बिरसा मुंडा-जयंती-01
राष्ट्र आज स्वतंत्रता सेनानी भगवान बिरसा मुंडा के जयंती, जनजातीय गौरव दिवस के रूप म मनावत हे। प्रधानमंत्री नरेन्द्र मोदी ह किहीन हे कि देस के जनजातीय स्वतंत्रता सेनानी मन अस्मिता अउ आत्मनिर्भरता के सिद्धांत उपर आधारित एक प्रगतिशील भारत के कल्पना करे रिहीन। श्री मोदी ह आज रांची म बिरसा मुंडा स्वतंत्रता सेनानी के वर्चुअल माध्यम ले उद्घाटन करत ए बात किहीन।
प्रधानमंत्री ह किहीन कि भगवान बिरसा मुंडा ह अपन जीवन देस के स्वतंत्रता संग्राम विरासत अउ संस्कृति खातिर समर्पित कर दे रिहीन। ओमन किहीन कि ए स्वदेशी लोगन मन बर जादा समावेशी होय अउ ओमन के विशिष्टता के जश्न मनाय के समय हरय।
श्री मोदी ह देस के स्वतंत्रता आंदोलन म जनजातीय स्वतंत्रता सेनानी मनके योगदान ल सुरता करीन अउ युवा मन ल उंखर ले सीख लेहे हे आग्रह करीन।
बिरसा मुंडा-जयंती-02
इही बीच, प्रधानमंत्री ह भगवान बिरसा मुंडा के जयंती म आज नई दिल्ली म संसद भवन परिसर म ओखर प्रतिमा म पुष्पाजलि अर्पित करीन।
उहें, प्रधानमंत्री ह आज भोपाल म भगवान बिरसा मुंडा के जयंती म राष्ट्रीय जनजातीय गौरव दिवस के सुभारंभ करीन। ओमन जनजातीय समुदाय मन बर ‘‘राशन आपके द्वार‘‘ समेत कई ठिन कल्याणकारी योजना घलो सुरू करीन।
सूचना अउ प्रसारण राज्यमंत्री डॉक्टर एल मुरूगन ह भगवान बिरसा मुंडा ल देस के स्वतंत्रता संग्राम के नायक बतईन हे। ओमन किहीन कि स्वतंत्रता संग्राम म बिरसा मुंडा अउ ओखर समुदाय के लोगन मनके योगदान ल भुलाय नइ जा सकय।
ऐति, छत्तीसगढ़ के राज्यपाल अनसुईया उइके वनवासी विकास समिति डहार ले भगवान बिरसा मुण्डा के एक सौ छियालीसवां जयंती म राखे गे राष्ट्रीय जनजातीय गौरव दिवस के कारीकरम म सामिल होईन। ए मउका म ओमन किहीन कि जनजातियां समाज के ध्वजवाहक हरय।
उहें, मुख्यमंत्री भूपेश बघेल ह भगवान बिरसा मुंडा के जयंती म ओमन ल नमन करीन हे। मुख्यमंत्री ह किहीन कि अमर सेनानी बिरसा मुंडा जननायक रिहीन। ओमन आदिवासी समुदाय ल जल, जंगल, जमीन के बारे म जागरूक करीन अउ ओमन ल अपन हक के लड़ाई लड़े के प्रेरणा दीन।
शिक्षा समागम
रायपुर के पंडित दीनदयाल उपाध्याय ऑडिटोरियम म राखे गे दू दिन के जवाहरलाल नेहरू राष्ट्रीय शिक्षा समागम के आज समापन होगे। दूसरा अउ आखिरी दिन आने-आने राज्य ले आय सिक्षाविद अउ अधिकारी मन कोरोना काल के बाद के परिस्थिति म सिक्षण के चुनौती अउ प्रभावी सिक्षा व्यवस्था तियार करे के पहलु मन उपर चरचा करीन। बिसेसज्ञ मन ए संबंध म अपन-अपन राज्य म करे जावत काम मनके अनुभव घलो साझा करीन। राष्ट्रीय शिक्षा समागम के चौथा सत्र म आज ‘‘बिल्डिंग बैक बैटर लैसेंस फ्रॉम दी पेंडमिक‘‘ बिसय उपर चरचा करे गीस।
एखर पहिली, शिक्षा समागम के पहला दिन काली नोबेल पुरस्कार विजेता अर्थशास्त्री डॉक्टर अभिजीत बैनर्जी ह किहीन कि वैश्विक महामारी कोरोना के सेती बदले परिस्थिति ल ध्यान म राखत लइका मनके सिक्षा के रणनीति बनाना होही। ओमन कोविन-नाइंटीन के सेती शिक्षा व्यवस्था म होय असर के उल्लेख करत किहीन कि कोरोना काल म औपचारिक सिक्षा संस्थान मनके बंद होय के कारण लइका मनके सीखे-सिखाय के प्रक्रिया बाधित होय हे। ए कारीकरम म मुख्यमंत्री भूपेश बघेल घलो वर्चुअल रूप ले सामिल होईन।
माओवादी-समाचार
नारायणपुर जिला म आज पुलिस के संग होय मुठभेड़ म एक माओवादी मारे गेहे। मिले जानकारी अनुसार जिला के छोटेडोंगर क्षेत्र म आज बिहनिया पुलिस के जवान सर्चिंग म निकले रिहीन। इही दउरान पेडमापाल के जंगल म माओवादी मन जवान मन उपर फायरिंग सुरू कर दीन। पुलिस डहार ले करे गे जवाबी कार्रवाई म एक झिन माओवादी मारे गीस। पुलिस ह घटनास्थल के तलाशी के दउरान मृत माओवादी के सव के अलावा एके-सैंतालीस रायफल बरामद करे हे। ए माओवादी के पहिचान कंपनी नंबर-छह के कमांडर साकेत के रूप म करे गेहे।
अमृत महोत्सव प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरवशाली इतिहास उपर विशेष अमृत महोत्सव प्रश्नोत्तरी कार्यक्रम आयोजित करत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – छोटा नागपुर क्षेत्र म औपनिवेशिक सरकार ल जनजाति मनके भूमि अधिकार के संरक्षण खातिर कानून लागू कराय बर बाध्य करे के उद्देश्य ले विद्रोह के नेतृत्व कोन स्वतंत्रता सेनानी ह करे रिहीन।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
ए प्रतियोगिता बर एक झिन भाग्यशाली प्रतिभागी ल विजेता के रूप म चुने जाही अउ काली के समाचार प्रभात म उंखर नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
शहीद जवान-अंतिम संस्कार
मणिपुर म होय उग्रवादी हमला म सहीद कर्नल विप्लव त्रिपाठी, उंखर पत्नी अउ उंखर बेटा के आज रायगढ़ के रामलीला मैदान म पूरा राजकीय सम्मान के संग अंतिम संस्कार करे गीस। सहीद के सम्मान म असम रायफल्स के दू आला अधिकारी अउ पचास जवान घलो अंतिम संस्कार म सामिल होके ओमन के पार्थिव सरीर उपर पुष्पांजलि अर्पित करीन। ए दउरान सेवा के जवान मन सहीद कर्नल ल गार्ड ऑफ ऑनर दीन। ए मउका म कैबिनेट मंत्री उमेश पटेल, सांसद गोमती साय, जिला कलेक्टर भीम सिंह, एसपी अभिषेक मीणा समेत अनेक गणमान्य नागरिक उपस्थित रिहीन।
एखर पहिली, आज बिहनिया सेना के बिसेस हेलीकॉप्टर ले ओमन के पार्थिव सरीर ल रायगढ़ के जिंदल एयरपोर्ट लाय गीस। एयरपोर्ट म सहीद कर्नल के पार्थिव सरीर पहुंच ले उहां मौजूद सब्बो लोगन मनके आंख नम होगीस अउ ओमन ल श्रद्धांजलि दे बर बड़का संख्या म लोगन मन इकट्ठा होईन। ए दउरान मनखे मन भारत माता के जय अउ सहीद कर्नल विप्लव त्रिपाठी अमर रेहे के नारा घलो लगईन। एसरपोर्ट म थोर बेरा बर सहीद कर्नल अउ उंखर परिवार के पार्थिव सरीर ल अंतिम दर्शन खातिर रखे गे रिहीस। एखर बाद फूल ले सजे वाहन म उंखर अंतिम सव यात्रा निकाले गीस, जउन ह सहर के मुख्य रस्ता ले होवत रामलीला मैदान पहुंचीस।
बतादन कि मणिपुर के चुराचंदपुर जिला म पाछु तेरह नवंबर के होय उग्रवादी हमला म छत्तीसगढ़ के रायगढ़ निवासी भारतीय सेना के कर्नल विप्लव त्रिपाठी समेत चार झिन दूसर जवान सहीद होगे रिहीन। ए हमला म कर्नल त्रिपाठी के पत्नी अनुजा त्रिपाठी अउ पांच साल के बेटा अबीर त्रिपाठी के घलो मृत्यु होगे रिहीस।
देवउठनी एकादशी
जेठउनी एकादशी के परब आज राजधानी रईपुर समेत प्रदेसभर म श्रद्धा अउ उछाह के संग मनाय जावत हे। एला छोटे दीवाली के रूप म घलो जाने जाथे। ए मउका म घर मन म तुलसी अउ भगवान शालीग्राम के प्रतीकात्मक बिहाव रचाय जाथे। ए बिहाव बर घर-घर म गन्ना के मंडप बनाय गेहे। घर मन ल दीया, रंगोली अउ आकर्षक रोसनी ले सजाय गेहे। अइसे माने जाथे कि आजे के दिन भगवान विष्णु लंबा नींद ल जागथे अउ एखरे संग बिहाव जइसे मंगल आयोजन मन बर सुभ मूहूर्त सुरू हो जाथे।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल जेठउनी एकादशी अउ तुलसी बिहाव के बधाई अउ सुभकामना दीन हे।
अउ अब थोरकुन समाचार सार म–
– स्वतंत्रता संग्राम सेनानी, सामाजिक कार्यकर्ता अउ भूदान आंदोलन के सूत्रधार आचार्य विनोबा भावे के आज पुण्यतिथि हरय। ए मउका म मुख्यमंत्री भूपेश बघेल ह ओमन ल श्रद्धांजलि दीन।
अउ
– भारत सरकार के सूचना अउ प्रसारण मंत्रालय, प्रादेशिक लोकसंपर्क कार्यालय अउ पत्र सूचना कार्यालय अउ भिलाई इस्पात संयंत्र के संयुक्त तत्वाधान म काली सोलह नंवबर के आजादी के अमृत महोत्सव, देस के आजादी म जनजातीय मनके योगदान उपर वेबीनार के आयोजन करे जाही।