केंद्र सरकार मोबाइल सेवा
केंद्रीय मंत्रिमंडल ह छत्तीसगढ़ समेत पांच ठिन राज्य के आकांक्षी जिला के जउन गांव मोबाइल सेवा के दायरा म नइ हे, ओ गांव म मोबाइल सेवा के प्रावधान बर एक ठिन परियोजना ल मंजूरी देहे।
प्रधानमंत्री के अध्यक्षता म मंत्रिमंडल समिति ह पांच ठिन राज्य छत्तीसगढ़ आंध्रप्रदेश, झारखंड, महाराष्ट्र अउ ओडिशा के आकांक्षी जिला म शामिल जउन गांव मोबाइल सेवा के दायरा म नइ हे उंहा बर वित्त पोषण सार्वभौमिक सेवा दायित्व निधि ल मंजूरी देहे। ए परियोजना के चलत ए सबो राज्य के चौवांलिस ठिन आकांक्षी जिला के सात हजार दू सौ सत्यासी गांव जउन मोबाइल सेवा के दायरा म नइ हे, ओ गांव म फोर-जी मोबाइल सेवा देके परिकल्पना करे गेहे। ए परियोजना के समझौता म हस्ताक्षर करे के बाद अठारा महीना के भीतरी यानि कि बछर दू हजार तेईस म नवंबर महीना तक एला पूरा कर ले जाही।
जेन गांव म ए सेवा मौजूद नइ हे, ओ सबो गांव म फोर-जी मोबाइल सेवा के प्रावधान ले संबंधित काम ल खुला बोली लगाके आवंटित करे जाही। ए प्रक्रिया यूएसओएफ के मौजूदा प्रणाली के तहत पूरा करे जाही।
डीजीपी बैठक
छत्तीसगढ़ के पुलिस महानिदेशक अशोक जुनेजा ह कीहिन कि सीमावर्ती राज्य के बीच आपसी समन्वय ले माओवादी समस्या अउ मादक पदार्थ के तस्करी म रोक संभव हे। ए बात श्री जुनेजा ह काली छत्तीसगढ़ अउ ओडिशा राज्य के बीच होय वीडियो कॅान्फ्रेसिंग के माध्यम ले इंटर स्टेट कॉर्डिनेशन मीटिंग म कीहिन ।
बइठक के शुरूआत म ओडिशा के डीजीपी अभय ह दूनो राज्य के माओवादी समस्या अउ मादक पदार्थ तस्करी के मुद्दा ल उठाइन। ए बेरा म छत्तीसगढ़ के डीजीपी ह बताइन कि बस्तर रेंज म माओवादी मनके खिलाफ सरलग कार्रवाई कर जात हे।
ओमन ह कीहिन कि दूनों राज्य के बीच गांजा तस्करी एक ठिन गंभीर समस्या हरय। जेखर उपर रोक लगाये बर छत्तीसगढ़ के सबो सीमावर्ती जिला म सीसीटीवी लगे चेक पोस्ट लगाये जाथे।
कोविड टीका
प्रदेश म कोरोना टीकाकरण अभियान सरलग जारी हे। अब तक राज्य के चौरासी प्रतिशत लोगन मन ल कोरोना के पहिली टीका लग चुके हे। उंहें बंयालिस प्रतिशत लोगन मन ल दूनो टीका लग चुके हे। तिहार के बेरा घलो हर रोज औसत एक लाख छियालिस टीका लगाये गीस। प्रदेश म अब तक दू करोड़ अड़तालिस लाख इक्कीस हजार ले जादा कोरोना टीका लगाये गेहे।
सबो पात्र मनखे तक कोरोना वैक्सीन के दूनो खुराक पहुंचाय बर प्रदेश म अभी घलो एक करोड़ टीका के अउ जरूरत हे। ए संबंध म मुख्यमंत्री भूपेश बघेल ह प्रधानमंत्री ल एक ठिन चिट्ठी लिखे हे।
इही बीच राज्य म कोरोना के औसत पॉजीटिवीटी दर शून्य दशमलव शून्य आठ प्रतिशत रहि गेहे। काली राज्य म कोरोना संक्रमण के बीस ठिन मामला आगू आय हे । उंहे राज्य के उन्नीस ठिन जिला म काली एखर एको मामला नइ मिले हे। ए बेरा म राज्य म दू सौ छियांसठ मरीज मनके इलाज आने-आने अस्पताल या फेर होम आइसोलेशन म चलत हे।
मुख्यमंत्री भूमिपूजन
मुख्यमंत्री भूपेश बघेल ह काली दुर्ग जिला म एक सौ सतहत्तर करोड़ रूपिया के लागत वाले विकास अउ निर्माण काम के लोकार्पण अउ भूमिपूजन करही। कार्यक्रम ह नगर निगम भिलाई, भिलाई-चरौदा, रिसाली अउ जामुल नगर पालिका क्षेत्र म होही। मुख्यमंत्री ह ए मउका म शासन के आने आने योजना के तहत फायदा मिले हितग्राही मन ल अनुदान राशि के चेक घलो बांटही।
धान खरीदी
मुख्य सचिव अमिताभ जैन ह जिला कलेक्टर अउ पुलिस अधीक्षक मन ल एक दिसंबर ले शुरू होवइया धान खरीदी प्रक्रिया बर सबो बेवस्था करे के निर्देश दीन हे।
काली रायपुर म वीडियो कॅान्फ्रेसिंग ले बइठका लेके ओमन ह कीहिन हे कि धान के बिक्री बर केंद्र म अवइया किसान मन ल कोनो भी प्रकार के असुविधा नइ होना चाही। संगेसंग धान के अवैध परिवहन के रोकथाम बर सरलग कार्यवाही होना चाही।
मुख्य सचिव ह बइठका म निर्देश दीन कि धान खरीदी केंद्र म बिजली, पानी अउ टोकन समेत बुनियादी सुविधा के उपलब्धता सुनिश्चित करे जाय। संगेसंग ओमन ह धान खरीदी शुरू होय के बाद हफ्ता के आखरी म खरीदे गे धान के मात्रा अउ बारदाना के भौतिक सत्यापन करे बर कीहिन हे।
इंजीनियर रिहा
बीजापुर जिला ले सात दिन पहिली अगवा करे गे सब इंजीनियर अजय लकड़ा ल माओवादी मन ह आज छोड़ दीन। जानबा के अनुसार रिहाई के पहिली जंगल के अंजान जगा म माओवादी मन ह एक ठिन जन अदालत लगाइन जिहां अगवा करे गे सब इंजीनियर के पत्नी अउ मीडियाकर्मी मन ह घलो मौजूद रीहिन।
बतादन कि पाछू ग्यारा नवंबर के जिला के गोरना मनकेल्ली रद्दा ले माओवादी मन ह सड़क निर्माण काम म लगे सब इंजीनियर समेत दू झिन कर्मचारी मन ल अगवा कर ले रीहिन। एमा ले एक झिन कर्मचारी ल अगवा करे के एके दिन बाद छोड़ दे रीहिन। एखर बाद ले सब इंजीनियर के पत्नी ह अपन पति के रिहाई बर माओवादी मनले अपील करत रीहिस।
इही बीच बीजापुर जिला म मिले एक झिन पच्चीस लाख के इनामी माओवादी के शव के पहिचान कर ले गेहे। ये ह दण्डकारण्य जोनल समिति के सदस्य रीहिस, जेखर खिलाफ हत्या अउ कई ठिन गंभीर वारदात म शामिल रेहे के आरोप हे।
कृषि प्रोजेक्ट चयन
केंद्र सरकार के इलेक्ट्रॅानिक्स अउ सूचना प्रौद्योगिकी मंत्रालय डहार ले आर्टिफिशियल इंटेलिजेंस बर आयोजित स्पर्धा म छत्तीसगढ़ के लईका मन डहार ले बनाये गे दू ठिन प्रोजेक्ट ल चुने गेहे।
दूनो प्रोजेक्ट ह महासमुंद जिला के शासकीय कुलदीप निगम उच्चतर माध्यमिक विद्यालय नर्रा के हवय। जिहां पढ़ईया लईका परमेश्वरी यादव के प्रोजेक्टर कृषि समस्या उपर आधारित रीहिस। त उंहे दूसर प्रोजेक्ट वैभव देवांगन अउ धीरज यादव ह फसल के बीच म उगे खरपतवार ल पहिचाने बर बनाये रीहिस।
घोष कार्यक्रम
राष्ट्रीय स्वयं सेवक संघ बिलासपुर अउ रायपुर शाखा के स्वयंसेवक मन डहार ले पाछू एक महीना ले घोष के सतत सातत्य ले अभ्यास करे जात हे। एमा ले चिन्हित घोष वादक मनके घोष प्रदर्शन कार्यक्रम परनदीन उन्नीस नवंबर के मंझनियां तीन बजे ले मुंगेली के मदकूद्वीप म होवइया हे। ए कार्यक्रम म सर संघचालक डॅाक्टर मोहन भागवत उपस्थित रीही।
हाथी आतंक
रायगढ़ जिला के धरमजयगढ़ वनमंडल म चालीस ले जादा हाथी मौजूद हे। आने-आने झुण्ड म ये हाथी मन ह छाल अउ बोरो रेंज के छै ले जादा गांव म डेरा डाले हे। पाछू एक दू दिन के भीतर ये हाथी मन ह बीस ले जादा किसान मनके फसल ल नुकसान पहुंचाइन हे।
अइसने कबीरधाम जिला के बांधी गांव के तीर हाथी मनके झुंड मौजूद होय के समाचार मिले हे। एखर बाद वन विभाग ह इंहा अलर्ट जारी कर देहे।
कोरिया नगरीय निकाय
कोरिया जिला के विभाजन के विरोध म भारतीय जनता पार्टी, कांग्रेस अउ गोंडवाना गणतंत्र पार्टी के पदाधिकारी मन ह एके संगरा बैकुण्ठपुर अउ शिवपुरचर्चा नगरीय निकाय चुनई के बहिष्कार करे के निर्णय लीन हे। ए संबंध म कोरिया बचाव मंच ह न्यायालय जाय के फैसला लीन हे।
जानबा के अनुसार कोरिया जिला के खड़गंवा ब्लॉक ल एमसीबी म शामिल करे गेहे । राजपत्र म एखर अधिसूचना प्रकाशित करे के बाद ही उंहा के रहइया मनखे मन ह एखर विरोध करत हे। एखर बर पहिली ले ही आंदोलन सरलग चलत हे अउ विभाजन के विरोध म कोरिया बचाओ मंच कोति ले राज्यपाल ल घलो ज्ञापन सौंपे जा चुके हे।
मौसम
पश्चिम मध्य बंगाल के खाड़ी अउ दक्षिण पश्चिम बंगाल के खाड़ी म एक ठिन निम्न दाब के क्षेत्र बने हुए हे। एखरे संग उपरी हवा के चक्रीय चक्रवाती घेरा घलो सक्रिय हे। जेखर ले प्रदेश म बंगाल के खाड़ी ले बड़ मात्रा म नमी आवत हे। काली प्रदेश के एक दू ठिन जगा म हल्का बरसा होय या फेर गरज चमक के संग बूंदाबांदी के संभावना हे। उंहें काली राज्य के दक्षिणी भाग म पानी गिर सकत हे।