राज्यपाल/उपराज्यपाल-सम्मेलन
राष्ट्रपति रामनाथ कोविंद के पगरइति म राज्यपाल अउ उप राज्यपाल के इंक्कानवां सम्मेलन आज राष्ट्रपति भवन म होईस। सम्मेलन म उपराष्ट्रपति एम. वेंकैया नायडू, प्रधानमंत्री नरेन्द्र मोदी अउ केन्द्रीय गृहमंत्री अमित शाह मौजूद रिहीन। ए सम्मेलन म छत्तीसगढ़ के राज्यपाल अनुसुईया उइके घलो सामिल होईन।
राष्ट्रपति ह उद्घाटन भासन म किहीन कि भारत ह कोविड के खिलाफ बड़का अउ परभावी अभियान चलावत हे। ओमन किहीन कि देस म राष्ट्रीय शिक्षा नीति ल लागू करे म राज्यपाल अउ उपराज्यपाल के बड़का भूमिका रिहीन।
अशोक जुनेजा-डीजीपी
भारतीय पुलिस सेवा के अधिकारी अशोक जुनेजा राज्य के नवा पुलिस महानिदेशक होही। राज्य सरकार ह डी.एम. अवस्थी के जघा म अशोक जुनेजा ल राज्य के नवा डीजीपी बनाय हे। ए संबंध म गृह विभाग ह आदेस जारी कर देहे।
श्री जुनेजा उन्नीस सौ नवासी बैच के आईपीएस अधिकारी हरय। श्री जुनेजा के तीर अतिरिक्त पुलिस महानिदेशक नक्सल ऑपरेशन, एसआईबी अउ अतिरिक्त पुलिस महानिदेशक छत्तीसगढ़ सशस्त्र बल अउ एसटीएफ के प्रभार पहिली जइसन रहि।
राष्ट्रीय शिक्षा दिवस
आज राष्ट्रीय शिक्षा दिवस हरय। ए दिवस बछर दू हजार आठ ले मौलाना अबुल कलाम आजाद के जयंती के रूप म मनाय जाथे। मौलाना अबुल कलाम आजाद स्वतंत्र भारत के पहिली सिक्षा मंत्री रिहीन। ओमन पन्द्रह अगस्त उन्नीस सौ सैंतालीस ले दू फरवरी उन्नीस सौ अंठावन तक देस के सेवा करीन। ओमन समाज सुधारक अउ स्वतंत्रता सेनानी रिहीन।
उपराष्ट्रपति एम. वेंकैया नायडू अउ प्रधानमंत्री नरेन्द्र मोदी ह आज मौलाना अबुल कलाम आजाद के जयंती के मउका म श्रद्धांजलि अर्पित करीन।
झीरम हमला-न्यायिक जांच
झीरम घाटी हमला के न्यायिक जांच रिपोर्ट राज्यपाल ल सौंपे के बाद राज्य सरकार ह फेर ले न्यायिक जांच आयोग के गठन करे हे। दू सदस्यीय ए जांच आयोग म न्यायमूर्ति सतीश के. अग्निहोत्री ल अध्यक्ष अउ बिलासपुर उच्च न्यायालय के न्यायाधीश न्यायमूर्ति जी. मिन्हाजुद्दीन ल सदस्य बनाय गेहे। आयोग अपन जांच रिपोर्ट छह महीना के भीतर पूरा करके राज्य सरकार ल सौंपही। नवा गठित आयोग म जांच बर दू उपरहा बिंदु मन ल घलो सामिल करे गेहे। एखर पहिली, झीरम घाटी हमला के जांच बर राज्य सरकार ह एक सदस्यीय न्यायिक जांच आयोग के गठन करे रिहीन, जेखर कार्यकाल तीस सितंबर के सिरा गे। ए आयोग के अध्यक्ष न्यायाधीश न्यायमूर्ति प्रशांत कुमार मिश्रा रिहीन।
खबर के मुताबिक पच्चीस मई दू हजार तेरह के बस्तर जिला के झीरम घाटी म माओवादी मन ह कांग्रेस नेता के काफिला म हमला कर दे रिहीन। ए हमला म तत्कालीन प्रदेश कांग्रेस अध्यक्ष नंदकुमार पटेल, वरिष्ठ नेता विद्याचरण शुक्ल, महेन्द्र कर्मा समेत तीस ले जादा लोगन मनके मउत होगे रिहीस। एमा पुलिस जवान मन घलो सामिल रिहीन।
राष्ट्रीय शिक्षा समागम
पंडित जवाहरलाल नेहरू राष्ट्रीय शिक्षा समागम के आयोजन रईपुर के पंडित दीनदयाल उपाध्याय ऑडिटोरियम म चौदह अउ पन्द्रह नवंबर के होही। शिक्षा विभाग डहार ले आयोजन के तियारी ल आखिरी रूप दे जावत हे। समारोह म स्कूली शिक्षा के क्षेत्र म आने-आने राज्य म करे जावत नवाचार मन ल आपस म साझा करे के संगेसंग नवाचारी काम मनके प्रदर्सन घलो करे जाही।
स्कूल शिक्षा विभाग के सचिव डॉक्टर कमलप्रीत सिंह ह काली बइठका लेके कारीकरम के तियारी के समीक्षा करीन।
कोविड टीका
केन्द्रीय स्वास्थ्य मंत्री मनसुख मांडविया ह आज ‘‘हर घर दस्तक अभियान‘‘ ल आगू लेगे बर जम्मों राज्य अउ केन्द्रसासित प्रदेस के स्वास्थ्य मंत्री मनके संग बइठका करीन। ए अभियान के उद्देश्य कोविड रोधी वैक्सीन के पहिली डोज नइ लेवइया जम्मों मनखे मनके टीकाकरण करना हे। ए अभियान म ओ लोगन मन ल घलो टीका लगाय जाही, जउन मन ल दूसर डोज ले म देरी होवत हे।
इही बीच, देस म राष्ट्रव्यापी टीकाकरण अभियान के तहत अब तक एक सौ दस करोड़ तेईस लाख ले जादा कोविड रोधी टीका लगाय गेहे।
ऐति, छत्तीसगढ़ म कोरोना संक्रमण के औसत पॉजिटिविटी दर शून्य दशमलव एक-दू प्रतिशत म आ गेहे। काली राज्य म कोरोना संक्रमण के पच्चीस नवा मामला आगू आय हे। अभी म प्रदेस म दू सौ तेईस मरीज मनके इलाज आने-आने अस्पताल या होम आइसोलेशन म चलत हे।
जिनोम पुरस्कार
छत्तीसगढ़ के छत्तीस भाजी मन ल संरक्षित करइया किसान दीनदयाल यादव ल आज नई दिल्ली म केन्द्रीय कृषि मंत्री नरेन्द्र सिंह तोमर ह जिनोम पुरस्कार ले सम्मानित करीन। जांजगीर-चांपा जिला के बहेराडीह के रहइया किसान दीनदयाल यादव ह जंगली रमकेलिया, जंगली मिरचा अउ जंगली धान के संरक्षण अउ संवर्धन के दिसा म बड़का काम करे हे। ए काम म रईपुर स्थित इंदिरा गांधी कृषि विश्वविद्यालय के अनुवांशिकी विभाग के घलो सुघ्घर योगदान हवय।
ए मउका म इंदिरा गांधी कृषि विश्वविद्यालय अनुवांशिकी विभाग के प्रधान वैज्ञानिक डॉक्टर दीपक शर्मा अउ जिला म किसान मन बर काम करइया सामाजिक संगठन रेस्टोरेशन फाउंडेशन के सीईओ जे. बसवराज विशेष रूप ले मौजूद रिहीन।
एम्स-विशेष क्लीनिक
अखिल भारतीय आयुर्विज्ञान संस्थान-एम्स रईपुर के मेडिसीन विभाग म विशेष डायबिटीक फुट क्लीनिक सुरू करे गेहे। ए बिसेस क्लीनिक हरेक मंगलवार के मंझनिया दू ले चार बजे तक चलही। एमा ओपीडी ले रिफर करे गे डायबिटीक फुट रोगी के इलाज होही। ए क्लीनिक म सुगर के मरीज मन ल पांव ले जुड़े इलाज के सुविधा मिलही।
बस ट्रायल
राजधानी रईपुर के भाटागांव स्थित अंतर्राष्ट्रीय बस टर्मिनल म काली बस के ट्रायल रन करे गीस। ए मउका म बड़का अधिकारी समेत बस संचालक मौजूद रिहीन। ए दउरान टर्मिनल म करीबन सत्तर बस मनके ट्रायल रन होईस। खबर के मुताबिक रईपुर के पंडरी स्थित बस स्टैंड ल अंतर्राष्ट्रीय बस टर्मिनल भाटागांव म लाय जावत हे।
दूरदर्शन केन्द्र
दूरदर्शन केन्द्र रईपुर के प्रादेसिक समाचार एकांश डहार ले छत्तीसगढ़ी अउ हिन्दी भासा के नैमित्तिक समाचार वाचक-वाचिका अउ नैमित्तिक संपादकीय सहायक के पैनल म सामिल होय बर अरजी मंगाय गेहे। आवेदक ल रईपुर नगर निगम के निवासी होना जरूरी हे। एखर ले जुड़े जानकारी प्रसार भारती के वेबसाइट म देखे जा सकत हे। ए पद मन बर आवेदन पत्र भरके रईपुर स्थित दूरदर्शन केन्द्र ले प्रादेशिक समाचार एकांश म स्पीड पोस्ट या फेर रजिस्टर्ड डाक के माध्यम ले अवइया तेरह नवंबर तक अरजी भेजे जा सकत हे।
मौसम
अवइया चौबीस घंटा के दउरान दक्षिण छत्तीसगढ़ म एक-दू जघा म हल्का बरसा होय अउ गरज-चमक के संग छींटा पड़े के संभावना हे।
मौसम विभाग के मुताबिक एक अवदाब पश्चिम मध्य बंगाल के खाड़ी के उपर बन हे। एखरे संग उपरी हवा के चक्रीय चक्रवाती घेरा घलो स्थित हवय। एखर परभाव ले काली प्रदेस म एक-दू जगह म हल्का मध्यम बरसा हो सकत हे।
अउ अब थोरकुन समाचार सार म-
– लोक आस्था के महापरब छठ के चार दिन के पूजा आज उगत सूरज ल अरग देके संग सिरा गे।
– जांजगीर-चांपा जिला के सासकीय-अशासकीय महाविद्यालय, आईटीआई, पॉलिटेक्निक अउ कृषि महाविद्यालय म पढ़त अनुसूचित जाति, अनुसूचित जनजाति अउ पिछड़ा वर्ग के विद्यार्थी, पोस्ट मैट्रिक छात्रवृत्ति बर तीस नंवबर तक ऑनलाइन अरजी कर सकत हे।
अउ
– रईपुर पुलिस ह एक झिन मनखे ल करीबन डेढ़ किलो गांजा के संग गिरफ्तार करे हे।