आदिवासी नृत्य महोत्सव-मुख्यमंत्री
मुख्यमंत्री भूपेश बघेल ह राजीव गांधी किसान न्याय योजना के तहत किसान मनके पंजीयन के तिथि ल बढ़ाके दस नवंबर करे जाय अउ राज्य म एक दिसंबर ले समर्थन मूल्य म धान खरीदी सुरू करे के घोषणा करीन।
श्री बघेल ह काली राजधानी रायपुर के साईंस कालेज मैदान म तीन दिवसीय राष्ट्रीय आदिवासी नृत्य महोत्सव के समापन समारोह ल संबोधित करत हुए किहीन कि ये आयोजन प्रदेशवासी मनके सहयोग ले अंतर्राष्ट्रीय स्वरूप ले लेहे। ओमन किहीन कि समारोह म गीत, संगीत, नृत्य, वाद्य अउ वादन के जरिया नवा समाज आकार लेवत दिखाई देवत हे। ये वो समाज आय जेन ह हासिया म रेहे हे। ये आयोजन के जरिया छत्तीसगढ़ के संस्कृति ल एक नवा पहचान देके कोशिश करे गेहे। ये मौका म मुख्यमंत्री ह ‘‘पाड़ामुंतोम बस्तर‘‘, ऐतिहासिक जीत ल सलाम, राष्ट्रीय आदिवासी नृत्य महोत्सव-2019 पर कॉफी टेबल बुक अउ ‘‘हमर संस्कृति-हमर तिहार‘‘ पुस्तक मनके विमोचन करीन।
मुख्यमंत्री ह समारोह म नृत्य प्रतियोगिता के विजेता नर्तक मन ल पुरस्कार राशि अउ प्रमाण पत्र प्रदान कर सम्मानित करीन। विवाह संस्कार श्रेणी म प्रथम पुरस्कार झारखंड के करसा नर्तक दल ल, द्वितीय पुरस्कार ओड़िसा के धप नर्तक दल अउ तृतीय पुरस्कार असम के कारबी तिवा नर्तक दल ल मिलीस। अइसने, अन्य पारंपरिक तिहार म घलो झारखंड के छाऊ नृत्य दल ह प्रथम, ओड़िशा के बाजसल नर्तक ह द्वितीय अउ छत्तीसगढ़ गौर सिंग नर्तक दल ह तीसरा स्थान हासिल करीन। प्रथम, द्वितीय अउ तृतीय पुरस्कार प्राप्त करइया नर्तक दल मन ल पांच लाख, तीन लाख अउ दू लाख रूपिया के पुस्कार राशि अउ प्रमाण देके सम्मानित करे गीस।
स्कूल गांधी-भजन
छत्तीसगढ़ के स्कूल मन म अब गांधी जी के प्रिय भजन ‘‘रघुपति राघव राजाराम अउ वैष्णव जन तो तेने कहिये जे‘‘ के नियमित गायन होही। मुख्यमंत्री भूपेश बघेल ह आज एखर घोषणा करीन। ओमन किहीन कि राज्य के लइका मन ल गांधी जी के विचार मन से संस्कारित करे बर ए निर्णय ले गेहे। ओमन किहीन कि पूर्व प्रधानमंत्री इंदिरा गांधी अउ पूर्व उप प्रधानमंत्री सरदार वल्लभ भाई पटेल के व्यक्तित्व म महात्मा गांधी के मूल्य मनके मौजदूगी सबसे बड़े समानता रेहे हे। ये दूनों ही विभूति मनके जीवन ल गांधी जी के ही विचार ह गढे़ रिहीस। श्री बघेल ह किहीन कि महात्मा गांधी के विचार मनके माध्यम ले राज्य के लइका मन म सामाजिक एकता अउ समरसता के भावना ल मजबूत करे जाही।
राज्योत्सव
काली छत्तीसगढ़ के राज्य स्थापना दिवस आय। ये अवसर म राज्य अलंकरण अउ राज्योत्सव समापन समारोह आयोजित करे जाही। ये कार्यक्रम राजधानी रायपुर के साईंस कालेज मैदान म संझा छह बजे सुरू होही। समारोह के मुख्य अतिथि राज्यपाल अनुसुईया उइके होही। मुख्यमंत्री भूपेश बघेल समारोह के अध्यक्षता करही।
ए मौका म काली संस्कृति विभाग डहार ले ये बछर अलग-अलग आठ विधा मनके विभूति मन ल छत्तीसगढ़ राज्य अलंकरण सम्मान दे जाही। उल्लेखनीय है कि पहली चार विधा मन म विभूति मन ल छत्तीसगढ़ राज्य अलंकरण सम्मान दे जात रिहीस। कोरोना महामारी के चलत पाछु एक-दू बछर ले एक-दो विधा मन म पुरस्कार के घोषणा नइ हो पाय रिहीस। ये विधा मनके विभूति मन ल घलो राज्य अलंकरण समारोह म सम्मानित करे जाही।
प्रदेश के सब्बो जिला मुख्यालय मन म घलो काली राज्योत्सव मनाय जाही।
मुख्यमंत्री-अपील
मुख्यमंत्री भूपेश बघेल ह काली राजधानी रायपुर के स्वामी विवेकानंद सरोवर बूढ़ातालाब परिसर स्थित छत्तीसगढ़ लोक माटी शिल्प परिसर पहुंचीन अउ उहां छत्तीसगढ़ गोधन न्याय योजना अउ आजीविका मिशन के तहत महिला स्व-सहायता समूह मन डहार ले लगाय गे स्टॉल म गोबर अउ माटी के दीया अउ अन्य सामग्री खरीद के उनला प्रोत्साहित करीन। ये दौरान मुख्यमंत्री ह लोगन मन ले स्थानीय विक्रेता अउ कुम्हार मन से ही दीया खरीदे के अपील करीन। ये मौका म ओमन दीपदान महोत्सव के तहत एक लाख दीया के निःशुल्क वितरण के काम के सुरूवात घलो करीन।
वल्लभ भाई पटेल-जयंती
राष्ट्र आज आधुनिक भारत ल एकता के सूत्र म पिरोने वाला लौह पुरूष सरदार वल्लभ भाई पटेल ल उंखर एक सौ छियालीसवां जयंती म श्रद्धासुमन अर्पित करत हे। ये दिन ल राष्ट्रीय एकता दिवस के रूप म मनाय जाथे।
राष्ट्रपति रामनाथ कोविंद ह दिल्ली के पटेल चौक म सरदार पटेल के प्रतिमा म पुष्पांजलि अर्पित करीन। अनेक केन्द्रीय मंत्री मन घलो लौह पुरूष ल श्रद्धांजलि दीन।
प्रधानमंत्री नरेन्द्र मोदी ह सरदार पटेल के जयंती म उनला भावभीनी श्रद्धांजलि अर्पित करीन। ये अवसर म अपन वीडियो संदेश म श्री मोदी ह किहीन कि सरदार वल्लभ भाई पटेल के प्रेरणा ले भारत बाहरी अउ आतंरिक सबो प्रकार के चुनौती मनके सामना करे म सक्षम रेहे हे।
ऐति, छत्तीसगढ़ म घलो लौह पुरूष सरदार वल्लभ भाई पटेल के जयंती अउ पूर्व प्रधानमंत्री इंदिरा गांधी के पुण्यतिथि म अलग-अलग कार्यक्रम आयोजित करे जात हे। मुख्यमंत्री भूपेश बघेल ह अपन रायपुर स्थित निवास कार्यालय म सरदार पटेल अउ पूर्व प्रधानमंत्री इंदिरा गांधी के चित्र उपर श्रद्धासुमन अर्पित कर उनला नमन करीन।
उहें, राजधानी रायपुर के साईंस कालेज मैदान म स्थित ऑटिडोरियम म आज सरदार पटेल अउ श्रीमती गांधी के व्यक्तित्व अउ कृतित्व उपर आधारित फोटो प्रदर्शनी लगाय गीस। एखर सुभारंभ गृहमंत्री ताम्रध्वज साहू ह करीन। प्रदर्सनी म सरदार पटेल के संविधान सभा के बइठका अउ स्वतंत्रता प्राप्ति के तस्वीर मन ल प्रदर्सित करे गेहे।
उहें, श्रीमती गांधी के इन्दु ले इंदिरा बने तक के जीवन सफर अउ देस के विकास बर उंखर डहार ले करे गे महत्वपूर्ण निर्णय मन ल चित्र के माध्यम ले प्रदर्सित करे गेहे।
राष्ट्रीय एकता दिवस के अवसर म कार्यक्रम म अतिथि मन डहार ले एकता, अखंडता अउ सुरक्षा बनाय राखे के सपथ ले गीस।
पिछड़ा वर्ग सर्वेक्षण
छत्तीसगढ़ के जनसंख्या म अन्य पिछड़ा वर्ग अउ आर्थिक रूप ले कमजोर वर्ग मनके सर्वेक्षण के काम अब तीस नवंबर तक होही। उल्लेखनीय हे कि सर्वेक्षण बर क्वांटीफायबल डाटा आयोग के गठन करे गेहे। अब तक सर्वेक्षण के काम लगभग सत्रह प्रतिशत हो चुके हे।
आयोग डहार ले संशोधित कार्यक्रम घलो जारी कर दे गेहे। एखर अनुसार ऑनलाइन पंजीकरण अउ डाटा संग्रहण अउ सत्यापन के काम तीस नवंबर तक निर्धारित करे गेहे। डाटा संग्रहण के बाद ग्राम पंचायतवार अउ वार्ड वार सूची के प्रारंभिक प्रकाशन ग्राम पंचायत, जनपद पंचायत, तहसील कार्यालय अउ जोन कार्यालय म सत्रह दिसंबर तक करे जाही। प्रारंभिक प्रकाशन उपर दावा आपत्ति अगले साल पांच जनवरी तक ले जाही। दावा आपत्ति के निराकरण बीस जनवरी तक करे जाही।
अउ अब थोरकुन समाचार सार म –
– बिलासपुर के लाईवलीहुड कालेज निपनिया म काली जिला स्तरीय जॉब मेला के आयोजन करे जाही।
– बलरामपुर जिला के शंकरगढ़ विकासखंड के जगीमा, उसनी, बरियाडीहकला अउ वाड्रफनगर के गुडरू म विशेष आधार शिविर के आयोजन करे गीस। ये शिविर म तीन सौ पहाड़ी कोरवा, पण्डो अउ नगेशिया समुदाय के सदस्य मनके आधार कार्ड बनाय गीस।
– कोरिया जिला के पुलिस अधीक्षक ह नौकरी लगाय के नाम म फर्जी फोन कॉल से सतर्क रेहे के अपील करे हे। ओमन किहीन कि लोगन मन अइसन कोनो फोन कॉल के साझा म झव आवय।
– महासमुंद जिला के नगर पंचायत तुमगांव बस्ती के भीतर हाथी के हमला ले एक झिन बुजुर्ग के मौत होगे।
अउ
– धमतरी जिला के सिहावा क्षेत्र म स्थित श्रृंगीऋषि आश्रम के पहाड़ी उपर आज दूसरइया तेंदूआ घलो पिंजरा म कैद होगे। तेंदूआ ल वन विभाग डहार ले सीतानदी अभ्यारण्य क्षेत्र म छोड़े जाही।