कृषि मंत्री-धान खरीदी
प्रदेस म एक दिसंबर ले सुरू होवइया धान खरीदी के पहिली दिन ले ही किसान मन अपन बोरा म धान बेचे बर ला सकही। किसान मनके सुविधा ल ध्यान म राखत मुख्यमंत्री ह ए फइसला लेहे।
राजनांदगांव जिला के कुमरदा गांव म देवारी मिलन अउ कृषक सम्मान म संबोधित करत कृषि मंत्री रविन्द्र चौबे ह बतईन कि किसान मन ल धान बेचे म कोनों परकार के परेसानी झन होवय, एखर बर ए बेवस्था करे गेहे। ओमन बतईन कि एसो प्रदेस म एक सौ पांच लाख मीटरिक टन धान बिसाय के अनुमान हे। किसान मन ल धान खरीदी के पइसा ल एक दिसंबर ले जारी कर दे जाही। ए मउका म कृषि मंत्री ह करीबन तीन करोड़ रूपिया के लागत वाले कोलियारी जलाशय अउ नहर लाइन के कामकाज के भूमिपूजन करीन। ओमन जिला के सफल किसान मन ल प्रतीक चिन्ह अउ प्रशस्ति पत्र देके घलो सम्मानित करीन। कृषि मंत्री ह राजनांदगांव म राज्य स्तरीय कृषि मेला राखे के घोसना करीन।
राज्यपाल-डीजीपी भेंट
राज्यपाल अनुसुईया उइके ह किहीन हे कि कोनों भी मनखे ह लालच देके या अपन ताकत देखाके धर्मांतरण कराथे, त पुलिस ह ओखर खिलाफ कड़ा कार्रवाई करय। राज्यपाल ह यहू किहीन कि आम लोगन मनके संग बिसेस रूप ले आदिवासी मनके प्रति पुलिस अधिकारी अउ कमरचारी मनके व्यवहार ह ठीकठाक रहना चाही। राज्यपाल ह ए बात प्रदेस के नवा पुलिस महानिदेशक अशोक जुनेजा ले मुलाकात के दउरान किहीन।
मुख्यमंत्री-घोषणा
मुख्यमंत्री ह आज भिलाई-चरौदा नगर निगम क्षेत्र म करीबन इकचालीस करोड़ रूपिया के कामकाज के लोकार्पण अउ सिलान्यास करीन। ए मउका म मुख्यमंत्री ह भिलाई-तीन के मिनी स्टेडियम ल स्टेडियम के रूप म बनाय के संगेसंग कुंद्रापारा के विस्थापित लोगन मन ल पट्टा देके अउ स्वामी आत्मानंद इंग्लिश मीडियम स्कूल म सीट ल बढ़ाय के घोसना करीन।
एखर पहिली, मुख्यमंत्री ह आज दुरूग जिला के जामुल नगर पालिका क्षेत्र म सात करोड़ रूपिया के विकास काम के लोकार्पण अउ भूमिपूजन करीन।
सुप्रीम कोर्ट-फैसला
उच्चतम न्यायालय ह पॉक्सो अधिनियम के तहत दुष्कर्म मामला म सारिरिक स्पर्श के बारे म बम्बई उच्च न्यायालय के फइसला ल रद्द कर देहे। उच्च न्यायालय ह पॉक्सो अधिनियम के अनुच्छेद-सात म अपराध के विवेचना म सारीरिक स्पर्श ल जरूरी सर्त माने रिहीन।
बम्बई उच्च न्यायालय के फइसला ल खारिज करत शीर्ष अदालत ह दोसी मन ल तीन साल के कठोर कारावास अउ एक महीना के सामान्य कारावास के सजा सुनाय हे।
सीबीएसई-परीक्षा
उच्चतम न्यायालय ह सीबीएसई अउ आईसीएसई के दसवीं अउ बारहवीं के बोर्ड परीक्षा ल हाईब्रिड मोड म कराय के आदेस देके छह झिन छात्र मनके याचिका ल खारिज कर देहे। ए दूनों परीक्षा ऑफलाइन होवत हे।
न्यायमूर्ति एम. खानविलकर अउ सी.टी. रविकुमार के खंडपीठ ह किहीन कि परीक्षा सुरू हो चुके हे अउ अइसन बेरा म कोनों भी परकार के दखलअंदाजी करे म परेसानी आ सकथे।
पेसा-कानून
केन्द्रीय ग्रामीण विकास अउ पंचायती राज मंत्री गिरिराज सिंह ह राज्य मन ले पंचायत अधिनियम उन्नीस सौ छियानवे के प्रावधान मन ल प्रभावी ढंग ले लागू करे बर केहे हे। ए अधिनियम छत्तीसगढ़, झारखंड, मध्यप्रदेश अउ ओड़िशा के संगेसंग दस ठिन राज्य म लागू हे।
ऐति, प्रदेस के पंचायत अउ ग्रामीण विकास मंत्री टी.एस. सिंहदेव ह किहीन हे कि पेसा कानून ल प्रभावी ढंग ल लागू करे बर नियम बनाय के काम ह तेजी ले चलत हे। विभागीय समीक्षा बइठका म ओमन किहीन कि पंचायत अउ ग्रामीण विकास विभाग ह पेसा कानून ल लागू करे म जुटे हे। ए नियम ल बनाय बर पाछु डेढ़ साल ले आदिवासी विकासखंड के लोगन अउ आदिवासी समाज के प्रतिनिधि मनके संगेसंग जनप्रतिनिधि मन ले गोठबात करके सुझाव ले जात हे। बइठका म अनुसूचित जाति अउ अनुसूचित जनजाति विकास मंत्री डॉक्टर प्रेमसाय सिंह टेकाम अउ कोरबा के सांसद ज्योत्सना महंत के संगेसंग आने-आने विधायक मन ह घलो अपन सुझाव दे हवय।
पंचायत मंत्री ह बइठका म बतईन कि ए नियम के मसौदा बर राजस्व, वन, आदिवासी, श्रम, गृह, आवास अउ पर्यावरण विभाग ल घलो जरूरी कार्रवाई अउ सुझाव बर भेजे गेहे।
भाजपा-चक्काजाम
प्रदेस म पेट्रोल-डीजल उपर वैट कम करे के मांग ल लेके बीस नवंबर के भारतीय जनता पार्टी ह जम्मों जिला म चक्काजाम करही। प्रदेस भाजपा अध्यक्ष विष्णुदेव साय ह पत्रकार मन ले गोठबात करत बतईन कि चक्काजाम ह बिहनिया ग्यारह बजे ले एक बजे तक चलही। ओमन राज्य सरकार उपर आरोप लगाईन कि आने-आने कल्याणकारी योजना अउ अपन कथित सफलता के गोठबात के नाव म गलतबयान बाजी करत हे।
बिजली बिल-सुरक्षा निधि
प्रदेस म बिजली उपभोक्ता मन डहार ले पाछु महीना बिल के संग जमा करे गे अतिरिक्त सुरक्षा निधि ल आधा कर देहे। छत्तीसगढ़ राज्य बिजली उत्पादन कंपनी ह घरेलू उपभोक्ता मन ल थोरकुन राहत देवत किहीन कि उपभोक्ता सुरक्षा निधि के आधा रकम के संग बिजली बिल जमा कर सकथे। जउन उपभोक्ता मन सुरक्षा निधि के पूरा रकम के संग पाछु महीना के बिजली बिल जमा कर देहे। ओमन ल अवइया महीना उंखर बिजली बिल ल कमती करके दे जाही।
पढ़ना-लिखना अभियान
पढ़ना-लिखना अभियान के बेरा ल छह महीना बर बढ़ा दे गेहे। राज्य साक्षरता मिशन प्राधिकरण के संचालक राजेश सिंह राणा ह बतईन कि ए अभियान म राज्य के ढाई लाख निरक्षर मन ल साक्षर करे के लक्ष्य मिले हे। एमा ले करीबन एक लाख नब्बे हजार निरक्षर मन परीक्षा म सामिल होगे हे। बांचे साठ हजार मन ल अवइया छह महीना म साक्षर करे जाही। ओमन बतईन कि छत्तीसगढ़ ह इकलौता राज्य हरय, जिहां साक्षरता परीक्षा के परिणाम ल स्कूल शिक्षा के पोर्टल म अपलोड करे हे।
लखमा-फूड पार्क
उद्योग मंत्री कवासी लखमा ह प्रदेस के जम्मों फूड पार्क मन ल बनाय के काम ल जल्दी सुरू करे के निरदेस देहे। समीक्षा बइठका म ओमन राज्य के आने-आने जिला मन म प्रस्तावित फूड पार्क के चलत कामकाज के समीक्षा करीन। बइठका म ओमन प्रधानमंत्री रोजगार सृजन कारीकरम, मुख्यमंत्री रोजगार योजना के संगेसंग आने कल्याणकारी योजना मनके बारे म चलत कामकाज के जानबा लीन।
जनजातीय शिल्प-मेला समापन
आजादी के अमृत महोत्सव म छत्तीसगढ़ आदिम जाति अनुसंधान अउ प्रशिक्षण संस्थान के संगेसंग भारत सरकार डहार ले रईपुर के छत्तीसगढ़ हाट म राखे गे तीन दिवसीय जनजातीय शिल्प मेला काली सिरा गे। ए मउका म संसदीय सचिव द्वरिकाधीश यादव ह छत्तीसगढ़ हाट म लगे ढोकरा शिल्प, जूट शिल्प, बांस शिल्प, कालीन बनाय, गोदना शिल्प, कांस्य शिल्प जइसन आने-आने शिल्पकला के स्टॉल ल देखीन।
समापन समारोह म छत्तीसगढ़ आदिमजाति अनुसंधान अउ प्रशिक्षण संस्थान के संचालक शम्मी आबिदी ह किहीन कि थोरकुन बेरा म ही राखे गे ए शिल्प मेला म प्रदर्सित जनजातीय कला ल लोगन मन ह अब्बड़ प्रसंसा करे हे।
स्कूल-सड़क सुरक्षा
प्रदेस के स्कूल मन म छात्र मन ल यातायात अउ सड़क सुरक्षा के बारे म जागरूक बनाय बर जल्दीच एक ठिन बिसेस बनाय जाही। छात्र मन ल बैनर, पोस्टर अउ दीवार लेखन के संगेसंग आने माध्यम ले यातायात के नियम ले जानबा कराय जाही। अभियान म जम्मों हाईस्कूल अउ हायर सेकेंडरी स्कूल के छात्र मन ल सड़क सुरक्षा मार्गदर्शिका घलो दे जाही। ए बारे म लोक शिक्षण आयुक्त डॉक्टर कमलप्रीत सिंह ह जम्मों जिला अधिकारी मन ल एखर प्रतिवेदन भेजे के निरदेस देहे।
जंगली हाथी-निर्देश
जंगली हाथी मन ले बांचे बर वन विभाग ह दिसा-निरदेस जारी करे हे। कबीरधाम जिला के आदिवासी बैगा बहुल बोड़ा विकासखंड के दूर-दराज गांव मन म जंगली हाथी मनके आय के सूचना मिले के बाद वन विभाग डहार ले लोगन मन ल हाथी मन बाचे के सलाह देहे। ओमन जंगली हाथी ले दू सौ मीटर के दुरिहा बना के संगेसंग फोटो ले या फेर तीर म जाके सेल्फी नइ लेके बात केहे हे।