सतर्कता जागरूकता सप्ताह
देशभर सतर्कता जागरूकता सप्ताह मनाय जात हे। केन्द्रीय सतर्कता आयुक्त सुरेश पटेल ह आज सतर्कता आयोग के अधिकारी अउ कर्मचारी मन ल सत्य-निष्ठा के शपथ देवइन। शपथ म किहीन कि देश के आर्थिक, राजनीतिक अउ सामाजिक प्रगति म भ्रष्टाचार एक सबले बड़े बाधा आय। श्री पटेल ह शपथ देवात हुए किहीन कि सरकारी कर्मचारी, नागरिक अउ निजी क्षेत्र के सबो हितधारक मन ल भ्रष्टाचार ल खतम करे बर मिलके काम करे बर पड़ही।
छत्तीसगढ़ म आज शासकीय कार्यालय मन म अधिकारी अउ कर्मचारी मन ह ईमानदारी अउ सत्य-निष्ठा के शपथ लीन।
आयुष्मान भारत स्वस्थ और अवसंरचना मिशन
केन्द्रीय स्वास्थ्य मंत्री मनसुख मांडविया ह किहीन कि ‘‘प्रधानमंत्री आयुष्मान भारत स्वास्थ्य अउ अवसंरचना मिशन‘‘ ले अवइया बेरा म वैश्विक महामारी जइसे स्थिति ले निपटे म सहयोग मिलही। ओमन किहीन कि कोविड-19 ह देश म स्वास्थ्य के बुनियादी ढांचा म सुधार के अवसर देहे अउ सरकार ह 64 हजार करोड़ रूपिया के निवेश के संग प्रधानमंत्री आयुष्मान भारत स्वास्थ्य अउ अवसंरचना मिशन सुरू करे हे। श्री मांडविया ह किहीन कि कैंसर अउ मधुमेह जइसे बीमारी के इलाज अउ प्राथमिक स्तर म उपचार बर सरकार ह डेढ़ लाख स्वास्थ्य अउ आरोग्य केन्द्र स्थापित करे के फइसला लेहे। देश म अइसे लगभग उनयासी हजार केन्द्र सुरू होग हे।
राज्यपाल-कर्मयोगिनी सम्मान कार्यक्रम
राज्यपाल अनुसुईया उइके काली कर्मयोगिनी सम्मान कार्यक्रम शामिल होईन। ए मउका म ओमन किहीन कि छत्तीसगढ़ के बेटी मनके उपलब्धि मन उपर सबो झन ल गर्व हे। इहां के बेटी मन कला, साहित्य, विज्ञान, खेलकूद, पत्रकारिता, प्रशासन, हर क्षेत्र म परचम लहरात हे। अपन परिवार के संग प्रदेश के नाव रोशन करत हे। ओमन कभू कोन्हों भी चुनौत ले नइ घबराय अउ सरलग आगू बाढ़ते राहय। ए कार्यक्रम ‘‘बेटी बचाओ-बेटी पढ़ाओ‘‘ संस्था डहार ले आयोजित करे गे रिहीस।
वर्ल्ड बैंक-पाटन दौरा
लइका मनके पोषण के बारे म फीडबैक ले बर आज वर्ल्ड बैंक के टीम ह दुर्ग जिला के पाटन विकासखंड के ग्राम कसही के दौरा करीस। विश्व बैंक के टीम ह सुपोषण अभियान के अध्ययन करे बर दू राज्य ल चुने हे, जेमा एक छत्तीसगढ़ अउ दूसर गुजरात हे।
कसही गांव म टीम के सदस्य मन ह लइका, आंगनबाड़ी कार्यकता अउ गर्भवती महिला मन ल चर्चा करीन। संगेसंग आंगनबाड़ी म स्थापित सुपोषण वाटिका घलो देखीन।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – राष्ट्रगीत वंदे मातरम् कोन प्रसिद्ध उन्यास के अंश हरय।
सुनइया मन अपन उत्तर वाट्सअप नंबर आठ आठ दो छै पांच चार छै दो छै या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई प्रमाण-पत्र अउ सांकेतिक पुरस्कार दे जाही।
लोकवाणी
मुख्यमंत्री भूपेश बघेल ह लोकवाणी म ए दारी ‘‘उद्यमिता और जन सशक्तिकरण का छत्तीसगढ़ मॉडल‘‘ विषय उपर गोठबात करही। ए बारे म कोनो भी मनखे आकाशवाणी रायपुर के दूरभाष नंबर 0 7 7 1 – 2 4 3 0 5 0 1, 5 0 2 अउ 5 0 3 म 27 ले 29 अक्टूबर तक मंझनियां 3 ले 4 बजे के बीच फोन करके अपन सवाल रिकार्ड करा सकत हे।
मुख्यमंत्री के मासिक रेडियो वार्ता लोकवाणी के तेइसवां कड़ी के प्रसारण 14 नवंबर के होही। एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले करे जाही।
हाथी रेडियो कॉलर
प्रदेश म हाथी-मानव द्वंद उपर नियंत्रण अउ हाथी मनके विचरण के जानकारी बर वन अउ जलवायु परिवर्तन विभाग अउ भारतीय वन्यजीव संस्थान देहरादून के संयुक्त परियोजना के अंतर्गत हाथी मनके रेडियो कॉलिंग करे जात हे। अभियान के तहत काली सूरजपुर वनमंडल के मोहनपुर म एक मादा हाथी ल सफलतापूर्वक रेडियो कॉलर लगाय गीस। रेडियो कॉलरिंग करे गे ए हाथी ल ‘‘मैत्री‘‘ नाम दे गेहे।
राज्य म ए समय विचरण करइया हाथी मनके अनुमानित संख्या 291 हे, जेमा सूरजपुर वन वृत्त के अंतर्गत 193, बिलासपुर वन वृत्त के अंतर्गत उनहत्तर(69), दुर्ग वन वृत्त के अंतर्गत 22 अउ रायपुर वन वृत्त के अंतर्गत 7 हाथी सामिल हे।
कोंडानार हस्तशिल्प महोत्सव
शिल्प नगरी कोंडागांव म शिल्पकार मन ल प्रोत्साहित करे बर जिला प्रशासन डहार ले पंखुड़ी सेवा समिति के सहयोग ले हाल ही म ‘‘कोंडानार हस्तशिल्प महोत्सव‘‘ के आयोजन करे गेहे। ए अवसर म उद्योग मंत्री अउ जिला के प्रभारी मंत्री कवासी लखमा ह घलो सामिल होईन। ओमन ह शिल्पकार मनके लगाय गे प्रदर्शनी के अवलोकन करीन अउ स्थानीय शिल्पकार मन ले मुलाकात करके प्रोत्साहित करीन। कार्यक्रम के बेरा स्कूली लइका अउ स्थानीय कलाकार मन ह लोकगीत म पारंपरिक जनजातीय नृत्य प्रस्तुत करीन।
मौसम
प्रदेश म काली ले तापमान म कमी आय के संग ठंड बाढ़े के संभावना हे। मौसम विभाग के अनुसार देश के सबो भाग ले दक्षिण-पश्चिम मानसून के विदाई होगे हे। छत्तीसगढ़ म काली ले उत्तर दिशा ले हवा आय के सुरू हो जही। उत्तर ले शुष्क अउ ठंडा हवा आय के सेती प्रदेश म न्यूनतम तापमान म गिरावट होय के संभावना हे। संगेसंग अब बिहनिया कोहरा बने रेहे के संभावना जताय जात हे।
रबी फसल बोआई
राज्य म रबी फसल के बोआई सुरू होगे हे। अब तक 20 हजार हेक्टेयर क्षेत्र म रबी फसल के बोआई करे जा चुके हे, जेमा दलहनी फसल के रकबा सबले ज्यादा हे। कृषि विभाग डहार ले ए बछर राज्य म 18 लाख 5 हजार हेक्टेयर क्षेत्र म रबी फसल के बोआई के लक्ष्य राखे गेहे।
उहें, कृषि विभाग अउ छत्तीसगढ़ राज्य बीज अउ कृषि विकास निगम डहार ले राज्य म रबी फसल के बीजा के भंडारण सहकारी समिति मन म करे जात हे। सहकारी समिति, कृषि विभाग, बीज उत्पादन कार्यक्रम अउ निजी क्षेत्र म रबी के अलग-अलग फसल के 27 हजार 610 क्विंटल बीजा उपलब्ध हे। किसान मन ह अब तक 2 हजार ले ज्यादा बीजा के उठाव कर डरे हे, जउन भंडारित बीजा के लगभग 8 प्रतिशत हरय।