राज्यपाल बिरसा मुण्डा जयंती
राज्यपाल अनुसूइया उइके ह कीहिन कि पेसा कानून के तहत ही नगरीय क्षेत्र मन म आदिवासी मनके हित ल सुरक्षित राखे बर मेसा कानून जल्दी पारित करे के जरूरत हे।
काली अंबिकापुर म बिरसा मुण्डा जयंती कार्यक्रम ल संबोधित करत राज्यपाल ह कीहिन कि आदिवासी समाज शिक्षित अउ जागरूक होके सरकारी योजना मनके लाभ ले अउ संवैधानिक अधिकार मनके जादा ले जादा उपयोग करय। ओमन कीहिन कि अनुसूचित क्षेत्र मन म उद्योग मन बर जमीन अधिग्रहण के बाद प्रभावित परिवार मन ल मुआवजा अउ लाभांश मिले के संगे-संग ओमन ल प्रस्तावित औद्योगिक इकाई म आजीवन शेयर धारक होय के प्रावधान घलो करे जाना चाही।
केंद्रीय मंत्री-मुख्यमंत्री बैठक
मुख्यमंत्री भूपेश बघेल ह केंद्र सरकार ले अनुरोध करे हे कि छत्तीसगढ़ ल धान ले एथेनॉल बनाये के अनुमति दे जाय। केंद्रीय वित्तमंत्री डॅाक्टर निर्मला सीतारमन के अध्यक्षता म आयोजित देश के सबो राज्य मनके मुख्यमंत्री मनके बइठक म वीडियो कॅान्फ्रेसिंग के माध्यम ले शामिल होत मुख्यमंत्री ह बताइन कि धान ले एथेनॉल प्लांट लगाये बर 12 कंपनी मनले एमओयू घलो कराय गेहे।
धान खरीदी बैठक
प्रदेश म चालू खरीफ मौसम बर समर्थन मूल्य म धान खरीदी एक दिसंबर ले शुरू होही। एखर बर प्रशासनिक स्तर म तैयारी शुरू होगे हे। इही कड़ी म प्रदेश के सबो संभाग मन म अलग-अलग बैठक आयोजित करे जाही। ए बैठक म धान खरीदी केंद्र मनके व्यवस्था सहित सबो जरूरी तैयारी उपर चर्चा करे जाही।
राज्य सरकार ह सबो संभाग के आयुक्त अउ कलेक्टर मन ल पत्र जारी करके बैठक के तारीख घोषित कर देहे। पत्र के अनुसार 17 नवंबर के बिलासपुर म, 18 के रायपुर म अउ 19 नवंबर के दुर्ग म संभाग स्तरीय बैठक होही। उंहें बस्तर संभाग के बैठक 20 नवंबर के जगदलपुर म अउ सरगुजा संभाग के बैठक 21 नवंबर के अंबिकापुर म होही।
जानकारी के अनुसार खाद्य मंत्री अमरजीत भगत ह धान खरीदी शुरू होय के पहिली सबो संभाग मन म समीक्षा बैठक के निर्देश देहे।
प्रधानमंत्री ऑडिट दिवस
प्रधानमंत्री नरेंद्र मोदी ह कीहिन कि सरकार ह कम अउ नई उपयोग होवइया परिसंपत्ति मनके मौद्रिकरण करे के साहसिक निर्णय लेहे। ओमन कीहिन कि ए फैसला के बाद देश के अर्थव्यवस्था ल नवा उर्जा मिले हे अउ सरकार के फैसला के दुनिया भर म स्वागत करे जात हे।
श्री मोदी ह आज ऑडिट दिवस के मउका म नई दिल्ली म आयोजित समारोह ल संबोधित करत कीहिन कि न्यूनतम शासन और अधिकतम परिणाम के सिद्धांत म चलत, सरकार के हस्तक्षेप कम से कम राखत, सबो काम ल पूरा करे जात हे।
जनजाति गौरव दिवस
प्रधानमंत्री नरेंद्र मोदी के शहीद बिरसा मुण्डा के जयंती ल जनजाति गौरव दिवस घोषित करे के बाद काली भाजपा अनुसूचित जनजाति मोर्चा डहार ले बिरसा मुण्डा के स्मृति म पूरा प्रदेश म लगभग ढाई सौ संस्था मन म कार्यक्रम आयोजित करके जनजाति गौरव दिवस मनाये गीस।
रायपुर के गोंडवाना भवन म आयोजित कार्यक्रम ल संबोधित करत राज्यसभा सांसद रामविचार नेताम ह कीहिन कि प्रधानमंत्री ह जनजाति गौरव दिवस के घोषणा करके आदिवासी समाज के विभूति मनके सम्मान बढ़ाय हे । ए मउका म आदिवासी समाज के स्वाधीनता सेनानी अउ महापुरूष मनके चित्र के प्रदर्शनी लगाये गीस।
स्वच्छता पुरस्कार
स्वच्छ अमृत महोत्सव के तहत राष्ट्रीय स्वच्छता सर्वेक्षण म छत्तीसगढ़ ल सरलग तीसरइया दरी अग्रणी राज्य के पुरस्कार दे जाही। मुख्यमंत्री भूपेश बघेल 20 नवंबर के नइ दिल्ली म राष्ट्रपति रामनाथ कोविंद ले ये पुरस्कार लीहीं।
उंहें ठोस कचरा प्रबंधन बर दुर्ग नगर निगम ल राष्ट्रीय स्तर म पहिला स्थान मिले हे।
शराब बंदी प्रशासनिक समिति बैठक
राज्य म पूर्ण शराब बंदी लागू करे जाय के संबंध म अनुशंसा बर गठित प्रशासनिक समिति ह राजनीतिक अउ सामाजिक संस्था मनके सदस्य मनके संग ही शराब बंदी वाले राज्य मनके अध्ययन करे के निर्णय लेहे।
आबकारी विभाग के सचिव निरंजन दास के अध्यक्षता म गठित ए प्रशासनिक समिति के काली नवा रायपुर म दूसर बैठक होइस। बैठक के सदस्य मन कीहिन कि राज्य म शराब बंदी होय के स्थिति म शराब के लत के शिकार लोगन मनके पुनर्वास के संग उंखर शारीरिक अउ मानसिक स्थिति म होवइया बदलाव बर कार्यशाला आयोजित करे जाय।
उंहें ग्रामीण क्षेत्र मन म महिला स्व सहायता समूह अउ महिला कमांडो के माध्यम ले जन जागरूकता अभियान चलाये जाय के सुझाव दे गेहे।
लैंगिक समानता वेबिनार
मुख्यमंत्री भूपेश बघेल ह कीहिन कि शिक्षा अउ रोजगार के क्षेत्र म समानता के अवसर ले लैंगिक समानता घलो निश्चित रूप ले बाढ़ही। रायपुर के पंडित रविशंकर शुक्ल विश्वविद्यालय अउ ऑक्सफैम इंडिया डहार ले लैंगिक समानता विषय म आयोजित ऑनलाईन वेबिनार ल संबोधित करत मुख्यमंत्री ह कीहिन कि छत्तीसगढ़ म जनजातीय संस्कृति के गहरा प्रभाव हे। जनजातीय संस्कृति मन म महिल अउ पुरूष के लैंगिक समानता उपर शुरू ले ही जोर दे जात हे।
मुख्यमंत्री ह कीहिन कि महिला मन ल आर्थिक रूप ले अवसर प्रदान करे बर ग्रामीण क्षेत्र मन म स्व सहायता समूह मनके गठन, ओमन ल विशेष रूप से प्रोत्साहन दे जात हे।
भाजपा प्रदर्शन
राज्य सरकार डहार ले पेट्रोल डीजल के वैट म कमी नइ करे अउ सीमेंट के कीमत म लगातार बढ़ोत्तरी करे के विरोध म भाजपा युवा मोर्चा के कार्यकर्ता मन ह आज महासमुंद म मोटर सायकिल के संग पैदल मार्च निकालिन। प्रदर्शनकारी मन ह बिजली बिल के कथित रूप ले जादा राशि ले जाय के विरोध करीन। ये रैली भाजपा कार्यालय ले निकलिस अउ नगर के प्रमुख चौक-चौराहा ले होत भाजपा कार्यालय म संपन्न होइस।
पार्षद हत्या
भिलाई चरौदा नगर निगम म हथखोज वार्ड के कांग्रेस पार्षद सूरज बंछोर के अज्ञात लोगन मन ह काली रात के हत्या कर दीस। सूचना मिलत ही दुर्ग रेंज के पुलिस महानिदेशक ओ.पी. पॉल अउ वरिष्ठ पुलिस अधीक्षक बद्रीनारायण मीणा तुरते घटना स्थल पहुंचीस। पुलिस अधिकारी मन बताइन कि पूछताछ के आधार म ग्यारा संदिग्ध लोगन मन ल हिरासत म ले गेहे। हत्या के कारण पता नइ चल पाय हे ।
नंदकुमार बघेल बीमार
मुख्यमंत्री भूपेश बघेल के पिता नंदकुमार बघेल के काली रतिहा अचानक तबियत बिगड़ गे। ओमन ल इलाज बर कोरिया के जिला अस्पताल म भर्ती कराय गीस। शुरूआती उपचार के बाद ओमन ल हेलिकॉप्टर ले रायपुर लाये गीस। इंहा एक निजी अस्पताल म उंखर इलाज चलत हे।
नवा बस स्टैण्ड
लंबा इंतजार के बाद रायपुर भाटागांव स्थित नवा बस टर्मिनल ले यात्री बस मनके संचालन काली ले शुरू होगे हे। पहिली दिन इंहा ले 416 यात्री बस के संचालन होइस।
जानकारी के अनुसार पंडरी बस स्टैण्ड म बस मनके सरलग बाढ़त संख्या के सेती यातायात के समस्या बाढ़त रीहिस। जेला दूरिहा करे बर भाटागांव म नवा अंतर्राज्यीय बस टर्मिनल बनाये गेहे ।