प्राकृतिक पेंट-एमओयू
छत्तीसगढ़ म अब गोबर ले प्राकृतिक पेंट बनाय जाही। एखर बर मुख्यमंत्री भूपेश बघेल के मौजूदगी म मुख्यमंत्री निवास म आयोजित कारीकरम म गोबर ले प्राकृतिक पेंट बनाय के तकनीक ल लेके एक ठन समझौता करे गीस। ए समझौता छत्तीसगढ़ राज्य गौ-सेवा आयोग अउ नेशनल पेपर इंस्टीट्यूट जयपुर, खादी अउ ग्रामोद्योग आयोग के संग सूक्ष्म, लघु अउ मध्यम आयोग मंत्रालय नई दिल्ली के बीच होइस।
ए मउका म मुख्यमंत्री ह बतईन कि पहिली चरण म छत्तीसगढ़ के 75 चयनित गौठान म प्राकृतिक पेंट निर्माण इकाई स्थापित करे जाही। एखर बर महिला स्व-सहायता समूह के सदस्य, महिला अउ युवा मन ल कौशल प्रशिक्षण, नेशनल पेपर इंस्टीट्यूट जयपुर डाहर ले दे जाही।
कारीकरम के दउरान मुख्यमंत्री ह गोधन न्याय योजना के तहत पशुपालक, किसान, ग्रामीण समेत गौठान समिति अउ महिला स्व-सहायता समूह मनके खाता म 2 करोड़ 37 लाख रूपिया के रासि ऑनलाइन जारी करीस।
उहें, मुख्यमंत्री ह आज अपन निवास कार्यालय म आयोजित समारोह ले ही, 11 ठन नगरीय निकाय बर 67 करोड़ रूपिया के विकास कारज के वर्चुअल लोकार्पण अउ भूमिपूजन करीन।
लखमा-लोकार्पण/भूमिपूजन
उद्योग अउ आबकारी मंत्री कवसी लखमा ह बीजापुर जिला के भैरमगढ़ म नौ करोड़ रूपिया के विकास कारज के लोकार्पण अउ भूमिपूजन करीन। ए मउका म श्री लखमा ह कहिन कि राज्य सरकार गांव, गरीब अउ किसान मनके हित बर संकल्पित हे। कारीकरम म ए.आई.सी.सी. के छत्तीसगढ़ प्रभारी सचिव सप्तगिरी शंकर उल्का, सांसद दीपक बैज अउ विधायक चंदन कश्यप के संगेसंग कतकोन जनप्रतिनिधि अउ ग्रामीण मौजूद रिहीन।
को-विन प्लेटफॉर्म-टीकाकरण
को-विन डिजिटल प्लेटफॉर्म म एक नवा सुविधा ‘‘अपने टीकाकरण की स्थिति जानें‘‘ सुरू करे गेहे। एखर ले लोगन ल टीकाकरण के स्थिति अउ विवरण सत्यापित या सुधार करे म मदद मिलही। सेवाप्रदाता घलो कोनों नागरिक के अनुरोध म ओला सेवा देवाय बर को-विन डिजिटल प्लेटफॉर्म के उपयोग कर सकही। केन्द्रीय स्वास्थ्य मंत्रालय ह किहीन कि ट्रेवल एजेंसी मन घलो ए सुविधा के उपयोग करके टीका लगा चुके लोगन ल ही यात्रा के अनुमति दे सकहीं। नियोक्ता मन घलो ए सेवा के उपयोग करके कर्मचारी के टीकाकरण के स्थिति जान के काम सुरू कर सकथे।
कोविड समाचार
देस म अब तक 116 करोड़ 50 लाख ले जादा कोरोना वैक्सीन लगाय जा चुके हे। केन्द्रीय स्वास्थ्य मंत्रालय के अनुसार काली संझा तक 67 लाख 25 हजार टीका लगाय गीस।
ऐति, छत्तीसगढ़ म घलो कोरोना ले बचाव बर अब तक 2 करोड़ 55 लाख 43 हजार ले जादा टीका लगाय जा चुके हे।
इही बीच, छत्तीसगढ़ म काली कोरोना संक्रमण के 24 ठन नवा मामला आगू आइस। एखरे संग छत्तीसगढ़ म सक्रिय मरीज के संख्या बाढ़के 295 हो गेहे।
स्टेट बैंक-अधिवेशन
कृषि मंत्री रविन्द्र चौबे ह आज राजधानी रईपुर म आयोजित भारतीय स्टेट बैंक अधिकारी संघ रायपुर के आंचलिक अधिवेशन म सामिल होईन। ए मउका म श्री चौबे ह किहीन कि सार्वजनिक उपकरण अउ संस्थान देस के ताकत हे। ए संस्थान के स्थापना देस के विकास ल गति दे बर करे गे रिहीस। बेरा के संग देस के विकास म ए संस्था मन अपन भूमिका साबित घलो करीन।
महिला सशक्तिकरण
गरियाबंद जिला मुख्यालय म आज महिला सशक्तिकरण सम्मान समारोह आयोजित करे गीस। ए मउका म पद्मश्री फूलबासन बाई यादव अउ पहुना मन आने-आने क्षेत्र म बढ़िया कारज करइया जिला के 12 ले जादा महिला मन ल सम्मानित करीन।
ए एउका म पद्मश्री फूलबासन बाई यादव ह गरियाबंद के महिला मनके बूता ल संहरावत किहीन कि हजारों संख्या म महिला मन सकलाइन, जउन उंखर दृढ़ इच्छासक्ति ल दरसाथे। ओमन किहीन कि महिला मन अपन घर-परिवार ल नशा ले दूर राखे के परयास करव अउ जिला ल नसामुक्ति के दिसा म आगू बढ़ावव।
कारीकरम म एसपी पारूल माथुर ह महिला मनके हौसला बढ़ावत किहीन कि महिला मन कोनों घला शोषण अउ घरेलू हिंसा ले झन डरव। अइसन होय म विरोध करव। पुलिस सदा महिला मनके संग हवय।
धान खरीदी-समीक्षा
छत्तीसगढ़ म अवइया एक नवंबर ले धान खरीदी सुरू होही। एखर तैयारी ल लेके आज जगदलपुर म खाद्य सचिव टोपेश्वर वर्मा ह समीक्षा बइठका लिन। ए दउरान खाद्य सचिव ह सीमावर्ती इलाका ले धान अउ मक्का के अवैध परिवहन उपर कड़ा कार्रवाई करे के निरदेस दीन। ओमन किहीन कि धान के अवैध परिवहन करत पाय म वाहन ल जब्त करे के संग ही तुरते एफ.आई.आर. दर्ज करे जाय।
विश्व मछुआरा दिवस
आज विश्व मछुआरा दिवस हे। ए मउका म भुवनेश्वर म आयोजित एक समारोह म केन्द्रीय मत्स्यपालन, पशुपालन अउ डेयरी मंत्री पुरूषोत्तम रूपाला ह किहीन कि किसान क्रेडिट कार्ड के फायदा मछुआरा अउ मत्स्य पालक मन ल देके प्रधानमंत्री के फइसला मछुआरा समाज बर बड़का उपहार हे।
ऐति, विश्व मछुआरा दिवस म मुख्यमंत्री भूपेश बघेल ह राज्य के मछली पालक अउ मछुआ समाज ल बधाई अउ सुभकामना दीन।
बाल सुरक्षा-सप्ताह
दुरूग जिला म बाल दिवस के मउका म चौदह नवंबर ले बीस नवंबर तक बाल सुरक्षा सप्ताह मनाय गीस। ए दउरान कतकोन कारीकरम आयोजित करे गीस। इही कड़ी म एसपी बद्रीनारायण मीणा के मार्गदर्शन म काली पुलगांव थाना के कोटनी गांव म सरकारी स्कूल म रंगोली प्रतियोगिता के आयोजन करे गीस अउ कक्षा म अव्वल आय लइका मन ल मेडल देके सम्मानित करे गीस।
कारीकरम म जिला पुलिस डाहार ले छात्रा मन ल साइबर क्राइम, ऑनलाइन ठगी, सोशल मीडिया ले जुड़े अपराध अउ लइका मनके खिलाफ होवइया अपराध, गुड टच-बैड टच अउ यातायात नियम ले जुड़े जानकारी दे गीस।
कौशिक-आरोप
छत्तीसगढ़ विधानसभा के नेता प्रतिपक्ष धरमलाल कौशिक ह किहीन कि राज्य सरकार अपन घोषणा के अनुसार प्रदेस के युवा मन ल 25 सौ रूपिया हर महीना बेरोजगारी भत्ता देवय। ओमन आरोप लगइन कि सरकार ह कागजी आंकड़ा के सहारा ले युवा मन ल ठगे म लगे हे।
उल्टी-दस्त
बलौदाबाजार जिला म बिलाईगढ़ विकासखंड के खम्हरिया गांव म बिहाव घर म आय करीबन अट्ठारह लोगन दूषित भोजन खाय ले बीमार होगें। बीमार सबो झन ल अस्पताल म भर्ती कराय गे हे।
सीएमएचओ खेमराज सोनवानी ह बतईन कि काली रतिहा दूषित खाना खाय ले अट्ठारह लोगन ल उल्टी-दस्त होय लागीस। एखर बाद पीड़ित मन ल बिलाईगढ़, सरसीवां अउ भटगांव के अस्पताल म भर्ती कराय गीस। फेरहाल सबो झन के स्थिति खतरा ले बाहिर हे।
जयशंकर शर्मा-निधन
वरिष्ठ पत्रकार जयशंकर शर्मा ‘‘नीरव‘‘ के आज बिहनिया दिल के दउरा पड़े ले रईपुर स्थित निवास म निधन होगे। ओमन चौरासी बछर के रिहीन। उंखर अंतिम संस्कार मारवाड़ी मुक्तिधाम म करे गीस।
श्री शर्मा के निधन म राज्यपाल अनुसुईया उइके, मुख्यमंत्री भूपेश बघेल अउ भाजपा के प्रदेश अध्यक्ष विष्णुदेव साय ह सोक व्यक्त करीन हे। मुख्यमंत्री ह अपन सोक संदेस म किहीन कि नीरव जी ह अपन लेखनी ले छत्तीसगढ़ के पत्रकारिता ल समृद्धि करीस हे। उंखर योगदान ल सबर दिन सुरता राखे जाही।
मन की बात
प्रधानमंत्री नरेन्द्र मोदी ह अट्ठाईस नवंबर के आकाशवाणी ले मन की बात कारीकरम म देस-बिदेस के लोगन संग अपन विचार साझा करहीं। प्रधानमंत्री ह लोगन ले अपन विचार माईजीओवी अउ नमो ऐप म रिकार्ड कराय के आग्रह करीन हें।
सुनइया मन टोल फ्री नंबर- एक आठ शून्य-शून्य एक-एक – सात आठ शून्य-शून्य म हिन्दी या अंग्रेजी म अपन संदेस रिकार्ड करा सकत हें। फोन लाइन छब्बीस नंवबर तक खुले रइही। फोन नंबर- एक नौ दो-दो म मिस्ड कॉल देके एसएमएस ले मिले लिंक ले घलो सोझे प्रधानमंत्री तक सुझाव भेजे जा सकथे।
विश्व टेलीविजन दिवस
आज विश्व टेलीविजन दिवय हे। ए मउका म एक ट्वीट म प्रसार भारती के मुख्य कार्यकारी अधिकारी शशि शेखर वेम्पटी ह किहीन हे कि दूरदर्शन म घलो कतकोन परिवर्तन होय हे। ओमन कहिन कि दूरदर्शन ह ‘‘एनेलॉग टेरेस्ट्रियल टीवी ट्रांसमिशन‘‘ युग ल छोड़ दीस अउ ‘‘डायरेक्ट टू मोबाइल टेरेस्ट्रियल‘‘ के दिशा म आगू बाढ़ गेहे।
दूरदर्शन के महानिदेशक मयंक अग्रवाल ह घलो ए मउका म सुभकामना दिन हें। ओमन अपन संदेस म कहिन कि भारत के लोकसेवा प्रसारक के रूप म दूरदर्शन ल ए बात गरब हे कि ओ ह देस-विदेस के खबर ल हर घर तक पहुंचाय के प्रयास करीस।
अब पेस हे मौसम के हाल..
छत्तीसगढ़ म अवइया दू दिन के बाद तापमान म गिरावट आय के संभावना हे। उहें, काली एक-दू जगह म हल्का बारिस अउ गरज-चमक के संग बूंदा-बांदी होय के संभावना हे।
मौसम विभाग के अनुसार बंगाल के खाड़ी ले ठंडा हवा आवत हे। एखर अलावा एक ठन चक्रवाती घेरा घलो बने हे। एखरे परभाव ले छत्तीसगढ़ म बादर अउ बारिस के स्थिति बने हे।