मुख्यमंत्री-धान परिवहन
मुख्यमंत्री भूपेश बघेल ह सीमावर्ती राज्य मन ले प्रदेस म धान के अवैध परिवहन के सिकायत ल गंभीरता ले लेवत जम्मों कलेक्टर अउ पुलिस अधीक्षक मन ल एखर अवैध परिवहन उपर कड़ई ले रोक लगाय के निरदेस दीन हे। मुख्यमंत्री ह अधिकारी मन ले किहीन हे कि पड़ोसी राज्य मन ले जुड़े प्रदेस के सीमा ल सील करे जाय अउ सीमावर्ती इलाका म धान के अवैध परिवहन ल रोके बर सरलग कड़ा निगरानी राखे जाय। ओमन अधिकारी मन ल किहीन कि प्रदेस के किसान मन ल धान के परिवहन के दउरान कोनो भी परकार के परेसानी झन होवय। श्री बघेल ह बतईन कि प्रदेस म एक दिसंबर ले समर्थन मूल्य म धान खरीदी सुरू होही।
मुख्यमंत्री-वित्त मंत्री पत्र
मुख्यमंत्री भूपेश बघेल ह केन्द्रीय वित्त मंत्री निर्मला सीतारमण ल चिट्ठी लिखके राज्य के हित बर वित्तीय संसाधन देवाय के आग्रह करीन हे। संगेसंग ओमन राजस्व घाटा अनुदान के मापदंड ल वर्तमान परिस्थिति के आधार म सुधर करे के घलो मांग करीन। श्री बघेल ह जीएसटी क्षतिपूर्ति अनुदान ल जून दू हजार बाईस के बाद घलो अवइया पांच बछर बर जारी राखे अउ धान ले बायो एथेनॉल बनाय के मंजूरी जल्दीच देके अनुरोध करीन हे। एखर संगेसंग मुख्यमंत्री ह केन्द्र डहार ले पेट्रोल अउ डीजल म सेस म कमी करे के अउ केन्द्रीय योजना मन म केंद्रांश बढ़ाय के घलो मांग करीन हे।
दिव्यांग सशक्तिकरण-पुरस्कार
केन्द्रीय सामाजिक न्याय अउ अधिकारिता मंत्रालय डहार ले बछर दू हजार बीस के दिव्यांग मनखे मनके सशक्तिकरण बर राष्ट्रीय पुरस्कार के विजेता के घोषणा कर दे गेहे। एमा छत्तीसगढ़ ल तीन श्रेणी म राष्ट्रीय पुरस्कार मिले हे। ए पुरस्कार तीन दिसंबर के अंतर्राष्ट्रीय दिव्यांग दिवस के मउका म नई दिल्ली म दे जाही।
राष्ट्रीय पुरस्कार के बेस्ट ब्रेल प्रेस के श्रेणी म बिलासपुर म समाज कल्याण विभाग डहार ले चलाय जात ब्रेल प्रेस ल चुने गेहे। उहें, दिव्यांग मनखे मन बर बिना कोनों रूकावट के वातावरण बनाय म सुघ्घर काम बर स्थानीय निकाय के श्रेणी म नवा रईपुर के चयन होय हे। अइसने, दिव्यांगजन के संगेसंग स्वरोजगार बर सर्वश्रेष्ठ नियोक्ता अउ प्लेसमेंट एजेंसी के श्रेणी म निजी या गैर-सरकारी संगठन या कार्यालय बर समता कॉलोनी रईपुर के ‘‘नुक्कड़ टी कैफे वेंचर्स एलएलपी‘‘ ल चुने गेहे।
मुख्यमंत्री भूपेश बघेल अउ समाज कल्याण मंत्री अनिला भेंड़िया ह राष्ट्रीय पुरस्कार बर चुने गे संस्था मन ल बधाई दीन हे।
हाईकोर्ट-नोटिस
छत्तीसगढ़ उच्च न्यायालय ह विद्युत वितरण कंपनी अउ वन विभाग के लापरवाही ले प्रदेस म होवत हाथी मनके मउत के मामला ल संज्ञान म लेहे। ए मामला म हाईकोर्ट ह विद्युत वितरण कंपनी अउ वन विभाग ल नोटिस जारी करके छह हफ्ता म जवाब मांगे हे। हाईकोर्ट के मुख्य न्यायाधीश न्यायमूर्ति गौतम भादुड़ी के बेंच ह प्रदेस म हाथी मनके सरलग होवत मउत म दायर जनहित याचिका म आज सुनवाई करीन।
खबर के मुताबिक हाथी मनके बिजली करेंट ले सरलग होवत मउत ल लेके रईपुर निवासी नितिन सिंघवी ह एक ठिन जनहित याचिका दायर करे रिहीन।
राज्यपाल/उपराज्यपाल-सम्मेलन
राज्यपाल अनसुईया उइके काली राष्ट्रपति भवन म राखे गे राज्यपाल अउ उप राज्यपाल के सम्मेलन म सामिल होईन। सम्मेलन म राष्ट्रपति रामनाथ कोविंद, उप राष्ट्रपति एम वेंकैया नायडु अउ प्रधानमंत्री नरेन्द्र मोदी मौजूद रिहीन।
राज्यपाल ह सम्मेलन म छत्तीसगढ़ म पेसा एक्ट के तहत नियम मन ल लागू करे अउ मेसा एक्ट ल संसद म पारित करे जरूरत बतईन। सुश्री उइके ह किहीन कि राज्यपाल के दायित्व ग्रहण करे के बाद राजभवन के दरवाजा म जउन भी जरूरतमंद अईन, उंखर समस्या ल ओमन सुनीन अउ राजभवन के विशिष्ट अवधारणा ल खतम करत एला ‘‘जनभवन‘‘ के स्वरूप दीन।
अमृत महोत्सव-क्विज प्रतियोगिता-छ.ग.
आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गे हवय। एमा छत्तीसगढ़ी बुलेटिन सुनइया मन बर आज के सवाल हवय-
बछर 2020 बर छत्तीसगढ़ ले कोन ल पद्मश्री सम्मान ले विभूषित करे गेहे ?
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेजे जा सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले ई-प्रमाण पत्र घलो जारी करे जाही।
खेलकूद-स्पर्धा
राज्य म चलत स्वामी आत्मानंद अंग्रेजी माध्यम विद्यालय के दू दिन के राज्य स्तरीय खेल-कूद प्रतियोगिता आज ले रईपुर म सुरू होईस। स्कूल शिक्षा मंत्री डॉक्टर प्रेमसाय सिंह टेकाम ह पंडित आर.डी. तिवारी सरकारी अंग्रेजी माध्यम उच्चतर माध्यमिक विद्यालय आमापारा के खेल मैदान म ए स्पर्धा के सुभारंभ करीन। ए प्रतियोगिता म प्रदेस के जम्मों पांच संभाग के एक हजार ले जादा खिलाड़ी म भाग लेवत हे। एमा फुगड़ी, दउड़, कबड्डी, शतरंज, खो-खो, फुटबाल, बॉलीबाल अउ बैडमिंटन के प्रतियोगिता होवत हे।
दूरदर्शन केन्द्र
दूरदर्शन केन्द्र रईपुर के प्रादेसिक समाचार एकांश डहार ले छत्तीसगढ़ी अउ हिन्दी भासा के नैमित्तिक समाचार वाचक-वाचिका अउ नैमित्तिक संपादकीय सहायक के पैनल म सामिल होय बर अरजी मंगाय गेहे। आवेदक ल रईपुर नगर निगम के निवासी होना जरूरी हे। एखर ले जुड़े जानकारी प्रसार भारती के वेबसाइट म देखे जा सकत हे। ए पद मन बर आवेदन पत्र भरके रईपुर स्थित दूरदर्शन केन्द्र के प्रादेशिक समाचार एकांश म स्पीड पोस्ट या फेर रजिस्टर्ड डाक के माध्यम ले काली तेरह नवंबर तक अरजी भेजे जा सकत हे।
सांस/राष्ट्रीय नवजात सप्ताह
प्रदेस म आज ले ‘‘सोशल अवेयरनेस एंड एक्शन टू न्यूट्रेलाइज निमोनिया सक्सेसफुली-सांस‘‘ अभियान अउ ‘‘राष्ट्रीय नवजात सप्ताह‘‘ के सुभारंभ करे गीस। ‘‘निमोनिया नहीं तो बचपन सही‘‘ के उद्देश्य के संग सुरू करे गे ए अभियान अवइया बछर अट्ठाईस फरवरी तक चलही। ए अभियान के उद्देश्य सून्य ले पांच बछर तक के लइका मन म होवइया निमोनिया के संबंध म समाज म जन-जागरूकता अउ गंभीर निमोनिया के प्रकरण के स्वास्थ्य संस्थान म इलाज ल बढ़ावा देना हे। ए कारीकरम ले राज्य के करीबन पैंतीस लाख लइका मन ल फायदा होही।
एखर संगेसंग स्वास्थ्य मंत्री टी.एस. सिंहदेव के मौजूदगी म राष्ट्रीय नवजात शिशु सप्ताह के सुभारंभ घलो करे गीस। ए सप्ताह पन्द्रह ले इक्कीस नवंबर तक चलही। एखर उद्देश्य नवजात शिशु के विकास के जरूरत के संबंध म जन-जागरूकता लाना अउ सही देखभाल करना हे। सप्ताह के दउरान नवजात सिसु मनके स्वास्थ्य परीक्षण जम्मों मेडिकल कॉलेज अस्पताल अउ जिला अस्पताल के ओ.पी.डी. म नवजात लइका मनके स्क्रीनिंग करे जाही।
विद्यार्थी-ट्रैकिंग
प्रदेस म चलत एकलव्य अउ प्रयास आवसीय विद्यालय ले पढ़के निकले लइका मनके ट्रैकिंग करे जाही। ट्रैकिंग के माध्यम ले ए जाने के कोसिस करे जाही कि पांच बछर पहिली स्कूल ले पढ़के निकले लइका अभी म सरकारी अउ गैर सरकारी नौकरी, खुद के व्यवसाय या फेर दूसर काम करत हे। अनुसूचित जाति अउ अनुसूचित जनजाति विकास मंत्री डॉक्टर प्रेमसाय सिंह टेकाम ह काली मंत्रालय म विभाग अउ एनआईसी के मदद ले ट्रैकिंग बर बनाय गे वेबसाइट के सुभारंभ करीन।
बइठका म बताय गीस कि प्रदेस म चलत एकलव्य विद्यालय म पढ़त दसवीं अउ बारहवीं कक्षा के विद्यार्थी मन ल पहिली बखत पीईटी अउ पीएमटी प्रवेस परीक्षा बर कोचिंग दे जाही। संगेसंग राजीव युवा उत्थान योजना के तहत जिला म अभ्यर्थी मनके चुनई करके ओमन ल रोजगार अउ राज्य म होवइया सासकीय भर्ती बर मार्गदर्शन अउ कोचिंग घलो दे जाही। डॉक्टर टेकाम ह एकलव्य आदर्श आवासीय विद्यालय म सिक्षक मनके भर्ती जल्दीच करे बर घलो कहिन।
मौसम
अवइया चौबीस घंटा के दउरान मध्य छत्तीसगढ़ के कुछेक जघा म हल्का ले मध्यम बरसा होय अउ गरज-चमक के संग सीटिर-साटर पानी गिरे के संभावना हे।
मौसम विभाग ले मिले खबर के मुताबिक कमती दबाव के एक क्षेत्र तमिलनाडु अउ उंखर तीर-तखार म स्थित हवय। उहें, एक ठिन द्रोणिका तमिलनाडु म स्थित निम्न दाब के केन्द्र ले उत्तर तटीय ओड़िसा तक बने हे। एखर असर ले काली प्रदेस के कुछेक जघा म हल्का ले मध्यम बरसा हो सकत हे।