कृषि मंत्री लाभकारी फसल
कृषि मंत्री रविंद्र चौबे ह कीहिन हे कि किसान मन ल ग्रीष्मकालीन धान के बदले म आने लाभकारी फसल के उत्पादन बर प्रोत्साहित करे जाय। एखर बर ओमन ह ए बछर म ग्रीष्मकालीन धान के जगा म गंहू, चना, उड़द, मक्का, तीली, रागी, अउ मुंगफली के खेती बर किसान मन ल विशेष रूप ले प्रेरित करे अउ ओमन ल जरूरी मार्गदर्शन देके फैसला करीन हे।
काली मंत्रालय म राखे गे एक ठिन बइठका म श्री चौबे ह अधिकारी मनले ए फसल के खेती बर प्रचार-प्रसार के अभियान चलाये बर कीहिन हे। संगेसंग ओमन ह आने ग्रीष्मकालीन बीजा के पर्याप्त मात्रा म उपलब्धता सुनिश्चित कराये के निर्देश घलो दीन हे। ओमन यहू घलो कीहिन कि जउन क्षेत्र म ग्रीष्मकालीन धान के उपज ले जाथे, उंहा उपयुक्त वैकल्पिक फसल के बीज के बेवस्था तुरते पर्याप्त मात्रा म करे जाय।
नगरीय निकाय सुविधा
मुख्यमंत्री भूपेश बघेल ह राज्य के नगरीय निकाय म सुविधा ल बढ़ाय अउ विकास काम म तेजी लाये के निर्देश दीन हे। एखर बर ओमन ह एक सौ बारा करोड़ रूपया के राशि स्वीकृत करीन हे। एमा नगर पालिक निगम बीरगांव, भिलाई, रिसाली अउ भिलाई-चरौदा शामिल हे।
उंहे नगर पालिका परिषद जामुल, खैरागढ़, सांरगढ़, बैकुण्ठपुर अउ शिवपुर चरचा के अलावा नगर पंचायत मारो, कोटा, भैरमगढ़, भोपालपट्टनम, नरहरपुर, अउ प्रेमनगर बर राशि स्वीकृत करे गेहे। एखर तहत नगरीय निकाय म बिजली पानी, रद्दा अउ सामुदायिक भवन उपलब्ध कराय जइसे मूलभूत सुविधा के संगेसंग नगर ल स्वच्छ अउ सुंदर बनाये बर काम करे जाही।
कोविड टीका
राष्ट्रीय कोरोना टीकाकरण अभियान म अब तक एक सौ नौ करोड़ तिरसठ लाख ले जादा कोरोना रोधी टीका लगाये जा चुके हे। पाछू चौबीस घंटा म बावन लाख उनहत्तर हजार ले जादा लोगन मनके टीकाकरण करे गेहे।
एति छत्तीसगढ़ के रायगढ़ जिला ह शत-प्रतिशत टीकाकरण करे के लक्ष्य पूरा कर लेहे। जिला म टीकाकरण के शुरूआत ए बछर सोला जनवरी ले करे गे रीहिस। जिला म दस लाख अड़सठ हजार ले जादा लोगन मन ल टीका के दूनो डोज लगाये जाय के लक्ष्य रीहिस। जेला सिरिफ दू सौ अंठानबे दिन म पूरा कर ले गेहे।
इही बीच प्रदेश म कोरोना संक्रमण के दर म सरलग सुधार होवत हे अउ औसत पॉजीटिवीटी दर शून्य दशमलव शून्य आठ प्रतिशत म आगे हे। काली राज्य म कोरोना संक्रमण के बाईस ठिन नवा मामला आगू आइस हे। अभी के बेरा म प्रदेश म दू सौ तैंतीस मरीज मनके इलाज आने आने अस्पताल या फेर होम आइसोलेशन म चलत हे।
सिंहदेव बैठक
स्वास्थ्य मंत्री टी.एस. सिंहदेव ह कीहिन हे कि प्रदेश म स्थापित सबो ब्लड बैंक के पूर्ण क्षमता के उपयोग करत जरूरतमंद मनखे तक एखर लाभ पहुंचाय जाय। ओमन ह जवान लइका मन ल रक्तदान बर प्रेरित करे बर घलो जोर दीन। श्री सिंहदेव ह काली छत्तीसगढ़ राज्य एड्स समिति अउ छत्तीसगढ़ राज्य रक्त संचरण परिषद के बइठका म ए बात ल कीहिन।
बइठका म ओमन ह विश्वविद्यालय अउ कॉलेज म एनएसएस अउ एनसीसी के माध्यम ले नियमित रूप ले रक्तदान शिविर ल आयोजित करे बर कीहिन हे। बइठका म स्वास्थ्य सेवा अउ राज्य एड्स नियंत्रण समिति के परियोजना संचालक नीरज बंसोड़ ह बताइन कि प्रदेश म ए बेरा पंच्यानबे ब्लड बैंक संचालित हे। जेमा ले इकतीस ठिन शासकीय अस्पताल म अउ चौसठ निजी क्षेत्र म हवय।
मुख्यमंत्री-बैठक
मुख्यमंत्री भूपेश बघेल ह चिटफंड कंपनी के फरार होय संचालक मनके खिलाफ धीमा कार्रवाई उपर नाराजगी जताइन हे। ओमन ह कीहिन हे कि तुरते आरोपी मनके गिरप्तारी करे जाय। श्री बघेल ह बस्तर फाइटर्स भर्ती प्रक्रिया म होवत देरी ल गंभीरता ले लेवत कीहिन कि भर्ती प्रक्रिया हर हाल म अवइया बछर के जनवरी महीना तक पूरा कर ले जाय।
उंहें मुख्यमंत्री ह शहीद पुलिस अधिकारी विनोद चौबे के नाव म डीजीपी मैरिट स्कॉलरशिप देके घोषणा घलो करीन हे। मुख्यमंत्री ह काली अपन निवास कार्यालय म गृह विभाग के काम के समीक्षा करत रीहिन। ओमन ह कीहिन कि माइलोगिन अउ लईका मनके सुरक्षा ह सरकार के सबले बड़े प्राथमिकता हरय। फेर माइलोगिन के सुरक्षा बर बनाये जात एप के तियारी म देरी होना एक ठिन चिंता के विषय हे। श्री बघेल ह पुलिस अधिकारी मनले तुरते महिला सुरक्षा एप ल तियार करके एखर प्रदर्शन करे बर कीहिन हे ।
ओमन कीहिन कि लोगन मन म बिस्वास अउ अपराधी मन म डर रेहे बर शहर बर के प्रमुख चौक-चौराहा म पुलिस अधिकारी मनके उपस्थ्ति होना जरूरी हे। बइठका म मुख्यमंत्री ह प्रदेश म बाढ़त गांजा तस्करी के मामला म सख्त कार्रवाई करे अउ एखर उपर रोक लगाये के बात कीहिन हे।
छठ पर्व
आस्था के महापरब छठ ह आज छत्तीसगढ़ समेत देशभर के आने आने जगा म धूमधाम ले मनाये जात हे। आज संझा छठव्रती अउ श्रद्धालु मन ह पूजा करके डूबत सूरज ल अर्घ्य दीन।
एखर बर रायपुर समेत प्रदेशभर के आने आने जिला म नदिया अउ तरिया के तीर किनारे घाट मन म विशेष बेवस्था करे गेहे। संगेसंग लोक कलाकार मन डहार ले पारंपरिक लोकगीत के आयोजन करे जाथे। चार दिन तक चलइया ये छठ परब के समापन काली उगत सूरज ल अर्घ देके संग होही ।
प्रधानमंत्री नरेंद्र मोदी ह छठ पूजा के मउका म देशवासी मन ल बधाई दीन हे। ओमन ह अपन ट्वीट म कीहिन हे कि छठी मइया सबो ल अच्छा स्वास्थ्य अउ खुशी देवंय।
प्रोडक्शन/ट्रेडिंग सेंटर
प्रदेश म व्यापार अउ रोजगार ल बढ़ाय बर गांव म प्रोडक्शन सेंटर अउ शहर ल ट्रेडिंग सेंटर के रूप म विकसित करे जाही। मुख्यमंत्री भूपेश बघेल ह काली रायपुर म एक ठिन समारोह ल संबोधित करत प्रदेश के कपड़ा व्यापारी मनले कीहिन कि ओमन ह डिजायनर मन ल प्रशिक्षण देके संगेसंग कपड़ा, डिजाइन अउ उत्पादन के आर्डर देवंय ।
ओमन कीहिन कि राज्य सरकार ह एखर बर जमीन, शेड अउ मशीन उपलब्ध कराही। जेखर ले लोगन मन ल रोजगार मिले के संगेसंग अच्छा कपड़ा घलो मिल सकही। मुख्यमंत्री ह एखर बर व्यापारी मन ल जिला कलेक्टर मन संग बइठका लेके परियोजना ल तियार करे बर घलो कीहिन हे।
अउ अब थोरकुन समाचार सार म-
– स्वतंत्रता संग्राम सेनानी बिरसा मुण्डा के जयंती पंद्रह नवंबर ल जनजातीय गौरव दिवस के रूप म मनाये जाही। प्रधानमंत्री ह पंद्रह नवंबर के भोपाल म जनजातीय गौरव दिवस म आयोजित कार्यक्रम शामिल होही।
– राज्यपाल अनुसूइया उइके ह काली ले पांच दिन बर नई दिल्ली प्रवास म हवय। ए बेरा राज्यपाल ह काली ग्यारा नवंबर के राष्ट्रपति भवन म आयोजित राज्यपाल के सम्मेलन म शामिल होइन।
– जांजगीर-चांपा जिला के सक्ती क्षेत्र म बोईरडीह गांव के सरपंच के खिलाफ अविश्वास प्रस्ताव पारित करे गेहे। तहसीलदार के उपस्थिति म सरपंच के खिलाफ नौ झिन पंच मन ह अपन मत दीन।
– नोबेल पुरस्कार विजेता अभिजीत बैनर्जी ह चौदा अउ पंद्रह नवंबर के रायपुर म होवइया पंडित जवाहरलाल नेहरू राष्ट्रीय शिक्षा समागम म शामिल होही ।
– भिलाई ईस्पात संयंत्र के मटेरियल रिकवरी डिपार्टमेंट म दू दिन पहिली होय विस्फोट के मामला म पुलिस ह बीएसपी प्रबंधक के खिलाफ अपराध दर्ज कर लेहे।
अउ
– कोरबा जिला म आज होय एक ठिन सड़क दुर्घटना म भाजपा के युवा नेता संदीप सिंह समेत दू झिन मनखे के मउत होगे। उंहें एक झिन मनखे ह घायल होइस हे, जेखर अस्पताल म इलाज चलत हे।