भाजपा-कार्यकारिणी बैठक
भारतीय जनता पार्टी के राष्ट्रीय कार्यकारिणी के बइठका आज ले नई दिल्ली म सुरू होगे। पार्टी अध्यक्ष जगत प्रकाश नड्डा ह अपन उद्घाटन भासन म केन्द्र सरकार के उपलब्धि बारे म बतईन। ए कार्यकारिणी म तीन सौ बयालीस सदस्य भाग लेवत हे, जेमा प्रधानमंत्री नरेन्द्र मोदी, केन्द्रीय गृह मंत्री अमित शाह और रक्षामंत्री राजनाथ सिंह घलो मौजूद हवय।
बइठका म छत्तीसगढ़ के पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह के संग कई झिन आने बड़का नेता घलो सामिल होईन। ए कार्यकारिणी म पार्टी सदस्य मन डहार ले राष्ट्रीय मुद्दा अउ अवइया बछर ले सुरू होवइया विधानसभा चुनाव म विचार-विमर्स करे जात हे। कोविड दिसा-निरदेस ल देखत ए बइठका ह ऑनलाइन अउ ऑफलाइन दूनों माध्यम ले होवत हे।
भाजपा के प्रदेस अध्यक्ष विष्णुदेव साय, प्रदेस संगठन महामंत्री पवन साय, नेता प्रतिपक्ष धरमलाल कौशिक, राज्यसभा सांसद सरोज पांडेय अउ सांसद अरूण साव के संगे कई झिन आने नेता छत्तीसगढ़ डहार ले ए कार्यकारिणी बइठका म वर्चुअल रूप ले सामिल होईन। फेर पाछु पत्रकार मन ले गोठियावत श्री कौशिक ह बतईन कि पार्टी के राष्ट्रीय अध्यक्ष ह अपन गोठबात म छत्तीसगढ़ सरकार के भ्रष्टाचार, माओवादी समस्या अउ सामाजिक भाई-चारा ले परभावित करइया घटना मन उपर अपन संसो जतईन हे।
कोविड टीका
राष्ट्रीय कोविड टीकाकरण अभियान के चलत अब तक ले एक अरब आठ करोड़ इक्कीस लाख ले जादा टीका लगाय जा चुके हे। उहें, काली अट्ठाईस लाख चालीस हजार ले जादा टीका लगाय गीस।
ऐति, छत्तीसगढ़ म काली कोरोना संक्रमण के सत्ताईस ठिन नवा मामला आगू आय हे। ए दउरान राज्य के ओन्नईस ठिन जिला म कोविड के काली कोनों मामला नइ मिल हे। राज्य म औसत पॉजिटीविट रेट शून्य दसमलव दू-छह प्रतिसत (0.26) रहि गेहे। उहें, कोरोना संक्रमण ले काखरो भी मउत नइ होय हे। प्रदेस म ए बेरा दू सौ उनसठ मरीज मनके इलाज कई ठिन अस्पताल या होम आइसोलेशन यानि घरे ले चलत हे।
झीरम जांच-कांग्रेस
प्रदेस कांग्रेस कमेटी के अध्यक्ष मोहन मरकाम ह झीरम न्यायिक जांच रिपोर्ट ल राज्य सरकार तीर सौंपे के मांग करीन। आज रईपुर म मीडिया ले गोठबात करत श्री मरकाम ह किहीन कि ए रिपोर्ट सरकार ल नइ सौंपना अनुचित हवय। संगे यहू एक ठिन सोचे के बात हे कि ए रिपोर्ट म आखिर अइसन का हवय, जेला सरकार ले लुकाय जात हे। ओमन किहीन कि ए रिपोर्ट ल सोझे राज्यपाल ल सौंपना ठीक आरो नइ देवय। श्री मरकाम ह किहीन कि जांच आयोग ह अपन कार्यकाल बढ़ाय के मांग करे रिहीस। फेर, इही भीतर हुरहा ए रिपोर्ट ल राज्यपाल तीर सौंप दे गीस। ए मामला म श्री मरकाम ह नवा सिरा ले जांच के मांग करे हे।
माओवादी-ग्रामीण अपहरण
सुकमा जिला के कोंटा ब्लॉक ले माओवादी मन डहार ले पांच झिन ग्रामीण मन ल अगवा करे के खबर मिले हे। बताय गीस कि बटेर गांव ले बीते सुकरार के चार झिन अउ काली एक झिन गंवई के मनखे ल अगवा करे गेहे। सर्व आदिवासी समाज ह माओवादी मन ले अपील करीन हे कि ओमन अगवा करे गे सबो ग्रामीण मन ल सुरक्षित छोड़ देवय।
एनटीपीसी-स्थापना दिवस
देस के प्रमुख विद्युत उत्पादक कंपनी राष्ट्रीय ताप विद्युत निगम-एनटीपीसी के आज सैंतालीसवां स्थापना दिवस हरय। ए मउका म छत्तीसगढ़ स्थित एनटीपीसी के सबो संयंत्र म आने-आने कारीकरम के आयोजन करे जावत हे।
इही कड़ी म नवा रईपुर के राष्ट्रीय ताप विद्युत निगम-एनटीपीसी पश्चिम क्षेत्र कार्यालय परिसर म आज एनटीपीसी के स्थापना दिवस मनाय गीस। एनटीपीसी म प्रचालन अउ सेवा के कार्यकारिणी निदेशक ए.के. त्रिपाठी ह ए कारीकरम के सुभारंभ करीन।
फिल्म फेस्टिवल
राजधानी रईपुर म अवइया नौ नवंबर ले कानूनी जागरूकता उपर आधारित शॉट फिल्म फेस्टिवल अउ समारोह होही। चार दिन तक चलइया ए समारोह ल पंडित दीनदायाल उपाध्याय ऑडिटोरियम म राखे गेहे। राष्ट्रीय विधिक सेवा प्राधिकरण नई दिल्ली डहार ले चलाय जात पैन इंडिया जागरूकता अउ ऑउटरीच प्रोग्राम के चलत राज्य विधिक सेवा प्राधिकरण बिलासपुर अउ जी.पी.आर.एस.एस. रईपुर के तकनीकी सहयोग ले ए कारीकरम होही।
लोकवाणी
मुख्यमंत्री भूपेश बघेल ह ‘‘लोकवाणी‘‘ म ए बखत ‘‘उद्यमिता और जनशक्तिकरण का छत्तीसगढ मॉडल‘‘ बिसय उपर गोठबात करही। ए मासिक रेडियो वार्ता लोकवाणी के तेईसवां कड़ी के प्रसारण अवइया चौदह नवंबर इतवार के दिन होही, जेला छत्तीसगढ़ स्थित प्रदेश के सब्बो केन्द्र, एफ.एम. रेडियो अउ क्षेत्रीय समाचार चैनल मन ले बिहनिया साढ़े दस ले ग्यारह बजे तक एके संघरा प्रसारित करही।
मनरेगा-जॉब कार्ड
प्रदेस म महात्मा गांधी राष्ट्रीय ग्रामीण रोजगार गारंटी अधिनियम-मनरेगा के जॉब कार्ड के नवीनीकरण अउ सत्यापन बर तीस नवंबर तक विशेष अभियान चलाय जात हे। ए बारे म राज्य मनरेगा आयुक्त मोहम्मद कैसर अब्दुल हक ह सबो कलेक्टर मन ल परिपत्र जारी करे हे। अभियान बेरा जॉब कार्ड मनके जांच अउ एखर ले जुड़े जानकारी के सत्यापन घलो करे जाही।
रोल बॉल
ईस्ट जोन रोल बॉल राष्ट्रीय चैंपियनशिप के आयोजन भिलाई म अवइया तेरह नवंबर ले सुरू होही। दू दिन वाले ए स्पर्धा म सात राज्य ले पुरूष अउ महिला वर्ग के टीम सामिल होही। ए स्वर्धा ल स्वर्गीय राजेश पटेल स्टेडियम म खेले जाही।
दूरदर्शन केन्द्र
दूरदर्शन केन्द्र रईपुर के प्रादेसिक समाचार एकांश डहार ले छत्तीसगढ़ी अउ हिन्दी भासा के नैमित्तिक समाचार वाचक, वाचिका अउ नैमित्तिक संपादकीय सहायक के पैनल म सामिल होय बर आवेदन मंगाय गेहे। आवेदक ल रईपुर नगर निगम के निवासी होना जरूरी हे। एखर ले जुड़े जानकारी प्रसार भारती के वेबसाइट म देखे जा सकत हे। ए पद मन बर आवेदन पत्र भरके रईपुर स्थित दूरदर्शन केन्द्र , प्रादेशिक समाचार एकांश म स्पीड पोस्ट या फेर रजिस्टर्ड डाक के माध्यम ले अवइया तेरह नवंबर तक आवेदन पठोय जा सकत हे।
अउ अब थोरकुन समाचार सार म-
– बिलासपुर जिला म भारतीय जनता युवा मोर्चा के आह्वान म आज पार्टी कार्यकर्ता मन ह नेहरू चौक म पेट्रोल पंप के आगू प्रदर्सन करीन अउ राज्य सरकार ले पेट्रोल-डीजल म वैट के दर कम करे के मांग करीन।
– अंबिकापुर स्थित सैनिक स्कूल म नवा सैक्षणिक सत्र म कक्षा छठवीं म प्रवेस बर अखिल भारतीय सैनिक स्कूल प्रवेस परीक्षा अवइया नौ जनवरी के होही।
– बिलासपुर केन्द्रीय जेल म आजीवन कारावास के सजा काटत एक झिन कैदी ह काली भाग गीस।
– बिलासपुर के तेल कारोबारी ले फर्जी चेक देके करीबन सैंतीस लाख रूपिया के ठगी करे के मामला आगू आय हे।
अउ
– महासमुंद के सिंघोड़ा पुलिस ह भागा अउ गनियारी पाली के जंगल ले एक ठिन गाड़ी ले करीबन पैंतीस किलो गांजा बरामद करे हे। फेर जांच बेरा ड्राईवर ह गाड़ी ल छोड़ भाग गीस।