यूक्रेन मदद
राज्य सरकार डहार ले यूक्रेन ले जुड़े मुद्दा उपर छत्तीसगढ़ के लोगन के मदद बर नई दिल्ली स्थित छत्तीसगढ़ भवन म संपर्क अधिकारी गणेश मिश्र ल नोडल अधिकारी नियुक्त करे गेहे। श्री मिश्र ले दूरभाष नंबर – 0 1 1 4 6 1 5 6 0 0 0 अउ मोबाइल नंबर 9 9 9 7 0 6 0 9 9 9 म संपर्क करे जा सकथे।
क्वांटीफाइबल-डाटा आयोग
क्वांटीफाइबल डाटा आयोग, प्रदेश के 5 नगर निगम क्षेत्र मन म अन्य पिछड़ा वर्ग अउ आर्थिक रूप ले कमजोर वर्ग के सर्वें कार्य के समीक्षा करही। आयोग के सचिव के अनुसार काली 23 फरवरी के चरौदा अउ रिसाली म सर्वें के समीक्षा बर बैठक आयोजित करे गेहे। उहें, 24 फरवरी के भिलाई अउ दुर्ग अउ 25 फरवरी के रायपुर नगर निगम क्षेत्र के सर्वें के समीक्षा बर बैठक होही।
डी. पुरंदेश्वरी-बैठक
भारतीय जनता पार्टी के महामंत्री अउ प्रदेश प्रभारी डी. पुरंदेश्वरी ह काली कांकेर म पार्टी के जिला अउ मंडल मोर्चा के संग प्रकोष्ठ के पदाधिकारी अउ जनप्रतिनिधि मनके बैठक लीन। ए मउका म ओमन ह पार्टी पदाधिकारी मन ले अपील करे हे कि ओमन एकजुट होके बूथ ल मजबूत करय। डी. पुरंदेश्वरी ह किहीन कि पार्टी म अनुशासन होना बहुत जरूरी हे अउ पदाधिकारी बूथ स्तर सक्रिय राहय। ओमन ह भाजपा पदाधिकारी मन ल रचनात्मक अउ सामाजिक कार्यक्रम मन म सक्रियता बढ़ाय बर किहीन। ओमन कार्यकर्ता मनके आह्वाहन करत किहीन कि ओमन बछर 2023 म पार्टी ल जिताय बर काम करय।
ग्रीष्मकालीन अवकाश-संशोधन
प्रदेश के शैक्षणिक संस्था मन म गर्मी के छुट्टी के दिन म संशोधन करे गेहे। नवा व्यवस्था के अनुसार अब ग्रीष्मकालीन अवकाश 01 मई ले नइ होके, 15 मई ले सुरू होके 15 जून तक रइही। ए छुट्टी कुल 32 दिन के होही। स्कूल शिक्षा विभाग के ए आदेश सरकारी, अनुदान प्राप्त, गैर अनुदान प्राप्त स्कूल अउ डी.एड.बी.एड अउ एम.एस. कॉलेज मन म मान्य होही। प्रदेश म अवइया शैक्षणिक सत्र 01 मई ले 15 दिन के अतिरिक्त शैक्षणिक काम बर सुरू करे जाही।
स्कूल सिक्षा विभाग के प्रमुख सचिव डॉक्टर आलोक शुक्ला ह बतईन कि कोरोना संक्रमण के सेती स्कूल सरलग बंद हे, जेखर चलत पढ़ई प्रभावित होय हे। ओमन बतईन कि एला देखत ए दरी गर्मी के छुट्टी कम कर दे गेहे, जेखर ले बेहतर ढंग ले पढ़ई हो सकय।
कोविड मृत्यु प्रकरण-राशि
राज्य म कोरोना संक्रमण ले मउत होय मनखे मनके 19 हजार 296 प्रकरण मन म उंखर परिजन मन ल अब तक 96 करोड़ 48 लाख रूपिया के राशि दे जा चुके हे। एमा रायपुर जिला म सबले जादा 14 करोड़ 72 लाख रूपिया के रासि के भुगतान करे जा चुके हे। आपदा प्रबंधन विभाग के अनुसार कोरोना संक्रमण ले मउत होय मनखे के परिजन मन ले 22 हजार 310 आवेदन मिले रिहीस, जेमा ले 19 हजार 462 पात्र पाय गीस।
सुनइया मन ल बतादन कि कोविड मृत्यु के सबो प्रकरण उपर राज्य सासन डहार ले 50-50 हजार रूपिया के राशि भुगतान करे जात हे।
अंतर्राष्ट्रीय मातृभाषा दिवस-वेबिनार
अंतर्राष्ट्रीय मातृभाषा दिवस के मउका म काली ‘‘अपन भाखा म‘‘ बिसय उपर छत्तीसगढ़ के आने-आने क्षेत्र के बोली अउ भाखा उपर वेबिनार के आयोजन करे गीस। कार्यक्रम म वरिष्ठ साहित्यकार डॉक्टर पीसी लाल यादव, मीर अली मीर अउ डॉक्टर चंपेश्वर गोस्वामी मौजूद रिहीन। राज्य परियोजना कार्यालय समग्र शिक्षा डहार ले ए कार्यक्रम के आयोजन करे गीस। वेबिनार म सबो अतिथि मन ह मातृभाखा के महत्व ल अपन-अपन रचना के माध्यम ले प्रस्तुत करीन। कार्यक्रम म राज्य के आने-आने जिला के शिक्षक मन घलो भाग लीन।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी के तहत आज के प्रश्न हे –
कर्नाटक के ओ महिला स्वतंत्रता सेनानी के नाव बतावव, जेन ह 16 बछर के उमर म उडुपी म विदेशी कपड़ा अउ शराब दुकान मनके विरोध म धरना प्रदर्शन शुरू करे रिहीस। ओमन ल गिफ्तार करे गीस, सजा दे गीस अउ फेर गिफ्तार कर ले गीस। कारागार अवधि के बेरा ओमन भासन दीन, कतई-बुनई के शिक्षा दीन अउ प्रभात फेरी के आयोजन करीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही। विजेता ल ई-प्रमाण पत्र घलो दे जाही।
माघी पुन्नी मेला
राजिम के माघी पुन्नी मेला म काली संत समागम समारोह के आयोजन करे जाही। काली संझा राजिम लोचन मंदिर के तीर म आयोजित ए समारोह के उद्घाटन राज्यपाल अनुसुईया उइके करही। कार्यक्रम के अध्यक्षता धर्मस्व मंत्री ताम्रध्वज करही। उहें, विशेष अतिथि के रूप म राज्य मंत्रिमंडल के मंत्री मन मौजूद रइही।
सुनइया मन ल बतादन कि राजिम म बीते 16 फरवरी ले चलत माघी पुन्नी मेला के समापन एक मार्च के महाशिवरात्रि के अवसर म होही।
मल्टीमीडिया चित्र प्रदर्शनी
सूचना अउ प्रसारण मंत्रालय के प्रादेशिक लोक संपर्क कार्यालय डहार ले मुंगेली के पथरिया म ‘‘आजादी के अमृत महोत्सव‘‘ विषय उपर आयोजित 3 दिवसीय मल्टीमीडिया चित्र प्रदर्शनी के काली समापन होईस। ए प्रदर्शनी म आजादी बर अपन जीवन न्यौछावर करइया सहीद मनके सपना ल भारत म साकार करे के संकल्प ले गीस। समापन अवसर म मुंगेली विधायक पुन्नू लाल मोहले अउ नेता प्रतिपक्ष धरमलाल कौशिक सहित कतको जनप्रतिनिधि मन मौजूद रिहीन। समापन के मउका म कार्यक्रम के बेरा आयोजित प्रतियोगिता मनके विजेता मन म पुरस्कार दे गीस।
जिला युवा संसद महोत्सव
नेहरू युवा केन्द्र रायपुर, महासमुंद, रायगढ़, बलौदाबाजार अउ गरियाबंद डहार ले संयुक्त रूप ले जिला युवा संसद महोत्सव के आयोजन करे गेहे। ए आयोजन के उद्देश्य जोशिला अउ गतिशील युवा मनके विचार के अभिव्यक्ति, सामाजिक, राजनीतिक अउ आर्थिक मुद्दा मन उपर उंखर भागीदारी बढ़ाय के संगेसंग आम लोगन मनके दृष्टिकोण ल उजागर करना हे। युवा संसद महोत्सव म राज्य के सबो जिला ले दू-दू उत्कृष्ट प्रतिभागी मनके चयन करे गेहे, जउन 26 फरवरी के राज्य स्तर म आयोजित होवइया युवा संसद महोत्सव म भाग लीहीं। राज्य स्तरीय युवा संसद महोत्सव म चुने गे प्रतिभागी अवइया 08 अउ 09 मार्च के दिल्ली म आयोजित राष्ट्रीय युवा संसद महोत्सव म भाग लीहीं।
गांजा तस्कर-गिरोह पर्दाफाश
दुर्ग पुलिस ह अंतर्राज्यीय गांजा तस्कर गिरोह के पर्दाफाश करे म सफलता हासिल करे हे। पुलिस ह दू झिन आरोपी मन ल गिरफ्तार करे हे अउ इंखर मन ले सुपेला के एक झिन युवक ल छोड़ाय हे।
वरिष्ठ पुलिस अधीक्षक बद्री नारायण मीणा ह आज एक पत्रकारवार्ता म बतईन कि बीते 10 फरवरी के एक महिला ह अपन बेटा के लापता होय के रिपोर्ट दर्ज कराय रिहीस। एखर बाद सोसल मीडिया म एक वीडियो वायरल होईस, जेमा कुछु लोगन मन ह लापता युवक ल पइसा देके नाव म प्रताड़ित करत रिहीस। पुलिस ह ए मामला म संज्ञान लेत पतासाजी करीन, त ए वीडियो ओड़िसा के कालाहांडी के रिहीस। एखर बाद नारकोटिक्स पुलिस के टीम ल कालाहांडी भेजे गीस, जिहां अंतर्राज्यीय गांजा तस्कर गिरोह के दू सदस्य मन ल गिरफ्तार करे गीस। संगेसंग लापता युवक के घलो रिहाई कराय गीस। ए मामला म एक झिन आने आरोपी फरार हे।
एनटीपीसी-प्रशिक्षण कार्यक्रम
राष्ट्रीय ताप विद्युत निगम-एन.टी.पी.सी. डहार ले स्व-सहायता समूह मन ल आर्थिक अउ सामाजिक रूप ले सक्षम बनाय बर काली ले कोरबा जिला के आने-आने गांव मन म प्रशिक्षण कार्यक्रम के सुरूआत करे गेहे। ए कार्यक्रम 26 फरवरी तक चलही। काली कार्यक्रम के पहिली दिन जमनीपाली, सुमेधा अउ गोपालपुर गांव ले करीब 20 स्व-सहायता समूह मन ल प्रशिक्षण दे गीस।
एम्स-पुरस्कार
अखिल भारतीय आयुर्विज्ञान संस्थान-एम्स रायपुर म कोरोना संक्रमण के रोकथाम बर बिसेस परयास बर मेडिसीन आई.सी.यू. अउ हैंड हाईजीन बर क्रिटिकल केयर यूनिट ल सम्मानित करे गीस। एखरे संग परिसर म साइकिल ल प्रोत्साहन दे बर ग्रीन इनीसिएटिव पुरस्कार घलो दे गीस। पुरस्कार समारोह ल संबोधित करत एम्स रायपुर के निदेशक प्रोफेसर डॉक्टर नितिन एम. नागरकर ह किहीन कि बेस्ट प्रैक्टिस अपना के एम्स गुणवत्तापूर्ण चिकित्सा म अग्रणी भूमिका निभात हे।
मुख्यमंत्री-पैरादान अपील
मुख्यमंत्री भूपेश बघेल ह गौठान मन म पशु मनके चारा बर किसान मन ले करे गे पैरादान के अपील के सकारात्मक असर दिखत हे। राज्य म किसान मन ह अब तक गौठान मन म 15 लाख 68 हजार 500 क्विंटल ले जादा पैरादान करे हे। जेखर कीमत दू सौ रूपिया प्रति क्विंटल के दर ले लगभग 31 करोड़ 35 लाख रूपिया हे। राज्य म सबले जादा पैरादान बिलासपुर संभाग के किसान मन करे हे।
कोर्बेवैक्स-मंजूरी
भारत के औषधि महाविद्यालय ह 12 ले 18 बछर के उमर वाले मन बर कोरोना रोधी टीका कोर्बेवैक्स के आपात उपयोग ल मंजूरी दे देहे। ए टीका ल हैदराबाद के फॉर्मास्यटिकल कंपनी बायोलॉजिकल-ई ह विकसित करे हे। ए ह रिसेप्टर बाइडिंग डोमेन प्रोटीन सब यूनिट आधारित पहली स्वदेशी कोरोना रोधी टीका हरय। एखर ले पहिली ए टीका ल पाछु बछर दिसंबर म वयस्क मन बर आपात उपयोग के अनुमति दे गे रिहीस। ए टीका ल 28 दिन के अंतराल दू डोज लगाय जाही।
आयोडीन-नमक सर्वें
राष्ट्रीय परिवार स्वास्थ्य सर्वेक्षण-एन.एच.एफ.एस. एंड-फाईव के. पाछु बछर छत्तीसगढ़ म होय सर्वें के अनुसार इहां 98 प्रतिशत ले जादा लोगन आयोडीन युक्त नमक के उपयोग करथे। एमा ग्रामीण क्षेत्र मन म 99 प्रतिशत अउ शहरी क्षेत्र म 98 प्रतिशत ले जादा लोगन सामिल हे। आयोडीन अल्पता कार्यक्रम के राज्य नोडल अधिकारी डॉक्टर कमलेश जैन ह बतईन कि लइका मनके संतुलित विकास बर आयोडीन वाले नमक के सेवन जरूरी हे। एखर कमी ले कतको गंभीर बीमारी हो सकथे।
उहें, राष्ट्रीय आयोडीन अल्पता विकार नियंत्रण कार्यक्रम के अंतर्गत राज्य के सबो जिला मन म सर्वें के काम पूरा कर ले गेहे। एमा ले चयनित चार जिला- रायगढ़, सरगुजा, बिलासपुर अउ जशपुर म ग्वाइटर रि-सर्वें के काम चलत हे। ए सर्वें 6 ले 12 बछर के स्कूली लइका मन म होवत हे।
सिंहदेव-अंबिकापुर
अंबिकापुर स्थित राजमाता श्रीमती देवेन्द्र कुमारी सिंहदेव चिकित्सा महाविद्यालय अउ शासकीय जिला चिकित्सालय एक नवा रूप म बनके तैयार हे। स्वास्थ्य मंत्री टी.एस. सिंहदेव ह आज चिकित्सालय परिसर पहुंच के नवा भवन अउ नवजात शिशु गहन चिकित्सा इकाई के अवलोकन करीन। ए मउका म स्वास्थ्य मंत्री ह नवापारा के शहरी प्राथमिक स्वास्थ्य केन्द्र म सिकल सेल प्रबंधन इकाई के सुभारंभ करीन। ए मउका म अपन संबोधन म श्री सिंहदेव ह किहीन कि सिकल सेल एक अनुवांशिक बीमारी हरय। एखर प्रति जागरूक होना जरूरी हे।
कोविड समाचार
प्रदेस म कोरोना संक्रमण के मामला म सरलग कमी आतजात हे। अभी के बेरा म प्रदेश के पॉजीटिविटी दर 0.91 प्रतिशत म आ गेहे। काली प्रदेश म 28 हजार 858 सैंपल के जांच करे गीस, जेमा 224 कोरोना संक्रमित पाय गीस। अभी के बेरा म 2 हजार 887 मरीज मनके इलाज प्रदेश के आने-आने अस्पताल या होम आइसोलेशन म चलत हे।
इही बीच, प्रदेश म कोरोना ले बचाव बर टीकाकरण अभियान घलो जोर-शोर ले चलत हे। प्रदेश म अब तक 3 करोड़ 75 लाख 41 हजार ले जादा टीका लगाय जा चुके हे।
 | ReplyForward |