हाईकोर्ट-नियमित सुनवाई
छत्तीसगढ़ उच्च न्यायालय के संग सबो अधीनस्थ न्यायालय मन म नियमित सुनवई काली 16 फरवरी ले फेर सुरू हो जही। ए संबंध म उच्च न्यायालय ह आदेश जारी कर देहे। सुनइया मन ल बतादन कि कोरोना संक्रमण के सेती अब तक न्यायालय मन म वर्चुअल सुनवई होवत रिहीस।
स्कूल शिक्षा-स्थानांतरण
स्कूल शिक्षा विभाग म स्वैच्छिक स्थानांतरण के इच्छुक मनखे मन ल अब ऑनलाइन आवेदन करना होही। एखर बर ओमन ह एनआईसी डहार ले बनाय गे अधिकारिक वेबसाइट म आवेदन कर सकथे। ए आवेदन के प्रिंट लेके कागज म घलो प्रेषित करे जा सकथे। ऑनलाइन आवेदन नइ करे के स्थिति म सिर्फ कागज म ही करे गे आवेदन उपर विचार नइ करे जाही।
स्कूल शिक्षा विभाग ए संबंध म आदेश जारी कर देहे, जेमा केहे गेहे कि बिना वेबसाइट म एंट्री करे कोन्हों प्रशासनिक तबादला नइ करे जाय। स्थानांतरण आदेश घलो एनआईसी के वेबसाइट के माध्यम ले ही जारी होही। संबंधित कर्मचारी मनके कार्यमुक्ति अउ नवा जगह म पदग्रहण घलो एनआईसी के वेबसाइट के माध्यम ले ही करे जाही।
गोबर बिजली-उत्पादन
राज्य सरकार ह गौठान मन म गोबर ले बिजली उत्पादन बर पांच युवा उद्यमी मनके संग एमओयू करे हे। एखर अंतर्गत उद्यमी मन डहार ले गौठान मन म दस-दस करोड़ रूपिया के निवेस प्रस्तावित हे। विद्युत उत्पादन बर गौठान मन म खरीदे जाने वाला गोबर के उपयोग उद्यमी मन ह प्राथमिक रूप ले करही। एखर बाद निजी क्षेत्र के डेयरी फार्म के गोबर अउ शहर म इकट्ठा होवइया कचरा के घलो उपयोग बिजली उत्पादन बर करे जा सकही। ए जानकारी कृषि मंत्री रविन्द्र चौबे के अध्यक्षता म नवा रायपुर में आयोजित गोधन न्याय मिशन के बैठक म दे गीस। बैठक म श्री चौबे ह गौठान मनके उत्पाद के बेहतर मार्केटिंग व्यवस्था करे के निरदेस देहे।
वकील मारपीट-मामला
रायगढ़ जिला म वकील अउ नायब तहसीलदार मनके बीच तीन दिन पहिली होय कथित झड़प के चौथा आरोपी वकील ल गिरफ्तार कर ले गेहे। रायगढ़ कलेक्टर ह आज आंदोलन करत करमचारी अउ अधिकारी संघ ले चरचा करीन। एखर बाद फेडरेसन ह अपन आंदोलन ल वापस लेके के घोषणा करीन।
दूसर कोती, सबो वकील मन ह आज करिया पट्टी लगाके विरोध प्रदर्शन करीन। वकील मनके एक प्रतिनिधिमंडल ह कलेक्टर ले मुलाकात करके अपन बात राखीन। अधिवक्ता संघ के एक प्रतिनिधि ह बतईन कि राजस्व न्यायालय के बहिष्कार जारी रइही।
भाजपा-आरोप
भारतीय जनता पार्टी के प्रदेश अध्यक्ष विष्णु देव साय ह किहीन कि प्रदेश के पहिली के भाजपा सरकार के शासन काल म जेन छत्तीसगढ़ ल जीरो पावर कट स्टेट के गौरव मिले रिहीस। अब ये राज्य कांग्रेस के शासनकाल म बिजली कटौती वाला देश के पांच राज्य मन म सामिल होगे हे। श्री साय ह किहीन कि चालू वित्तीय वर्ष म अक्टूबर तक छत्तीसगढ़ के ग्रामीण क्षेत्र मन म करीब 540 घंटा अउ शहरी क्षेत्र मन म 50 ले जादा घंटा के औसत कटौती करे गीस। ए जानकारी राज्यसभा म केन्द्रीय ऊर्जा मंत्री आर.के. सिंह ह देहे। श्री साय ह किहीन कि राज्य म किसान मन ल बिजली नइ मिले ले खेती-किसानी के संग लोगन मनके जरूरी काम घलो प्रभावित होवत हे।
माद्यी पूर्णिमा मेला
माद्यी पुन्नी के संगेसंग काली ले प्रदेश के आने-आने क्षेत्र मन म मेला अउ महोत्सव के आयोजन के शुरूआत हो जही। एमा राजिम, सिरपुर अउ शिवरीनारायण के मेला प्रमुख हे। राजिम के त्रिवेणी संगम म माद्यी पुन्नी मेला काली ले सुरू होके एक मार्च महाशिवरात्रि तक चलही। पहिली दिन बिहनिया चार बजे ले विशेष पर्व स्नान ले मेला के सुरूवात होही। संझा सात बजे विधानसभा अध्यक्ष डॉक्टर चरणदास महंत ह मेला के विधिवत उद्घाटन करही।
उहें, जांजगीर-चांपा के धार्मिक नगरी शिवरीनारायण म घलो काली ले माघी मेला शुरू होही। 15 दिन तक चलइया ए मेला के तैयारी पूरा कर ले गेहे। श्रद्धालु मन काली बिहनिया महानदी, जोंक अउ शिवनाथ नदी के त्रिवेदी संगम म पुण्य स्नान करही।
ऐति, महासमुंद जिला के महानदी तट म स्थित सिरपुर म काली दू दिन बर सिरपुर महोत्सव सुरू होही। महोत्सव के उद्घाटन संस्कृति मंत्री अमरजीत भगत करही, जिहां स्थानीय कलाकार मन ह सांस्कृतिक कार्यक्रम के प्रस्तुति दीहीं।
इही बीच, मुख्यमंत्री भूपेश बघेल ह राजिम माद्यी पुन्नी मेला अउ शिवरीनारायण मेला बर प्रदेशवासी मन ल बधाई अउ शुभकामना दीन हे। श्री बघेल ह किहीन हे कि दूनों मेला छत्तीसगढ़ के आस्थ के चिन्हारी हरय।
धान उठाव
प्रदेश म धान खरीदी के बाद कस्टम मिलिंग बर धान के उठाव तेजी ले करे जात हे। मिलर मन डहार ले अब तक 72 लाख 81 हजार मीटरिक टन धान के उठाव कर ले गेहे। उहें, अब तक 19 लाख 24 हजार मीटरिक टन चावल केन्द्रीय पूल म जमा करे जा चुके हे।
सिविक एक्शन प्रोग्राम
सीमा सुरक्षा बल-बीएसएफ डहार ले कांकेर जिला के पुलिया अउ भैंसासुर गांव म काली सिविक एक्शन प्रोग्राम अउ मेडिकल कैम्प के आयोजन करे गीस। ए बेरा ग्रामीण मनके कतको बीमारी के इलाज करे गीस अउ दवई दे गीस। एखरे संग करीब पांच लाख रूपिया के दैनिक उपयोग के सामान घलो बांटे गीस। ए कैम्प के फायदा आने-आने गांव के सैकड़ों ग्रामीण मन ल मिलीस।
बस्तर कैफे
बस्तर म उत्पादित कॉफी के बिक्री अउ मार्केटिंग बर रायपुर अउ नई दिल्ली म बस्तर कैफे सुरू करे जाही। ए बेरा सिर्फ जगदलपुर म बस्तर कैफे के संचालन करे जात हे। कृषि मंत्री रविन्द्र चौबे के अध्यक्षता म नवा रायपुर म होय छत्तीसगढ़ टी-कॉफी बोर्ड के बैठक म बस्तर अउ सरगुजा संभाग म चाय अउ कॉफी के खेती के रकबा ल बढ़ाय बर अउ बस्तर म उपजे कॉफी के मार्केटिंग बर निजी कंपनी मन संग एमओयू करे के निर्णय ले गेहे। श्री चौबे ह बस्तर सहित सरगुजा संभाग के पठारी इलाका मन म चाय अउ कॉफी के खेती ल बढ़ावा दे बर सर्वें करके प्रोजेक्ट बनाय के निरदेस देहे। ओमन किहीन कि बस्तर कॉफी के मार्केंटिंग बर निजी कंपनी मनके संग ए शर्त म एमओयू करे जाय कि कॉफी के ब्रांड नेम म बस्तर के नाव जरूरी रूप ले सामिल करे जाय। ओमन ह अधिकारी मन ल सुकमा जिला म घलो कॉफी के खेती बर क्षेत्र चिन्हांकित करे के निरदेस देहे।
अउ अब पेस हे मौसम के हाल..
प्रदेश के उत्तरी क्षेत्र म अवइया 24 घंटा म एक-दू जगह मन म हल्का बरसात हो सकथे। या फेर गरज-चमक के संग छींटा पड़ सकथे अउ एखर ले न्यूनतम तापमान म बढ़ोतरी हो सकथे।
अउ अब थोरकुन समाचार सार म-
– महान संत अउ समाज सुधारक संत शिरोमणि रविदास के जयंती काली मनाय जाही। ए मउका म राज्यपाल अनसुईया उइके अउ मुख्यमंत्री भूपेश बघेल ह प्रदेशवासी मन ल संत रविदास जयंती के बधाई देत किहीन कि उंखर उपदेश समाज के कल्याण अउ उत्थान बर जरूरी हे।
– इंदिरा गांधी राष्ट्रीय मुक्त विश्वविद्यालय-इग्नू म आने-आने पाठ्यक्रम अउ सेमेस्टर कार्यक्रम बर पंजीयन के तारीख इक्कीस फरवरी तक बढ़ा दे गेहे।
– दुर्ग के हेमचंद यादव विश्वविद्यालय ह नौ सेमेस्टर परीक्षा मनके परिणाम जारी कर देहे। विश्वविद्यालय के स्नातक कक्षा मनके वार्षिक प्रायोगिक परीक्षा पच्चीस फरवरी ले पन्द्रह मार्च के बीच ऑफलाइन माध्यम ले होही।
अउ
– राजिम माघी पुन्नी मेला के बेरा क्षेत्र के तीर-तखार के शराब दुकान काली ले एक मार्च तक बंद रइही।