राज्य स्थापना दिवस
छत्तीसगढ़ राज्य आज अपन बाईसवां स्थापना दिवस मनावत हे। राज्य के गठन एक नवंबर दू हजार के होय रीहिस। ए मउका म राष्ट्रपति रामनाथ कोविंद, उपराष्ट्रपति एम. वेंकैया नायडू अउ प्रधानमंत्री नरेंद्र मोदी, राज्यपाल अनुसूइया उइके अउ मुख्यमंत्री भूपेश बघेल ह छत्तीसगढ़ के स्थापना दिवस के अवसर म प्रदेशवासी मन ल बधाई अउ शुभकामना दीन हे।
ए मउका म मुख्यमंत्री के रायपुर स्थित निवास म आयोजित कार्यक्रम म राज्य के इक्कीस लाख किसान मनके खाता म पंद्रह सौ दस करोड़ इक्यासी लाख रूपिया जमा करे गीस। ए राशि म राजीव गांधी किसान न्याय योजना के तीसरा किश्त के रूप म पंद्रह सौ करोड़ रूपिया अउ गोधन न्याय योजना के भीतर लाभांश के राशि दस करोड़ इक्यासी लाख रूपिया शामिल हे।
ए अवसर म मुख्यमंत्री ह कीहिन कि राज्य सरकार के किसान हितैशी नीति मनले प्रदेश के किसान समृद्ध होय हे। ओमन कीहिन कि ए बछर एक करोड़ पांच लाख मीटरिक टन धान खरीदी के उम्मीद हे। ओमन बताइन कि एक दिसंबर ले राज्य म समर्थन मूल्य म धान खरीदी शुरू हो जाही। मुख्यमंत्री ह कीहिन कि किसान मनके सुविधा बर राजीव गांधी किसान न्याय योजना के तहत पंजीयन के तारीख दस नवंबर तक बढ़ा दे गेहे।
राज्य स्थापना दिवस के मउका म मुख्यमंत्री स्लम स्वास्थ्य योजना के ऑनलाईन डैशबोर्ड अउ महिला स्व सहायता समूह मन डहार ले तियार करे गे छत्तीसगढ़ के पारंपरिक व्यंजन के स्मार्ट फूड वर्जन जोरन के गिप्ट पैक लांच करे गेहे। ए गिप्ट पैक म बाजरा के बर्फी, दरभा कॉफी, रागी अउ बस्तर काजू के कुकीज के संग मिलेट ले बने पीड़िया, पपची अउ ठेठरी शामिल हे।
कोविड टीका हर घर दस्तक अभियान
राष्ट्रव्यापी टीकाकरण अभियान के भीतर अब तक देश म एक सौ छै करोड़ चौंतीस लाख ले जादा के टीका लगाये जा चुके हे। केंद्रीय स्वास्थ्य मंत्रालय ह बताइन कि काली बारा लाख सतहत्तर हजार ले जादा के टीका लगाये गीस
इही बीच राष्ट्रव्यापी टीकाकरण हर घर दस्तक अभियान आज ले शुरू होगे हे। आकाशवाणी ले विशेष बातचीत म नीति आयोग के सदस्य वी.के. पॉल ह कीहिन कि ए अभियान के भीतर वो जिला म विशेष धियान दे जाही, जिहां कोनो भी कारण ले टीकाकरण के रप्तार धीमा हे।
एति छत्तीसगढ़ म कोरोना ले बचाव खातिर अब तक दू करोड़ चौंतीस लाख छब्बीस हजार ले जादा टीका लगाये जा चुके हे। एमा ले एक करोड़ साठ लाख चौवन हजार ले जादा लेगन ह टीका के पहिला डोज अउ तिहत्तर लाख बहत्तर हजार ले जादा लोगन मन ह टीका के दूसर डोज लगा चुके हे।
इही बीच प्रदेश म काली कोरोना संक्रमण के बत्तीस नवा मामला आगू आय हे। उंहें सतरा जिला म काली कोरोना संक्रमण के कोनो नवा मामला आगू नइ आय हे। फेर चार ठिन जिला म काली एक-एक अउ दू जिला म दू-दू कोरोना संक्रमित मरीज मिले हे।
हज यात्रा
केंद्रीय अल्पसंख्यक कार्य मंत्री मुख्तार अब्बास नकवी ह आज कीहिन कि कोरोना महामारी के सेती दू बछर ले बंद हजयात्रा अवइया बछर ले फेर शुरू हो जाही। मुंबइ म आज ओमन ह बताइन कि हज यात्री मनके सुविधा बर एक ठिन मोबाईल एप बनाय गेहे। ओमन ह यहू कीहिन कि जेन लोगन ल कोविड के दूनो खुराक लग गेहे उही लोगन मन ल हजयात्रा म जाय के अनुमति मिलही।
टीबी उन्मूलन
केंद्रीय स्वास्थ्य मंत्रालय के टीम ह आज बिलासपुर अउ महासमुंद जिला म टीबी उन्मूलन बर गे काम के जांच के बाद ए दिशा म उठाये जात कदम के सराहना करीन।
टीम ह अइसने बेवस्था अउ सुविधा प्रदेश सबो जिला म कराये के निर्देश घलो दीन।
खबर के मुताबिक राष्ट्रीय छै उन्मूलन कार्यक्रम के भीतर बारा सदस्य मन ह पच्चीस ले अठाईस अक्टूबर तक दूनो जिला के दउरा करके टीबी नियंत्रण अउ उन्मूलन बर उठाये के कदम के संग जांच अउ इलाज के बेवस्था के निरीक्षण करीन। ओमन ह जरूरी दवाई के उपलब्धता के घलो जानकारी लीन।
एसटी उम्मीदवार छूट
राज्य सरकार ह अनुसूचित जनजाति के पुरूष अभ्यर्थी मन ल सूबेदार, एसआई अउ प्लाटून कमांडर के भर्ती के बेरा उंचाई, अउ सीना माप म छूट देके घोषणा करे गेहे।
ए उम्मीदवार मन बर शारीरिक अर्हता म न्यूनतम उंचाई एक सौ तिरसठ सेंटीमीटर, अउ न्यूनतम सीमा माप अर्हता म छूट देवत बिना सीना फुलाये अठहत्तर सेंटीमीटर अउ सीना फुलाये म तिरासी सेंटीमीटर करे गेहे। बांचे अर्हता पहिली ले जारी विज्ञापन अनुसार होही। संगेसंग सबो अभ्यर्थी बर ऑनलाईन आवेदन करे के आखरी तारीख ग्यारा नवंबर तक बढ़ा दे गेहे।
अमृत महोत्सव प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के भीतर पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – भारत के राष्ट्रीय जलीय जीव कोन से हरय। ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट प्रसार भारत डॅाट जीओवी डॅाट इन म भेजयं।
ए प्रतियोगिता बर एक झिन भाग्यशाली प्रतिभागी ल विजेता के रूप म चुने जाही । काली के समाचार प्रभात म विजेता के नाव के घोषणा करे जाही।
माओवादी मुठभेड़
दंतेवाड़ा जिला म काली संझा सुरक्षा बल मनके संग होय मुठभेड़ म तीन झिन इनामी माइलोगिन माओवादी मारे गीस। पुलिस ह सबो के शव ल बरामद कर लेहे। माइलोगन माओवादी उपर पांच-पांच लाख रूपिया के इनाम रीहिस।
मिले खबर के मुताबिक डीआरजी के टीम ह तलाशी अभियान म निकले रीहिस, ए दउरान कटेकल्याण थाना क्षेत्र के अड़वाल अउ कुंजेरा के तीर माओवादी मन ह अचानक हमला कर दीन। जवाबी कार्रवाई म सुरक्षा बल मन ह तीन महिला माओवादी मन मारे गीस। शव के संगेसंग इंखर तीर ले बारा बोर के बंदूक दू देशी रिवाल्वर एक ठिन गन, दू आई ई डी संग बड़ मात्रा म माओवादी सामग्री बरामद करे गेहे।
अउ अब थोरकुन समाचार सार म-
– राजनांदगांव कलेक्टर तारन प्रकाश सिन्हा ह छत्तीसगढ़ लोक सेवा आयोग के परीक्षा म प्रवीण सूची म पहिला स्थान मिले आस्था बोरकर ल उंखर घर जाके बधाई अउ शुभकामना दीन।
– कबीरधाम जिला म राज्योत्सव अउ अवइया तिहार ल देखत शांति, बेवस्था बनाये राखे बर पुलिस जवान मन ह काली शहर म फ्लैग मार्च करीन।
– महासमुंद जिला के कोमाखान पुलिस ह चार सौ बीस किलो गांजा के संग दू झिन आरोपी ल गिरप्तार करे हे। जब्त गांजा के कीमत चौरासी लाख रूपिया बताये जात हे।
– गरियाबंद जिला के पांडुका स्थित छत्तीसगढ़ ग्रामीण बैंक म आग लगे ले फाईल अउ कम्पयूटर जरके क्षतिग्रस्त होगे हे।
अउ
– कोंडागांव जिला के केशकाल म इक्कीसवां राज्य स्तरीय शालेय क्रीड़ा प्रतियोगिता सिरा गेहे। ए स्पर्धा म बस्तर संभाग आगू रीहिस।