मांडविया-महाटीकाकरण अभियान
केन्द्रीय स्वास्थ्य मंत्री मनसुख मांडविया ह किहीन हे कि सरकार टीकाकरण अभियान ल बने असन चलाय बर महाटीकाकरण अभियान ‘‘हर घर दस्तक‘‘ सुरू करत हे। अभियान म अवइया एक महीना तक सबो राज्य म स्वास्थ्य करमचारी घर-घर जाके लोगन ल टीका लगाही।
श्री मांडविया ह नई दिल्ली के विज्ञान भवन म राज्य के स्वास्थ्य मंत्री मन संग गोठबात करीन। गोठबात के बेरा कोविड टीकाकरण अभियान अउ प्रधानमंत्री आयुष्मान भारत स्वास्थ्य अवसंरचना मिशन म घलो गोठबात होईस। ए मिशन सोमवार के सुरू करे गे रिहीस। बइठका के बाद श्री मांडविया ह किहीन कि देस के अड़तालीस जिला अइसन हे, जिहां पात्र आबादी के पचास प्रतिसत ले ही कमती लोगन मन पहिली टीका लगवाय हे।
कोविड टीका
राष्ट्रभर म कोविड टीकाकरण अभियान म देस म अब तक एक सौ चार करोड़ चार लाख ले जादा झन ल टीका लगाय गेहे। केन्द्रीय स्वास्थ्य मंत्रालय ह बतईन कि काली उनचास लाख जादा झन ल टीका लगाय गीस।
ऐति, छत्तीसगढ़ के कोरिया जिला म कोरोना टीकाकरण के आंकड़ा पांच लाख ल पार कर गेहे। जिला कलेक्टर श्याम धावड़े ह जम्मों झन ले अपील करीन हे कि सबो झन टीका जरूर लगवाय।
ओति, कोंडगांव जिला म टीकाकरण अभियान तेजी ले चलाय जात हे। जिला कलेक्टर पुष्पेन्द्र कुमार मीणा के निरदेस म स्वास्थ्य विभाग के टीम घर-घर जाके लोगन ल टीका लगावत हे।
राष्ट्रीय आदिवासी नृत्य महोत्सव
राजधानी रईपुर म आज ले राष्ट्रीय आदिवासी नृत्य महोत्सव सुरू होगे हे। राजधानी के साईंस कालेज मैदान म राखे गे कारीकरम म झारखंड के मुख्यमंत्री हेमंत सोरेन ह राष्ट्रीय आदिवासी नृत्य महोत्सव अउ राज्योत्सव के सुभारंभ करीन। कारीकरम के अगुवई छत्तीसगढ़ के मुख्यमंत्री भूपेश बघेल ह करीन। ए मउका म छत्तीसगढ़ के मुख्यमंत्री अउ झारखंड के मुख्यमंत्री ह आदिवासी पंरपरा के मुताबिक सिर म गौर मुकुट पहरिन अउ पारंपरिक वाद्य यंत्र मांदर, ठोड़का अउ तुरही बजाके ए महोत्सव म संघरे कलाकार मनके उछाह बड़ईन। उद्घाटन समारोह के बाद मुख्यमंत्री श्री बघेल ह छत्तीसगढ़ शासन के आने-आने विभाग कोति ले लगाय गे विकास प्रदर्शनी ल देखनी।
एक नवंबर तक चलइया ए महोत्सव म सत्ताईस राज्य अउ छह केन्द्रसासित प्रदेस के कलकार मनके संगेसंग देसी कलाकार मन घलो अपन प्रस्तुति दीहीं। एमा नाइजीरिया, उजबेकिस्तान, श्रीलंका, युगांडा, स्वाजीलैंड, मालदीव, पेलेस्टाइन अउ सीरिया के कलाकार अपन प्रस्तुति दीहीं।
इही बीच, सांसद राहुल गांधी ह आदिवासी नृत्य महोत्सव के आयोजन बर छत्तीसगढ़ सरकार ल बधाई अउ सुभकामना दीन हे। ओमन किहीन कि राज्य सरकार कोति ले देस के आदिवासी कलाकार मन ल मंच देवाना अउ सांस्कृतिक परंपरा ल आगू लाय खातिर मउका देना सराहनीय हवय।
राज्योत्सव
एक नवंबर के राज्य स्थापना दिवस के मउका म राज्य अलंकरण अउ राज्योत्सव समापन समारोह राखे जाही। ए कारीकरम राजधानी रईपुर के साईंस कालेज मैदान म संझा छह बजे ले होही। ए समारोह के माईपहुना राज्यपाल अनुसुईया उइके होही अउ मुख्यमंत्री भूपेश बघेल समारोह के अगुवई करही।
ए बेरा म एक नवंबर के संस्कृति विभाग कोति ले एसो आने-आने आठ ठिन विधा के विभूति मन ल छत्तीसगढ़ राज्य अलंकरण सम्मान दे जाही।
अमृत महोत्सव-चित्र प्रदर्शनी
आजादी के अमृत महोत्सव म प्रादेशिक लोकसंपर्क कार्यालय-आरओबी रईपुर कोति ले आज ले भिलाई के नेहरू आर्ट गैलेरी म चित्र प्रदर्शनी लगाय गेहे। बीएसपी के प्रभारी निदेशक अनिर्बान दास गुप्ता तीन दिवसीय ए प्रदर्शनी के सुभारंभ करीन। ए प्रदर्सनी ले आम लोगन ल स्वतंत्रता संग्राम सेनानी मनके संबंध म जानकारी दे जावत हे। ए बेरा म समाज सेवी अउ पर्यावरण विद डॉक्टर विश्वनाथ प्राणीग्रही अउ पीआईबी-आरओबी रईपुर के अपर महानिदेशक अभिषेक दयाल मौजूद रिहीन।
विष्णुदेव साय-पत्र
भारतीय जनता पार्टी के प्रदेश अध्यक्ष विष्णुदेव साय ह कांग्रेस के राष्ट्रीय अध्यक्ष सोनिया गांधी ल चिट्ठी लिखके के किहीन कि छत्तीसगढ़ म बाढ़त अपराध के सेती कानून बेवस्था बिगड़त जात हे। उहें, कांग्रेस अउ राज्य सरकार के ढाई-ढाई बछर के मुद्दा ल लेके प्रदेस म सत्ता संघर्ष होवत हे। श्री साय ह किहीन कि छत्तीसगढ़ सांति प्रिय प्रदेस हवय। सबो सद्भाव के संग जुलमुल के काम करथे, फेर कांग्रेस अउ राज्य सरकार म सत्ता के जउन होड़ मचे हे ओखर ले बिकास काम म समस्या आवत हे। जन कल्याण अउ विकास के काम ठप्प पड़े हे। पार्टी के सदस्य आने-आन गुट म बंटके सक्ती प्रदर्शन करत हे। ए दिसा म सकारात्मक अउ निर्णायक कदम उठाय जाना चाही।
इही बीच, रईपुर दउरा म आय मध्यप्रदेश के पूर्व मुख्यमंत्री दिग्विजय सिंह ह भाजपा के प्रदेश अध्यक्ष विष्णुदेव साय के चिट्ठी म निसाना साधत किहीन कि छत्तीसगढ़ के कांग्रेस सरकार बने काम करत हे।
छठ पूजा-स्पेशल ट्रेन
यात्री मनके सुभीता ल धियान म राखत रेलवे ह छठ पूजा बर दुरूग अउ पटना के बीच दू अतिरिक्त स्पेशल ट्रेन सुरू करे के फइसला लेहे। ए गाड़ी दुरूग ले दू अउ छह नवंबर के अउ पटना ले तीन अउ सात नवंबर के चलही। ए स्पेशल ट्रेन म दू एस.एल.आर. तीन सामान्य, नौ स्लीपर, एक-एसी-टू, चार एसी-थ्री समेत बीस कोच रइही। ए गाड़ी पूरा आरक्षित हे अउ कंन्फर्म टिकिट होय म ही यात्री मन ल आय-जाय के मंजूरी मिलही।
दलहन/रबी फसल बोआई
राज्य म दलहन फसल के बोआई सुरू होगे हे। अब तक ग्यारह हजार चार सौ पचास हेक्टेयर रकबा म दलहन फलस के बोआई होय हे। एसो राज्य म आठ लाख बीस हजार हेक्टेयर क्षेत्र म दलहन फसल बोये के लक्ष्य हवय, जउन पाछु बछर ले अड़सठ हजार हेक्टेयर जादा हे। पाछु साल सात लाख बावन हजार हेक्टेयर म दलहन फसल लगाय गे रिहीस।
उहें, प्रदेस म रबी फसल के बोआई के काम चलत हे। अभी तक करीबन बीस हजार हेक्टेयर रकबा म बोआई होय हे, जेमा दलहन फसल के रकबा जादा हवय। कृषि विभाग कोति ले एसो राज्य म अट्ठारह लाख पचास हजार हेक्टेयर क्षेत्र म बोय के लक्ष्य तय करे गेहे।
अउ अब थोरकुन समाचार सार म –
– धमतरी के कलेक्ट्रेट परिसर म ‘‘पुरखा के सुरता‘‘ बिसय म स्वतंत्रता संग्राम सेनानी मन ले जुड़े तीन दिवसीय फोटो प्रदर्शनी लगाय गेहे।
– जांजगीर-चांपा जिला के जेल म बंद एक कैदी के नाव ले पावर ऑफ अटर्नी बनाके करोड़ों के भूईंया बेचे के मामला म पुलिस ह एक गिरोह के पांच झिन सदस्य ल गिरफ्तार करे हे। पुलिस ह उंखर तीर ले फर्जी सील अउ आने दस्तावेज घलो जब्त करे रिहीन।
– कोंडगांव कलेक्टर पुष्पेन्द्र मीणा ह जिला म धान उठाव के स्थिति अउ धान उपार्जन के संबंध म राईस मिल प्रबंधक मन ले गोठबात करीन। ए बेरा म धान उठाव के काम म तेजी लाय बर घलो किहीन।
– जांजगीर-चांपा जिला म कृषक चेतना मंच के किसान मन अपन आने-आने मांग ल लेके तीस अक्टूबर के धरना-प्रदर्शन करही।
अउ
– राजनांदगांव पुलिस ह जिला के तिलई गांव म एक घर म दबिश देके बड़ मात्रा म पटाखा बरामद करे हे। पुलिस के मुताबिक इहां अवैध रूप ले पटाखा के भंडारण करे जात रिहीस। जब्त करे गे पटाखा के कीमत करीबन सवा लाख रूपिया बताय गेहे।