प्रधानमंत्री वेबिनार
प्रधानमंत्री नरेंद्र मोदी ह ग्रामीण आबादी के कृषि समेत आने आने क्षेत्र म नवा तकनीक के ज्ञान देके ग्रामीण भारत के नवा छबि बनाये उपर जोर दीन हे। ग्रामीण विकास बर बजट ले संबंधित घोषणा उपर एक ठिन वेबिनार ल संबोधित करत श्री मोदी ह कीहिन कि बछर दू हजार बाईस के बजट म ग्रामीण क्षेत्र- पूर्वोत्तर अउ आंकाक्षी जिला के विकास खातिर एक ठिन विशेष रूपरेखा तियार करे गेहे। प्रधानमंत्री ह कहिन कि भूमि संबंधी दस्तावेज के डिजिटलीकरण अउ भूमि सीमांकन संबंधी काम ल टेक्नॉलाजी ले जोड़ना समय के मांग हे।
विज्ञान सर्वत्र पूज्यते-राज्यपाल
केंद्र सरकार ह आजादी के अमृत महोत्सव के हिस्सा के रूप म काली ले देशभर म पचहत्तर ठिन आने आने जगा म विज्ञान सर्वत्र पूज्यते स्मरणोत्सव आयोजित करत हे। इही कड़ी म रायपुर के पंडित रविशंकर शुक्ल विश्वविद्यालय के सभागार म आयोजित विज्ञान सर्वत्र पूज्यते – सभी के लिए विज्ञान का उत्सव कार्यक्रम म राज्यपाल अनुसूइया उइके ह शामिल होइन अउ ओमन ह विज्ञान अउ तकनीक म आधारित पोस्टर प्रदर्शनी के शुभारंभ करीन। अठाईस फरवरी तक चलइया ए प्रदर्शनी म विज्ञान अउ तकनीक उपर आधारित आने आने गतिविधि अउ प्रतियोगिता के माध्यम ले विद्यार्थी मनके संगेसंग आम लोगन मन ल घलो महत्वपूर्ण जानकारी मिलही।
ए मउका म राज्यपाल ह कीहिन कि ए प्रदर्शनी ले विज्ञान के क्षेत्र म भारत के वैभव अउ गौरवशाली इतिहास ल जाने अउ समझे के अवसर मिलही। ओमन ह कीहिन कि कोरोना के चुनौती भरे बेरा म लोगन मन ल विज्ञान के उपयोगिता अउ एखर महत्व समझ म आही। जब देश के वैज्ञानिक मन ह सस्ता कीमत म मेडिकल उपकरण ल तियार करीन।
स्वास्थ्य विभाग भर्ती
प्रदेश के स्वास्थ्य अउ परिवार कल्याण विभाग म चिकित्सा अधिकारी, स्टाफ नर्स, स्वास्थ्य कार्यकर्ता, जूनियर सेक्रेट्रियल असिसटेंट अउ चतुर्थ श्रेणी के नौ सौ दस ठिन पद म संविदा भर्ती करे जाही।
ए भर्ती म राष्ट्रीय स्वास्थ्य मिशन डहार ले राज्य स्तर उपर एक सौ बंयासी चिकित्सा अधिकारी मनके पद घलो सामिल हे । उंहें सोला ठिन जिला म स्टाफ नर्स, पुरूष स्वास्थ्य कार्यकर्ता, जूनियर सेक्रेट्रियल असिसटेंट अउ चतुर्थ श्रेणी के कुल सात सौ अठाईस ठिन पद म घलो जिला स्तर म भर्ती करे जाही।
माओवादी समाचार
सुकमा जिला म सुरक्षा बल मन ह तीन झिन माओवादी मन ल गिरप्तार करे हे। एमा ले एक झिन माओवादी उपर एक लाख रूपिया के इनाम घोषित रीहिस। जिला के पुलिस अधीक्षक सुनील शर्मा ह बताइन हे कि सीआरपीएफ अउ जिला पुलिस बल के संयुक्त टीम ह तलाशी अभियान म निकले रीहिन। इही बेरा पोलमपल्ली थाना क्षेत्र के आने आने जगा ले ए माओवादी मन ल गिरप्तार करे गीस। इंखर उपर कतकोन माओवादी घटना म सामिल रेहे के आरोप हे।
उंहें ए जिला म माओवादी मन ह बचेली ले डेढ़ किलोमीटर दूरिहा एक ठिन मालवाहक ट्रेन म आगी लगा दीन। बताये जात हे कि ए ट्रेन ह विशाखापट्टनम कोति जात रीहिस। इही बेरा बड़का संख्या म हथियारबंद माओवादी मन ह उंहा पहुंचके ट्रेन के इंजन म आगी लगाये के बाद लोकोपायलेट अउ गार्ड ले वॉकी- टॉकी घलो छिन लीन। ए घटना के जानकारी मिले के बाद पुलिस बल ल मउका म रवाना कर दे गेहे।
इही बीच दंतेवाड़ा जिला म एक झिन माओवादी ह पुलिस के आत्मसमर्पण करीस । एखर उपर नीलवाया रद्दा म आईईडी ब्लास्ट के घटना म सामिल रेहे के आरोप हे। ए घटना म तीन झिन जवान अउ दूरदर्शन के कैमरामेन के मउत होगे रीहिस।
भाजपा किसान मोर्चा आरोप
भारतीय जनता पार्टी किसान मोर्चा के प्रदेश अध्यक्ष श्याम बिहारी जायसवाल ह आरोप लगाइन हे कि राज्य सरकार यूरिया अउ डीएपी के मुनाफाखोरी ल बढ़ावा देवत हे। एखर ले किसान मन ल जादा कीमत म खाद बेचे जात हे। श्री जायसवाल ह कीहिन कि सिरिफ दिखावा के नाव म राज्य सरकार खाद दुकान के लाइसेंस निलंबित करत हे। फेर मुनाफाखोरी के सेती किसान मन ल परेसानी के सामना करे बर पड़त हे।
नई राजधानी-प्रभावित किसान
राज्य सरकार ह नई राजधानी परियोजना प्रभावित किसान कल्याण समिति के कुछु मांग ल स्वीकार करे के बाद ओखर उपर तेजी ले कार्रवाई करना शुरू कर देहे। एखर बर अटल नगर विकास प्राधिकरण ह निविदा के माध्यम ले प्रभावित परिवार ल साठ प्रतिशत रोजगार के आरक्षण देके संबंध म आदेश जारी करे हे।
अइसने सशक्त समिति के बइठका म लेगे निर्णय के अनुसार आवासीय पट्टा जारी करे जाना हे। एखर प्राधिकरण डहार ले सर्वे करे जात हे। फिलहाल चार ठिन गांव म सर्वे के काम पूरा हो चुके अउ सात ठिन गांव म सर्वे के कार्रवाई चलत हे ।
ई-पास खाद्यान्न
प्रदेश म संचालित उचित मूल्य के दुकान म अवइया महीना ले ई-पास के माध्यम ले राशन कार्ड धारी परिवार वाला मन ल खाद्यान्न के वितरण करे जाही। एखर बर प्रदेश के बारा हजार तीन सौ बाईस दुकान म ई-पास उपकरण लगाये गेहे। एखर ले राशन कार्डधारी मन ह अपन पसंद के उचित मूल्य दुकान ले राशन के जीनिस ले सकही। ए संबंध म खाद्य विभाग डहार ले सबो जिला कलेक्टर मन ल चिट्ठी घलो जारी कर देहे।
जानबा के अनुसार राज्य म ए बेरा तेरा हजार दू सौ चौरानबे ठिन शासकीय उचित मूल्य के दुकान संचालित होवत हे। जेमा ले बारा हजार तीन सौ बाईस दुकान मन म ई-पास उपकरण लगाय गेहे। प्रदेश के चार ठिन जिला नारायणपुर, बीजापुर, सुकमा, अउ दंतेवाड़ा जिला के लोगन फिलहाल टेबलेट ले ही राशन ले सकही।
सिविक एक्शन प्रोग्राम
सीमा सुरक्षा बल- बीएसएफ डहार ले कांकेर जिला के पिंडकसा गांव म सिविक एक्शन प्रोग्राम अउ मेडिकल कैम्प के आयोजन करे गीस। कार्यक्रम म तीर तार के गांव के लोगन मन बड़का संख्या म सामिल होइन । ए बेरा म जवान मन ह ग्रामीण मन ल कंबल, सिन्टेक्स अउ खेती ले जुड़े उपकरण अउ रोजमर्रा के सामान बांटीन। ए मेडिकल कैंप म चिकित्सक मन ह लोगन मनके स्वास्थ्य के जांच करीन अउ ओमन ल दवाई घलो दीन।
सी-मार्ट
राज्य के उत्पादक मन डहार ले बनाये गे उपभोक्त सामग्री के बिक्री बर रायपुर समेत प्रदेश के आने आने जिला म सी-मार्ट के स्थापना करे जाही। ए संबंध म मुख्य सचिव अमिताभ जैन के अध्यक्षता म काली नवा रायपुर म उच्च अधिकार प्राप्त हाई पॉवर कमेटी के बइठका होइस।
बइठक म मुख्य सचिव ह कीहिन कि प्रदेश म उत्पादित उपभोक्त सामग्री ल एके छत के नीचे बिक्री खातिर सी-मार्ट के स्थापना करे जात हे। एखर बर भुंइया ल चिन्हित करके डिजाइन तैयार करे जाही। बइठका म सी-मार्ट के स्थापना, के संगेसंग एला बढ़ाय बर बिस्तार ले गोठबात करे गीस।
युवक आत्महत्या-जांच
बलौदाबजार के जिला कलेक्ट्रेट म चलत जनचौपाल के बेरा एक झिन जवान लइका डहार ले कथित रूप ले आत्महत्या करे के कोसिस के जांच के निर्देश कलेक्टर डोमनसिंह ह दीन हे। ओमन ह ए मामला म एडीएम राजेंद्र गुप्ता ल जांच अधिकारी बनाके सात दिन के भीतर जांच प्रतिवेदन देबर कीहिन हे।
जानबा के अनुसार काली बलौदबाजार म कलेक्टर ह जनचौपाल लगाये रीहिस। इही बेरा बिलाइगढ़ तहसील के गाड़ापाली गांव के रहइया युवक ह आत्महत्या करे के कोसिस करीस। उंखर कहना रीहिस कि बैंक ले कर्जा मिले म देरी होय के सेती वोह परेसान रीहिस।
इही बीच अस्पताल म भर्ती युवक के स्थिति म तेजी ले सुधार होय के बात बताये जात हे।
अउ अब थोरकुन समाचार सार म-
– राष्ट्रीय साधन सह प्राविण्य छात्रवृत्ति परीक्षा सत्ताईस फरवरी के राज्य के चयनित परीक्षा केंद्र म ऑफलाइन तरीका ले करे जाही।
– बिलासपुर जिल के सिविल लाइन थाना क्षेत्र म पुलिस ह एक झिन मनखे ल अवैध हथियार अउ छै ठिन जिंदा कारतूस के संग गिरप्तार करे हे।
अउ
– बिलासपुर रेलमंडल के मलुगुर यार्ड म सुधार काम चलत हे। एखरे सेती कोरबा-यशवंतपुर एक्सप्रेस ह चौबीस, सत्ताईस फरवरी अउ तीन मार्च के दूसर रद्दा ले चलही।