विश्व रेडियो दिवस-01
ें आज विश्व रेडियो दिवस हरय। बछर दू हजार ग्यारह म यूनेस्को के सदस्य देश म ए दिवस ल मनाय के घोसना करे रिहीन अउ बछर दू हजार बारह म संयुक्त राष्ट्र महासभा म एला अंतर्राष्ट्रीय दिवस के रूप म मान्यता दीन। ए बछर विश्व रेडियो दिवस के थीम हरय-‘‘रेडियो और भरोसा‘‘। रॉयटर्स के हाल के सर्वेक्षण म आकाशवाणी ह अपन जिम्मेदारी मुताबिक प्रसारण के विश्वसनीय ब्रांड के रूप म सबले आगू माने गेहे।
प्रधानमंत्री नरेन्द्र मोदी ह विश्व रेडियो दिवस के मउका म जम्मों सुनइया मन ल अउ एला आगू बढ़इया हुनरमंद मन ल सुभकामना दीन। श्री मोदी ह एक ठिन ट्वीट श्रृंखला म किहीन कि ए ह घर हो या रद्दा बाट, या कहीं अउ हो, रेडियो ह लोगन मन के जिनगी के जरूरी हिस्सा बन गेहे। ए ह लोगन ले जुड़े के एक ठक सुघ्घर माध्यम हरय।
आकाशवाणी के महानिदेशक एन. वेणुधर रेड्डी ह किहीन हे कि आकाशवाणी ह कई दशक ले अपन भरोसा बनाय राखीन हे, जेखर श्रेय प्रसारक अउ कारीकरम ले जुड़े अधिकारी-कर्मचारी मनके संगेसंग तकनीकी दल अउ समाचार बुलेटिन तैयार करइया संपादक अउ सहयोगी मन ल जाथे। विश्व रेडियो दिवस के मउका म राखे गे एक ठिन लंबा वार्ता टॉकेथॉन म भाग लेवत श्री रेड्डी ह किहीन कि ए बछर जनवरी म अंतर्राष्ट्रीय समाचार एजेंसी रायटर्स ह मीडिया संगठन के विश्वसनीयता उपर एक ठिन सर्वे करे रिहीस, जेमा आकाशवाणी ह अव्वल रिहीस। श्री रेड्डी ह किहीन कि ऑल इंडिया रेडिया-एआईआर ह कई पीढ़ी ले भारतीय परिवार के हिस्सा बनय हवय।
विश्व रेडियो दिवस-02
ें ऐति, छत्तीसगढ़ म घलो विश्व रेडियो दिवस के मउका म कई ठिन कारीकरम होवत हे। राजधानी रईपुर के सिविल लाइन स्थित वृंदावन हॉल म आज ओल्ड लिसनर्स ग्रुप ऑफ इंडिया के रईपुर जोन डहार ले महान गायिका लता मंगेशकर के श्रद्धांजलि कारीकरम राखे गीस। ए दउरान कलाकार मन गाना घलो गईन। कारीकरम म आकाशवाणी रायपुर के सहायक निदेशक लखन लाल भौर्य माईपहुना रिहीन। ए मउका म पत्रकार मनके सम्मान घलो करे गीस। कारीकरम म ओल्ड लिसनर्स ग्रुप ऑफ छत्तीसगढ़ के प्रदेश अध्यक्ष मोहन लाल देवांगन अउ आकाशवाणी रईपुर के उद्घोषक प्रकाश उदय, सेवानिवृत्त उद्घोषक श्याम वर्मा घलो मौजूद रिहीन।
इही बीच, छत्तीसगढ़ रेडियो श्रोता संघ के संयोजक अशोक बजाज ह विश्व रेडियो दिवस के मउका म सबो रेडियो प्रेमी मन ल सुभकामना दे हे।
लोकवाणी
ें मुख्यमंत्री भूपेश बघेल ह किहीन हे कि छत्तीसगढ़ म उद्योग, व्यापार अउ कारोबार बर सुघ्घर महौल हवय। ओमन किहीन कि देस अउ दुनिया के निवेसक मन इहां आके देखयं कि उद्योग मित्र, व्यापार मित्र, कारोबार मित्र, उपभोक्ता मित्र, पर्यटक मित्र अउ रोजगार मित्र नीति मन ले कइसे नवा छत्तीसगढ़ गढ़े जावत हे। राज्य म आर्थिक गतिविधि म तेजी आय अउ रोजगार के मउका बाढ़य अइसन कार्य ल महत्ता दे जात हे।
श्री बघेल ह आज आकाशवाणी रईपुर ले प्रसारित मासिक रेडियो वार्ता लोकवाणी के छब्बीसवां कड़ी म ‘‘सुगम उद्योग, व्यापार-उन्नत कारोबार‘‘ ए बिसय उपर प्रदेस के रहवइया मन ले गोठबात करीन। ओमन किहीन कि राज्य सरकार डहार ले प्रदेस म सबला खाय-कमाय अउ रोजगार दे खातिर पहल करे जात हे। राज्य म सरकार के फइसला ले गांव-गंवई के अर्थव्यवस्था ह मजबूत होय हे, जेखर फायदा कारखाना अउ व्यापार जगत ल मिलत हे।
मुख्यमंत्री ह किहीन कि प्रदेस म पाछु तीन बछर ले एक हजार सात सौ पन्द्रह ठिन नवा उद्योग स्थापित होय हे, जेमा उन्नईस हजार पांच सौ करोड़ रूपिया ले जादा के निवेस होय हे अउ करीबन तैंतीस हजार मनखे ल रोजगार मिले हे। ओमन किहीन कि छत्तीसगढ़ म कारखाना मनके सहुलियत उपर घलो दे गेहे। इज ऑफ डूइंग बिजनेस के मापदंड म छत्तीसगढ़ ह देस के पहिली छह राज्य म सामिल हे।
श्री बघेल ह किहीन कि राज्य सरकार ह छत्तीसगढ़ रोजगार मिशन के गठन करे हे। एखर जरिया ले पांच बछर म पन्द्रह लाख रोजगार के मउका म राखे के लक्ष्य हे।
कोविड समाचार
ें प्रदेस म कोरोना संक्रमण के मामला ह सरलग कमती होवत हे। उहें, पॉजिटीविटी रेट ह घुचके दू दशमलव छह-नौ प्रतिसत म आ गेहे। काली प्रदेस म कोरोना संक्रमण के सात सौ चौव्वन नवा मामला आय हे। ए बेरा करीबन आठ हजार दू सौ मरीज मनके इलाज प्रदेस के कतकोन अस्पताल अउ होम आइसोलेशन यानि घरे म रहि के चलत हे।
ऐति, प्रदेस म कोरोना ले बाचे खातिर लोगन मन ल अब तक ले तीन करोड़ सड़सठ लाख तेईस हजार ले जादा टीका लगाय जा चुके हे।
कोरवा महिला मौत-समिति गठित
ें पहाड़ी कोरवा नारी-परानी के एक ठिन प्राईवेट अस्पताल म मउत के मामला म कोरबा कलेक्टर रानू साहू ह जांच समिति बनाय हे। ए समिति ह तीन दिन के भीतर ए माईलोगिन के मउत के कारण जांच के अपन रिपोर्ट सौंपही। संगे जिला अस्पताल आय मरीज ल जबरन प्राईवेट अस्पताल पठोय के मामला ल लेके मैनेजर समेत तीन झन मनखे के खिलाफ पुलिस ह मामला दर्ज कर लेहे।
उहें, दूसर डहार ले मेडिकल कॉलेज के डीन समेत आने डॉक्टर मन ल नोटिस जारी कर दे गेहे।
शहीद जवान-पार्थिव शरीर
ें बीजापुर जिला के बासागुड़ा थाना क्षेत्र म काली माओवादी मन संग होय मुठभेड़ म शहीद होय सीआरपीएफ के सहायक कमाडेंट शांतिभूषण तिर्की ल आज जगदलपुर के सीआरपीएफ मुख्यालय म आखिरी सलामी दे गीस। एखर बाद शहीद कमांडेंट के पार्थिव सरीर ल हेलीकॉप्टर ले उंखर गृह जिला रांची पठोय गीस।
मेडिकल प्रवेश
ें प्रदेश के आदिवासी अंचल म पढ़ईया लइका मन अखिल भारतीय मेडिकल प्रवेश परीक्षा-नीट म जोरदरहा प्रदर्शन करे हे। राज्य के दूरिहा जगह म राखे गे एकलव्य आदर्श आवासीय विद्यालय के नौ झिन पढ़ईया लइका मनके चयन ए बछर एम.बी.बी.एस. के पढ़ई बर होय हे। एमा दंतेवाड़ा के पांच झिन नोनी मनके संगे तरेगांव कबीरधाम के दू झिन अउ छोटे मुड़पार खरसिया के दू झिन बाबू लइका मन सामिल हे।
रायगढ़-मारपीट मामला
ें रायगढ़ के तहसील कोर्ट म वकील अउ कर्मचारी मन बीच मारपीट के मामला ह तूल पकड़त जात हे। प्रदेस स्तर के कर्मचारी-अधिकारी संगठन ह चेताय हे कि कहूं दोषी वकील मन ल गिरफ्तार नइ करे जाही, त ओमन काली ले जिला भर के राजस्व न्यायालय म कलमबंद हड़ताल करही।
धान खरीदी-आरोप
ें भारतीय जनता पार्टी सहकारिता प्रकोष्ठ ह राज्य सरकार उपर वादाखिलाफी के आरोप लगावत किहीन हे कि सरकार ह किसान मनके सबो धान ल नइ बिसा पाईस। प्रकोष्ठ के प्रदेस संयोजक शशिकांत द्विवेदी ह किहीन कि राज्य सरकार ह प्रदेस म एक सौ पांच लाख मीटरिक टन धान बिसाय के दावा करत हे। फेर, हकीकत म ओहर अंठानवे लाख मीटरिक टन ही धान बिसा पाय हे।