उग्रवादी हमला शहीद
मणिपुर राज्य के चुराचंदपुर जिला म आज होय उग्रवादी हमला म छत्तीसगढ़ के रायगढ़ निवासी भारतीय सेना के कर्नल विप्लव त्रिपाठी समेत चार झिन अउ जवान मन शहीद होगे। ये हमला म कर्नल त्रिपाठी के पत्नी अनुजा त्रिपाठी अउ उखंर पांच बछर के लईका अबीर त्रिपाठी के घलो मउत होगे।
ये घटना आज बीहनिया साढ़े ग्यारा बजे ओ बेरा होइस, जब कर्नल त्रिपाठी बिहांगकाय पोस्ट के दउरा करके वापिस लहुटत रीहिस हे। इही दउरान सियालसी गांव के तीर एंबुश लगाय उग्रवादी मन ह ओखर गाड़ी म हमला कर दीस। जेमा कर्नल त्रिपाठी, उंखर पत्नी अउ बेटा शहीद होगे।
राज्यपाल अनुसूइया उइके अउ मुख्यमंत्री भूपेश बघेल ह ए उग्रवादी हमला ल कायराना बतात एखर कड़ा निंदा करीन हे। ओमन कर्नल के शहादत ल नमन करत दुखी परिवार बर शोक जताइन हे।
माओवादी मुठभेड़
छत्तीसगढ़ के सीमा ले लगे महाराष्ट्र, के गढ़चिरौली जिला म सुरक्षा बल अउ माओवादी मनके बीच होय मुठभेड़ म दस माओवादी के मारे जाय के खबर मिले हे।
गढ़चिरौली के पुलिस अधीक्षक ह बताइन हे कि ग्यारा पत्ती आउटपोस्ट के मर्दिनलोटा गांव के तीर सुरक्षा बल अउ मन माओवादी के बीच मुठभेड़ होइस । ए मुठभेड़ म दस झिन माओवादी के मारे जाय के अंदेशा हे। माओवादी मनके शव बरामद होय के बादेच स्थिति स्पष्ट हो पाही कि मुठभेड़ म कतका झन माओवादी मन मारे गेहे ।
झीरम न्यायिक जांच
राज्यपाल अनुसूईया उइके ह झीरम कांड के न्यायिक जांच रिपोर्ट राज्य सरकार ल भेज देहे।
इही बीच भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमन सिंह ह कीहिन हे कि झीरम घाटी हमला के न्यायिक जांच रिपोर्ट ल विधानसभा के पटल म राखे के संगे एला सार्वजनिक करे जाना चाही। डॅाक्टर सिंह ह पत्रकार मनले गोठबात करत कीहिन कि न्यायिक आयोग ह सात बछर के मेहनत के बाद रिपोर्ट पेस करीन हे, ओखर बिंदु मन ल सदन के पटल म राखे जाना चाही ।
उंहें मुख्यमंत्री भूपेश ह कीहिन हे कि झीरम कांड के न्यायिक जांच रिपोर्ट ल सार्वजनिक नइ करे जाय। काबर कि घटना के जांच अभी पूरा नइ होय हे। ओमन कीहिन कि झीरम कांड जांच के रिपोर्ट सरकार ल मिल गेहे, फेर ओला सार्वजनिक नइ करन।
विधानसभा सत्र
छत्तीसगढ़ विधानसभा के शीतकालिन सत्र अवइया तेरा दिसंबर ले शुरू होही। सतरा दिसंबर तक चलइया ए सत्र म कुल पांच बइठक होही। विधानसभा सचिवालय डहार ले ए संबंध म अधिसूचना जारी कर दे गेहे। ए सत्र के दउरान वित्तीय काम के संगेसंग आने आने सरकारी काम घलो करे जाही। शीतकालीन सत्र म धान खरीदी समेत जनहित ले जुड़े आने आने मुद्दा मन उपर घलो गोठबात होय के संभावना हे।
धान खरीदी बैठक
प्रदेश म समर्थन मूल्य म धान खरीदी अवइया एक दिसंबर ले शुरू होही। मुख्य सचिव अमिताभ जैन ह आज मुख्यमंत्री निवास कार्यालय म खाद्य, सहकारिता, कृषि, मार्कफेड अउ नागरिक आपूर्ति निगम के अधिकारी मनके बइठका लेके समर्थन मूल्य म धान खरीदी के तियारी के समीक्षा करीन।
मुख्य सचिव ह अधिकारी मन ल अठाईस नवंबर तक जम्मों उपार्जन केंद्र मन म धान खरीदी के बने बेवस्था करे के निर्देश दीन हे। ओमन अधिकारी मन ले कीहिन कि एक दिसंबर ले धान खरीदी ल धियान म राखत सबो समिति मन म बारदाना के पूरा बेवस्था करे जाही। ओमन धान के कोचिया अउ आने राज्य मनले धान के अवैध परिवहन म जुड़े लोगन मनके खिलाफ कड़ा कार्रवाई करे बर कीहिन हे।
धान बेचे बर नवा पंजीकृत किसान मनके संख्या म एक लाख उनचास हजार के बढ़ोत्तरी होय हे। किसान मन ल धान खरीदी के पहिली दिन ले ही भुगतान शुरू कर दे जाही।
भाजपा कार्यसमिति बैठक
भारतीय जनता पार्टी के प्रदेश कार्यसमिति के बइठका आज राजधानी रायपुर के कुशाभाउ ठाकरे परिसर म होइस । पार्टी के प्रदेश प्रभारी डी. पुरंदेश्वरी राष्ट्रीय उपाध्यक्ष डॅाक्टर रमन सिंह अउ प्रदेश अध्यक्ष विष्णुदेव साय के मौजूदगी म राखे गे ए बइठका म राजनीतिक प्रस्ताव पारित करे गीस।
नेता प्रतिपक्ष धरमलाल कौशिक ह राजनीतिक प्रस्ताव रखीन, जेखर समर्थन भाजपा के प्रदेश मंत्री विजय शर्मा ह करीन। प्रस्ताव म कहे गीस कि श्री मोदी के अगवई म देश ह आज चारो मुढ़ा विकास करत हे।
उंहें भाजपा कार्यसमिति ह आरोप लगाइन हे कि छत्तीसगढ़ म कांग्रेस सरकार के कुशासन के सेती हताशा अउ निराशा फैले हे। कांग्रेस सरकार म अपराधिक घटना बाढ़े के संग धर्मांतरण के मामला घलो आगू आवत हे।
कोरोना टीका
छत्तीसगढ़ म कोरोना ले बचाव बर अब तक दू करोड़ तिरालिस लाख उनतीस हजार ले जादा टीका लगाए गेहे। एमा एक करोड़ तिरसठ लाख तिरालिस हजार ले जादा पहिली टीका अउ उनयासी लाख छियासी हजार ले जादा दूसर खुराक शामिल हे।
उंहें हर घर दस्तक अभियान के तहत राजनांदगांव जिला म स्वास्थ्यकर्मी मन दूरदराज के जगा म घर-घर जाके आम मनखे समेत दिव्यांग के टीकाकरण करत हे। ये अभियान तीस नवंबर तक चलही। जिला म अब तक करीबन सतरा लाख लोगन मनके टीकाकरण करे गेहे।
इही बीच प्रदेश म कोरोना संक्रमण के दर सरलग घटत हे । अभी प्रदेश म पॉजीटिविटी दर शून्य दशमलव शून्य आठ प्रतिशत हे। प्रदेश म काली कोरोना के उन्नीस मामला आगू आइस हे।
अमृत महोत्सव-क्विज विजेता-जवाब
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के तेरहवां अंक म छत्तीसगढ़ी बुलेटिन म प्रश्न रिहीस- ‘बछर 2020 बर छत्तीसगढ़ ले कोन ल पद्मश्री सम्मान ले विभूषित करे गेहे ?। एखर सही जवाब हे – मदन सिंह चौहान।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – रायपुर जिला के ग्राम मोवा, निवासी डॅाक्टर नवीन गुप्ता। आकाशवाणी परिवार डहार ले हमन डॅाक्टर गुप्ता ल बड़ अकन बधाई अउ सुभाकामना देवत हन। डाक्टर गुप्ता ह आकाशवाणी समाचार के नियमित श्रोता हरय।
अउ अब पेस हे मौसम के हाल –
मौसम म अचानके आये बदलाव के सेती पाछू चौबीस घंटा के दउरान राजधानी रायपुर समेत कई ठिन जगा म हल्का ले मध्यम बरसा दरज करे गेहे। उंहें तापमान म घलो मामूली बदलाव होय हे।
मौसम विभाग के मुताबिक ए उपरी हवा के चक्रीय चक्रवाती घेरा उत्तर अंदरूनी तमिलनाडु अउ ओखर तीर तखार म हवय। उंहें एक द्रोणिका आंध्रप्रदेश अउ ओडिशा ले होवत पश्चिम बंगाल तक जावत हे। एखर प्रभाव ले छत्तीसगढ़ म घलो अवइया चौबीस घंटा के दउरान कुछएक जगा म हल्का बरसा होय के संभावना हे।
अउ अब थोरकुन समाचार सार म-
– मुख्यमंत्री भूपेश बघेल ह भारत के पहिली प्रधानमंत्री पंडित जवाहर लाल नेहरू के जन्मदिन चौदह नवंबर बाल दिवस म जम्मों लइका मन समेत प्रदेशवासी मन ल बधाई दीन हे।
– देश म स्वच्छता सर्वेक्षण अउ जीएफसी म उतकृष्ट प्रदर्शन बर नगर पालिका परिषद बेमेतरा ल अवइया अठारा नवंबर के नई दिल्ली म राखे के समारोह म राष्ट्रपति डहार ले अवार्ड दे जाही।
– रायपुर जिला के धरसींवा विकासखंड स्थित छत्तीसगढ़ राज्य औद्योगिक विकास निगम के जमीन म काबिज लोगन मन ल राजीव आश्रय योजना के तहत पट्टा दे जाही।
– राज्य विधिक से प्राधिकरण डहार ले लीगल अवेयरनेस उपर राखे गे चार दिन के शॉर्ट फिल्म फेस्ट म आईपीएस अफसर शशिमोहन सिंह डहार ले निर्देशित फिल्म कोटपा ल पहिली पुरस्कार दे जाही।
अउ
– रायपुर कलेक्टर अउ जिला दंडाधिकारी ह पंद्रह नवंबर ले नवा बने बस स्टेण्ड – अंतर्राष्ट्रीय बस टर्मिनल भाठागांव ले बस चलना चालू होही।