धान खरीदी
प्रदेश म ए बछर समर्थन मूल्य म धान खरीदी एक दिसंबर ले शुरू होही। खाद्य मंत्री अमरजीत भगत ह आज अपन निवास कार्यालय म विभागीय अधिकारी मनके बइठका लेके धान खरीदी के तियारी के समीक्षा करीन।
ओमन कीहिन कि धान खरीदी के दउरान प्रदेश के सीमावर्ती इलाका म दूसर राज्य ले अवैध तरीका ले धान के परिवहन के शिकायत मिलते रहिथे। तेखर सेती दूसर राज्य ले धान के अवैध परिवहन ल रोके बर प्रदेश के सीमावर्ती इलाका म कड़ा निगरानी सुनिश्चित करे जाय। ओमन कीहिन कि ए बछर राज्यसरकार डहार ले एक सौ पांच लाख मीट्रिक टन धान खरीदी के अनुमान करे गे हावय। ओमन कीहिन कि धान खरीदी के बने बेवस्था बर सबो खरीदी केंद्र मन म पर्याप्त बारदाना होना चाही।
बइठका म अधिकारी मन ह बताइन कि प्रदेश म तेईस सौ ले जादा सहकारी समिति केंद्र मनके माध्यम ले धान खरीदी करे जाही। ए बछर करीबन एक लाख तेरा हजार नवा किसान मन ह पंजीयन कराय हे। अभी तक धान बेचे बर पूरा प्रदेश म बाईस लाख छैसठ हजार ले जादा किसान मनके पंजीयन होगे हवय। मुख्यमंत्री के निर्देश म नवा किसान मन बर पंजीयन के तिथि दस नवंबर तक बढ़ा देगे हे।
राज्योत्सव समापन
छत्तीसगढ़ राज्य स्थापना दिवस म राखे गे पांच दिन के राज्योत्सव के काली समापन होगे। रायपुर के साइंस कालेज मैदान म राखे गे राज्योत्सव के ए समारोह म राज्यपाल ह कीहिन कि छत्तीसगढ़ राज्य हर क्षेत्र म आगू बढ़त हे। ओमन ह ए मउका म छत्तीसगढ़ राज्य निर्माण म योगदान देवइया पुरखा मनके घलो सुरता करीन। ए मउका म ओमन ह प्रदेशवासी मन ल अपन बधाई अउ शुभकामना दीन।
मुख्यमंत्री घोषणा
प्रदेश म अवइया बछर ले तीन दिन के छत्तीसगढ़ लोक कला साहित्य अउ युवा महोत्सव के आयोजन करे जाही। ये महोत्सव स्वामी विवेकानंद के जयंती के मउका म हर बछर बारा ले चौदा जनवरी तक कराये जाही। ए घोषणा मुख्यमंत्री भूपेश बघेल ह काली रायपुर म राखे गे पांच दिन के राज्योत्सव के समापन समारोह म कीहिन ।
श्री बघेल ह कीहिन कि राष्ट्रीय आदिवासी नृत्य महोत्सव के जइसे ही युवा महोत्सव घलो कराये जाही। एमा आने-आने विधा के लोक कलाकार अउ साहित्यकार मन ल उंखर अभिव्यक्ति बर मंच दे जाही। ए महोत्सव म छत्तीसगढ़ी के अलावा हल्बी, गोंडी, कुंडुख अउ सरगुजिहा बोली के कलाकार अउ साहित्यकार मन ल घलो मउका मिलही। संगेसंग पंडवानी, भरथरी, सुआ, अउ पंथी संघरा छत्तीसगढ़ के पारंपरिक नाचा अउ गम्मत कलाकार मन ल घलो मउका दे जाही।
राज्य अंलकरण सम्मान
राज्यपाल अनुसूइया उइके ह राज्य स्थापना दिवस के मउका म राजधानी रायपुर के साइंस कालेज मैदान म राखे गे राज्य अलंकरण समारोह म छत्तीसगढ़ के आने-आने विभूति मन ल उंखर उपलब्धि अउ प्रदेश के विकास म योगदान बर राज्य अलंकरण सम्मान ले विभूषित करीन। कार्यक्रम के अगवई मुख्यमंत्री भूपेश बघेल ह करीन।
ए मउका म नेता प्रतिपक्ष धरमलाला कौशिक संगरा मंत्रिमंडल के सदस्य, संसदीय सचिव, सांसद, विधायक, निगम मंडल के अध्यक्ष अउ दूसर जन प्रतिनिधि मन मौजूद रीहिन।
अलंकरण पुरस्कार म शहीद वीर नारायण सिंह पुरस्कार बिलासपुर जिला के लिम्हा नवापारा गांव के जानकी प्रसाद पुलस्त ल दे गीस। पंडित लखलाल मिश्र सम्मान दुर्ग जिला के उतई थाना म पदस्थ पुलिस अधिकारी कुंदनलाल गौर ल दे गीस। अइसने यति यतनलाल सम्मान नारायणपुर म चलत रामकृष्ण मिशन आश्रम ल दे गीस। खेल के क्षेत्र के गुंडाधुर सम्मान बिलासपुर जिला के खिलाड़ी कुमारी रोहिणी साहू ल मिलिस। मिनीमाता सम्मान दुर्ग जिला के पंचशील नगर के डॅाक्टर कल्पना देशमुख ल दे गीस। उंहें गुरू घासीदास सम्मान दुर्ग जिला के आलबरस निवासी पुरानिक लाल चेलक ल मिलिस।
पंडित माधवराव सप्रे राष्ट्रीय रचनात्मकता सम्मान नई दिल्ली के वरिष्ठ पत्रकार मृणाल पाण्डे ल दे गीस। अइसने सबो विधा बर आने आने पुरस्कार ले विभूति मन ल सम्मानित करे गीस।
धनतेरस
छत्तीसगढ़ संगरा देशभर म धनतेरस के तिहार आज बड़ उछाह के संग मनाये जावत हे। आज के दिन धनवृद्धि बर कुबेर देवता के अउ स्वस्थ रेहे बर भगवान धनवंतरी के पूजा करे जाथे।
आज बाजार मन म बहुत रौनक देखे जावत हे। राज्यपाल अनुसूइया उइके, मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह प्रदेशवासी मन ल धनतेरस के बधाई अउ शुभकामना दीन हे। ए मउका म श्री बघेल ह कीहिन कि देवारी म कुम्हार जइसन छोटे बेवसाय करइया मनले दीया अउ घर सजाये के जीनिस खरीद के उंखर देवारी ल घलो खुशहाल बनाना चाही।
आरएसएस-पत्रकार वार्ता
राष्ट्रीय स्वयंसेवक संघ के पं्रात संघचालक डॅाक्टर पूर्णेन्दु सक्सेना ह कीहिन हे कि देश ह ए बेरा आजादी के अमृत महोत्सव मनावत हे। एमा संघ के स्वयंसेवक समाज अउ आने आने संस्था मन मिलके काम करही। एखर अलावा संघ डहार ले स्वतंत्र आयोजन घलो होही।
आज रायपुर म एक ठन पत्रकार वार्ता म डॅाक्टर सक्सेना ह कीहिन कि स्वाधीनता संग्राम के अज्ञात सेनानी मनके जीवनी ल समाज के आगू लाये जाही। ओमन बताइन कि राष्ट्रीय सवयंसेवक संघ के सर संघचालक डॅाक्टर मोहन भागवत अवइया उन्नीस नवंबर के रायपुर आहीं। डॅाक्टर सक्सेना ह कीहिन कि कोनो एक समुदाय के संख्या ल बढ़ाय बर लालच देके या धोखा ले मतांतरण कराना सही नइ हे।
ओमन कीहिन कि यदि धर्मातंरण या मतांतरण ल रोके बर कानून बनथे त हमन ओखर स्वागत करबो। ओमन बताइन कि संघ के अखिल भारतीय कार्यकारी मंडल ह अठाईस ले तीस अक्टूबर तक धारवाड़ म होय बइठका के दउरान बांग्लादेश म हिंदू मन उपर कथित रूप ले होय उन्मादी हमला के निंदा करीन हे । ए संबंध म संघ ह केंद्र सरकार ले बांग्लादेश म रहइया हिंदू अउ बौद्ध समाज के सुरक्षा बर जरूरी पहल करे के मांग करीन हे।
पं्रात संघचालक ह कीहिन कि सिक्ख पंत नवां गुरू, गुरू तेग बहादुर जी के चार सौ प्रकाशवर्ष म संस्था मनके संग मिलके कार्यक्रम के आयोजन के फैसला लेगे हवय। ओमन कीहिन कि बछर दू हजार पच्चीस म संघ के सौ बछर पूरा होवइया हे, जेला देखत संघ के मंडल स्तर तक विस्तार करे जाही। अभी देश म करीब साढ़े छै हजार विकासखंड ले साढ़े पांच हजार ले जादा विकासखंड म संघ के काम चलत हे
मनरेगा जॉब कार्ड
प्रदेश म महात्मा गांधी राष्ट्रीय ग्रामीण रोजगार गारंटी अधिनियम-मनरेगा के जॉब कार्ड के नवीनीकरण अउ सत्यापन बर तीस नवंबर तक विशेष अभियान चलाये जावत हे। ए संबंध म राज्य मनरेगा आयुक्त मोहम्मद कैसर अब्दुल हक ह सबो कलेक्टर मन ल परिपत्र जारी करीन हे। अभियान के दउरान जॉब कार्ड के वैधता के जांच करे जाही। संगेसंग संबंधित जानकारी के सत्यापन घलो करे जाही।
आजादी का अमृत महोत्सव प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – पुणे म आर्य महिला समाज के स्थापना करइया महिला समाज सुधारक के नाव बतावव। ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हें।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।