।
श्री साय ह कीहिन कि दंतेवाड़ा, कांकेर, सूरजपुर, कबीरधाम अउ राजनांदगांव जिला मन म वनोपज समिति के चुनाव के दउरान बड़ा पैमाना म गड़बड़ी के शिकायत मिले हे। ओमन आरोप लगाइन कि ए जिला मन म कांग्रेस के पदाधिकारी अउ वनोपज समिति मन म शेयर होल्डर नइ होय के बावजूद जिला इकाई मनके प्रतिनिधि बना दे गेहे।
पल्स पोलियो अभियान
विश्व पोलियो उन्मूलन अभियान के तहत राष्ट्रीय टीकाकरण दिवस म प्रदेश म अवइया सत्ताईस फरवरी के पल्स पोलियो अभियान चलाये जाही। एखर तहत शून्य ले पांच साल तक के लइका मन ल पोलियो के दवा पिलाये जाही। अभियान के पहिली दिन पोलियो खुराक ले वंचित होय लइका मन ल अठाईस फरवरी अउ एक मार्च के घर-घर जाके दवा पिलाये जाही।
युवा संसद कार्यक्रम
नेहरू युवा केंद्र डहार ले जगदलपुर म आज जिला-स्तरीय आस-पड़ोस युवा संसद कार्यक्रम के आयोजन करे गीस। जगदलपुर नगर निगम के महापौर सफीरा साहू ह ए युवा संसद के शुभारंभ करीन। कार्यक्रम के अध्यक्षता छत्तीसगढ़ नेहरू युवा केंद्र संगठन रायपुर के राज्य निदेशक श्रीकांत पांडेय ह करीन।
युवा मन ल संबोधित करत जगदलपुर के महापौर सफीरा साहू ह कीहिन कि युवा मन ल अपन जीवन के एक लक्ष्य जरूर निर्धारित करना चाही। ओमन कीहिन कि निरंतर परिश्रम अउ प्रयास ले ही अपन लक्ष्य मन ल पाये जा सकत हे। ए मउका म बस्तर रेंज के पुलिस महानिरिक्षक सुंदरराज पी. ह कीहिन कि तेज दिमाग, सुगठित शरीर अउ कोमल हृदय वर्तमान भारत के युवा मनके पहिचान हरय।
कार्यक्रम ल संबोधित करत छत्तीसगढ़ नेहरू युवा केंद्र संगठन रायपुर के राज्य निदेशक श्रीकांत पांडेय ह कीहिन कि वर्तमान म युवा मन ल आगू बढ़े बर साधन के जरूरत नइ हे, बल्कि सहयोग के जरूरत हे। कार्यक्रम के दउरान बस्तर जिला के दस युवा-युवती मंडल मन ल खेल सामग्री घलो बांटे गीस।
छत्तीसगढ़ राष्ट्रीय पुरस्कार
प्रदेस म शैक्षणिक गतिविधि ल तकनीक के माध्यम ले सहज बनाये बर छत्तीसगढ़ ल राष्ट्रीय स्तर के पुरस्कार मिले हे। एक अंग्रेजी दैनिक अखबार डहार ले काली नई दिल्ली म प्रदेश के स्कूल शिक्षा विभाग ल डिजिटल टेक्नॉलाजी सभा अवार्ड ले सम्मानित करे गीस।
बतादन कि स्कूल शिक्षा विभाग डहार ले कोरोना संकटकाल के दउरान स्कूली लइका मन ल घर बइठे शिक्षा उपलब्ध कराय के तकनीक ल देश ह सराहे हे। पढ़ई तुंहर द्वार ल एखर बर राष्ट्रीय स्तर के पुरस्कार घलो मिले हे।
अउ अब थोरकुन समाचार सार म-
– मुख्यमंत्री भूपेश बघेल काली अपन बिलासपुर प्रवास के दउरान शहर म करीबन तीन सौ चौवन करोड़ रूपिया के लागत वाले लगभग सौ ठिन विकास काम के शिलान्यास अउ लोकार्पण करहीं।
अउ
– मुख्यमंत्री शाला सुरक्षा कार्यक्रम के तहत राज्य शैक्षिक अनुसंधान अउ प्रशिक्षण परिषद एससीईआरटी डहार ले राखे गे पांच दिन के प्रशिक्षण कार्यक्रम काली संपन्न होगे।