शिक्षा समागम
प्रदेस म कक्षा नौवीं ले बारहवीं तक के विद्यार्थी मन ल रोजगार ले जुड़े सिक्षा दे जाही। जेखर ले लइका मन अपन पढ़ई के संगेसंग कोनो बिसेस विधा म हुनरमंद हो सकय। स्वामी आत्मानंद अंग्रेजी माध्यम स्कूल के जइसे गुणवत्ता वाले सिक्षा दे जाय बर अंतर्राष्ट्रीय मानक के अनुसार स्कूल चलाय जाही। उहें, तीन बछर ले जादा के लइका मन बर बालवाड़ी चलाके ओमन ल पूर्व प्राथमिक सिक्षा दे जाही।
मुख्यमंत्री भूपेश बघेल ह आज बाल दिवस के मउका म राखे गे दू दिन के जवाहर लाल नेहरू राष्ट्रीय सिक्षा समागम के उद्घाटन मउका म छत्तीसगढ़ ल स्कूली सिखा के विजन डाक्यूमेंट-दू हजार तीस के तहत ए तीन ठन बड़े घोसना करीन।
एखर पहिली, मुख्यमंत्री ह छत्तीसगढ़ के स्कूल मन म करे गे नवा प्रयोग उपर आधारित प्रदर्सनी के अवलोकन करीन।
स्वच्छता पुरस्कार
आजादी के अमृत महोत्सव म बीस नवंबर के नई दिल्ली म राखे गे स्वच्छ अमृत महोत्सव म राष्ट्रपति रामनाथ कोविंद डहार ले छत्तीसगढ़ ल भारत के स्वच्छतम राज्य के श्रेणी म पुरस्कार दे जाही। केन्द्र सरकार डहार ले राखे गे स्वच्छता प्रतियोगिता म छत्तीसगढ़ ह ए बखत घलो बाजी मारे हे। एखर पहिली, बछर दू हजार उन्नीस अउ बीस म घलो छत्तीसगढ़ ह एमा आगू रेहे हे।
केन्द्र सरकार डहार ले केन्द्रीय मंत्री हरदीप सिंह पुरी ह मुख्यमंत्री भूपेश बघेल अउ नगरीय प्रशासन मंत्री डॉक्टर शिवकुमार डहरिया ल पुरस्कार ग्रहण करे बर नई दिल्ली बुलाय हे।
जनजातीय गौरव दिवस
प्रधानमंत्री नरेन्द्र मोदी ह आजादी के अमृत महोत्सव म काली जनजातीय गौरव दिवस समारोह के अगुवई करही। केन्द्र सरकार ह काली भगवान बिरसा मुंडा के जयंती ल जनजातीय गौरव दिवस के रूप म मनाय के फइसला करे हे। देसभर म जनजातीय समुदाय के लोगन मन बिरसामुंडा बर एके जइसे श्रद्धा रखथे।
भाजपा-कार्यसमिति
भारतीय जनता पार्टी के प्रदेश कार्यसमिति के बइठका आज पार्टी कार्यालय कुशाभाऊ ठाकरे परिसर रईपुर म संपन्न होईस। बइठका म केन्द्रीय कार्यसमिति के विषय के संग छत्तीसगढ़ के स्थानीय अउ संगठनात्मक मुद्दा उपर घलो बात करे गीस। एखर अलावा बइठका म पार्टी के अवइया कार्ययोजना ल घलो अंतिम रूप दे गीस।
बइठका म पार्टी के प्रदेश प्रभारी डी. पुरंदेश्वरी ह किहीन कि केन्द्र के भाजपा सरकार ह पाछु सात बछर म आने-आने विकास योजना ल धरातल म उतारे हे। हमन बछर दू हजार चौदह म सबका साथ-सबका विकास अउ अंत्योदय के लक्ष्य ल लेके आगू बढ़े रेहेन, एखर बाद ले अभी तक प्रधानमंत्री नरेन्द्र मोदी के हरेक योजना समाज के हरेक वर्ग तक विकास ल आगू बढ़ावत हे।
शहीद जवान-अंतिम संस्कार
मणिपुर म होय उग्रवादी हमला म सहीद कर्नल विप्लव त्रिपाठी, उंखर पत्नी अउ उंखर बेटा के अंतिम संस्कार काली पूरा राजकीय सम्मान के संग रायगढ़ म करे जाही। काली बिहनिया सेना के हेलीकॉप्टर ले उंखर सव ल जिंदल एयरपोर्ट लाय जाही। सहीद के सम्मान म असम रायफल्स के दू बड़े अधिकारी अउ पचास झन जवान मन घलोक उंखर अंतिम संस्कार म सामिल होही।
माओवादी-मुठभेड़
छत्तीसगढ़ के राजनांदगांव जिला ले लगे महाराष्ट्र के गढ़चिरौली म काली सुरक्षा बल के संग होय मुठभेड़ म छब्बीस झिन माओवादी मन मारे गीन। एमा छह झिन माईलोगिन मन घलो सामिल हे।
गढ़चिरौली के पुलिस अधीक्षक अंकित गोयल ह बतईन कि ग्यारबत्ती-कोंडगुल के जंगल म बड़ संख्या म माओवादी मनके होय के सूचना मिले के बाद सुरक्षा बल ल रवाना करे गे रिहीस। इही दउरान जवान अउ माओवादी मनके बीच मुठभेड़ होईस, जेमा छब्बीस झिन माओवादी मन मारे गीन। उंखर मनके सव ल बरामद कर ले गेहे। जेमा ले कतकोन हार्डकोर माओवादी हे अउ छत्तीसगढ़ के सुकमा अउ बीजापुर जिला के निवास हवय। मउका म पांच नग एके-सैंतालीस राइफल, नौ एसएलआर, नौ बारा बोर के बंदूक, एक इंसास संघरा उनतीस ठन हथियार अउ बड़ संख्या म माओवादी जिनीस बरामद करे गेहे।
मन की बात
प्रधानमंत्री नरेन्द्र मोदी अट्ठाईस नवंबर के आकाशवाणी ले ‘‘मन की बात‘‘ कारीकरम म देस अउ बिदेस के लोगन ले अपन विचार साझा करही। ए मासिक रेडियो कारीकरम के तिरासीवां कड़ी होही। प्रधानमंत्री ह ए महीना के कड़ी बर लोगन ले सुझाव मांगीन हे। ओमन ह लोगन ले माईजीवी अउ नमो ऐप म अपन संदेस रिकार्ड करके भेजे के अनुरोध करे हे। एखर अलावा एक-नौ-दो-दो म मिस्ड कॉल देके एसएमएस ले मिले लिंग म सीधा प्रधानमंत्री ल अपन सुझाव भेज सकत हे।
लोकवाणी
मुख्यमंत्री भूपेश बघेल ह आज अपन मासिक रेडियो वार्ता ‘‘लोकवाणी‘‘ म उद्यमिता अउ जनशक्तिकरण का छत्तीसगढ़ मॉडल‘‘ बिसय उपर लोगन ले गोठबात करीन। ओमन किहीन कि राज्य सरकार ह आजीविका ल मजबूत करे बर अउ जनता के हाथ म आर्थिक ताकत सौंपे के जउन रणनीति अपनाय हे उही हमर पहिचान बने हे। छत्तीसगढ़ सरकार ह दिखावटी विकास के दउर ले अपन-आप ल अलग राखे गे अउ बुनियादी बात उपर ध्यान देहे। एखर ले प्रदेस म आजीविका अउ जीवन स्तर ल उठाय के साधन बनत हे।
मुख्यमंत्री ह किहीन कि सुरूवाती मंदी के समय होय या कोविड के संकट राज्य सरकार ह जनहितकारी योजना मनके माध्यम ले सब्बो वर्ग ल आगू बढ़ाय बर कतकोन परयास करे हे।
क्रीडा प्रतियोगिता-समापन
स्वामी आत्मानंद उत्कृष्ट अंग्रेजी माध्यम विद्यालय के राज्य स्तरीय शालेय क्रीड प्रतियोगिता के काली समापन होईस। ए प्रतियोगिता म रईपुर, बिलासपुर, बस्तर, सरगुजा अउ दुरूग संभाग ले एक हजार दू सौ ले जादा प्रतिभागी मन ह भाग लीन। एमा दू सौ खेल प्रशिक्षक अउ अधिकारी मन घलो सामिल होईन।
राजधानी के सुभाष स्टेडियम म राखे गे ए समापन समारोह म मुख्यमंत्री भूपेश बघेल ह किहीन कि मैदान के खेल भावना ह जीवनभर काम आथे। खेल भावना ल जीवन म उतारे ले कभू निरास नइ होना पड़ही अउ आगू बाढ़े के उत्साह घलो बने रइही।
मौसम
प्रदेस म अवइया उन्नीस नवंबर तक कतकोन जघा म हल्का ले मध्यम बरसा होय के संभावना हे। मौसम विभाग के अनुसार अंडमान सागर के बीच म एक ठिन निम्न दबाव के क्षेत्र बने हे। एखर पन्द्रह नवंबर तक पश्चिम उत्तर-पश्चिम कोति जाय के संगेसंग उत्तरी अंडमान सागर अउ ओखर ले लगे दक्षिण पूर्व बंगाल के खाड़ी के उपर निम्नदाब के क्षेत्र बने के संभावना हे, जेखर प्रभाव ले छत्तीसगढ़ म बंगाल के खाड़ी ले नमी आवत हे, जेखर सेती कतकोन जगह म हल्का ले मध्यम बरसा होवत हे।
अउ अब थोरकुन समाचार सार म-
– स्वतंत्रता संग्राम सेनानी बिरसा मुंडा के काली जयंती हे। ए मउका म राज्यपाल अनुसुईया उइके ह ओमन ल अपन श्रद्धांजलि दीन हे।
– अखिल भारतीय कांग्रेस कमेटी के आह्वान म आज दुरूग म मुख्यमंत्री भूपेश बघेल अउ कांग्रेस के प्रदेश अध्यक्ष मोहन मरकाम ह जन-जागरण पदयात्रा के सुरवात करीन।
– आजादी के अमृत महोत्सव म आदिम जाति अनुसंधान अउ प्रशिक्षण संस्थान डहार ले केन्द्रीय जनजातीय कार्यमंत्रालय के सहयोग ले रईपुर के पंडरी के छत्तीसगढ़ हाट म काली ले तीन दिन के जनजातीय क्राफ्ट मेला लगाय जाही।
– कोरबा जिला के पुलिस अधीक्षक भोजराम पटेल ह विजिबल पुलिसिंग बर शहर के प्रमुख चौक-चौराहा म चौबीस घंटा पुलिस के मौजूदगी के निरदेस दीन हे। उहें, आम जनता के मदद बर चौक-चौराहा म अस्थायी पुलिस सहायता केन्द्र घलो बनाय गेहे।
– रईपुर जिला रोजगार अउ स्वरोजगार मार्गदर्शन केन्द्र डहार ले निजी क्षेत्र के नियोजक बर काली पन्द्रह नवंबर के प्लेसमेंट कैम्प के आयोजन करे जाही।
अउ
– राजनांदगांव के बोरतलाव थाना क्षेत्र के पनियाजोब नाका तीर ट्रक के टक्कर ले सात मवेसी मनके मउत होगे।