मंत्रिपरिषद निर्णय
प्रदेस के स्कूल परिसर म स्थित आंगनबाड़ी केंद्र मन म पांच ले छै साल तक के लइका मन बर बालवाड़ी शुरू करे जाही। ये निर्णय मुख्यमंत्री भूपेश बघेल के अध्यक्षता म आज रायपुर स्थित उंखर निवास कार्यालय म होय मंत्रिपरिषद के बइठका म ले गीस। बइठका के बाद मंत्रिमंडल डहार ले लेगे निर्णय के जानकारी देवत केबिनेट मंत्री रविंद्र चौबे ह बताइन कि बइठका म स्कूल शिक्षा विभाग के प्रस्ताव के अनुमोदन करत बालवाड़ी शुरू करे जाय के निर्णय ले गीस। एखर ले अवइया शैक्षणिक सत्र म राज्य के पांच ले छै साल तक के आयु समूह के अड़सठ हजार ले जादा लइका मन लाभान्वित होही।
श्री चौबे ह बताइन कि राज्य के दस आकांक्षी जिला अउ दू हाई बर्डन जिला मन म अवइया महीना ले राशन कार्डधारी मन ल फोर्टिफाइड चंउर बांटे के निर्णय ले गेहे। एमा कोरबा, राजनांदगांव, महासमुंद, कांकेर, नारायणपुर, दंतेवाड़ा, बीजापुर, बस्तर, कोण्डागांव अउ सुकमा के अलावा कबीरधाम अउ रायगढ़ जिला शामिल हरय।
बइठका म आने आने जिला मन म फार्मासिस्ट के रिक्त पद ल भरे बर भर्ती परिणाम के वैधता एक साल बढ़ाय जाय के निर्णय ले गीस। उंहें छत्तीसगढ़ भू राजस्व संहिता उन्नीस सौ उनसठ म संशोधन विधेयक दू हजार बाईस के घलो अनुमोदन करे गीस। एखर तहत नामांतरण, बंटवारा, जइसन प्रक्रिया मन ल सरल करे जाही। एखर अलावा नगरीय क्षेत्र म शासकीय भूमि आवंटन, अतिक्रमित भूमि के व्यवस्थापन अउ भू स्वामी हक देके नवा प्रावधान मनके अनुमोदन करे गीस। बइठका म तृतीय अनुपूरक अउ बजट अनुमान बछर दू हजार इक्कीस-बाईस विधानसभा म प्रस्तुत करे के संबंध म छत्तीसगढ़ विनियोग विधेयक के अनुमोदन करे गीस संगेसंग मंत्रिपरिषद ह बजट सत्र बर राज्यपाल के अभिभाषण के घलो अनुमोदन करीन।
गोधन न्याय योजना राशि वितरण
मुख्यमंत्री भूपेश बघेल ह आज रायपुर म गोधन न्याय योजना के तहत पशुपालक ग्रामीण, गौठान ले जुड़े महिला समूह अउ गौठान समिति मन ल दस करोड़ चौबीस लाख रूपिया के राशि के ऑनलाइन भुगतान करीन।
ए मउका म मुख्यमंत्री ह कीहिन कि गोधन न्याय योजना, राजीव गांधी किसान न्याय योजना अउ सुराजी गांव योजना किसान मनके जीवन म बदलाव लाने वाला योजना साबित होवत हे। ओमन कीहिन कि अब गोधन न्याय योजना के संचालन प्रदेश म मिशन के रूप म करे जात हे।
ए दउरान मुख्यमंत्री के उपस्थिति म रायपुर अउ दुर्ग के दस गौठान मन म जैविक गुलाल अउ पूजन सामग्री के उत्पादन बर एमओयू म हस्ताक्षर करे गीस। एखर तहत प्रथम चरण म दूनो जिला के डेढ़ सौ महिला स्व सहायता समूह मन ल जोड़े गीस। ए समूह जैविक गुलाल के संगेसंग पूजन सामग्री जेमा चंदन पाउडर, रूई बत्ती, कुमकुम, रोली हवन आदि सामग्री तियार करही। उंहें मुख्यमंत्री ह प्राकृतिक पदार्थ ले बने उत्पाद मन बर एकीकृत अर्थ ब्रांड लांच करीन।
रायगढ़ तहसील-सरकार निर्देश
प्रदेस के जम्मों राजस्व न्यायालय मन म अब सुरक्षा व्यवस्था सुनिश्चित करे जाही। ए संबंध म राज्य सरकार ह कलेक्टर मन ल निरदेस जारी करे हे। बतादन कि रायगढ़ जिला के तहसील कार्यालय म पाछु दिन म तहसीलदार सहित राजस्व विभाग के कर्मचारी अउ वकील मनके बीच होय कथित झड़प के घटना के बाद राज्य सरकार ह जम्मों कलेक्टर मन ल निरदेस जारी करके पत्र लिखे हे।
इही बीच, राज्य सरकार डहार ले सुरक्षा संबंधी निरदेस के बाद तहसीलदार मन अपन आंदोलन समाप्त कर देहे।
दुर्घटना
महासमुंद जिला म पाछू रतिहा होय एक सड़क हादसा म एक महिला समेत चार मनखे मनके मउत होगे। ए घटना पटेवा थाना क्षेत्र के बरेकेल कला के तीर के हे।
मिले जानकारी अनुसार चार झिन लोगन मन एक मोटर सायकिल उपर सवार होके ग्राम ढांक ले बंसुलाडबरी जात रीहिन। इही दउरान झलक-बागबहरा के बीच बरेकेल कला गांव के तीर अज्ञात वाहन ह मोटर सायकिल ल टक्कर मार दीस। ए हादसा म मां अउ बेटा समेत चार लोगन मनके मउकाच म मउत होगे। जम्मों मृतक मन एके परिवार के बताये जात हे।
फूड प्वॉइजनिंग-मौत
सरगुजा जिला के सीतापुर थाना क्षेत्र के देवगढ़ गांव म बिहाव कारीकरम म भोजन करे के बाद अट्ठारह ले ज्यादा लोगन मनके तबीयत बिगड़ गे। एखर बाद ओमन ल सीतापुर सामुदायिक स्वास्थ्य केन्द्र म भर्ती करवाय गे रिहीस, जेमा एक लइका के इलाज के दउरान मउत होगे। उहें, दू झिन गंभीर लइका मन ल बेहतर इलाज बर अंबिकापुर मेडिकल कॉलेज भेजे गेहे।
इही बीच, भाजपा पदाधिकारी अउ कार्यकर्ता मन ह पीड़ित परिवार मन ल पचास लाख रूपिया मुआवजा देके मांग करे हे।
माओवादी मुठभेड़
कांकेर जिला म पाछू रतिहा सुरक्षा बल अउ माओवादी मनके बीच मुठभेड़ होय के खबर हे। ए मुठभेड़ म सुरक्षा बल मन कई झिन माओवादी मन ल मारे जाय के दावा करे हे। जिला के पुलिस अधीक्षक शलभ सिन्हा ह घटना के पुष्टि करत बताइन कि सुरक्षा बल मन ल ताड़ोकी थाना क्षेत्र म बड़का संख्या म माओवादी मनके मौजूदगी के सूचना मिले रीहिस। एखर बाद डीआरजी अउ एसएसबी के संयुक्त पार्टी ल मउका म रवाना करे गीस ।
ए दउरान रात लगभग एक बजे कोसरोंडा के जंगल म माओवादी मन अउ जवान मनके बीच फायरिंग शुरू होगे। करीबन एक घ्ांटा तक चले ए मुठभेड़ के बाद माओवादी उंहा ले भाग गीन। बीहनिया घटनास्थल के तलाशी के दउरान कई जगा मन म खून के धब्बा मिले हे, जेखर ले अंदाजा लगाये जात हे कि ये मुठभेड़ म कई झिन माओवादी मारे गेहे। श्री सिन्हा ह बताइन कि सुरक्षा बल मन सर्चिंग के दउरान माओवादी मनके दैनिक उपयोग के सामान बरामद करे हे।
कोविड-मंत्रालय आदेश
प्रदेस म कोरोना संक्रमण के कम होवत संख्या ल देखत आने-आने जिला मन म लागू प्रतिबंध म छूट दे जात हे। इही कड़ी म राज्य सासन ह नवा रईपुर स्थित मंत्रालय म बाहिरी मनखे मनके प्रवेस उपर लगाय गे रोक ल इक्कीस फरवरी ले हटाय के निर्णय ले हे। लेकिन, मंत्रालय जवइया लोगन मन ल कोरोना ले बचाव संबंधी निरदेस के पालन करना जरूरी होही।
ओति, कोंडागांव जिला म घलो जम्मों शैक्षणिक संस्थान मन ल खोले के आदेस जारी कर दे गेहे। उहें, सासकीय कार्यालय मन म घलो आमजन के प्रवेस के अनुमति होही।
डाकघर-स्वास्थ्य बीमा
डाकघर के माध्यम ले घलो अब लोगन मन स्वास्थ्य बीमा पॉलिसी ले सकहीं। ग्राहक मन ल स्वास्थ्य बीमा के लाभ देवाय बर डाक विभाग ह दू ठिन निजी कंपनी के संग अनुबंध करे हे। एखर तहत बीमाधारक पांच लाख तक के स्वास्थ्य बीमा करा सकही, जेखर ले ओमन ल देशभर के अस्पताल के संगेसंग विदेश मन म घलो इलाज के सुविधा मिलही।
नवजात मृत्यु दर
केन्द्र सरकार के राष्ट्रीय परिवार स्वास्थ्य सर्वेक्षण-पांच डहार ले जारी आंकड़ा के अनुसार बछर दू हजार पन्द्रह-सोलह के तुलना म बछर दू हजार बीस-इक्कीस म छत्तीसगढ़ म नवजात मृत्यु दर म तेईस प्रतिशत, शिशु मृत्यु दर म अट्ठारह प्रतिशत अउ पांच साल तक लइका मनके मृत्यु दर म बाईस प्रतिशत के कमी आय हे।
मल्टीमीडिया चित्र प्रदर्शनी
सूचना एवं प्रसारण मंत्रालय के प्रादेशिक लोकसंपर्क कार्यालय रईपुर डहार ले काली ले मुंगेली जिला के पथरिया म आजादी के अमृत महोत्सव के तहत तीन दिन के मल्टीमीडिया चित्र प्रदर्शनी के आयोजन करे जाही। ए चित्र प्रदर्शनी के उद्घाटन विधानसभा म नेता प्रतिपक्ष धरमलाल कौशिक ह करही।